Anna U Fukelwa ki Kozo

M USALI yo muñwi ya sepahala u lumbeka Jehova ka ku tumusa mwa tapelo ya hae. U ikutwa kuli Mulimu u mu zwisize mwa liluli, mi u felisize maswabi a hae ka tabo.

Libizo la musali yo ki Anna. Ki nto mañi ye tisize kuli cwale a ikutwe cwalo? Ki nto mañi ye mu tabisize hahulu cwale? Likande la hae li kona ku lu tusa cwañi? Kuli lu fumane likalabo kwa lipuzo zeo, ha lu nyakisiseñi likande la Anna.

Lubasi Lo Lu Ziyelehile

Anna ki yo muñwi wa basali ba Elikana, Mulivi ya pila mwa naha ya Efraimi. (1 Samuele 1:1, 2a; 1 Makolonika 6:33, 34) Nihaike kuli Mulimu sapili na si ka lela kuli batu ba nyale libali, tukiso yeo ne i lumelelizwe mwa Mulao wa Mushe mi ne ku filwe milao ye ne swanela ku latelelwa. Lubasi lwa Elikana ki lubasi lo lu lapela Jehova, kono hañata mwa manyalo a libali ku banga ni mifilifili sina mo ku inezi mwa lubasi lwa Elikana.

Anna ki mumba, kono Penina, musal’a Elikana yo muñwi, u na ni bana. Kona kuli Penina ki muhalizo wa Anna.—1 Samuele 1:2b.

Basali ba Maisilaele ne ba nga kuli ku ba mumba ki nto ye swabisa mi ku bonisa kuli mutu ha tabelwi ki Mulimu. Kono ha ku na bupaki bo bu bonisa kuli Anna na sa tabelwi ki Mulimu kabakala ku sa pepa. Ku fita ku mu omba-omba, Penina u shemaeta Anna kabakala kuli yena u na ni bana.

Misipili ya kwa Sibaka Se Si Kenile

Ku si na taba ni butata bo, lubasi lwa Elikana lu tama musipili wa ka silimo wa ku ya kwa sibaka sa Jehova se si kenile kwa Shilo. * Wo ki musipili wa likilomita ze bato eza 60 ku ya ni ku kuta, mi ku bonahala kuli ba u zamaya ka mautu. Yeo ki nako ye t’ata sihulu-hulu ku Anna kakuli Penina ni bana ba hae ba fiwa lisuma ze ñata za sitabelo sa buitumelo, kono Anna yena u fiwa fela suma i liñwi. Penina u tukufaza Anna ka nako yeo, mi u mu zwafisa maswe kuli mane se ku bonahala inge kuli Jehova u timile Anna “lupepo.” Anna u tukufazwanga cwalo mwaha ni mwaha, mi u fita fa ku zwafa maswe kuli mane wa lila ni ku hana ku ca. Misipili ye swanela ku mu tiseza tabo i ba ye t’ata hahulu ku yena. Niteñi, Anna u zwelapili ku tamanga misipili yeo ya ku ya kwa sibaka sa Jehova se si kenile.—1 Samuele 1:3-7.

Kaniti, Anna u lu tomezi mutala o munde. Mu ezanga cwañi ha mu zwafile? Kana mwa ikambusanga kwa Bakreste ka mina? Anna na si ka eza cwalo. Na zwezipili ku swalisana ni balapeli ba Jehova. Ni luna lu swanela ku eza nto ye swana niha lu talimana ni miliko.—Samu 26:12; 122:1; Liproverbia 18:1; Maheberu 10:24, 25.

 Elikana u lika ku omba-omba Anna mi u mu kupa kuli a mu taluseze ze mu kataza. U mu buza u li: “Anna u lilañi? Kiñi ha u sa ci lico mi u filikani pilu? Mo ni inezi ku wena, ha ni li, ni fita kwa tuso bana ba bashimani ba ba lishumi?” (1 Samuele 1:8) Mwendi Elikana ha zibi za Penina mwa nyandiseza Anna, mi Anna mwendi u iketela ku kuza fela ku fita ku tongokela munna hae ka taba yeo. Kono niteñi, Anna ki musali ya hulile kwa moya, mi kuli a pilisane ka kozo ni muhalizo wa hae u fitisa tapelo ku Jehova.

Anna U Itama ka Luci

Matabelo a buitumelo na celwanga kwa ndu ya Jehova ye kenile. Ha se ba zwile kwa licelo, Anna u lapela ku Mulimu. (1 Samuele 1:9, 10) U lapela u li: “Mawe [Muñ’a] Bupilo wa limpi, kabe u ka talima ku swaba kwa mutang’a hao, wa ni hupula, u sa libali mutang’a hao, mi wa fa mutang’a hao mwan’a mushimani; fo ni ka mu fa [Muñ’a] Bupilo mazazi kaufela a bupilo bwa hae, mi mbeli ha i na ku mu beula kwa toho.”—1 Samuele 1:11.

Tapelo ya Anna ha i ngonjoloki. U kupa mwan’a mushimani mi u itama kuli u ka mu fa ku Jehova kuli ite a be Munazareni ku isa lifu. (Numere 6:1-5) Buitamo bo bu cwalo bu swanela ku lumelezwa ki munn’a hae, mi za eza Elikana li bonisa kuli u lumelelize buitamo bwa musal’a hae ya latwa.—Numere 30:6-8.

Mulapelelo wa Anna u tisa kuli Muprisita yo Muhulu Eli a mu nahanele kuli u kozwi bucwala. U mu bona ha nyanganyisa milomo ya hae, kono ha ku na sa utwa bakeñisa kuli Anna u lapelela mwa pilu. Anna u lapela ka t’ata luli. (1 Samuele 1:12-14) Mu nahane fela butuku bwa utwa Anna ha nyaziwa ki Eli ya nahana kuli mwendi Anna u kozwi! Kono Anna u alaba Eli muprisita yo muhulu ka likute. Eli a man’o lemuha kuli Anna na lapela kabakala ‘ziyezi ye tuna ya hae, ni ka butuku bwa hae,’ u bulela kuli: “Mulimu wa Isilaele a ku fe s’o kupile ku Yena!” (1 Samuele 1:15-17) Cwale, Anna wa ikela mi u kalisa ku ca mi “mwa pata ya hae ha ku si ka bonwa maswabi hape.”—1 Samuele 1:18.

Likande le, li lu lutañi? Ha lu lapela ku Jehova ka za lika ze lu bilaeza, lu lukela ku mu zibisa ze kwatas’a pilu ya luna. Haiba lu palelwa ku tatulula butata bo bu lu tezi, lu swanela ku siya lika mwa mazoho a Jehova. Yeo kona nzila ye nde ka ku fitisisa.—Liproverbia 3:5, 6.

Hamulaho wa ku lapela ka t’ata, batanga ba Jehova ba kana ba telwa ki kozo ye swana ni ya na ikutwile Anna. Ka za tapelo, muapositola Paulusi na ñozi kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafilipi 4:6, 7) Ha lu lwalisa Jehova mishimbo ya luna, lu swanela ku mu tuhelela kuli a i babalele. Mi sina Anna, ha lu tokwi ku swaba hape.—Samu 55:22.

Mwana U Fiwa Jehova

Mulimu cwale u hupula Anna; mi Anna wa itwala ni ku pepa mwan’a mushimani. (1 Samuele 1:19, 20) Ye ki ye ñwi ya litaba li sikai mwa Bibele ze bonisa Mulimu ha sepisa ku pepwa kwa mwana ya na ka ba mutang’a hae. Samuele, mwan’a bo Elikana ni Anna, u ka ba mupolofita wa Jehova, mi u ka peta musebezi wa butokwa mwa mubuso wa Isilaele.

Ku si na ku kakanya, Anna u kalisa ku luta Samuele za Jehova ku zwa kwa bwanana bwa hae. Kono kana Anna u libezi buitamo bwa hae? Kutokwa ni hanyinyani! U bulela kuli: ‘Mwana a sa kwa fela ni ka mu isa, a tiswe fapil’a [Muñ’a] Bupilo, mi a ine kwateñi kamita.’ Samuele ha kwa fela, mwendi inge a na ni lilimo ze talu kamba ku fitelela hanyinyani f’o, Anna u mu isa kuli a yo pila kwa ndu ya Jehova ye kenile, ku likana ni mwa na itamezi.—1 Samuele 1:21-24; 2 Makolonika 31:16.

Hamulaho wa ku fa sitabelo ku Jehova, Anna ni munn’a hae ba isa Samuele ku Eli. Anna mwendi u swala kana ka hae ka mushimani  kwa lizoho mi u bulelela Eli kuli: “[Muñ’a] ka, ka moya wa hao o pila, [muñ’a] ka, ki na musali yani, ya n’a kile a yema hona mo fapil’a hao, a lapela [Muñ’a] Bupilo. Ki yena mwana yani ye ne ni kupa; [Muñ’a] Bupilo u ni file se ne ni kupile ku yena. Mi cwale ni na, ni mu fa [Muñ’a] Bupilo, mi u ka ba ya filwe [Muñ’a] Bupilo mwa mazazi kaufela a bupilo bwa hae.” Mi Samuele kona mwa kalela sebelezo ya hae ye ipitezi ku Mulimu ku fitela lifu la hae.—1 Samuele 1:25-28; 2:11.

Ku si na ku kakanya, Anna h’a libali Samuele. Mañolo a biha kuli: “Mahe n’a mu ezeza siapalonyana se sitelele, ka myaha kaufela, mi n’a mu tiseza sona ha ne ba taha ni munn’a hae ku t’o eza sitabelo sa ka mwaha ni mwaha.” (1 Samuele 2:19) Ki niti Anna u zwelapili ku lapelela Samuele. Ku si na ku kakanya, u yo susuezanga mwan’a hae ku zwelapili ku sebeleza Mulimu ka busepahali ha yo mu potelanga ka mwaha ni mwaha.

Nako ye ñwi, Eli u fuyola bashemi ba Samuele mi u bulelela Elikana kuli: “[Muñ’a] Bupilo a ku tahiseze bana ka musali yo, bakeñisa mwana y’a file [Muñ’a] Bupilo.” Mi ku ba honacwalo luli; Anna u pepela Elikana bana ba bañwi ba bashimani ba balalu ni bana ba basizana ba babeli.—1 Samuele 2:20, 21.

Bo Anna ni Elikana ba tomezi bashemi ba Sikreste mutala o munde luli! Mi bashemi ba bañata ba itatezi ku fana bana ba bona ba bashimani ni ba basizana ku Jehova, ka ku ba susueza ku shimbuluka kuli ba yo eza mufuta o muñwi wa sebelezo ya nako kaufela. Bashemi ba ba lilato bao ba swanela ku babaziwa kabakala buitomboli bwa bona. Mi Jehova u ka ba fuyola.

Tapelo ya Anna ya Buitumelo

Anna u ba ni tabo ye tuna niha na si na mwana sapili! Buñata bwa litapelo ze ne lapezwi ki basali ha li si ka ñolwa mwa Mañolo. Kono lu bala litapelo ze peli kwa litapelo za na lapezi Anna. Ya pili n’a i lapezi ka nako ya na ziyelehile maswe, mi ya bubeli ne li tapelo ya buitumelo ya na lapezi ka nako ya na tabile. Anna u kalisa tapelo ya hae ya buitumelo ka manzwi a li: “Pilu ya ka i tabezi [Muñ’a] Bupilo.” U zwelapili kuli: “Yena ya n’a sa pepi, u pepile bana,” mi kihona a lumbeka Jehova kuli, ‘u zwisa mubotana mwa liluli.’ Ki niti, “ya shebile, u mu nanula fa lisita la mulola.”—1 Samuele 2:1-10.

Likande le la Anna, le li ñozwi ka tuso ya moya wa Mulimu, li lu bonisa kuli batu ba bañwi kabakala ku sa petahala ba kana ba lu nyandisa mi nto yeo ya kona ku lu utwisa butuku. Kono lu si tuheleli miliko ye cwalo ku lu palelwisa ku sebeleza Jehova ka tabo. Jehova ki Mulimu ya utwa litapelo, wa utwanga mihuwo ya batu ba hae ba ba sepahala, mi u ba lamulelanga mwa miliko ni ku ba fa kozo ni limbuyoti ze ñwi.—Samu 22:23-26; 34:6-8; 65:2.

[Litaluso za kwatasi]

[Siswaniso se si fa likepe 17]

Anna na file Samuele ku Jehova