“Mulena, Ne U Tibeziñi Lizebe?”

MANZWI ao n’a bulezwi ki Papa Benedict XVI, ha n’a potezi tolongo ya kale ya ba Nazi mwa Auschwitz, kwa Poland, ka la May 28, 2006. Kwa tolongo yeo ko ne ku bulaezwi Majuda ni batu ba bañwi b’a likiti-kiti, Papa Benedict XVI n’a ekelize ku bulela kuli: “Sibaka se, si tisa kuli mutu a ipuze lipuzo ze ñata! Puzo ye ipuziwanga hahulu ki ya kuli: Kanti Mulimu n’a inzi kai zeo ha ne li ezahala? Kiñi ha n’a ikuzelize fela? N’a tuheleziñi pulaotuna ye, mi n’a tuheleziñi bumaswe kuli bu tule? . . . Ha lu zweleñipili ku itilelela ku Mulimu kuli: Teeleza! U si ke wa libala kamunu, sibupiwa sa hao!”

Batu ne ba ngile manzwi a papa ao ka ku shutana-shutana. Ba bañwi ne ba ize, papa n’a si ka bulela lika za butokwa ze cwale ka sitoyo sa ku toya Majuda se ne si labuzi butata mwa Auschwitz. Ba bañwi bona ne ba ize kuli ka manzwi ao, papa n’a lika ku nyinyafaza manzwi a Papa John Paul II a ku kupa swalelo ya libi ze ne i ezizwe ki keleke ya Katolika. Filippo Gentiloni, mubihi wa makande wa Katolika, yena n’a ize: “Kona libaka ba bañata ba ne ba utwile puzo ya kuli Mulimu n’a inzi kai, ili puzo ye si na kalabo, ha ne ba ipuzelize fela puzo ye bunolo ya kuli: Kanti Pius XII n’a inzi kai?” Batu bao ne ba talusa kuli Papa Pius XII n’a si ka eza se siñwi ha ne ku ezahala pulao yeo.

Pulao yeo ni lipulao ze ñwi ze bile teñi mwa lifasi li paka fela taba ya kuli “mutu u na ni mata fahalimu a yo muñwi, ku mu eza maswe.” (Muekelesia 8:9) Mi Mubupi ha itibangi lizebe ha ku ezahala lika ze maswe zeo. Mwa Bibele, u patuluzi mabaka h’a tuhelezi bumaswe. Mulimu hape u lu kolwisize kuli ha si ka lu libala. Mane nako ya tuhelezi batu ku ipusa i tuha i fela honafa. (Jeremia 10:23) Kana mu bata ku ziba mulelo wa Mulimu kwa neku la batu? Lipaki za Jehova ba kona ku mi tusa ku ziba kalabo ya Bibele kwa puzo ye ne zingile Papa Benedict XVI.

[Manzwi a bañi ba siswaniso fa likepe 32]

Oświęcim Museum