Ku Ba ni Tabo Ha Lu Nze Lu Libelela Jehova

KANA mu kile mwa ca tolwana ye butala? Kaniti haiba mu kile mwa ca tolwana ye cwalo, ne mu si ka i tabela. Ku fitanga nako kuli tolwana i buzwe, mi neikaba hande ku libelela. Kono hape ku na ni miinelo ye miñwi ye swanela ku libelelwa. Bibele i li: “Se sinde ki kuli mutu a sepe mi a libelele ku pilisa kwa [Muñ’a] Bupilo, inz’a kuzize.” (Malilo 3:26; Tite 2:13) Bakreste ba kona ku libelela Jehova ka linzila lifi? Ku mu libelela ku kona ku lu tusa cwañi?

Ku Libelela Mulimu ku Talusañi?

Ka ku ba Bakreste, lu ‘libelela ni ku akufisa lizazi la Mulimu.’ Lu libelela ku imululwa ha ka ‘yundisa banyefuli.’ (2 Pitrosi 3:7, 12) Jehova u nyolelwa ku felisa bumaswe kaufela, kono wa libelela kuli a pilise Bakreste ka nzila ye ka lumbekisa libizo la hae. Bibele i li: “Mulimu h’a latile ku bonisa buhali bwa hae, ni ku lumba mata a hae, a iswala hahulu nako ye telele ka lipiza za buhali ze bupezwi ku feliswa; kuli a zibahalise bufumu bwa kanya ya hae ka lipiza za makeke.” (Maroma 9:22, 23) Sina mwa miteñi ya Nuwe, Jehova wa ziba nako ye swanela ya ku pilisa batu ba hae kacenu. (1 Pitrosi 3:20) Kacwalo ku libelela Mulimu ku kopanyeleza ku libelela nako ya hae ya ku nga muhato.

Ha lu nze lu libelela lizazi la Jehova, fokuñwi lu kana lwa zwafa ha lu bona mizamao ya lifasi ha inze i zwelapili ku sinyeha. Ha lu zwafa, ki hande ku nyakisisa manzwi a Mika mupolofita wa Mulimu, ya na ñozi kuli: “Mutu ya saba Mulimu h’a sa li yo mwa lifasi; ha ku sa na ya lukile kwa batu.” Hape a ekeza kuli: “Haili na, ni ka talima ku [Muñ’a] Bupilo, ni libelele Mulimu ya ni pilisa.” (Mika 7:2, 7) Ku ‘libelela’ ko lu swanela ku bonisa ku talusañi? Bakeñisa kuli ku libelela kwa zwafisanga hañata, lu kona ku ba cwañi ni tabo ha lu nze lu libelela Mulimu?

Ku Ba ni Tabo Ha Lu Nze Lu Libelela

Lu ituta ku libelela ku Jehova. Ha si ka tuhela ni kamuta ku ba “Mulimu ya [tabile, NW].” (1 Timotea 1:11) U tabile ha nz’a libelela kakuli u zwelapili ku sebeza kuli a taleleze mulelo wa hae wa kuli batu ba ba mu lata ba petahale sina mwa na ba bupezi pili. (Maroma 5:12; 6:23) U bona ze tabisa mwa musebezi wa hae bolule-lule ba batu ha ba nze ba taha mwa bulapeli bwa niti. Jesu n’a bulezi kuli: “Ndate wa sebeza ku fitela cwale; ni na, na sebeza.” (Joani 5:17) Ku ezeza ba bañwi lika ku tahisa tabo. (Likezo 20:35) Ka ku swana, Bakreste ba niti ha ba libeleli wa toze. Kono ba zwelapili ku sebeza ilikuli ba tuse ba bañwi kuli ba itute mulelo wa Mulimu ka za batu.

Kamita batu ba ba sepahala ba tabezi ku lumbeka Mulimu ha ba nze ba libelela nako ya ka nga muhato. Mu nyakisise mutala wa walisamu Davida. Davida n’a nyandisizwe ki mulen’a hae, n’a betekilwe ki mulikani yo mutuna, ni ku fetuhelwa ki mwan’a hae. Mwa  miinelo yeo kaufela, kuli Davida n’a ka ba ni tabo ha n’a nz’a libelela ku imululwa ka nako ya Jehova ye swanela? Samu 71, ili yeo mwendi ne i ñozwi ki Davida, i li: “Na, ni ka ba ni sepo ka nako ni nako, ni tiiseze mwa ku ku lumbeka. Mulomo wa ka u ka bulela ka mazazi ku sepahala kwa hao.” (Samu 71:14, 15) Ku fita ku libelela ka ku fela pilu, Davida n’a tabile bakeñisa kuli na patehile ku lumbeka Jehova ni ku tiisa ba bañwi ba ne ba li mwa bulapeli bwa niti.—Samu 71:23.

Ku libelela Jehova ha ku swani ni ku libelela ko ku felisa pilu kwa ku libelela mbasi ye liyehile. Kono ku swana ni ku libelela ko ku tabisa kwa bashemi ha ba nze ba libelela mwan’a bona ku fitela a hula. Kono lilimo zeo ki lilimo za ku luta, za ku laela, ni ku kalimela, ilikuli mwana a kone ku hula hande. Mi ni luna ka ku libelela Jehova, lu ba ni tabo ha lu nze lu tusa ba bañwi kuli ba sutelele ku Mulimu. Mi hape lu bata ku shemubiwa ki Mulimu, ni kuli kwa mafelelezo a lu pilise.

Mu Si Zwafi

Ku libelela Jehova hape ku talusa ku zwelapili ku mu lata ni ku mu sebeleza lu sa zwafi. Kono ku eza cwalo hasi nto ye bunolo. Buñata bwa batanga ba Mulimu kacenu ba pila mwahal’a batu ba ba nyefula mutu kaufela ya na ni tumelo mwa lisepiso za Mulimu. Kono mu nge mutala wa Maisilaele ba ba sepahala ba ne ba zwezipili ku ba ni sepo mwahal’a lilimo ze 70 ze ne ba li mwa butanga mwa Babilona. Ne ba tiisizwe kiñi kuli ba zwelepili ku ba ni sepo? Ne ba tiisizwe ki ku bala lisamu. Samu ye ñwi ye susueza, mwendi ye ne se i ñozwi kale ka nako yeo, i li: “Ni sepile linzwi la hae. Moya wa ka u talimezi Mulena, ka talimelo ye tuna, ye fita ya ba ba libelezi busihu kuli bu se; e, ye tuna ku ya ba ba libelezi kuli busihu bu se. Isilaele u sepe [Muñ’a] Bupilo.”—Samu 130:5-7.

Majuda ba ne ba zwezipili ku ba ni sepo ka ku balanga ni ku bulela za samu yeo ne ba filwe mupuzo muta Babilona ne i hapilwe ki lila. Buñata bwa Majuda ba ba sepahala kapili-pili ba tama lieto la ku kutela kwa Jerusalema. Ka za nako yeo, samu i li: “[Muñ’a] Bupilo h’a kutisa lihapwa za Sione, . . . milomo ya luna kiha i tala liseho.” (Samu 126:1, 2) Majuda bani ne ba si ka zwafa, kono ne ba zwezipili ku tiisa tumelo ya bona ka ku balanga Linzwi la Mulimu. Mi ne ba si ka lisela ku opelela Jehova milumbeko.

Ka ku swana, Bakreste ba niti ba ba libelela Mulimu mwa nako ya “ku fela kwa lifasi” ba zwelapili ku tiisa tumelo ya bona. Ba ituta Linzwi la Mulimu, ba tiisana, mi ba zwelapli ku lumbeka Jehova ka ku kutaza taba ye nde ya Mubuso wa hae.—Mateu 24:3, 14.

Ku Libelela Kuli Lu Tusiwe ki Kalimelo

Mupolofita wa Mulimu Jeremia n’a ñozi kuli: “Se sinde ki kuli mutu a sepe mi a libelele ku pilisa kwa [Muñ’a] Bupilo, inz’a kuzize.”  (Malilo 3:26) Jeremia fa n’a talusa kuli neikaba hande kuli batu ba Mulimu ba si ke ba bilaela mwa n’a ba kalimelezi Jehova ha n’a tuhelezi Jerusalema kuli i shandaulwe. Ku fita ku bilaela, ne ba swanela ku tusiwa ki ze ne ba ipumani ku zona ka ku nahanisisa buipanguli bwa bona ni kuli ne ba tokwa ku cinca moya wa bona.—Malilo 3:40, 42.

Mo lu tusezwa ki kalimelo ya Jehova ku kona ku bapanywa ni mo i hulelanga tolwana. Ka za kalimelo ye zwa ku Mulimu, Bibele i li: “Ku kalimelwa ko, ku ka beya muselo wa kozo ni wa ku luka.” (Maheberu 12:11) Sina fela ha ku fitanga nako kuli tolwana i buzwe, kacwalo ni luna lu tokwa nako kuli lu cince moya wa luna ku likana ni mwa lu lutela Mulimu. Ka mutala, haiba lu zwa fa buikalabelo mwa puteho bakeñisa muzamao o maswe, ku itatela ku libelela Mulimu ku ka lu tusa kuli lu si ke lwa zwafa ni ku tuhela. Ha lu li mwa miinelo ye cwalo lu kona ku susuezwa ki manzwi a Davida a tahile ka moya wa Mulimu, a li: “Ku halifa kwa [Mulimu] ki kwa nakonyana fela, kono mwa sishemo sa hae ku na ni bupilo; myoko niha i ka ta ku luna nako ya manzibwana, ha bu sa, ku se ku taha tabo.” (Samu 30:5) Haiba lu libelela ni ku sebelisa kelezo ye lu fiwa ka Linzwi la Mulimu ni kopano ya hae, nako ya luna ya ku ba ni “tabo” i ka fita.

Ku Hula Ku Nga Nako

Haiba mu ba banca kamba kona mu sa zo kolobezwa, mwendi mu bata ku ba ni buikalabelo mwa puteho ya Sikreste. Kono ku nga nako kuli mutu a hule kwa moya ilikuli a kone ku peta buikalabelo bo bu cwalo. Kacwalo mu zwelepili ku hula kwa moya ha mu sa li ba banca. Ka mutala, nako ya bunca kona nako ye nde ya ku bala Bibele mutumbi, ya ku kala ku ba ni tulemeno twa Sikreste, ni ku ituta mwa ku ezeza balutiwa. (Muekelesia 12:1) Haiba mu libelela ka buikokobezo, nako i ka fita fa ka mi fela buikalabelo Jehova.

Musebezi wa ku eza balutiwa ni ona u tokwa ku libelela. Sina fela mulimi ha tokwa ku zwelepili ku selaela ku fitela Mulimu a melisa, musebezi wa ku eza balutiwa ni ona u cwalo. (1 Makorinte 3:7; Jakobo 5:7) Ku tusa ba bañwi kuli ba be ni tumelo ni ku itebuha Jehova ku nganga likweli kamba mane nihaiba lilimo za ku ituta Bibele. Ku libelela Jehova hape ku talusa ku tundamena, niha neikaba kuli baituti kwa makalelo ha ba zwelipili. Haiba ba bonisa kuli ba itebuha ze ba ituta nihaiba fela hanyinyani, fo ku kona ku talusa kuli ba tusiwa ki moya wa Jehova. Ha mu ka libelela, mu ka tabela ku bona muituti wa mina ha nz’a tusiwa ki Jehova kuli a hule ku fita fa ku ba mulutiwa wa Kreste.—Mateu 28:20.

Ku Bonisa Lilato ka ku Libelela

Mutala o bonisa kuli mutu ha libelela u bonisa lilato ni buikolwiso ki wa kaizeli wa musupali ya pila mwa sibaka sa lihalaupa se si fumaneha kwa Andes kwa South America. Yena ni kaizeli yo muñwi ki bona fela Lipaki za Jehova mwa munzi wa habo. Mu nahane fela tabo ye ba banga ni yona ha ba libelelanga ku potelwa ki Bakreste ba bañwi! Muta o muñwi, muokameli wa maeto na latehile ha na li mwa musipili wa ku yo ba potela lwa pili. N’a na ni ku kutela mwamulaho ku yo fita fa na fapuhezi mi a liyeha ka lihora li sikai. Ha yo bonanga munzi ne se li busihu luli. Bakeñisa kuli ne ku si na malaiti mwa sibaka seo, n’a komokile hahulu ha na boni liseli. N’a tabile hahulu luli ha kena mwahae ni ku lemuha kuli kanti liseli la na bona ne li la lampi ye ne swelwi ki kaizeli wa musupali! Kaizeli yo n’a na ni buikolwiso bwa kuli muzwale yo u ka taha, mi kacwalo a libelela.

Ni luna ha lu ka libelela sina kaizeli yani, lu ka ba ni tabo ha lu nze lu libelela Jehova. Lu na ni buikolwiso bwa kuli u ka peta lisepiso za hae. Mi ka ku swana sina muokameli wa maeto yani, lwa itebuha batu ba ba bonisa lilato ka ku lu libelela. Kacwalo kwa utwahala Jehova ha itebuha ba ba mu libelela. Bibele i li: “[Muñ’a] Bupilo u tabela . . . ba ba [libelela] sishemo sa hae.”—Samu 147:11.

[Siswaniso se si fa likepe 18]

Batu ba ba patehile ku lumbeka libizo la Mulimu ba fumana tabo ha ba nze ba libelela Jehova