Mutala wa Busepahali

CWANOÑU fa, Mukreste yo muñwi ya bizwa Nelma, ya ipyanga ka ku ota milili mwa tolopo ya Cruzeiro do Sul, kwa Brazil, n’a ipumani mwa muinelo o no likile busepahali bwa hae. Mandu a mwa silalanda sa habo ha na sinyizwe ki munda, Nelma n’a lumezwi libyana ki musali yo muñwi ya ikotisanga milili ku yena. Ha nze a seca libyana zeo, a fumana masheleñi a likana madola a America a 1,000 mwa lipokoto za malukwe a mañwi.

Mali a n’a fumani Nelma n’a likana ni mali a n’a kona ku fumana mwa likweli ze supile, mi Nelma n’a tokwa mali luli. Ndu ya hae ne i sinyizwe ki munda, mi bondat’ahe ni banyani ba hae ne ba sinyehezwi ki libyana za bona ze ñata. Ka mali ao, n’a ka feza ku lukisisa ndu ya hae mi n’a ka siyala ni a mañwi a ku fa bahabo yena. Kono lizwalo la Nelma le li lutilwe ka Bibele ne li si ka mu lumeleza ku ipulukela mali ao.—Maheberu 13:18.

Habusa a pakelela kwa mubeleko, nako ya ku kalisa musebezi i si ka kwana kale, mi a yo lizeza musali ya n’a mu lumezi libyana zeo. Nelma a itumela ku musali y’o kwa libyana za n’a mu lumezi kono a mu taluseza kuli h’a koni ku ipulukela mali a fumani mwa libyana zeo. Musali yo n’a tabile hahulu ha n’a kutiselizwe mali a hae ao. A taluseza Nelma kuli n’a bulukile mali ao kuli ite a itusise ona kwa ku lifa babeleki ba hae. Musali yo a li: “Ki ba sikai ba ba sepahala cwana inge mina.”

Ki niti kuli ba bañwi ba kana ba ikutwa kuli ku sepahala ha ku tusi se siñwi. Kono ku sepahala ki kwa butokwa hahulu kwa batu ba ba bata ku tabisa Mulimu wa niti, Jehova. (Maefese 4:25, 28) Nelma n’a ize: “Ku ipulukela mali ani ne ku ka ni tokwisa buloko.”