Kana Lu Libelela Fela Kuli Ba Bañwi Ba Lu Bulelelange Niti?

M USIZANA yo muñwi wa lilimo ze 16 n’a ize: “Ni toile buhata, mi ni toile ku pumiwa!” Buñata bwa luna lu ikutwanga cwalo. Lu ikutwanga hande ba bañwi ha ba lu bulelela litaba za niti, ibe za mwa mulomo kamba ze ñozwi. Kono kana luna lwa bulelanga niti ha lu taluseza ba bañwi litaba?

Mwa patisiso ye ñwi ye ne ezizwe kwa Germany, buñata bwa batu ba ne ba buzizwe ne ba ikutwile kuli “ha ku si ka fosahala ku bulela buhata mwa litaba ze nyinyani ilikuli mutu a isileleze kwa kozi kamba ku sileleza ba bañwi, mi mane ku bulela buhata mwa litaba ze nyinyani kwa tokwahala kuli batu ba pilisane hande.” Mi mubihi wa makande yo muñwi n’a ñozi kuli: “Ku bulelanga fela niti bo busile ki ko kunde kono hape kwa nyikwisa.”

Esi mwendi lu tabela fela kuli ba bañwi ba lu bulelelange niti kono luna inge lu ikutwa ku ba ni mabaka luli a ku sa bulela niti fokuñwi? Kana ki kwa butokwa ku ziba kuli lu bulela niti kamba kutokwa? Ki lifi ze zwa mwa ku sa bulela niti?

Bumaswe Bwa Ku Sa Bulela Niti

Mu nyakisise bumaswe bo bu kona ku tiswa ki ku sa bulela niti. Ku bulela buhata ku tahisa kuli bosinyalana ni ba mwa lubasi ba si ke ba sepana. Lusebo lo lu maswe lu kona ku sinya libubo le linde la mutu. Babeleki ha ba bulela buhata ba kona ku tisa kuli pisinisi i we ni kuli lika li tule hahulu. Bupumi bwa ku sa fitisa mali a mitelo bu tisa kuli milonga i palelwe ku ba ni pene ya ku itusisa kwa ku eza misebezi ya ku tusa nyangela. Bukabemba mu-ca-habeli bwa babatisisi ba litaba bu tiseza kuli ba sinyehelwe ki misebezi ya bona ye minde ni ku sinya mabizo a mande a likopano ze kutekeha ko ba sebeza. Milelo ya ku bata ku fuma kapili ka bupumi i tiseza kuli bafumi ba ba si na butali ba latehelwe ki mali a bona kaufela e ba bulukisize kwa panga kamba ku sinyehelwa ki lika ze tuna hahulu. Kona libaka Bibele ha i lu taluseza kuli kwa lika za toile Jehova Mulimu, ku na ni “lilimi le li puma” ni “paki ya buhata, ye bulela lishano”!—Liproverbia 6:16-19.

Buhata bo bu ile kabubo bu kona ku tisa butata kwa batu ba sikai mane nihaiba kwa nyangela. Buñata bwa batu ba izibela hande taba ye. Kono cwale ki kabakalañi batu ha ba bulelanga litaba ze si za niti ka bomu? Mi kana ku bulela taba ye si ya niti kwa swana ni ku bulela buhata? Lu ka fumana likalabo za lipuzo ze ni ze ñwi mwa taba ye tatama.

[Siswaniso se si fa likepe 3]

Ku bulela buhata ku tahisa kuli bosinyalana ba si ke ba sepana