“A Lu Hapeleza” ku Ya ni Yena

BATU ba kwa Upa ba zibahala ka moya wa ku lata ku amuhela baenyi. Ka mutala, kwa India, ha ku taha muenyi ya na si ka libelelwa, muenyi yo u kona ku yumbulwa lico ze ne lukiselizwe lubasi. Kwa Iran, basali ba ba na ni mabasi ba bulukanga lico ze ñata mwa friji kuli ite ba yumbule baenyi ba ba kona ku punya ka sipundumukela.

Ku na ni batu ba bañata ba ba bulezwi mwa Bibele ba ne ba na ni moya o cwalo wa bufani. Lidia ki mutala o ipitezi wa batu ba ba cwalo. Na pila mwa Filipi, ona muleneñi o mutuna wa sikiliti sa Masedonia, mi ku bonahala kuli ne li muproselite wa Mujuda. Muta o muñwi, ka la sabata, muapositola Paulusi ni ba na zamaya ni bona ba fumana Lidia ni basali ba bañwi kwand’a muleneñi wa Filipi inze ba kopani kwa likamba. Ka nako yeo, Mulimu a kwalula pilu ya Lidia, Paulusi ha na nz’a bulela. Mi Lidia a kolobezwa ni ba ndu ya hae. Kihona cwale a kupa bazamai bao kuli: “Ha mu atuzi kuli ni ya sepahala, mu kene mwa ndu ya ka.” Mane Luka, mulikan’a Paulusi, u biha kuli: “A lu hapeleza.”—Likezo 16:11-15.

Sina mwa na ezelize Lidia, Bakreste ni bona kacenu ba amuhelanga balapeli ka bona, ba ba cwale ka baokameli ba maeto ni basali ba bona. Mane Bakreste ba tundamenanga balapeli ka bona kuli ba fitele mwa mandu a bona. Mi mwa ku tundamena kwa bona, ba ikolanga makande a yahisa ni siango se sinde sa kwa moya. Nihaike kuli buñata bwa Lipaki za Jehova hasi bafumi, ki batu ba ba tabela ku ‘amuhela baenyi.’ (Maroma 12:13; Maheberu 13:2) Ba fumana tabo kabakala moya wa bona wa bufani. Ki niti, Jesu na nepile ha na ize: “Ku na ni mbuyoti mwa ku fana, ye fita ye mwa ku fiwa.”—Likezo 20:35.