Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Lu itutañi kwa nguli ya Jesu ya munna wa mutundameti? (Luka 11:5-10)

Nguli yeo i bonisa mo lu swanela ku lapelela. Lu lukela ku lapelanga ka ku tundamena, sihulu ha lu kupa moya o kenile wa Mulimu. (Luka 11:11-13)—12/15, makepe 20-2.

• Nguli ya Jesu ya mbelwa ni muatuli i lu lutañi? (Luka 18:1-8)

I lu luta kuli lu swanela ku lapelanga. Ka ku sa swana ni muatuli wa mwa nguli yeo, Jehova ki Mulimu ya lukile mi u bata ku lu tusa. Hape i lu luta kuli lu swanela ku ba ni tumelo ye swana sina ya mbelwa yani wa mwa nguli.—12/15, makepe 26-8.

• Ki kabakalañi muapositola Paulusi ha n’a elelize Bakreste ba kwa Korinte kuli ba ‘atumuluse’ lilato la bona? (2 Makorinte 6:11-13)

Ku bonahala kuli ba bañwi mwa Korinte ne ba sa lati ba bañwi, mi ne ba si na silikani ni musa. Lu lukela ku lika ka t’ata ku bonisa lilato kwa balumeli sina luna. Mane lu lukela ku lika ka t’ata ku itama bulikani ni bona.—1/1, makepe 9-11.

• Ku swaiwa ko ku bulezwi kwa Sinulo 7:3 ki kufi?

Mulimu ha toza Bakreste ka moya o kenile, f’o ki ku swaiwa kwa makalelo. Kono Sinulo 7:3 i bulela za ku swaiwa kwa mafelelezo, ko ku bonisa kuli ba ba tozizwe ba sepahalile luli ku fita kwa mafelelezo.—1/1, makepe 30-1.

• Bashemi ba kona ku itutañi kwa taba ye mwa Bibele ya za Samuele?

Nto ya pili ye ba kona ku ituta kwa mutala wo ki ya kuli ba swanela ku luta bana ba bona linzwi la Mulimu, sina mo ne ba ezelize bashemi ba Samuele. Ku zwaf’o, ba swanela ku susueza bana ba bona kuli ba sebeleze Jehova mwa bupilo bwa bona kaufela.—1/15, likepe 16.

• Lu kona ku bonisa cwañi kuli lu tabile ku libelela Jehova?

Lu “libelezi . . . lizazi la Mulimu,” mi lu libelela ku imululwa ha ka yundisa banyefuli kaufela. (2 Pitrosi 3:7, 12) Jehova u nyolelwa ku felisa bumaswe kaufela, kono u libelela kuli a pilise Bakreste ka nzila ye ka lumbekisa libizo la hae. Lu swanela ku kolwa kuli Jehova wa ziba nako ye swanela ya ku eza cwalo, kono ka nako ya cwale, lu swanela ku mu lumbeka ka m’ata a luna kaufela. (Samu 71:14, 15)—3/1, makepe 17-18.

• Kana Nuwe na kenyize mwa aleka lifolofolo ze kenile ze 7 mwa mufuta ni mufuta kamba ze 14 mwa mufuta ni mufuta?

Nuwe n’a taluselizwe kuli kwa lifolofolo kamukana ze kenile, ‘a nge ze 7, za banna ni ze sihali.’ (Genese 7:1, 2, NW) Mwa Siheberu sa mwa Bibele, kwa Genese 7:2, ku ñozwi kuli ‘7, 7.’ Kono sina mo ku boniselizwe mwa mañolo a mañwi, mwa Siheberu, linombolo niha li kutelwa ku ñolwa cwalo, ha ku talusi kuli li swanela ku kopanywa. Ku bonahala kuli Nuwe na kenyize mwa aleka lifolofolo ze 7 mwa mufuta ni mufuta, ze talu za banna ni ze talu ze sihali, ku beya cwalo ni i liñwi ya n’a ka itusisa hasamulaho ku eza sitabelo. (Genese 8:20)—3/15, likepe 31

• Ki kabakalañi Bakreste ha ba swanela ku ‘lemuha’ mutala wa maeluda, ba ba etelela?

Muapositola Paulusi u lu eleza kuli lu “lemuhe” mupilelo o munde wa maeluda ni ku latelela mutala wa bona wa tumelo. (Maheberu 13:7) Lu lukela ku latelela mutala wa maeluda bakeñisa kuli lu elelizwe cwalo mwa Linzwi la Mulimu. Hape lu lukela ku eza cwalo bakeñisa kuli maeluda ki batu ba ba bata pili Mubuso mi ba tabela ku lu tusa.—4/1, likepe 28.