Ba Banca—Ze Mu Eza Z’a Ama Bashemi Ba Mina

MUAPOSITOLA JOANI wa musupali na ñozi kuli: “Ha ku na se si ni tabisa ku fita se, ha ni utwa kuli bana ba ka ba zamaya mwa niti.” (3 Joani 4) Bana ba ba bulelwa mwa timana ye ki balutiwa ba Sikreste kono bashemi ba ba saba Mulimu ba utwisisa hahulu manzwi ao. Sina bashemi mo ba amela bupilo bwa bana ba bona, ni bona bana ba ama ka nzila ye swana bupilo bwa bashemi ba bona.

Mulena Salumoni wa Isilaele na lemuhile kuli likezo za bana li kona ku ama hahulu bashemi ba bona. Na ñozi kuli: “Mwana ya talifile u tabisa ndat’ahe; kono mwana wa sikuba u swabisa m’ahe.” (Liproverbia 10:1) Kacwalo bana kaufela—nihaiba ba se ba hulile—ba swanela ku tokomela kuli likezo za bona li ka ama cwañi bondat’a bona kamba bom’a bona. Mi kwa swanela luli ku eza cwalo.

Mu nahane fela mo ba ikatalelize bashemi ba mina ba ba saba Mulimu ha ne ba mi uta! Kale mane pili mu si ka pepwa kale, bona ne se ba kalile kale ku nahana za mina ni ku mi lapelelanga. Ha se mu pepilwe, sibeli sa bona ne ba tabile mi mwendi ne ba itumelanga ku Mulimu kabakala tohonolo yeo kono inge ba ziba kuli ki buikalabelo bo butuna. Ne ba na ni ku babalela mbututu ye nyinyani, mi ka ku ba balapeli ba Jehova, ne ba ngile buikalabelo bo ka butuna.

Bakeñisa kuli bashemi ba mina ki Bakreste ba niti, ne ba balanga Bibele ni libuka ze tomile ku yona kuli ba fumane litaelo sakata, mi ne ba kupanga likelezo kwa bashemi ba bañwi ba ba hulisize kale bana. Hape ne ba zwezipili ku talusezanga Mulimu lipilaelo za bona ka tapelo. (Baatuli 13:8) Ha ne mu sweli ku hula, bashemi ba mina ba fita fa ku ziba bunde bwa mina ni mifokolo ya mina. (Jobo 1:5) Ha se mu kalile ku nonoboka kwa taha matata a mañwi. Fokuñwi mwendi ne mu hanelelanga ku ipangula, mi ba kalisa ku lapelanga hahulu, ku bala hahulu, ni ku nahanisisa hahulu mwa ku mi tuseza kuli mu zwelepili ku lapela Ndat’a mina ya kwa lihalimu Jehova.

Bashemi ki bashemi. Niha se mu hulile ba bata ku bona teñi kuli mu iketile kwa mubili, mwa munahano, mwa maikuto, ni  kwa moya. Kono ka nako ye swana bashemi ba mina ba ziba kuli mu swanela ku ikezeza likatulo mi ha ba koni ku mi ketela mo mu ka pilela. Ki mina ba ba ka iketela mupilelo.

Kacwalo haiba ‘ha ku na se si tabisa bashemi ku fita’ ku utwa kuli bana ba bona ‘ba zamaya mwa niti, mu zibe he ku lukile ku bulela kuli bashemi ba utwanga butuku bo butuna bana ba bona ha ba tuhela ku zamaya mwa niti. Kaniti bana ba ba eza lika maswe ba tongisa bashemi ba bona. Salumoni na ize: “Mwan’a litanya ki maswabi ku ndat’ahe, mi u utwisa ya mu pepile butuku.” (Liproverbia 17:25) Bashemi ba swabanga hahulu mwan’a bona ha lisela ku lapela Mulimu wa niti.

Ku likana ni mo mu bonezi, ze mu eza mina bana li kona ku ama ba lubasi lwa mina mane ni ba sili. Likezo za mina li amanga hahulu bashemi ba mina. Haiba mu fulalela Mulimu ni likuka za hae, mu nyandisa bashemi ba mina. Kono ba ikutwanga hande ha mu eza lika ze nde. Haiba mu zwelapili ku sepahala ni ku utwa Jehova, bashemi ba mina ba ka taba. Mu like ka t’ata ku tabisa bashemi ba mina. Yeo kona mpo ya butokwa hahulu ye mu kona ku fa bashemi ba mina ba ba mi uta, ku mi sileleza, ni ku mi lata.