Mwa Kona ku Ba ni Sepo mwa Lifasi Le Li Tezi Manyando Le

“BATU-TU fela se li bona ba ba tusa hahulu sicaba ni ku tatulula matata e ba kopana ni ona ba bañata.” Bill Clinton, ya na banga mueteleli wa naha America, ki yena ya na tumusize manzwi ao kwa mukopano o no bile teñi ka March 2006 kwa Ottawa, mwa Canada. Na unguzi ka ku bulela kuli ku zwa fo ku ezahalela kozi ya tsunami ka 2004 batu ba lifasi se ba na ni moya wa ku tusa ba bañwi, mi ka sepo, a bulela kuli “ku zwa haisali, ye ki yona nako ye ba itingile yo muñwi ku yo muñwi batu mwa lifasi.”

Kana lwa swanela ku libelela likozi kuli li kopanye batu mwa sibaka ni sibaka kuli ba beleke hamoho ilikuli za kwapili li konde? Kana taba ya kuli batu se ba ‘itinga yo muñwi ku yo muñwi’ i lu fa sepo ye tiile ya kuli kwapili ku ka ba ni kozo sakata ni buiketo bo bu inelela?

Simbule sa Sepo Sakata

Ze ezahezi hal’a lilimo ze fitelela 6,000 ze ba pilile batu li paka kuli batu ba sweli ku swabisana fela. Ku swanezi Bibele ha i lu eleza kuli: “Mu si ke mwa isepisa ka malena, nihaiba  ka bana ba batu, ba ba palelwa ku tusa.” (Samu 146:3) Ku sepa likopano za lifasi, sifumu sa lona, ni lisepiso za lona, ha ku na ko ku ka lu isa; lu ka swaba fela. Libaka? Kakuli “lifasi la fela, ni takazo ya lona.”—1 Joani 2:17.

Kono mwahal’a nako ye ba pilile batu Mulimu u bile yena sepo tota ya ba ba lukile. Bibele i mu biza “sepo ya Isilaele” mi hape i li ki yena ‘ye ne ba sepile Maisilaele’ ni “ye ne ba sepile bokuku a bona,” mi ku zwa f’o mwa Bibele ku na ni lipulelo ze ñata ze bulela za ku sepa Mulimu. (Jeremia 14:8; 17:13; 50:7) Mañolo kaniti a lu eleza ku ‘sepa Muñ’a Bupilo.’—Samu 27:14.

Liproverbia 3:5, 6 li lu susueza kuli: “U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao; u beye [Muñ’a] Bupilo mwa milelo ya hao kaufela, mi Yena u ka lukisa linzila za hao.” Mwa swanela luli ku sepa lisepiso za Mulimu cwalo kakuli Jehova Mulimu h’a fetuhi, wa itingwa, mi u talelezanga za bulezi. (Malaki 3:6; Jakobo 1:17) Mulimu u bata ku tusa mina, mi haiba mu zwelapili ku mamela ze li bulela Linzwi la hae, yona Bibele, li ka mi tusa ku kondisa mwa linako ze sabisa ze.—Isaya 48:17, 18.

Mutu ya utwa Mulimu ka pilu ya hae kaufela u ka kolwa sepiso ye: “Si sabi kakuli ni na ni wena. Si bilaeli kakuli ki Na Mulimu wa hao. Ni ka ku fa mata, e, ni ka ku tusa; e, ni ka ku tiisa ka lizoho la ka la bulyo la niti ya ka.” (Isaya 41:10) Ku tundamena ku lapela ni ku yeyanga sepiso yeo kwa omba-omba hahulu ku bote ba ba lata Jehova Mulimu luli, kakuli manzwi ao a ba tusa ku itiisa ha ba li mwa matata kamba ha ba bilaela lika ze ñwi za mwa bupilo.

Ha mu nyakisise mutala wa basali ba ba bizwa bo Andrea; ki Lipaki za Jehova mi ba na ni bana ba babeli. Ba bulela kuli: “Se si ni tiisanga fela ha ni kopana ni matata mwa bupilo ki tapelo ni ku nahanisisanga lisepiso za Jehova. Ku ni belanga bunolo ku itiisa haiba ni hupula kuli Jehova u inzi ni na mwa bupilo bwa ka kaufela.”

Mu Tiise Sepo ya Mina ku Jehova

Ha na koñomeka za butokwa bwa ku sepa Jehova, walisamu yo muñwi na ize: “Ba pila mwa kozo ye tuna ba ba lata mulao wa hao; se si ka ba yaulula ha si yo.” (Samu 119:165) Ku ituta Linzwi la Mulimu ka pilu kaufela ku ka taza munahano ni pilu ya mina ka lika za kwa moya ze yahisa, ‘ze li za niti, ze kutekeha, ze lukile, ze kenile, ze na ni libubo le linde, ze na ni swanelo, ni ze lukela ku lumbwa.’ Haiba mu eza buikatazo bwa ku teeleza lika ze cwalo, ku ituta zona, ku li amuhela, ni ku itwaeza zona, fohe “Mulimu wa kozo u ka ba ni mina.”—Mafilipi 4:8, 9.

Bo John ba ba iponezi taba yeo ka lilimo na lilimo mwa bupilo bwa bona ba li: “Pili ni si ka cinca kale mubonelo wa ka wa za nako ya kwapili, ne ni tokwa ku cinca butu bwa ka ni munahanelo wa ka kuli ni kone ku itama bulikani bo bu tiile ni Mulimu ya petehile ya sa konwi ku bonwa ka meto. Nzila i nosi ye ne ka kona ku ni tusa ku itama bulikani bo ki ya ku ba mutu ya tiile kwa moya. Seo ne si talusa kuli ne ni tokwa ku ba ni mubonelo wa Mulimu wa lika ka ku balanga ni ku yeyanga Linzwi la hae le li ñozwi ka ketelelo ya moya o kenile.”

Haiba lu ifepa ka niti ye pilisa ye mwa Mañolo a ñozwi ka tuso ya moya wa Mulimu lu ka kona ku tiyela lika ze maswe ze sweli ku futuka mwa mitai ya makande zazi ni zazi. Hape ku latelela ze i bulela Bibele ku ka tiisa lubasi lwa mina ni ku mi kalulula kwa lipilaelo ze ñata. Mane Mulimu u sepisa kuli u itukiselize ku ‘tahisa m’ata a hae ku tusa ba ba mu file lipilu za bona, kaufela zona.’ (2 Makolonika 16:9) U ka tatulula matata kuli mane mu tokwe ku saba se siñwi.

Phinehas ya pilile mwa nako ya ndwa ni lipulao, u talusa kuli: “Ni itutile ku beya bupilo bwa ka mwa mazoho a Jehova. Ku latelela likuka za mwa Bibele ku ni silelelize kwa matata a mañata.” Haiba mu sepa Jehova Mulimu luli, u ka mi tusa ku tula lukwakwa lwa matata a matuna. (Samu 18:29) Mwana ya utwana  hahulu ni bashemi u fitanga fa ku ba sepa hahulu mi niha kula kamba ku katazeha ka nzila ye ñwi u ikutwanga ku silelezwa ki bona. Ni mina mwa kona ku ikutwa cwalo haiba mu ikataza ku amuhela memo ya kuli mu sepe Jehova.—Samu 37:34.

Mutomo Sakata wa Sepo

Jesu Kreste na bulelezi balateleli ba hae kuli: “Mu lapele cwana, mu li: Ndat’a luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:9, 10) Mubuso o kwa lihalimu wo—ona mulonga o zamaiswa ki Jesu Kreste—ki wona wa ka itusisa Mulimu kuli a bonise tukelo ya hae ya ku busa lifasi.—Samu 2:7-12; Daniele 7:13, 14.

Sabo ya mifuta-futa ye ba ni yona batu kacenu i paka hande fo ku sweu kuli Mulimu u na ni ku nga muhato. Kwa tabisa ku ziba kuli Mulimu u tuha a nga muhato wo! Jesu Kreste, yo Mulimu a beile kale fa bulena bwa Mubuso wa Mesia, u filwe m’ata a ku bonisa kuli Jehova ki yena ya swanela ku busa ni m’ata a ku kenisa Libizo la Mulimu. (Mateu 28:18) Ona cwale-cwale fa, Mubuso wo u tuha u nga muhato fa lifasi wa ku felisa lika kaufela ze tisa sabo ni lipilaelo. Isaya 9:6 i kolohanya tulemeno to tu bonisa kuli Jesu ki yena Mubusi ya swanela ya kona ku lu imulula kwa lika ze lu ikalezwi. Ka mutala, kwa liñolo leo, Jesu u bizwa “Ndate wa kamita,” “Muelezi,” ni “Mulena wa Kozo.”

Ha lu nyakisiseñi pulelo ya kuli “Ndate wa kamita.” Ka ku ba “Ndate wa kamita,” Jesu u na ni m’ata, mane ni takazo, ya ku itusisa sitabelo sa hae sa tiululo kuli a fe bupilo bwa kamita kwa batu ba ba ipeya ku utwa fa lifasi. Seo si talusa kuli batu bao ba ka fita fa ku lukululwa kwa sibi ni ku sa petahala ko ba hozize ku mutu wa pili Adama. (Mateu 20:28; Maroma 5:12; 6:23) Kreste hape ka ku itusisa m’ata hae a filwe ki Mulimu u ka zusa batu ba bañata ba ba shwile.—Joani 11:25, 26.

Jesu ha na li fa lifasi na bonisize kuli ki “Muelezi” yo munde. Kabakala zibo ya hae ya Linzwi la Mulimu ni kutwisiso ya hae ye ipitezi ya ku ziba mo ba inezi batu, Jesu na ziba mwa ku tatululela matata e ba kopana ni ona batu ka zazi. Niha sa beilwe fa bulena mwa lihalimu, Kreste u zwezipili ku ba “Muelezi” yo munde, ya itusiswa ki Jehova kuli a fitise litaba kwa batu. Likelezo za Jesu, ze ñozwi mwa Bibele, ki ze butali kamita mi li nepahezi. Ku ziba taba yeo, ni ku lumela cwalo, ku ka mi tusa ku pila mu si na se mu ikalezwi, mu si na sabo.

Isaya 9:6 hape i bulela kuli Jesu ki “Mulena wa Kozo.” Ka ku ba “Mulena wa Kozo,” Kreste u ka tuha a itusisa m’ata a hae ku felisa silibonda se si li teñi mwa puso ya linaha, mupilelo wa sicaba, ni mwa mayemo a sifumu. Ka nzila ifi? Ka ku kopanya batu kaufela mwa puso ya Mubuso wa Mesia ona mubuso u nosi wa kozo sakata.—Daniele 2:44.

Mwa Mubuso wo, lifasi kaufela li ka tala kozo ye sa feli. Mu kona ku kolwa cwañi taba yeo? Lu kolwiswa ki manzwi a’ kwa Isaya 11:9 a’ li: “Ha ku sa na ya ka holofaza kamba ku sinya fa lilundu la ka le li kenile; kakuli lifasi li ka tala zibo ya [Muñ’a] Bupilo, sina mezi mw’a kwahelezi liwate.” Kwa nalule-lule mutu kaufela ya ka pila fa lifasi u ka ba ni zibo ye nepahezi ya ku ziba Mulimu mi u ka mamela milao ya hae. Kana yeo ki taba ye mi tabisa? Haiba ki cwalo, mu si ke mwa liyeha ku ipumanela “zibo ya [Muñ’a] Bupilo” yeo ya butokwa.

Zibo ya Mulimu yeo i tiisa tumelo mi i isa batu kwa bupilo mi mu kona ku i fumana ka ku nyakisisa ze i luta Bibele luli ka za lika ze sweli ku ezahala kacenu ni lika ze nde ze i sepisa Bibele kwapili. Kacwalo lu mi susueza ku amuhela tuto ya Bibele ye si na tifo ye ba sweli ku fa Lipaki za Jehova mwa sibaka se mu pila ku sona. Yeo kona nzila ye mu kona ku felisa ka yona sabo ya mina ya za kwapili ni ku fumana sepo sakata mwa lifasi le li tezi manyando le.

 [Mbokisi/Siswaniso se si fa likepe 7]

Libaka Mubuso wa Mulimu Ha U Fa Sepo kwa Batu

Jesu Kreste, ka ku ba Mulena wa Mubuso wa Mulimu, u filwe tukelo ya ku itusisa m’ata a’ filwe mwa pupo kaufela. (Mateu 28:18) U ka kutiseza ze bupilwe kaufela mwa muinelo wa zona wa sapili. Hape u na ni m’ata a ku folisa matuku. Misebezi ye m’ata ya na ezize Jesu fa lifasi ne i bonisa fela butuna bwa limbuyoti ze ka fiwa batu mwa mubuso wa hae ka ku ba Mulena ya petehile ni ya itingwa. Ki tufi to mu tabela hahulu kwa tulemeno twa Mulena ya li Mesia to tu kolohanyizwe mwatasi?

▪ Ku Atumeleha.—Mareka 10:13-16.

▪ Kutwisiso ni kutokwa sobozi.—Mareka 10:35-45.

▪ Ku itingwa ni ku isa ba bañwi pilu. —Mateu 4:5-7; Luka 6:19.

▪ Ku luka.—Isaya 11:3-5; Joani 5:30; 8:16.

▪ Ku tusa ba bañwi, ni buikokobezo.—Joani 13:3-15.

[Siswaniso se si fa likepe 4]

Ku balanga Bibele ni ku yeyanga ze lu bala kwa kona ku lu tusa ku sepa Jehova