Linzwi la Mulimu Li Mi Zamaise
Linzwi la Mulimu Li Mi Zamaise
“Linzwi la hao ki lumonyi lwa mwa mautu a ka, ki liseli la mwa nzila ya ka.”—SAMU 119:105.
1, 2. Ki kabakalañi batu ba bañata ha ba palezwi ku fumana kozo ni tabo?
KANA mwa hupula fo mu kile mwa kupela mutu yo muñwi cwalo kuli a mi supeze nzila? Mwendi ne se mu li bukaufi ni ko ne mu ya kono ne mu sa zibi hande nzila ya ku fita. Kamba mwendi mane ne mu latehile luli mi ne mu tokwa ku supezwa nzila ye liba ko ne mu ya. Ibe kuli mu fakaufi ni ko mu ya kamba mu latehile luli, kana ne ku si ke kwa ba hande ha ne mu ka buza ya ziba hande sibaka? Mutu y’o wa kona ku mi supeza nzila ye ka mi libisa hande ko mu ya.
2 Ka lilimo-limo, batu ba likile ku zamaya mwa nzila ya bupilo ku si na ketelelo ya Mulimu. Kono bakeñisa kuli ba izamaisa fela ba sa etelelwi ki Mulimu, batu ba ba si ka petahala ba latehile luli. Ha ba koni ku fumana nzila ye libisa kwa bupilo bwa kozo ni tabo. Ki kabakalañi ha ba palezwi ku fumana kozo ni tabo? Lilimo ze fitelela 2,500 kwamulaho k’o, mupolofita Jeremia n’a bulezi kuli: “Nzila ya mutu ha i yo mwa mata a hae; mi mutu nih’a zamaya, h’a koni ku izamaisa ili yena.” (Jeremia 10:23) Mutu kaufela ya lika ku izamaisa ili yena ni ku hana ketelelo ye nde u ka fita fa ku zwafa luli. Batu kaniti ba tokwa ku etelelwa!
3. Ki kabakalañi Jehova Mulimu h’a li yena ya swanela luli ku zamaisa batu, mi ki lika mañi za sepisa batu?
3 Jehova Mulimu ki yena ya kona ku etelela hande batu. Kabakalañi? Kakuli ki yena ya ziba hande mo ba bupezwi batu ku fita mutu ufi kamba ufi. Mi wa izibela hande mo ne ku tezi kuli batu ba keluhe mwa nzila mi ba yambaele. Hape wa ziba se ba tokwa ku eza batu kuli ba kutele mwa nzila ye lukile. Ku zwaf’o, bakeñisa kuli ki yena Mubupi, Jehova kamita wa ziba ze lu tokwa luli. (Isaya 48:17) Kacwalo lu lukela ku sepa luli sepiso ya hae ye ñozwi kwa Samu 32:8, ye li: “Ni ka ku talifisa, ni ku lute nzila y’o swanezi ku zamaya; ni ka ku eleza, meto a ka inz’a ku shalimile.” Kaniti, Jehova ki yena luli ya lu supeza nzila ye nde hahulu ya ku zamaya ku yona. Kono Mulimu u lu zamaisa cwañi?
4, 5. Manzwi a Mulimu a kona ku lu zamaisa cwañi?
4 Walisamu ha n’a lapela ku Jehova, n’a ize: “Linzwi la hao ki lumonyi lwa mwa mautu a ka, ki liseli la mwa nzila ya ka.” (Samu 119:105) Lipulelo za Mulimu ni litaelo za hae li mwa Bibele, mi Bibele i kona ku lu tusa ku tiyela matulungundu e lu kopana ni ona mwa nzila ya luna ya bupilo. Ha lu bala Bibele ni ku latelela ketelelo ya yona, lu ka iponela luli z’a talusa manzwi a kwa Isaya 30:21, a li: “Lizebe za mina li ka utwa mwamulaho a mina linzwi le li li: Nzila ki yona ye, mu zamaye ku yona!”
5 Kono mu lemuhe kuli Samu 119:105 i supa kwa misebezi ye mibeli ye li peta Linzwi la Mulimu. Musebezi wa pili kikuli Linzwi la Mulimu li sebeza sina lumonyi lwa mwa mautu a luna. Ha lu kopana ni matata a ka zazi, likuka za Bibele li swanela ku lu zamaisa ilikuli lu eze likatulo ze nde mi lu ambuke malaba a lifasi le. Musebezi wa bubeli ki wa kuli, litaelo za Mulimu li sebeza sina liseli la mwa nzila ya luna. Kacwalo li lu tusa ku eza liketo ze lumelelana ni sepo ya luna ya ku pila ku ya ku ile mwa Paradaisi ya sepisize Mulimu. Bakeñisa kuli mwa nzila ye lu zamaya ku yona ku na ni liseli, lu ka bona hande ko lu libile, mi lu ka lemuha ze kona ku zwa mwa likezo za luna. (Maroma 14:21; 1 Timotea 6:9; Sinulo 22:12) Ha lu nyakisiseñi ka butungi ka mo manzwi a Mulimu a mwa Bibele a kona ku bela lumonyi lwa mwa mahutu a luna ni liseli la mwa nzila ya luna.
“Lumonyi Lwa mwa Mautu A Ka”
6. Manzwi a Mulimu a ba lumonyi lwa mwa mahutu a luna mwa miinelo ye cwañi?
6 Ka zazi ni zazi lu ezanga likatulo. Likatulo ze ñwi li banga ze nyinyani, kono fokuñwi lu kopananga ni miliko ya ku eza buhule, ya ku sa sepahala, ni ya ku ikenya mwa litaba za naha. Kuli lu kone ku tiyela hande miliko yeo, lu tokwa ku ba ni “kutwisiso ya ku keta ze nde ku ze maswe.” (Maheberu 5:14) Ha lu bata zibo ye nepahezi ya Linzwi la Mulimu ni ku shemuna kutwisiso ya luna ya likuka za hae, lu ka luta lizwalo la luna ilikuli lu kone ku eza likatulo ze ka tabisa Jehova.—Liproverbia 3:21.
7. Mu taluse muinelo o kona ku tahisa kuli Mukreste a swalisane ni b’a beleka ni bona ba ba sa lumeli.
7 Ha mu nyakisise mutala wo. Kana mu bata hahulu ku tabisa pilu ya Jehova? (Liproverbia 27:11) Haiba ki cwalo, mu eza hande hahulu. Kono mu nahane ka nakonyana kuli be mu beleka ni bona ba mi fa tikiti ilikuli mu ye ni bona kwa lishengo la lipapali. Ba belekisana hande ni mina kwa mubeleko mi ba bata ku yo ishumusa hamoho ni mina. Mu kana mwa ikutwa kuli be mu beleka ni bona bao hasi batu ba ba maswe. Mi mwendi mane ba ezanga lika ze nde. Mu ka ya ni bona kamba mu ka hana? Kana ku ya ni bona ku kona ku labula butata? Linzwi la Mulimu li kona ku mi tusa cwañi kuli mu eze katulo ye nde mwa taba ye?
8. Ki likuka mañi za mwa Mañolo ze kona ku lu tusa ku utwisisa taba ya ku swalisana ni ba bañwi?
8 Mu nyakisise likuka za mwa Mañolo li sikai. Sikuka sa pili se mu kona ku hupula si kwa 1 Makorinte 15:33, se si li: “Litwaelano ze maswe li sinya mikwa ye minde.” Kana ku latelela sikuka se ku talusa kuli ha lu swaneli ku swalisana ni hanyinyani ni ba ba sa lumeli? Kalabo ya mwa Mañolo ki ya kuli batili. Esi mane muapositola Paulusi n’a bonisize lilato kwa “batu kaufela,” ku kopanyeleza cwalo ni ba ba sa lumeli. (1 Makorinte 9:22) Bukreste bu tokwa kuli lu bonise lilato ku ba bañwi, ku beya cwalo ni bo lu sa lapeli ni bona. (Maroma 10:13-15) Kaniti, haiba lu sa swalisani ni batu be lu kona ku tusa, lu ka latelela cwañi kelezo ya kuli “lu eze batu kaufela hande”?—Magalata 6:10.
9. Ki kelezo mañi ya mwa Bibele ye lu tusa ku ziba maciñekelo mwa silikani sa luna ni be lu beleka ni bona?
9 Kono ku swalisana ni ye lu beleka hamoho ni yena kwa shutana ni ku ba mulikan’a hae yo mutuna. Fa hape kona fo lu tokwa ku latelela sikuka se siñwi sa mwa Mañolo. Muapositola Paulusi n’a elelize Bakreste kuli: “Mu si ke mwa lwala coko i liñwi ni ba ba sa lumeli.” (2 Makorinte 6:14) Pulelo ya kuli, “mu si ke mwa lwala coko i liñwi” i talusañi? Litoloko ze ñwi za Bibele li toloka pulelo yeo kuli, “mu si ke mwa twaelana hahulu,” “mu si liki ku sebelisana hahulu,” kamba “mu tuhele ku itama silikani se si sa lukeli.” Ki mwa miinelo mañi m’o silikani ni ye mu beleka ni yena si ba se si sa lukeli? Mutu u kona ku fita cwañi fa ku lwala coko i liñwi ni ba ba sa lumeli? Linzwi la Mulimu, Bibele, la kona ku mi zamaisa mwa muinelo wo.
10. (a) Jesu n’a ketile cwañi balikani ba hae? (b) Ki lipuzo mañi ze ka tusa mutu ku keta balikani ba bande?
10 Mu nyakisise mutala wa Jesu, ili ya lata batu ku zwa fela fo ba bupelwa. (Liproverbia 8:31) Ha n’a li fa lifasi, Jesu n’a itamile silikani se situna hahulu ni balateleli ba hae. (Joani 13:1) Mane n’a ‘latile’ mutu ya n’a si ka utwisisa hande lika za kwa moya. (Mareka 10:17-22) Kono hape Jesu n’a ketile hande ka tokomelo balikani ba hae. N’a si ka itama silikani ni batu be ne ba sa tabeli luli ku eza tato ya Ndat’ahe. Nako ye ñwi, Jesu n’a bulezi kuli: “Balikani ba ka ki mina, ha mu eza se ni mi laela kaufela.” (Joani 15:14) Ki niti kuli fokuñwi mwa kona ku utwana ni ye mu beleka ni yena. Kono mu swanela ku ipuza kuli: ‘Kana mutu yo wa tabela ku eza za laela Jesu? Kana mutu yo u bata ku ituta za Jehova, yena ya n’a lu laezi Jesu kuli lu mu lapele? Kana u na ni muzamao o munde o swana ni wo ni na ni ona ka ku ba Mukreste?’ (Mateu 4:10) Ha mu nze mu ambolisana ni be mu beleka ni bona ni ku ba taluseza kuli lu swanela ku latelela likuka za Bibele, mu ka fumana likalabo kwa lipuzo zeo.
11. Ki mwa miinelo mañi mo lu tokwa ku zamaiswa ki manzwi a Mulimu?
11 Manzwi a Mulimu a kona ku ba lumonyi lwa mwa mahutu a luna mwa miinelo ye miñwi ye miñata. Ka mutala, Mukreste ya sa beleki u kona ku fumana musebezi wa n’a bata hahulu. Kono musebezi wa teñi ki o patehisa, mi haiba a lumela ku kena musebezi wo, ha na ku fumanehanga kwa mikopano ya Sikreste ye miñata mi h’a na ku ezanga ni misebezi ye miñwi ya mwa bulapeli bwa niti. (Samu 37:25) Mukreste yo muñwi u kona ku komiwa ki mukwa wa ku buhanga lika za ku itabisa ze lwanisa likuka za Bibele. (Maefese 4:17-19) Mi yo muñwi yena ki mutu ya tongoka ka nako kaufela bakeñisa mifokolo ya balumeli ba bañwi. (Makolose 3:13) Mwa miinelo ye kaufela, haike Linzwi la Mulimu li be lumonyi lwa mwa mahutu a luna. Kaniti, ku latelela likuka za Bibele ku kona ku lu tusa ku tiyela butata bufi kamba bufi bo lu ka kopana ni bona mwa bupilo. Linzwi la Mulimu “li na ni tuso kwa ku luta, ni ku kolisa, ni ku nyaza, ni ku hulisa ka ku luka.”—2 Timotea 3:16.
“Ki Liseli La mwa Nzila Ya Ka”
12. Manzwi a Mulimu a swana cwañi ni liseli le li monyeha mwa nzila ya luna?
12 Samu 119:105 hape i bulela kuli manzwi a Mulimu a kona ku ba liseli la mwa nzila ya luna, ku monyeha mwa nzila ye lu zamaya ku yona. Ha lu yo mwa simbwi ka ze ka ezahala kwapili, kakuli Bibele i talusa libaka lika ze maswe ha li ezahala mwa lifasi mi i bonisa ni ko li libile lifasi. Lwa ziba kuli lu pila mwa “mazazi a maungulelo” a lifasi le li maswe le. (2 Timotea 3:1-5) Ku ziba ze ka ezahala kwapili ku swanela ku ama mo lu pilela kacenu. Muapositola Pitrosi n’a ñozi kuli: “Cwale linto zeo kaufela sina ha li na ni ku fela, ni li, mu lukela ku pila ka mizamao ye kenile hahulu, ni ka bulapeli; inze mu libelezi ni ku akufisa lizazi la Mulimu.”—2 Pitrosi 3:11, 12.
13. Ku ziba hande nako ye lu pila ku yona ku ama cwañi munahano wa luna ni mo lu pilela?
13 Munahano wa luna ni mo lu pilela li swanela ku bonisa hande kuli lu na ni sepo ye tuna ya kuli “lifasi la fela, ni takazo ya lona.” (1 Joani 2:17) Ku latelela liketelelo za mwa Bibele ku ka lu tusa ku itomela likonkwani ze nde za kwapili. Ka mutala, Jesu n’a ize: “Mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.” (Mateu 6:33) Mikulwani ba bañata ba eza hande hahulu ka ku bonisa tumelo mwa manzwi a Jesu ka ku ndongwama sebelezo ya nako kaufela! Batu ba bañwi ni mabasi a mañwi ba itatezi ku tutela kwa libaka ko ku tokwahala hahulu bashaeli ba Mubuso.
14. Lubasi lo luñwi lwa Sikreste ne lu ezizeñi kuli lu pete ze ñata mwa bukombwa?
14 Mu nyakisise mutala wa lubasi lwa Sikreste lwa batu ba bane ba ne ba tutile ku zwa kwa United States ni ku ya kwa Dominican Republic, ku yo sebeleza puteho ye mwa tolopo ye na ni bayahi ba 50,000. Mwa puteho yeo ku na ni bahasanyi ba Mubuso ba ba bat’o ba 130. Kono ka la 12 April, 2006, batu ba ba bat’o ba 1,300 ne ba fumanehile kwa Kupuzo ya lifu la Kreste! Simu ya mwa tolopo yeo ‘i buzwize, i libelela ku kutulwa.’ Mi mwa likweli fela ze ketalizoho, lubasi l’o ne lu zamaisa lituto za Bibele ze 30. (Joani 4:35) Wa munna u li: “Mwa puteho ku na ni mizwale ni likaizeli ba 30 ba ba tutezi kwanu kuli ba to lu tusa. Ba 20 ku bona ba zwa kwa United States, mi ba bañwi bona ba zwa kwa Bahamas, Canada, Italy, New Zealand, ni Spain. Ne ba tile inge ba na ni mafulofulo a ku abana mwa bukombwa mi ba tusize hahulu mizwale ba mwa puteho ye kuli ni bona ba tukufalelwe musebezi wo.”
15. Ki limbuyoti mañi ze mu bile ni zona ka ku eza pili za Mubuso mwa bupilo bwa mina?
15 Kwa utwahala kuli ba bañata ha ba koni ku tuta kuli ba yo sebeleza kwa sibaka se si mwa butokwi. Kono ba ba kona ku tuta, kamba ba ba kona ku cinca miinelo ya bona kuli ba kone ku tuta, kaniti ba ka ba ni limbuyoti ze ñata ka ku yo sebeleza ko ku na ni butokwi. Mi ku si na taba ni ko mu kutaleza, mu sebeleze Jehova ka m’ata a mina kaufela ilikuli mu si ke mwa icawisa limbuyoti za Mulimu. Haiba mu eza pili za Mubuso mwa bupilo bwa mina, Jehova u sepisa kuli u ka mi “sululela mbuyoti, mane sibaka mo mu ka i amuhelela si taele.”—Malaki 3:10.
Ku Tusiwa ki Ketelelo ya Jehova
16. Lu ka tusiwa cwañi ha lu ka zamaiswa ki manzwi a Mulimu?
16 Sina mo se lu nyakisiselize, manzwi a Jehova a lu zamaisa ka linzila ze peli. A sebeza sina lumonyi lwa mwa mautu a luna, ili ku lu tusa ku zwelapili ku zamaya mwa nzila ye lukile mi a lu etelela ha lu eza likatulo. Mi hape a swana sina liseli le li monyeha mwa nzila ya luna, ili ku lu tusa ku bona hande ze kwapili. Mi bakeñisa liseli leo, lu ka kona ku mamela temuso ya Pitrosi, ye li: “Mu itame mwa teka ya kutwisiso ya mina, mu iswale, mi mu libelele ka sepo ye tiile, sishemo se mu ka tisezwa, nako y’a ka taha Jesu Kreste.”—1 Pitrosi 1:13.
17. Tuto ya Bibele i kona ku lu tusa cwañi ku latelela ketelelo ya Mulimu?
17 Ku si na ku kakanya, Jehova ki yena luli ya lu supeza nzila ya ku zamaya ku yona. Kono puzo ki ya kuli, kana lu ka ya mwa nzila ya lu supeza ku zamaya ku yona? Kuli mu utwisise hande ketelelo ya Jehova, mu ikatulele ku balanga Bibele ka zazi. Mu nahanisisange ze mu bala, mu likange ku utwisisa kuli tato ya Jehova ki ifi, mi mu nahane ka mo mu kona ku sebeliseza taba ye mu balile mwa bupilo bwa mina. (1 Timotea 4:15) Mi ha mu eza likatulo, mu itusise “m’ata a mina a ku nahana.”—Maroma 12:1, NW.
18. Linzwi la Mulimu ha li lu zamaisa, ki limbuyoti mañi ze lu ka fiwa?
18 Haiba Linzwi la Mulimu li lu zamaisa, likuka za Bibele li ka lu monyehela mi li ka lu etelela ha lu eza likatulo za kuli ki ifi nzila ye nde ye lu lukela ku zamaya ku yona. Lu na ni sepo ya kuli manzwi a Jehova a’ ñozwi a kona ku talifisa “ya si na kutwisiso.” (Samu 19:7) Bibele ha i lu zamaisa, lu ka ba ni lizwalo le li twekile mi lu ka ba ni tabo ye tiswa ki ku tabisa Jehova. (1 Timotea 1:18, 19) Mi haiba manzwi a Mulimu a lu zamaisa ka zazi, Jehova u ka lu kampweka mbuyoti ye tuna, yona ya bupilo bwa ku ya ku ile.—Joani 17:3.
Kana Mwa Hupula?
• Ki kabakalañi ha lu swanela ku zamaiswa ki Jehova Mulimu?
• Manzwi a Mulimu a kona ku ba cwañi lumonyi lwa mwa mahutu a luna?
• Manzwi a Mulimu a kona ku ba cwañi liseli la mwa nzila ya luna?
• Tuto ya Bibele i kona ku lu tusa cwañi ku latelela ketelelo ya Mulimu?
[Lipuzo za Tuto]
[Siswaniso se si fa likepe 15]
Ki mwa miinelo mañi m’o silikani ni ya sa lumeli si ba se si sa lukeli?
[Siswaniso se si fa likepe 16]
Balikani ba Jesu ba batuna ne li batu ba ne ba eza tato ya Jehova
[Maswaniso a fa likepe 17]
Kana mo mu pilela ku bonisa kuli mu eza pili za Mubuso?