Takazo ya Adryana

ADRYANA, musizana wa lilimo ze silezi ya pila mwa Tulsa, kwa Oklahoma, mwa America, na na ni takazo. Takazo ya hae ne i swana ni ya Davida ya na opezi kuli: “Ni kupile nto i li ñwi ku [Muñ’a] Bupilo, mi ni ka i tundamena; kikuli ni ine mwa Ndu ya [Muñ’a] Bupilo mazazi kaufela a bupilo bwa ka, kuli ni buhe bunde bwa [Muñ’a] Bupilo, mi ni shalimisise Sibaka sa hae se si kenile.”—Samu 27:4.

Adryana ha n’a kwanisize fela likweli ze silezi, a fumanwa ni butuku bwa kansa ye bizwa neuroblastoma. Kabakala butuku bo bu bulaya bo, mahutu a Adryana a omelela luñañali. A pazulwa hañata ki madokota mi a tanda silimo mutumbi a nz’a fiwa fela likalafo za kansa.

Bondat’ahe Adryana ba ba sa lapeli, ne ba kupile kopano ye ñwi kuli i ise Adryana kwa sibaka se siñwi se si buheha kuli a yo ikatuluseza teñi. Kopano yeo i si ka lumela kale, ya luma batu ku yo buza Adryana pili. Adryana a itumela ku bona kono a ba taluseza kuli yena n’a ka tabela ku yo pota fa Betele ya mwa New York, fa sibaka se situna se si okamela misebezi ya Lipaki za Jehova mwa lifasi kaufela. Ha sa utwile kuli bondat’ahe ne ba batañi bona, Adryana a lapela ku Jehova ku mu kupa kuli a mu tuse ku yo pota fa Betele. Nihaike kuli kwa makalelo ba kopano yeo ne ba nga kuli Betele haki sibaka se si kona ku tabisa kwa banana, ba lumela kupo ya Adryana ha ba bona kuli bondat’ahe ha ba si ka i lwanisa.

Adryana, bom’ahe, muhulwan’a hae, ni mulikan’a hae, ba funduka ku liba kwa New York ku yo pota lwa pili fa Betele. Adryana a li: “Jehova n’a alabile tapelo ya ka. Ne ni ziba kuli ne lu ka yo amuhelwa hande fa Betele. Ne ni boni mo ba pangelanga libuka, limagazini, ni Libibele. Ku yo pota kwa Betele ne ku ni tabisize ku fita ha ne ni ka ya kwa sibaka sa ku itabiseza teñi.”

Adryana na ‘ipuhezi bunde bwa Jehova’ mi na shalimile ni ku itebuha sibaka se situna se si okamela misebezi ya batu ba Jehova kacenu. Ni mina mwa kona ku yo pota fa Betele. Kwand’a sibaka se situna se si okamela musebezi wa Lipaki za Jehova se si kwa New York, ku na ni liofisi za mitai mwa linaha ze ñata za lifasi.