Ki Kabakalañi Ha Lu Lukela ku Kopananga Hamoho?

KA KU sa libelela, bo Christine ba yubekwa ki bo munn’a bona hamulaho wa ku nyalana ka lilimo ze 20. Bo Christine ba siyala mwa buinosi, mi ne ba uta bana ba bashimani ba supile ni wa musizana a li muñwi. Bana bao ne li ba lilimo ze 7 ku isa ku ze 18. Bo Christine ba li: “Cwale ne ni na ni ku ezanga likatulo ze tuna ni li nosi. Ne ni zwafanga bakeñisa misebezi ye ne ni na ni ku peta mi ne ni batanga hahulu ku tusiwa ni ku fiwa ketelelo.” Bo Christine ne ba fumani kai tuso ye ne ba bata?

Bo Christine ba li: “Na ni lubasi lwa ka ne lu nga mikopano ku ba mapilelo a luna. Ha ne lu fumanehanga kwa mikopano, ne lu tusiwanga ki balikani ba luna mi ne lu fiwanga ketelelo ya mwa Linzwi la Mulimu. Ku fumanehanga kamita kwa mikopano ne ku lu tusize hahulu mwa lubasi lwa luna.”

Mwa “linako ze tata” ze, kaufela luna lu ka kopana ni litiko ze fapahana-fapahana. (2 Timotea 3:1) Sina bo Christine, mwendi ni mina mu nga mikopano ya Lipaki za Jehova ku ba mapilelo a mina, ili kalulo ya butokwa hahulu mwa bulapeli bwa mina ku Jehova. Ku si na ku kakanya, mikopano ya puteho ye ketalizoho ye banga teñi sunda ni sunda i mi susuezanga ku lata hahulu Mulimu, i tiisanga sepo ya mina, mi i mi fanga ketelelo ya mwa Bibele ya mwa ku tiyela litiko.

Kono ku fumanahenga kwa mikopano kamita ku t’ata ku ba bañwi. Ba katalanga hahulu mazibwana, mi cwale ha ba nahana kuli ba swanela ku apala hande ni ku zamaya ku liba kwa mikopano, ba fitanga fa ku zwafa luli. Fokuñwi ba bañwi ba lemuhanga kuli musebezi wa bona u ba patehisanga hahulu mi ha ba bangi ni nako ya ku ya kwa mikopano. Kuli ba fumanehange kwa mikopano kamita, f’o ku talusa kuli cwale ba kana ba holanga pene ye nyinyani kamba mane nihaiba ku zwisiwa fa mubeleko. Ba bañwi bona ba kona ku yawa mikopano kakuli ba nahana kuli ku yo ishumusa ka lipapali ze ñwi cwalo ku ka ba katulusa hahulu ku fita ha ba ka ya kwa mikopano.

Kacwalo ki mabaka afi a butokwa a kona ku mi susueza ku fumanehanga kwa mikopano ya Sikreste? Mu swanela ku ezañi kuli mikopano i kone ku mi katulusa? Kuli lu fumane likalabo kwa lipuzo zeo, ha lu nyakisiseñi manzwi a mande a Jesu a kwa Mateu 11:28-30. Teñi ko, Jesu n’a ize: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka, mi  mu itute ku na; kakuli ni na ni musa ni pilu ye bunolo, mi mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.”

“Mu Tahe ku Na”

Jesu n’a ize: “Mu tahe ku na.” Nzila ye ñwi ye lu taha ka yona ku Jesu ki ka ku fumanehanga kwa mikopano kamita. Ku na ni libaka la butokwa ha lu swanela ku fumanehanga kwa mikopano, kakuli ka nako ye ñwi Jesu n’a bulezi kuli: “Mo ku na ni ba babeli kamba ba balalu ba ba kopani ka Libizo la ka, ni mwateñi mwahal’a bona.”—Mateu 18:20.

Mwa miteñi ya hae, Jesu n’a memile batu ba ba fapahana-fapahana kuli ba mu latelele. Mi batu bao ha ne ba ka eza cwalo ne ba ka ba ni tohonolo ya ku ba balikani ba hae ba batuna. Ba bañwi ne ba latelezi Jesu honafo fela. (Mateu 4:18-22) Kono ba bañwi bona ne ba si ka mu latelela bakeñisa kuli ne ba lata hahulu sifumu. (Mareka 10:21, 22; Luka 9:57-62) Jesu n’a bulelezi ba ne ba mu latelezi kuli: “Hasi mina mu ni ketile, kono ki na ni mi ketile.”—Joani 15:16.

Kreste ha sa shwile ni ku zuha kwa bafu, n’a sa inangi hamoho ni balutiwa ba hae sina mutu. Kono n’a sa li ni bona ka ku etelela musebezi o ne ba eza ni ku bona haiba ne ba latelela kelezo ya hae. Ka mutala, ha se ku fitile lilimo ze 70 ku zwa fa zuhela kwa bafu, Jesu n’a elelize ni ku babaza liputeho ze 7 za kwa Asia Minor. Za n’a bulezi, ne li bonisa kuli n’a ziba hande misebezi ye minde ni bufokoli bwa batu ba mwa liputeho zeo.—Sinulo 2:1–3:22.

Ni kacenu le, Jesu u sa iyakatwa hahulu za yo muñwi ni yo muñwi wa balutiwa ba hae. U sepisa kuli: “A mu bone, na, ni inzi ni mina ka mazazi kaufela, ku isa kwa mafelelezo a lifasi.” (Mateu 28:20) Cwale se lu pila mwa mazazi a maungulelo, kacwalo lu tokwa ku utwa manzwi a Jesu mi lu mu latelele. Nzila ye ñwi ye lu kona ku eza cwalo ka yona ki ka ku fumanehanga kwa mikopano kamita. Jesu u bata kuli lu mu teeleze mi ‘lu lutiwe ki yena’ ka lituto ni lingambolo za mwa Bibele ili ze fiwanga kamita kwa mikopano. (Maefese 4:20, 21) Kana mwa latelela manzwi a Jesu a li: “Mu tahe ku na”?

“Mina Kamukana Ba Ba Katezi, Ba Ba Imezwi”

Libaka le lituna ha lu lukela ku fumanehanga kwa mikopano ki la kuli lu yo susuezwa. (Maheberu 10:24, 25) Kaniti, buñata bwa luna lu ‘katezi mi lu imezwi’ ka linzila ze fapahana-fapahana. Mwendi mu imezwi ki lipilaelo za mwa bupilo, ze cwale ka makulanu. Ha mu ya kwa mikopano ya Sikreste mwa kona ku yo tiisana ni ba bañwi. (Maroma 1:11, 12) Ka mutala, mu ka utwa lipulelo ze tiisa kwa moya, mu ka hupuliswa za sepo ya mina ya mwa Bibele, mi mu ka bona ba bañwi ba ba tiyela litiko kono inge ba na ni tumelo. Zeo kaufela li ka mi tusa ku itiisa ni kuli mu si ke mwa bilaezwa hahulu ki makulanu a mina.

Ha mu teeleze ku za n’a bulezi musali yo muñwi wa Sikreste ya unjamwi ki butuku bo bu sa foli. Musali yo u talusa kuli: “Bakeñisa butuku bo ni kula, ni na ni ku inanga mwa sipatela ka linako ze ñwi. Hamulaho wa ku lukululwa mwa sipatela, ku tatanyana ku fumaneha kwa mikopano, kono ha ni lukeli ku shuta mikopano. Moya wa silikani ni lilato o ba bonisanga mizwale ni likaizeli u ekezanga kwa tabo ya ka, mi tuto ni ketelelo ya fanga Jehova ni Jesu li ni tusa hahulu ku ba ya tabile mwa bupilo.”

“Coko Ya Ka I Bubebe, mi Mulwalo Wa Ka Ha U Na Bukiti”

Mu lemuhe kuli mwa taba ye lu nyakisisa, Jesu n’a bulezi kuli: “Mu itute ku na.” Ha lu ituta ku Jesu, lu fita fa ku ba balutiwa ba hae, mi lu itwesa coko ya hae ha lu ineela ku Mulimu ni ku kolobezwa. (Mateu 28:19, 20) Haiba lu bata ku zwelapili ku ba balutiwa ba Jesu, lu swanela ku abananga kamita kwa mikopano. Kabakalañi? Kakuli ki kwa mikopano ya Sikreste ko lu itutela za Jesu, za lituto za hae, ni za mwa n’a lutelanga.

 Kreste u bata kuli lu shimbe mulwalo mañi? Ki mulwalo o swana ni wa lwezi, mi mulwalo wo ki tohonolo ya ku eza tato ya Mulimu. (Joani 4:34; 15:8) Ku utwa milao ya Mulimu ku tokwa buikatazo, kono mulwalo wo hasi o bukiti. Mulwalo wo u kona ku utwahala bukiti haiba lu kaliketa ku u shimba lu nosi. Kacwalo haiba lu lapela ku kupa moya wa Mulimu mi lu ifepa ka lico za kwa moya ze suliwanga kwa mikopano, Mulimu u ka lu fa ‘mata a matuna hahulu.’ (2 Makorinte 4:7) Ha lu itukiseza ni ku alaba ha lu li kwa mikopano, lu ka fita fa ku lata hahulu Jehova. Mi haiba lu sebeleza Mulimu ka libaka la kuli lwa mu lata, litaelo za hae “ha li na [ku ba ze] bukiti.”—1 Joani 5:3.

Batu kaufela ba kopananga ni matata a cwale ka mwa ku fumanela pene ya ku ipilisa ka yona, makulanu, ni matata a mañwi cwalo. Kono kuli lu kone ku kondisa mwa miinelo yeo, ha lu tokwi ku itinga fela fa butali bwa batu. Mikopano ya puteho i lu tusa kuli lu ‘si ke lwa bilaelanga,’ kakuli Jehova u lu fa ze lu tokwa mi u lu tusa ku tiyela matata. (Mateu 6:25-33) Kaniti, mikopano ya Sikreste ki nzila yeo Mulimu a lu bonisa ka yona lilato.

“Ni Na ni Musa ni Pilu Ye Bunolo”

Jesu n’a na ni mukwa wa ku yanga mwa sinagoge, ili mo ne ku balelwanga Linzwi la Mulimu. Ka nako ye ñwi ha n’a ile mwa sinagoge, Jesu a’ nga muputo wa Isaya mi a bala manzwi a li: “Moya wa Mulena u fahalimw’a ka, kakuli u ni tozize, kuli ni bulelele babotana Evangeli; u ni lumile ku folisa ba ba lobehile lipilu, ku zibisa ba ba hapilwe kuli ba lukuluhile, ni ba ba shwile meto kuli ba filwe ku bona, ba ba nyandiswa, ni ba kutise ba lukuluhile, mi ni zibise mwaha wa Mulena, wa sishemo.” (Luka 4:16, 18, 19) Ne li taba ye tabisa luli ku ikutwela Jesu ha talusa kuli: “Kacenu liñolo leo li ezahezi, mu nze mu ikutwela”!—Luka 4:21.

Jesu yena “Mulisana yo mutuna” ya na ni musa, u sa lisa balateleli ba hae kwa moya. (1 Pitrosi 5:1-4) Ka ketelelo ya Jesu, “mutanga ya sepahala, ya na ni kutwisiso” u ketile banna kuli ba be balisana mwa liputeho za Lipaki za Jehova lifasi kamukana. (Mateu 24:45-47; Tite 1:5-9) Banna bao ba ‘lisa puteho ya Mulimu’ ka musa mi ba toma mutala o munde ka ku fumanehanga kamita kwa mikopano. Mwa kona ku bonisa buitebuho bwa mina ku bona banna bao, ka ku fumanehanga kwa mikopano. Mi mu ka susueza ba bañwi ha mu ka fumanehanga teñi ni ha mu ka alabanga ka nako ya mikopano.—Likezo 15:30-33; 20:28; Maefese 4:8, 11, 12.

“Mu Ka Fumanela Mioya Ya Mina Pumulo”

Ha mu li kwa mikopano ya Sikreste, mu swanela ku ezañi kuli mu kone ku katuluha luli? Nzila ye ñwi ki ka ku latelela kelezo ya Jesu ye li: “Mu bone mo mu utwela.” (Luka 8:18) Batu be ne ba nyolelwa hahulu ku lutiwa, ne ba teelelize ka tokomelo ku Jesu. Ne ba mu kupile ku talusa linguli za hae, mi ha n’a ezize cwalo, ne ba fuyauzwi ka ku ba ni kutwisiso ye tuna.—Mateu 13:10-16.

Ni mina mwa kona ku likanyisa batu bao ba ne ba nyolelwa za kwa moya, ha mu ka teelezanga kwa lingambolo ze fiwa kwa mikopano ya luna. (Mateu 5:3, 6) Kuli mu si ke mwa nahana lika li sili, mu like ku latelela za talusa mubuleli. Mu ipuze lipuzo ze cwale ka ze: ‘Ni kona ku sebelisa cwañi taba ye mwa bupilo bwa ka? Ni kona ku itusisa cwañi taba ye kuli ni tuse ba bañwi? Ni ka talusa cwañi taba ye?’ Ku tuha f’o, mu apule mañolo a itusisa mubuleli kuli a koñomeke lisupo ze tuna. Ha mu teeleza ka tokomelo ha mu li kwa mikopano, mikopano i ka mi katulusa luli.

Hamulaho wa mukopano, mu ambolisane ni ba bañwi ze mu itutile. Mu bulele za taba ye nyakisisizwe ni mo i kona ku mi tuseza. Ku ambolisana hande ku kona ku tisa kuli mikopano i kone ku ba ye katulusa luli.

Ku si na kuliñi, lu na ni mabaka a mande ha lu swanela ku kopana hamoho. Ha se lu nyakisisize lituso ze, lu swanela ku ipuza kuli: ‘Kana na amuhela memo ya Jesu ye li: “Mu tahe ku na”?’

[Maswaniso a fa likepe 11]

Kana lika ze ñwi li mi palelwisa ku fumanehanga kwa mikopano?