Ki Lianga Kono Ba Tukufalezwi ku Sebeza

KULI mu kopane ni bo Leonardo, ha mu koni ku lumela kuli ba kona ku yaha. Ha ba na mazoho kabakala kozi ye ne kile ya ezahala kwa mubeleko wa bona. Nihakulicwalo bo Leonardo ne ba fufulezwi ku yaha fa sibaka se siñwi mwa Acajutla, kwa El Salvador, sina mo mu bonela fa siswaniso.

Bo Leonardo ne ba pangisize libelekiso za bona ilikuli ni bona ba kone ku swala kwa musebezi wa ku yaha. Ba yomekanga kanyumiti ka mwambo wa lizoho la bona la silyo mwa liseka la sipi le li sweli kwa focolo kihona cwale ba nga mubu ni ku u latela mwa ngolobani. Hape ba tamile maseka a mañwi kwa maswalelo a ngolobani ilikuli ba kone ku i kasha bona beñi. Kiñi se ne si ba susuelize ku tusa kwa musebezi wa ku yaha?

Bo Leonardo ne ba bata ku tusa kwa musebezi wa ku yaha Ndu ya Mubuso, ili ndu ya milapelo ya puteho ya Lipaki za Jehova mwa sibaka sa habo bona. Bo Leonardo ne ba kona ku fa mabaka a utwahala ha ne ba si ke ba taha kwa muyaho. N’e li babeleki, ne li lianga, mi hape mwa puteho ya habo ne li batanga ba bukombwa. Kono ne ba bata ku tusa ka mo ne ba konela kaufela kuli ba sebeleze Mulimu.

Mina bo, kana mu na ni moya o swana wa ku sebeleza Mulimu? Ku fita ku fa libaka la kuli ki lihole, bo Leonardo ka butali ne ba pangisize libelekiso ze ne ba kona ku itusisa ilikuli ba pete musebezi o ne ba si ke ba kona ku peta. Ne ba sebelelize Mulimu ‘ka kutwisiso ya bona kaufela.’ (Mateu 22:37) Babeleki kaufela ba ba sweli ku yaha Mandu a Mubuso a Lipaki za Jehova mwa lifasi kaufela ba na ni moya o munde wa ku itatela. Mañi ni mañi u lukuluhile ku fumaneha kwa mikopano ya bona, mi ni mina mwa memiwa ku fumaneha teñi.