Jehova Ki Mulimu Ya Itebuha
Jehova Ki Mulimu Ya Itebuha
“Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.”—MAHEBERU 6:10.
1. Jehova na bonisize cwañi buitebuho bwa hae ku Ruti wa Mumoabi?
JEHOVA u itebuha hahulu buikatazo bo ba eza batu ba ba bata luli ku eza tato ya hae, mi wa ba kapwekanga mipuzo. (Maheberu 11:6) Munna ya sepahala Boazi na ziba hande kuli Mulimu wa fanga mupuzo, kakuli na bulelezi Ruti wa Mumoabi, ya na babalezi hande mukwenyan’a hae wa mbelwa kuli: “[Muñ’a] Bupilo a ku fe mupuzo kwa musebezi wa hao, mi ibe mupuzo o tezi.” (Ruti 2:12) Kana Ruti na fuyauzwi ki Mulimu? Na fuyauzwi luli! Esi mane likande la hae li ñozwi ni mwa Bibele! Mi fahalimu a seo, na nyezwi ki Boazi mi a ba kukululu wa Mulena Davida ni wa Jesu Kreste. (Ruti 4:13, 17; Mateu 1:5, 6, 16) Wo ki o muñwi fela wa mitala ye miñata ye mwa Bibele ye bonisa kuli Jehova wa itebuha batanga ba hae.
2, 3. (a) Kiñi ze komokisa hahulu ka za buitebuho bwa Jehova. (b) Ki kabakalañi Jehova ha kona ku bonisa buitebuho bwa niti? Mu fe mutala.
2 Neikaba ku sa luka kwa neku la Jehova ha na si ke a itebuha. Maheberu 6:10 i li: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae, mwa sebelezo ya ku tusa balumeli, ili ye mu nze mu ba sebeleza ni ka nako ye.” Se si komokisa hahulu ka za yona taba ye kikuli Jehova u bonisanga buitebuho kwa batu ba ba sepahala nihaike kuli ki baezalibi mi ba kauhezwi kwa kanya ya hae.—Maroma 3:23.
3 Kabakala kuli ha lu si ka petahala, lu kana lwa ikutwa kuli misebezi ya luna ku Mulimu ki ye minyinyani hahulu mi Mulimu ha koni ku lu fuyaulela misebezi ye cwalo. Kono Jehova wa ziba hande milelo ni miinelo ya luna, mi unga ka butokwa hahulu sebelezo ya luna ya ka pilu kaufela. (Mateu 22:37) Lu nge kuli me u fumana mpo ya sifaha se si cipile fa tafule ya hae. U kana a nga kuli mpo yeo ha i na tuso mi wa kona ku ikasheza kwatuko. Kono kadi ye kwatuko a mpo yeo i bonisa kuli i zwa kwa kana ka hae ka kasizana, mi ka lekile sifaha seo ka pene ya kona kaufela ye ne ka bulukanga. Ka ku lemuha seo me yo cwale u bona kuli mpo yeo ki ya butokwa. Mwendi ka ku enga-enga miyoko, u kumbata kana ka hae kao mi wa itebuha hahulu ku kona.
4, 5. Jesu na likanyisize cwañi Jehova ka ku bonisa buitebuho?
4 Ka ku ziba hande milelo ni mapalelwi a luna, Jehova wa itebuhanga ha lu mu fa ze nde ka ku fitisisa, ibe kuli ki ze nyinyani kamba ze ñata. Jesu na bonisize luli maikuto a Jehova mwa taba ye. Mu nahane za likande la mwa Bibele la za mponyana ya musali wa mbelwa. “Jesu ha nz’a talima, a bona baluwi ba ba beya linubu za bona mwa pulukelo ya Tempele. A bona ni musali wa mbelwa, ya shebile, a beya mwateñi tuhafu to tubeli twa penny. Kih’a li: Kaniti ni li ku mina, musali yo wa mbelwa, ya shebile, u zwisize ku fita ba bañwi kaufela. Kakuli bao kaufela ha ba zwisize linubu, ba ngile ku ze ba sa tokwi; kanti yena u file ku za bubotana bwa hae, s’a n’a ka pila ka sona kaufela.”—Luka 21:1-4.
5 Ka ku ziba miinelo ya musali yo—kuli ne li mbelwa mi na shebile—Jesu na utwisisize butokwa luli bwa mpo ya hae, mi a itebuha hahulu yona. Ni Jehova kona mwa ngela lika cwalo. (Joani 14:9) Kana ha ku susuezi ku ziba kuli ku si na taba ni miinelo ya mina, mwa kona ku shemubiwa ki Mulimu wa luna ya itebuha ni Mwan’a hae?
Jehova U Fuyaula Muetopia Ya Utwa Mulimu
6, 7. Ki kabakalañi Jehova ha na bonisize buitebuho bwa hae ku Ebedi-Meleki, mi na ezize cwañi cwalo?
6 Taba ya kuli Jehova wa fuyaulanga ba ba eza tato ya hae i bonisizwe ka ku kuta-kutela mwa Mañolo. Ha mu nyakisise mwa na ezelize Ebedi-Meleki wa Muetopia ya na utwa Mulimu, ya na pilile mwa miteñi ya Jeremia ni ya na li sikombwa mwa ndu ya Mulena Zedekia wa Juda ya na sa sepahali. Ebedi-Meleki a utwa kuli manduna ba Juda ka mafosisa ba limbile mupolofita Jeremia mulatu wa ku lwanisa mulonga, mi kacwalo ba mu nepezi mwa lisima kuli a bulaiwe ki tala. (Jeremia 38:1-7) Ka ku ziba kuli Jeremia na toilwe hahulu bakeñisa lushango lwa na shaela, Ebedi-Meleki a beya bupilo bwa hae mwa kozi mi a fitisa kupo ku mulena. Muetopia yo a bulela ka bundume kuli: “Mawe mulena muñ’a ka! Batu bao ba fosize ha ba ezize mupolofita Jeremia cwalo, ba mu latezi mwa musima, s’a ka shwela mw’a inzi.” Ka ku laelwa ki mulena, Ebedi-Meleki a nga banna ba 30 mi a yo yangwela mupolofita wa Mulimu.—Jeremia 38:8-13.
7 Jehova na boni kuli Ebedi-Meleki na na ni tumelo, ili ye ne mu konisize ku koma sabo ya na kana a ikutwile. Kacwalo Jehova na bonisize buitebuho bwa hae mi ka Jeremia a bulelela Ebedi-Meleki kuli: “Bona! Ni se ni y’o tisa fahalimu a munzi mifumbo ye ni bulezi, ya bumaswe isi ya bunde . . . Kono ni ka ku lamulela ka lizazi leo, . . . ha u na ku fiwa mwa mazoho a batu b’o saba. Luli ni ka ku lamulela . . . , mi bupilo bwa hao i ka ba mbuya ya hao; kakuli u kile wa sepa Na.” (Jeremia 39:16-18) Ka niti, Jehova na lamulezi Ebedi-Meleki, hamoho ni Jeremia, kwa manduna ba Juda ba ba maswe mi hamulaho na ba lamulezi ni kwa Mababilona, ba ne ba tubakile Jerusalema. Samu 97:10 i li: “[Jehova] u sileleza moya wa ba ba kenile ba hae, u ba lamulela mwa mazoho a ba ba maswe.”
‘Ndat’a Mina Ya Bona kwa Mukunda, U ka mi Kutiseza’
8, 9. Sina mwa na boniselize Jesu, ki litapelo ze cwañi za itebuha Jehova?
8 Bupaki bo buñwi bwa kuli Jehova wa itebuha mi u nga ka butokwa ze lu mu ezeza bu kona ku bonwa ku se i bulela Bibele ka za tapelo. Munna ya butali na ize: “[Mulimu] u tabela tapelo ya ya na ni niti.” (Liproverbia 15:8) Mwa miteñi ya Jesu buñata bwa baeteleli ba bulapeli ne ba lapelanga fa nyangela, isi ka libaka la kuli ne ba tabela luli za Mulimu, kono ka takazo ya ku tabisa batu. Jesu na bulezi kuli: “Ba se ba ngile mupuzo wa bona.” Mi a laela balateleli ba hae kuli: “Kono wena ha u lapela, kena mwa muzuzu, mi ha u kwalile sikwalo, u lapele Ndat’aho ya kwa mukunda; mi ndat’aho ya bona kwa mukunda, u ka ku kutiseza.”—Mateu 6:5, 6.
9 Jesu fa na sa nyazi tapelo ya fa nyangela, kakuli ni yena ka sibili na lapezi fa nyangela fokuñwi. (Luka 9:16) Jehova u itebuha hahulu ha lu lapela ku yena ku zwelela kwa pilu, lu si na mulelo wa ku iponahalisa ku ba bañwi. Mane litapelo za luna za kwa mukunda li bonisa hande lilato la luna le lituna ku Mulimu ni kuli lu mu sepile. Kacwalo, ha ku komokisa kuli Jesu hañata na ya nga kwa libaka ze kwa mukunda ku yo lapela. Nako ye ñwi na ezize cwalo “isali malungasiku.” Ka nako ye ñwi, “a kambamela fa lilundu ku y’o lapela kwatuko.” Mi pili a si ka keta kale baapositola ba hae ba 12, Jesu na tozi busihu kaufela a nosi inge a lapela.—Mareka 1:35; Mateu 14:23; Luka 6:12, 13.
10. Litapelo za luna ha li ka bonisa busepahali ni takazo ye zwelela kwa pilu, lu ka kolwa ka za nto mañi?
10 Mu nahane fela ka mo Jehova na teelelize hande kwa maikuto a Mwan’a hae a zwelela kwa pilu! Kaniti ka linako ze ñwi Jesu na lapezi “ka muhuwo o mutuna, ni ka miyoko . . . mi a utwiwa kabakala bulapeli bwa hae.” (Maheberu 5:7; Luka 22:41-44) Litapelo za luna ha li ka bonisa busepahali ni takazo ye zwelela kwa pilu cwalo, lwa kona ku kolwa kuli Ndat’a luna wa kwa lihalimu wa teeleza hande mi wa itebuha. Kaniti, “[Muñ’a] Bupilo u fakaufi ni ba ba mu lapela kaufela . . . ka ku eza niti.”—Samu 145:18.
11. Jehova u ikutwa cwañi ka ze lu eza kwa mukunda?
11 Haiba Jehova wa itebuha ha lu lapela ku yena kwa mukunda, u zibe u ka itebuha hahulu ni ku fita haiba lu mu utwa kwa mukunda! Mane Jehova wa ziba hande ze lu eza kwa mukunda. (1 Pitrosi 3:12) Kaniti, ha lu sepahala ni ku ipeya ku utwa ha lu li kwa mukunda lu bonisa hande kuli lu sebeleza Jehova ‘ka pilu kaufela,’ fo kikuli, pilu ye na ni mulelo o munde ni ye kumalela ze lukile. (1 Makolonika 28:9) Muzamao o cwalo wa tabisa pilu ya Jehova luli!—Liproverbia 27:11; 1 Joani 3:22.
12, 13. Lu kona ku sileleza cwañi munahano ni pilu ya luna ni ku ba sina mulutiwa ya sepahala Natanaele?
12 Kabakalelo Bakreste ba ba sepahala ba ambuka libi za kwa mukunda ze kona ku silafaza munahano ni pilu, ze cwale ka ku buha maswaniso a mapunu ni a mifilifili. Nihaike kuli libi ze ñwi za kona ku patelwa batu, lu lemuha kuli “lika kaufela li inzi fande, mi li atami, mwa meto a hae Yena ye lu na ni ku ikalabela ku Yena.” (Maheberu 4:13; Luka 8:17) Ka ku satalala ku ambuka lika ze sa tabisi Jehova, lu ba ni lizwalo le linde mi lwa nyakalala ka ku ziba kuli Mulimu wa lu katelwa. Ha ku na kakanyo ni ye kana ya kuli Jehova wa itebuha luli mutu “ya na ni mizamao ye lukile, mi a eza ka ku sepahala, a bulela niti mo i li teñi mwa pilu ya hae.”—Samu 15:1, 2.
13 Konohe lu kona ku sileleza cwañi munahano ni pilu ya luna mwa lifasi le li tezi bumaswe? (Liproverbia 4:23; Maefese 2:2) Kwand’a ku itusisa fela ka ku tala lika za kwa moya za lu fa Jehova kuli li lu tiise, lu swanela ku lika ka tata ku hana ze maswe ni ku eza ze lukile, ku nga muhato ka bubebe kuli litakazo ze maswe li si ke za hula ni ku tahisa sibi. (Jakobo 1:14, 15) Mu nahane fela mo ne mu ka tabela Jesu ha na ka bulela za mina sina mwa na bulelezi ka za Natanaele kuli: “A mu bone [mutu] wa niti, ye ku si na bupumi ku yena!” (Joani 1:47) Natanaele, ya na bizwa hape kuli Bartolome, hamulaho na bile ni tohonolo ya ku ba yo muñwi wa baapositola ba 12 ba Jesu.—Mareka 3:16-19.
“Muprisita yo Mutuna ya Lu Utwela Butuku ni ya Sepahala”
14. Jesu na ngile cwañi kezo ya Maria ka ku shutana ni ba bañwi?
14 Ka ku ba “siswaniso sa Mulimu Ya sa bonwi,” Jehova, Jesu kamita u likanyisa Ndat’ahe ka ku tala ka ku itebuha ba ba sebeleza Mulimu ka pilu ye twekile. (Makolose 1:15) Ka mutala, mazazi a ketalizoho pili a si ka itombola kale bupilo bwa hae, Jesu ni ba bañwi ba balutiwa ba hae ne ba li mwa ndu ya Simoni wa kwa Betania. Ka nako ya manzibwana, Maria, kaizel’a bo Lazaro ni Mareta, a “nga mafula a sende a’ likana pondo ya bukiti, a’ leka mali a mañata” (a bat’o likana tuwelo ya silimo mutumbi) mi a toza Jesu kwa toho ni kwa mahutu. (Joani 12:1-3) Ba bañwi ba li: “Ki yañi sinyehelo yeo?” Kono Jesu na si ka nga kuli kezo ya na ezize Maria ne li sinyehelo. Na i ngile kuli ne li kezo ya bufani bo butuna ni ye na ni taluso ya butokwa ka za lifu ni ku bulukiwa kwa hae ze ne atumezi. Kacwalo ku fita ku nyaza Maria, Jesu a mu babaza. Na ize: “Kai ni kai mo i ka bulelwa Evangeli yeo, mwa lifasi kamukana, ku ka bulelwa ni se si ezizwe ki yena, ibe s’a ka hupulwa ka sona.”—Mateu 26:6-13.
15, 16. Lu tusiwa cwañi ka taba ya kuli Jesu na pilile ni ku sebeleza Mulimu sina mutu?
15 Lu na ni tohonolo luli ka ku ba ni Mueteleli ya itebuha cwalo yena Jesu! Mane bupilo bwa na pilile Jesu sina mutu ne bu mu lutile ku itukiseza musebezi wa na mu tomezi Jehova, ona wa ku sebeza sina Muprisita yo Mutuna ni Mulena, pili ku sebeleza puteho ya ba ba tozizwe mi hamulaho ni batu kaufela.—Makolose 1:13; Maheberu 7:26; Sinulo 11:15.
16 Niha na si ka taha kale fa lifasi, Jesu na tabela ni ku wabelelwa hahulu batu. (Liproverbia 8:31) Ka ku pila sina mutu, na konile ku fita fa ku ziba hande litiko ze lu kopana ni zona ha lu nze lu sebeleza Mulimu. Muapositola Paulusi na ñozi kuli: “Neli swanelo kuli [Jesu] a eziwe ya swana mwa litaba kaufela sina banyani ba hae, kuli a be muprisita yo mutuna ya lu utwela butuku ni ya sepahala . . . Kakuli sina ha n’a likilwe ka butuku bw’a utwile, u kona ku tusa ba ba likwa.” Jesu wa kona “ku lu utwela butuku mwa mifokolo ya luna” bakeñisa kuli “n’a likilwe mwa litaba kaufela, sina luna, a sa weli mwa sibi.”—Maheberu 2:17, 18; 4:15, 16.
17, 18. (a) Mañolo a kwa liputeho ze 7 za mwa Asia Minor a bonisañi ka za buitebuho bo butuna bwa Jesu? (b) Ki musebezi mañi o ne ba bakanyezwa Bakreste ba ba tozizwe?
17 Jesu na bonisize kuli na utwisisa hande hahulu litiko za balateleli ba hae ha sa zusizwe kwa bafu. Mu nyakisise mañolo a hae kwa liputeho ze 7 za mwa Asia Minor, ka mo ne a ñolezwi ki muapositola Joani. Kwa puteho ya Smirna, Jesu na ize: “Ni ziba ñalelwa ya hao, ni bubotana bwa hao.” Sa na bulela luli Jesu fa kikuli, ‘Na utwisisa hande butata bwa hao; na ziba hande ze u kopana ni zona.’ Cwale bakeñisa kuli ni yena na nyandile ku isa kwa lifu, Jesu ka mufelañeke ni ka mata a matuna na ekelize ka ku bulela kuli: “U sepahale ku isa kwa lifu, mi ni ka ku fa kuwani ya bulena ya bupilo.”—Sinulo 2:8-10.
18 Mañolo a na ñolezwi liputeho ze 7 a tezi lipulelo ze bonisa kuli Jesu na ziba hande litiko ze ne ba kopana ni zona balutiwa ba hae mi na bonisa ni buitebuho bwa hae luli kwa busepahali bwa bona. (Sinulo 2:1–3:22) Mu si libali kuli Jesu na bulela kwa Bakreste ba ba tozizwe ba ne ba na ni sepo ya ku busa ni yena kwa lihalimu. Ka ku likanyisa Mulena bona, ne ba bakanyezwa musebezi wa bona o mutuna wa ku tusa kwa ku fa lituso za sitabelo sa tiululo sa Kreste kwa batu ka mufelañeke o mutuna.—Sinulo 5:9, 10; 22:1-5.
19, 20. Ba “buñata bo butuna” ba bonisa cwañi buitebuho bwa bona ku Jehova ni ku Mwan’a hae?
19 Mane lilato la Jesu kwa balateleli ba hae ba ba tozizwe hape li boniswa ni kwa “lingu ze ñwi” ze sepahala, bao bolule-lule ba ku bona cwale ba eza ‘buñata bo butuna bwa batu ba ba zwa mwa macaba kaufela,’ ba ba ka punyuha “ñalelwa ye tuna” ye taha. (Joani 10:16; Sinulo 7:9, 14) Bona ba kungushukela kwa lineku la Jesu bakeñisa kuli ba itebuha sitabelo sa hae sa tiululo ni sepo ya bona ya bupilo bo bu sa feli. Ba bonisa cwañi buitebuho bwa bona? Ba eza cwalo ka ku “sebeleza [Mulimu] musihali ni busihu mwa Tempele ya hae.”—Sinulo 7:15-17.
20 Piho ya mwa lifasi kaufela ya silimo sa sebelezo sa 2006, ye bonisizwe fa makepe 27 ku isa 30, i bonisa hande kuli zona likombwa ze sepahala ze kaniti li sebeleza Jehova “musihali ni busihu.” Mane, mwa silimo seo sa 2006, bona hamohocwalo ni palonyana ya bomasiyaleti ba Bakreste ba ba tozizwe ne ba konile ku tanda lihora ze 1,333,966,199 mwa bukombwa bwa fa nyangela—ili nako ye fitelela lilimo ze 150,000!
Mu Zwelepili ku Itebuha!
21, 22. (a) Ka za ku itebuha, ki kabakalañi Bakreste ha ba lukela ku tokomela sihulu kacenu? (b) Ki lika mañi ze ka nyakisiswa mwa taba ye tatama?
21 Ha ne ba sebelisani ni batu ba ba si ka petahala, Jehova ni Mwan’a hae ne ba bonisize ku itebuha ko ku tuna ili ko ku komokisa luli. Nihakulicwalo, ka bumai buñata bwa batu ha ba na taba ni Mulimu, kono ba isa pilu kwa lika za bona. Paulusi ha na talusa batu ba ba pila “mwa mazazi a maungulelo,” na ñozi kuli: “Batu ba ka ba baitati, ba ba lata mali . . . ba ba si na buitumelo.” (2 Timotea 3:1-5) Batu ba ba cwalo ba shutana hahulu ni Bakreste ba niti, ili bao ka tapelo ye zwelela kwa pilu, ka ku itatela ku utwa, ni ka ku sebeza ka pilu kaufela ba bonisa kuli ba itebuha za ba ezelize Mulimu kaufela!—Samu 62:8; Mareka 12:30; 1 Joani 5:3.
22 Mwa taba ye tatama, lu ka buhisana ze ñwi za litukiso ze ñata za kwa moya za lu file Jehova ka lilato. Ha lu nze lu nahana zona ‘limpo ze nde’ ze, haike lu itebuhe hahulu ni ku fita.—Jakobo 1:17.
Ne Mu Ka Alaba Cwañi?
• Jehova u bonisize cwañi kuli ki Mulimu ya itebuha?
• Ha lu li kwa mukunda, lu kona ku tabisa cwañi pilu ya Jehova?
• Jesu na bonisize cwañi buitebuho?
• Ku pila sina mutu ne ku tusize cwañi Jesu kuli a be mubusi ya na ni mufelañeke ni ya itebuha?
[Lipuzo za Tuto]
[Siswaniso se si fa likepe 17]
Sina mushemi ha tabela mpo ye cipile ya kana ka hae, Jehova wa itebuhanga ha lu mu fa ze nde ka ku fitisisa