Liseli Ki Nto ya Butokwa!

MU IKUTWANGA cwañi muta mu bona liseli hamulaho wa ku bubutela mwa lififi? Kaniti mu ikutwanga ku imuluha! Mwendi mu kile mwa ipumana mwa muinelo o kona ku bapanywa kwa lififi. Mwendi ne mu ziyelehile hahulu kuli mane ne mu sa boni kuli butata b’o ne bu kona ku feliswa cwañi. Hanyinyani-hanyinyani mwa kala ku bona liseli kamba nzila ya mwa ku bu tatululela. Yeo ki nto ye tabisa luli mi i swana inge mutu ya bona liseli hamulaho wa ku bubutela mwa lififi.

Mwa linako za baapositola, batu ba bañata ne ba li mwa lififi la kwa moya. Muapositola Pitrosi ha na ñolela batu ba ne ba siile lituto za bona za kale ni ku ba Bakreste na ize: “[Mulimu u] mi bizelize ku zwa mwa lififi, ni ku kena mwa liseli la hae le li komokisa.” (1 Pitrosi 2:9) Ne ku swana inge kuli ba zwile mwa lififi ni ku kena mwa liseli le lituna. Hape ku swana inge mutu ya pila a nosi, a si na sepo, ya to kena mwa lubasi lo lu na ni sepo ya lika ze nde kwapili.—Maefese 2:1, 12.

“U Tuhezi Lilato la Hao la Pili”

Bakreste ba makalelo ne ba fumani “niti,” yona tumelo ya Sikreste. (Joani 18:37) Ne ba iponezi liseli le li komokisa la niti mi ne ba zwile mwa lififi la kwa moya ni ku kena mwa liseli leo. Kono ku kumbuluka, Bakreste ba bañwi ba ne ba tukufalezwi ba fokola. Ka mutala, kwa mafelelezo a lilimo za baapositola, mwa puteho ya Efese ne ku keni butata bo butuna. Jesu Kreste ha sa zuhile kwa bafu, na tungunyuzi butata bo, ha na ize: “Se ni nyaza ku wena, kikuli u tuhezi lilato la hao la pili. Hupula k’o wile, mi u bake, mi u eze misebezi ya hao ya pili.” (Sinulo 2:4, 5) Bakreste ba kwa Efese ne ba tokwa ku zusulusa lilato la bona la pili la ku lata Mulimu ni ku lata niti.

Luna bo? Lu ikola ku ba mwa liseli la ku ziba niti ye makaza ya za Linzwi la Mulimu. Lu fitile fa ku lata niti. Kono matata a luna batu a kona ku folisa lilato la luna la ku lata niti. Ku zwa fo, ku na ni matata a mañwi a zamaelela ni “mazazi a maungulelo.” Lu pila mwa “linako ze tata” ili mwa lifasi le li yahilwe ki batu ba ba li “baitati, ba ba lata mali, ba ba itumbaeta ni ku ikuhumusa; [ba ba li] banyefuli, ba ba sa utwi bashemi ba bona, ba ba si na buitumelo.” (2 Timotea 3:1, 2) Batu ba ba cwalo ba kona ku lu fokolisa ni ku folisa lilato la luna ku Jehova.

Haiba lu tuhezi lilato la luna la pili, lu tokwa ku ‘hupula ko lu wile ni ku baka.’ Lu tokwa ku kutela mwa mayemo a ne lu li ku ona a kwa moya. Hape lu na ni ku tokomela kuli lilato la luna la ku lata niti li si ke la fola. Kaufela luna lu tokwa ku zwelapili ku talimela lisepiso za kwapili ni ku tiiseza mwa lilato la luna la ku lata Mulimu ni ku lata niti.

‘Niti Y’e Lu Lukulula’

Liseli la mwa Mañolo ki la butokwa bakeñisa kuli Bibele i lu tusa ku alaba lipuzo za butokwa ze zingile batu ka nako ye telele. Ze ñwi za zona ki ze cwale ka ze: Lu pilelañi? Mulelo wa bupilo ki ufi? Ki kabakalañi bumaswe ha bu li teñi? Ki kai kwa yanga mutu hamulaho  wa lifu? Jehova u lu file liseli la ku ziba niti ya za lituto za butokwa zeo. Mi lu swanela ku itebuha hahulu tohonolo yeo. Haike lu si keshebisi lituto za butokwa ze lu itutile zeo.

Jesu na bulelezi balutiwa ba hae kuli: “Mu ka ziba niti, mi niti i ka mi lukulula.” (Joani 8:32) Lwa kona ku lukuluha kwa sibi ni lifu kabakala sitabelo sa Jesu sa tiululo. Kono lituto za niti ze lu itutile li lu lukuluzi hape kwa kapai ni lipilaelo za lifasi le li ambekilwe ki lififi le. Ku yeya ni ku itebuha lika ze lu itutile ku ka tiisa lilato la luna la ku lata Jehova ni Linzwi la hae.

Muapositola Paulusi na ñolezi Bakreste ba kwa Tesalonika kuli: “Nako ye mu amuhezi Linzwi la Mulimu le mu utwile ku luna, mu li amuhezi isi sina linzwi la mutu, kono sina Linzwi la Mulimu, mi ki lona luli, kifohe, li sebeza ka mata ku mina balumeli.” (1 Matesalonika 2:13) Bakreste ba kwa Tesalonika ne ba utwile ni ku “amuhela Linzwi [la Mulimu] ka tabo.” Ne se ba zwile “mwa lififi.” Mi ne se ba li “bana ba liseli.” (1 Matesalonika 1:4-7; 5:4, 5) Bakreste bao ne ba fitile fa ku ziba kuli Jehova ki yena Mubupi ni kuli ki Mulimu ya-m’ata-ote, ya butali, ya lilato, ni ya na ni makeke. Sina mo ne ba itutezi balateleli kaufela ba Kreste, Bakreste ba kwa Tesalonika ni bona ne ba itutile kuli Jehova na ezize tukiso ya kuli libi za bona li takulwe ka sitabelo sa tiululo sa Mwan’a hae Jesu Kreste.—Likezo 3:19-21.

Nihaike Bakreste ba kwa Tesalonika ne ba sa zibi niti kamukana yona, ne ba ziba kwa ku i fumana. Mañolo a’ ñozwi ka tuso ya moya wa Mulimu a’ kona ku tusa mutu wa Mulimu kuli “a petahale mi a talifele luli misebezi kaufela ye minde.” (2 Timotea 3:16, 17) Bakreste ba kwa Tesalonika ne ba kona ku zwelapili ku ituta, mi ka ku eza cwalo ne ba kana ba itemuhelanga kuli liseli le li zwa ku Mulimu ki la butokwa. Kona libaka ne ba swanela ku taba kamita. (1 Matesalonika 5:16) Mi ku cwalo ni ku luna.

Liseli la mwa Nzila ya Luna

Walisamu na bonisize libaka liseli ha li li la butokwa, ha na opezi kuli: “Linzwi la hao ki lumonyi lwa mwa mautu a ka, ki liseli la mwa nzila ya ka.” (Samu 119:105) Ketelelo ye lu fumana mwa Linzwi la Mulimu ya kona ku lu tusa ku keta mupilelo o swanela ni ku sa biuka mwa sikuka seo. Ha lu swaneli ku ba sina sisepe se si kukana. Ku ziba niti ni ku pila ka yona ku lu sileleza kuli lu si ke lwa “iswa kai ni kai ki moya o muñwi ni o muñwi wa tuto ye nca.”—Maefese 4:14.

Bibele i li: “Mu si ke mwa isepisa ka malena, nihaiba ka bana ba batu, ba ba palelwa ku tusa.” Hape i li: “U filwe mbuyoti mutu ya na ni Mulimu wa Jakobo ku mu tusa, ya isepisa ka [Muñ’a] Bupilo, Mulimu wa hae.” (Samu 146:3, 5) Ku zwa fo, ku sepa Jehova ku lu tusa ku sa ba ni sabo ni lipilaelo za bupilo. Muapositola Paulusi na ñozi kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafilipi 4:6, 7) Ku etelelwa ki niti ya Linzwi la Mulimu kwa tusa luli.

Mu Benye Sina Mamonyi mwa Lifasi

Hape Linzwi la Mulimu ki la butokwa kakuli li fa batu kolo ya ku eza se siñwi mwa  musebezi wa butokwa hahulu. Jesu na laezi balateleli ba hae kuli: “Mu ye . . . mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela. Mi, a mu bone, na, ni inzi ni mina ka mazazi kaufela, ku isa kwa mafelelezo a lifasi.” A si ka fa kale taelo yeo, Jesu na kalile ka ku bulela kuli: “Ni filwe bulena kaufela mwa lihalimu ni mwa lifasi.”—Mateu 28:18-20.

Ha lu nyakisiseñi kuli ki bomañi ba ba tusa Bakreste ba niti mwa musebezi wa ku kutaza taba ye nde ni ku luta niti ya Bibele kwa macaba. Jesu na sepisize balateleli ba hae kuli na ka ba ni bona. Mi ku bile cwalo; u zwezipili ku ba tusa mwa bukombwa bwa bona ha ba nze ba ‘bonisa liseli la bona kwa batu’ ka ku shaela Linzwi la Mulimu ni ka ‘misebezi ya bona ye minde.’ (Mateu 5:14-16) Mangeloi ni ona a sweli ku tusa Bakreste ba niti mwa musebezi wo wa ku kutaza. (Sinulo 14:6) Jehova Mulimu ni yena u sweli wa ba tusa. Muapositola Paulusi na ñozi kuli: “Na ni calile, Apolosi u selaezi mezi; kono ya melisize, ki Mulimu.” Ki tohonolo ye tuna luli ku ba mwahal’a “ba ba sebeza ni Mulimu”!—1 Makorinte 3:6, 9.

Hape mu nahane mwa lu fuyaulela Mulimu ha lu nze lu eza musebezi wa lu file. Ha ku na nto ye kona ku likana ni tohonolo ye lu filwe ya ku “benya sina mamonyi mwa lifasi.” Haiba lu benyisa liseli la Linzwi la Mulimu mwa lipulelo ni likezo za luna, lu ka kona ku fa tuso ye tuna kwa batu ba ba tabela. (Mafilipi 2:15) Mi lu ka ba ni tabo ha lu nze lu kutaza ni ku luta macaba, kakuli ‘Mulimu hasi ya si ka luka, kuli a libale misebezi ya luna, ni lilato le lu bonisize kwa Libizo la hae.’—Maheberu 6:10.

‘Mu Leke Mulyani wa ku Isela mwa Meto’

Mwa litaba za na ñolezi puteho ya Laodisea mwa miteñi ya baapositola, Jesu na ize: “U leke .  . mulyani wa meto, mi u isele mwa meto, kuli u bone. Na, ni kalimela mi ni nata kaufela ba ba latwa ki na.” (Sinulo 3:18, 19) Kalafo ya bubofu bwa kwa moya ki “mulyani wa meto,” zona lituto ni likelezo za Jesu. Kuli lu be ni mubonelo o munde wa ze ezahala kacenu ni lisepiso za kwapili, lu tokwa ku amuhela likelezo za Jesu ni ketelelo ye mwa Bibele. Hape lu swanela ku ba ni maikuto a na li teñi ku Kreste ni ku likanyisa mutala wa hae. (Mafilipi 2:5; 1 Pitrosi 2:21) Mulyani wa meto wo haki wa mahala. Jesu na ize: “U leke ku na.” Lu kona ku leka mulyani wo ka nako ni buikatazo bwa luna.

Ha lu zwa mwa simbwi ni ku kena mwa sibaka se si na ni liseli, ku kona ku nga nako kuli meto a luna a twaele. Ka nzila ye swana, ku tokwahala nako kuli lu itute Linzwi la Mulimu ni ku bona liseli la niti. Ku tokwahala nako kuli lu nahanisise ze lu itutile ni ku lemuha butokwa bwa niti. Kono yeo hasi teko ye tula hahulu. Kabakalañi? Kakuli liseli ki nto ya butokwa.

[Siswaniso se si fa likepe 14]

“U leke ku na . . . mulyani wa meto, mi u isele mwa meto, kuli u bone.”