Ku Bata Likalabo Ze Lukile

Ni kona ku bukeleza cwañi buikangulo bwa ka?

Ni kona ku ezañi kuli lubasi lwa ka lu be lo lu tabile?

Ni kona ku ezañi kuli ni si ke na zwa musebezi?

KANA mu kile mwa ipuza fateñi lipuzo zeo? Kana ne mu fumani likalabo ze ne mi tusize? Silimo ni silimo, ku hatiswanga libuka ze bat’o eza 2,000 ze bulela za litaba zeo ni za litaba ze ñwi za butokwa. Ka silimo, mwa naha ya Britain fela, babali ba libuka ba lekanga libuka ze fa likelezo za mwa ku talimanela ni matata a mwa bupilo ka mali a bat’o likana ni madola a kwa America a 150 milioni. Mwa United States, litekiso za libuka ze fa likelezo li fitanga fa madola a bat’o eza 600 milioni ka silimo. Kaniti, haki mina fela mu nosi ba ba bata ku ziba mwa ku talimanela ni matata a mwa bupilo.

Muñoli wa libuka yo muñwi u bulela cwana ka za likelezo ze fiwanga mwa libuka ze ñata zeo, u li: “Libuka ze nca ze ñata li kutelanga fela ze ñozwi kale.” Ki niti, buñata bwa likelezo ze mwa libuka zeo li bonisa fela butali bo bu fumaneha mwa Bibele. Bibele ki ye ñwi ya libuka za kale ka ku fitisisa. I hasanyizwe hahulu ku fita buka ifi kamba ifi mwa lifasi. Mi i tolokilwe mwa lipuo ze bat’o eza 2,400. Libibele kaufela ze hatisizwe mwa lifasi li fitelela 4.6 bilioni.

Bibele i bulela patalaza kuli: “Liñolo kamukana li tahile ka Moya wa Mulimu, mi li na ni tuso kwa ku luta, ni ku kolisa, ni ku nyaza, ni ku hulisa ka ku luka.” (2 Timotea 3:16) Kono Bibele ne i si ka ñolwa sina buka ya likelezo. Mulelo wa yona o mutuna ki wa ku patululela batu tato ya Mulimu. Nihakulicwalo, Bibele i bulela ze ñata ka za mwa ku tiyela matata a luna, mi i sepisa kuli ba ba latelela ze i bulela ba ka tusiwa. (Isaya 48:17, 18) Batu ba ba fapahana-fapahana ba tusiwanga ha ba latelela likelezo ze mwa Bibele. Mu bale taba ye tatama kuli mu iponele nji ze i bulela Bibele ka za litaba ze cwale ka buikangulo, lubasi, ni mubeleko, za tusa.