Sisupo sa Butokwa Hahulu Ku Fita Sisupo sa Lihalimu

IBATA iba mwa sicaba ni sicaba ku na ni mashitanguti a’ talusa za lisupo za lihalimu. Mwa Sikuwa ba li: Lihalimu ha li fubelela manzibwana, mufuluhi a wabelwe; mi ha li fubelela kakusasana, mufuluhi a talife. Licaziba li na ni mabaka a talusa se si tisanga kuli ku ezahale sina mo li taluseza lishitanguti leo.

Ni mwa miteñi ya Jesu batu ne ba ziba ku lemuha lisupo za lihalimu ni taluso ya zona. Jesu na bulelezi Majuda ba bañwi kuli: “Swalala ha i tile, mu li: Bu ka sa hande, kakuli lihalimu ki le lifubelu. Mi ka nako ya kakusasana mu li: Kacenu pula i ka luma, kakuli lihalimu li bonahala bufubelu bo bunsu. Mu ziba ku lemuha sisupo sa lihalimu.” Kono Jesu na ekelize ku bulela nto ye komokisa, a li: “Mi ha mu koni ku lemuha sisupo sa linako.”—Mateu 16:2, 3.

Ki sifi sona “sisupo sa linako” seo? N’e li bupaki bo bu namile bo ne bu bonisa kuli Jesu ne li yena Mesia wa niti ya na lumilwe ki Mulimu. Likezo za Jesu ne li lemuseha hande sina bufubelu bwa lihalimu. Kono buñata bwa Majuda ne ba keshebisize sisupo se ne si paka kuli Mesia na tile—sona sisupo sa butokwa ku fita sisupo sa lihalimu.

Ni kacenu ku na ni sisupo sa butokwa hahulu se lu tokwa ku utwisisa ku fita ku lemuha fela sisupo sa lihalimu. Jesu na bulezi cimo kuli lifasi le li maswe le, li ka fela kihona ku ka taha lifasi le linca. Na kolohanyize likezahalo ze ne ka bonisa kuli ku tuha ku ba cwalo. Ze ñwi za zona likezahalo zeo ki lindwa za lifasi kamukana ni matala. Jesu na ize zeo ha li ka bonahala, mu zibe kuli nako ya Mulimu ya ku felisa bumaswe i fakaufi.—Mateu 24:3-21.

Kana mwa lemuha “sisupo sa linako” seo?