Bumaswe Se Li T’o Bone Wa Kuta!

Mushimani ya ipapalela u nopa kanto ka kañwi fafasi; kanti ki ndalamiti, ya mu tunyeza mi i mu bisa sibofu ni sihole. Musali u yumba mwan’a hae ya sa zo pepwa; u mu shiteka mwahal’a manyalala kwatuko ni mukwakwa. Munna ya zwisizwe musebezi u kutela kwa n’a belekanga; u kunupa mañi ni mañi ya fumana mi mafelelezo wa ikunupa. Mutu ya n’a kutekeha mwa naha ku kumbuluka u shengula banana ba banyinyani.

KA BUMAI, lipiho ze cwalo za bumaswe bo bu sweli ku ezahala li atile hahulu mwa linako za luna. Mane lipiho ze maswe zeo ha li bulelwangi hahulu kakuli ku na ni likezo ze maswe hahulu ni ku fita za ku yundisa mikowa ya batu ni za bukebenga bo bu maswe ze sweli ku ezahala mwa lifasi. Magazini ye ñwi ya mwa 1995 ne i ize: “Lilimo za mwanda wa bu-20 li bile lilimo za Satani luli. Kwa li ku simwa, ha ku si ka ba kale ni nako, muta batu ba bulaile batu ba bañwi ba bañata-ñata ka libaka fela la mushobo, bulapeli ni sifumu inge mo ku bezi mwa lilimo zeo.”

Ka nako ye swana, batu ba sweli ku silafaza moya wa lifasi, ku feza lika ze mwa lifasi, ni ku yundisa mifuta ye miñwi ya lifolofolo. Kana batu ba kona ku feza bumaswe kaufela b’o ni ku bisa lifasi ku ba sibaka se sinde? Kamba kana ku lika ku eza cwalo ku swana fela inge ku tanyela mandinda ka lufiyelo? Caziba yo muñwi ya ñozi ze ñata ka za bumaswe, n’a ize: “Ni ikatalize hahulu kuli ni cince lika mwa lifasi, kuli li kone ku ba hande. Kono ha ku bonahali kuli za cinca.” Mwendi ni mina mu ikutwa cwalo.

Lifasi mo se li inezi li swana inge sisepe se si mwa liwate le li bifile, mo ku na ni mandinda a sweli ku ekezeha ka zazi ni zazi. Nihaike ha ku na ya tabela ku ya ko si mu isa sisepe, ni kwa lika a mane ku si sikulula, wa palelwa. Sisepe si ikela fela ko si libile, mi ha si koni ku sikululwa.

Ki niti kuli libaka le liñwi miinelo ha i sweli ku pongana mwa lifasi kikuli batu ha ba si ka petahala. (Maroma 3:23) Niteñi ha lu nyakisisa butuna bwa bumaswe bo bu sweli ku ezahala ni mo bu sweli ku ekezehela, lu bona kuli haki batu fela ba ba bu tisa. Esi mwendi batu ba sweli ku zamaiswa ki moya o muñwi cwalo o m’ata o sa bonahali? Haiba ki cwalo, ki moya mañi wona wo, mi lu kona ku isileleza cwañi ku ona? Taba ye tatama i ka alaba lipuzo zeo.

[Manzwi a bañi ba siswaniso fa likepe 3]

© Heldur Netocny/Panos Pictures