Tuso Ye Zwa ku ‘Mulimu, Yena Ya Tiisa’

LILIMO ze bat’o ba ze 2,000 kwamulaho k’o, muapositola Paulusi n’a talusize kuli Jehova ki yena “[Muñ’a] ku tiisa ni ku kutaza.” (Maroma 15:5) Bakeñisa kuli Bibele i lu kolwisa kuli Jehova ha cincangi, lu na ni buikolwiso bwa kuli Mulimu u sa tiisa ba ba mu sebeleza ni la kacenu le. (Jakobo 1:17) Mane Bibele i patulula kuli Jehova u tiisanga ba ba nyandile ka linzila ze fitana-fitana. Ki lifi ze ñwi za linzila zeo? Mulimu u fanga m’ata ku ba ba lapela ku yena, ku mu kupa tuso. Mulimu hape u susuezanga Bakreste ba niti ku yo tiisa balumeli sina bona. Jehova hape u ñozi litaba ze omba-omba mwa Linzwi la hae, ili litaba ze kona ku tiisa ba ba shwezwi ki bana ba bona. Ha lu nyakisiseñi linzila ze talu zeo, mi lu li nyakisise i liñwi ka i liñwi.

‘Jehova A Mu Utwa’

Mulena Davida n’a ñozi cwana ka za Jehova, yena Mubupi wa luna: “Mu sepe Mulimu ka linako kaufela, mina macaba, mu sululele fapil’a hae lipilu za mina, ku luna Mulimu ki sisabelo.” (Samu 62:8) Ki kabakalañi Davida ha n’a sepile Jehova cwalo? Yena Davida ka sibili n’a ipulezi kuli: “Mutu ki yo, ya n’a maibile, a huweleza, mi [Muñ’a] Bupilo a mu utwa, mi a mu lamulela kwa liziyezi za hae kaufela.” (Samu 34:6) Mwa manyando a hae kaufela, Davida n’a lapelanga ku Mulimu, mi Jehova n’a mu tusanga. Davida n’a fitile fa ku lemuha kuli Mulimu n’a ka mu tiisa ni ku mu tusa mwa liziyezi za hae.

Bashemi ba ba shwezwi ki bana ba bona ba swanela ku ziba kuli Jehova u ka ba tiisa, sina  mwa n’a tiiselize Davida. Ba swanela ku lapelanga ku Mulimu “ya utwa milapelo” inze ba na ni sepo ya kuli u ka ba tusa luli. (Samu 65:2) Bo William ba ba bulezwi mwa taba ye felile, ne ba ize: “Ku bile ni linako ze ni ikutwile kuli ha ni koni ku pila ku si na mwan’a ka, mi ni kupile tuso ku Jehova. Mulimu u ni file m’ata a ku zwelapili ku pila.” Ni mina haiba mu lapela ku Jehova ka tumelo, Muambakani ya pahami Jehova u ka mi tiisa. Ha mu swaneli ku kakanya kakuli Jehova Mulimu ki yena ya sepisize batanga ba hae kuli: “Na, [Muñ’a] Bupilo Mulimu wa hao, ni ku sweli kwa lizoho la bulyo, mi ni ku bulelela, ni li: Si sabi, ni ka ku tusa.”—Isaya 41:13.

Tuso Ye Zwa kwa Bakreste Ba Bañwi

Hañata bashemi ha ba shwezwi ki mwan’a bona, ba batanga ku ina ba nosi, kuli ba lile mwan’a bona y’o. Kono ku sa bonana ni ba bañwi ka nako ye telele ha ku na ku ba tusa se siñwi. Ka ku ya ka Liproverbia 18:1, “mutu ya sa lati siango ni ba bañwi” u inyandisa fela. Kacwalo, ba ba lila ba si ke ba inanga fela ba nosi, ba sa amboli ni ba bañwi.

Balikani be lu lapela ni bona ba tusanga ba ba ziyelehile. Liproverbia 17:17 i li: “Mulikan’a mutu wa mu lata ka nako ni nako, u pepezwi kuli a be mwanahabo mwa liziyezi za hae.” Bo Lucy, ba ba bulezwi mwa taba ye felile, ne ba tiisizwe ki Bakreste ba bañwi ha ne ba shwezwi ki mwan’a bona. Ne ba bulezi cwana ka za balumeli sina bona: “Ne ba tahanga ku to ni potela, ni ko ne ba sa bulelangi ze ñata fokuñwi. Kaizeli yo muñwi n’a ni potelanga fa mazazi e ne ni banga ni nosi. N’a zibanga kuli fa mazazi ao ne ni inanga fa ndu inze ni lila, mi n’a tahanga ku to lila ni na. Kaizeli yo muñwi yena n’a ni lizezanga luwaile zazi ni zazi ku ni tiisa. Ba bañwi bona ne ba lu bizezanga kwa ndu ya bona kwa lico, mi ba sa zwelapili ku eza cwalo.”

Nihaike kuli butuku bo butuna bo ba utwanga bashemi ba ba shwezwi ki bana ba bona ha bu felangi kapili, ku lapela ku Mulimu ni ku eza siango ni Bakreste ba bañwi kwa kona ku ba tiisa hahulu. Bakreste ba bañata ba ba latehezwi ki bana ba bona ba lemuhile kuli Jehova ha ba yumbangi simulamu. Kaniti luli “ba ba lobehile lipilu, [Jehova] wa  ba folisa, u tama litombo za bona.”—Samu 147:3.

Litaba za mwa Bibele Ze Omba-Omba

Kwand’a tapelo ni siango ni ba bañwi, Linzwi la Mulimu ni lona la kona ku tiisa ba ba lila. Litaba ze ñozwi mwa Bibele li patulula kuli Jesu u na ni takazo ni m’ata a ku felisa butuku bo ba utwanga bashemi ba ba shwezwi ki bana ba bona, ka ku zusa bana ba bona kwa bafu. Litaba zeo li omba-omba hahulu ba ba lila. Ha lu nyakisiseñi ze peli ku zona.

Luka kauhanyo 7 i talusa ze ne ezahezi muta Jesu n’a katani batu ba ba lwezi mufu mwa munzi wa Naine. Batu bao ne ba ya ku yo buluka mwana a nosi wa musali wa mbelwa. Timana 13 i bulela kuli: “Mulena h’a mu bona, a mu utwela butuku, mi a mu bulelela, a li: U si ke wa lila.”

Ki batu ba sikai ba ba kona ku taluseza m’ahe mwana ya shwile kuli a tuhele ku lila. Ki kabakalañi Jesu ha n’a bulezi cwalo? Kakuli n’a ziba kuli n’a tuha a felisa butuku bwa musali y’o. Likande leo li zwelapili kuli: “[Jesu] a sutelela kwa lukutu; ba ba lu lwezi ba yema; mi Jesu a li: Mucaha, na ku bulelela, Zuha! Mufu a zuha, mi a kala ku bulela; mi Jesu a mu kutiseza ku m’ahe.” (Luka 7:14, 15) Ka nako yeo, musali y’o mwendi n’a lilile hape, kono isi kabakala masitapilu a ku latehelwa ki mwan’a hae kono kabakala tabo ya ku bona mwan’a hae ya n’a shwile.

Nako ye ñwi hape Jesu n’a atumezwi ki Jairusi ya n’a til’o mu kupa ku folisa mwan’a hae wa lilimo ze 12 ya n’a kula hahulu. Kono  ku si ka fita nako, Jairusi a bihelwa kuli mwan’a hae u tokwahalile. Taba yeo ya tomohisa maswe pilu ya Jairusi, kono Jesu a mu bulelela kuli: “Si sabi, u lumele fela!” Jesu ha fita mwa ndu ya Jairusi, a ya kwa situpu. A swala mwanana ya n’a shwile ka lizoho, mi a li ku yena: “Mwanana na ku bulelela, zuha.” Kwa ezahalañi? “Mwanana a zuha kapili, mi a zamaya.” Bashemi ba hae ne ba ikutwile cwañi? “Ba kala ku komoka hahulu” ka tabo ye tuna. Jairusi ni musal’a hae ha ba kumbata mwan’a bona, ne ba bile ni tabo ye tuna hahulu. N’e li inge ne ba lola fela.—Mareka 5:22-24, 35-43.

Litaba ze cwalo zeo za mwa Bibele li bonisa bashemi ba ba shwezwi ki bana ba bona kacenu ze ka ezahala kwapili. Jesu n’a ize: “Nako ya ta, mo ba ba li mwa mabita kaufela, ba ka utwa linzwi la hae, mi ba zwe.” (Joani 5:28, 29) Mulelo wa Jehova ki wa kuli Mwan’a hae a to zusa ba ba shwile. Banana ba ba sa konwi ku balwa ba ba shwile ba ka “utwa linzwi la hae” ha ka li ku bona: ‘Na mi bulelela, ha mu zuhe.’ Banana bao hape ba ka bulela ni ku zamaya. Mi sina Jairusi ni musal’a hae, bashemi ba bana bao ba ka “komoka hahulu” ka tabo ye tuna.

Haiba mu shwezwi ki mwan’a mina, mu zibe kuli Jehova wa kona ku felisa matomola a mina ka ku zusa mwan’a mina y’o kwa bafu. Kuli mu be ni tohonolo ya ku iponela makazo yeo, mu utwe kelezo ya muñoli wa Samu ya n’a ize: “Mu bate [Muñ’a] Bupilo, ni mata a hae; mu bate pata ya hae kamita. A mu hupule misebezi ya hae ye komokisa, y’a ezize, ni ze babazeha za hae.” (Samu 105:4, 5) Ee, mu sebeleze Mulimu wa niti, yena Jehova, ni ku mu lapela ka nzila y’a bata.

Ki ifi tuso ye mu ka fumana cwale haiba mu ‘bata Jehova’? Mu ka fumana m’ata kabakala ku lapela ku Mulimu, mu ka tiiswa ki lilato la Bakreste ka mina, mi mu ka susuezwa ha mu ka ituta Linzwi la Mulimu. Mi hona cwale-cwale fa, mu ka iponela ‘misebezi ye komokisa’ ya ka eza Jehova ili ye ka mi tusa ku ya ku ile hamoho ni bana ba mina be ne ba shwile.

[Mbokisi fa likepe 5]

“Mu Ni Tiseze Musali Yani Ya Shwezwi ki Bana ba Hae Ba Babeli”

Bo Kehinde ni bo Bintu ki Lipaki za Jehova ba ba pila kwa Nigeria. Ne ba shwezwi ki bana ba bona ba babeli mwa kozi ya fa mukwakwa. Ku zwa fo ba shwela bana ba bona, ba bile mwa matomola a matuna. Nihakulicwalo, ba tiisizwe ki sepo ya bona ku Jehova, mi ba zwelapili ku kutaza taba ye nde ku ba bañwi.

Ba bañwi ne ba komokile ha ba bona kuli bo Kehinde ni bo Bintu ba sa na ni sepo ni m’ata. Zazi le liñwi, basali ba ba bizwa bo Mrs. Ukoli ba kupa balikani ba bo Bintu kuli: “Mu ni tiseze musali yani ya shwezwi ki bana ba hae ba babeli, ya sa zwelapili ku kutaza ni ka nako ye. Ni bata kuli a to ni taluseza se si mu tiisa.” Bo Bintu ha ba fita kwa ndu ya bo Mrs. Ukoli, ba buziwa kuli: “Musali tuwe u kutalezañi za Mulimu kanti yena Mulimu yo ki yena ya bulaile bana ba hao. Mulimu u bulaile ni mwan’a ka a nosi. Mi ku zwa fa bulaela mwan’a ka, ha ni na taba ni Yena.” Bo Bintu ne ba itusisize Bibele ku talusa libaka le ba shwela batu ni libaka ha lu kona ku ba ni sepo ya kuli bafu ba ka zuha.—Likezo 24:15; Maroma 5:12.

Hamulaho, bo Mrs. Ukoli ba bulela kuli: “Ne ni nahana kuli Mulimu ki yena ya bulayanga batu. Se ni ziba niti cwale.” Ba ikatulela ku ituta Bibele ni Lipaki za Jehova kuli ba zibe ze ñata ka za lisepiso za Mulimu.

[Mbokisi fa likepe 6]

‘Ni Bata ku Tusa, Kono Ha Ni Zibi Mwa ku Ezeza’

Mutu ha timela, bashemi ba hae, banyani ni bahulwani ba hae ba lobehanga hahulu pilu, kono balikani ba bona ha ba zibangi za ku eza. Ba batanga ku tusa lubasi kono ba sabanga kuli ba ka swana ba bulela kamba ku eza lika ze ka ekeza fela kwa butuku bwa lubasi l’o. Liakalezo ze latelela li ka tusa ba ba ikutwanga kuli ba bata ku tusa, kono ha ba zibi mwa ku ezeza.

❖ Mu si ke mwa shengoka ba ba shwezwi kabakala kuli ha mu zibi hande za ku bulela kamba ku eza. Ku yo ba lekula fela ku ka ba tiisa. Ha mu si na za ku bulela, mwa kona ku ba kumbata ni ku bulela ku zwelela kwa pilu mo mu ikutwela. Ku eza cwalo ku bonisa kuli mwa ba utwela butuku luli. Esi mwendi mu saba kuli ha mu ka lila, mu ka ekeza fela kwa butuku bwa bona? Bibele i li: “Mu lile ni ba ba lila.” (Maroma 12:15) Ha mu ka lotisa mioko, ba ka bona kuli ni mina mu lobehile pilu mi ku ka ba omba-omba.

❖ Mu ikupulise za ku eza. Mwa kona ku lukiseza lubasi sico. Kamba mwa kona ku ba tapiseza mikeke ye tezi masila. Mi mwa kona ku yo ba ngela lika ze tokwahala fa lapa. Mu si ke mwa li: “Ha mu ka tokwa se siñwi mu ka ni zibisa.” Mu bulele hande mu mane, bashemi ba bañata ba ba shwezwi ha ba utwa manzwi ao, ba ikutwanga kuli mu patehile hahulu mi ha mu koni ku ba tusa. Kono neikaba hande ku buza kuli: “Ki lika mañi ze ni kona ku mi tusa ku eza ka nako ye?” Mi ha se ba mi taluselize mu eze ka mo ba kupezi. Kono mu si ke mwa kena mwa libaka za ndu ze sa swaneli ku keniwa kamba ku icocomeza mwa litaba za bona za ka butu.

❖ Mu si ke mwa itusisa lipulelo ze cwale ka za kuli: “Na ziba mo mu ikutwela.” Mañi ni mañi ku na ni mwa ikutwelanga ha ku shwile mutu ya na lata. Ki niti, mwendi ni mina mu kile mwa shwelwa ki mwana, kono ha mu koni ku ziba luli mo ba ikutwela.

❖ Ku ka fita nako ye telele kuli lubasi lu yoyelwe hape. Kacwalo mu zwelepili ku ba tusa ka mo mu konela kaufela. Ba ba shwezwi ba tokomelwanga hahulu, kono ha se ku fitile mazazi batu ba tuhelanga ku ba lekula. Mu iteekele ku ba tusa mwa lisunda ni likweli ze sa taha. *

[Litaluso za kwatasi]

[Maswaniso a fa likepe 7]

Litaba za mwa Bibele li bonisa kuli Jesu u na ni m’ata ni takazo ya ku zusa banana kwa bafu