Lipuzo Ze Zwa kwa Babali

Kana liñolo la Liproverbia 22:6 li talusa kuli bana ba Bakreste ha ba utilwe hande kipeto ku felile ha ba na ku keluha mwa nzila ya Jehova?

Timana yeo i li: “Luta mwana nzila y’a swanezi ku zamaya, nih’a supala h’a na ku i keluha.” Ko li sikamezi lituhela ki kona ko u libanga mutai mi bana ba ba lutilwe hande ba zwelapili ku sebeleza Jehova niha se ba hulile. Bashemi kaufela ba ziba kuli ku luta bana cwalo ku tokwa nako ni buikatazo. Kuli bashemi ba tuse bana bona ku ba balutiwa ba Kreste, ba lukela ku ba luta ka tokomelo, ku ba eleza, ku ba susueza, ni ku ba kalimela mane ni ku ba tomela mutala o munde. Bashemi ba lukela ku swalelela ku eza cwalo ka lilato ili ka lilimo ze ñata.

Kono cwañi haiba mwana a tuhela ku sebeleza Jehova, kana f’o ku talusa kuli kipeto ha si ka huliswa hande? Kwa banga cwalo fokuñwi haiba bashemi ba palelwa ku hulisa hande bana ba bona ka ku ba lemusa ni ku ba luta lituto za Jehova. (Maefese 6:4) Kono liñolo leo la Liproverbia 22:6 ha li talusi kuli bana ha ba utilwe hande kipeto ba ka zwelapili ku sepahala ku Mulimu. Bashemi ha ba koni ku ketela bana ba bona lika kaufela. Sina mo ku inezi ku ba bahulu, banana ni bona ba na ni tukuluho mi kwa mafelelezo ki bona ba ba swanela ku iketela mo ba ka pilela. (Deuteronoma 30:15, 16, 19) Bashemi fokuñwi niha ba ka ikataza cwañi, bana ba bañwi ba kana ba iketela ku sa sepahala, sina mwa na ezelize Salumoni, yena muñoli wa timana ye ye lu nyakisisa. Nihaiba Jehova n’a na ni bana ba bañwi ba ne iketezi ku sa sepahala.

Kacwalo timana ye lu nyakisisa ye ha i talusi kuli mwana ni mwana ya lutilwe nzila ye nde “h’a na ku i keluha” kono i talusa kuli hañata ki mo ku belanga. Sisupo seo si tiisa bashemi luli! Bashemi ba swanela ku tiiswa kabakala ku ziba kuli buikatazo bo ba eza bwa ku luta bana ba bona ku zamaya mwa nzila ya Jehova bu ka tisa ze nde. Bakeñisa kuli buikalabelo bwa bona ki bwa butokwa mi ze ba eza li ama hahulu bana ba bona, bashemi ba elezwa ku sa keshebisa buikalabelo bo.—Deuteronoma 6:6, 7.

Bana niha ba tuhela ku sebeleza Jehova, haiba bashemi ne ba likile ka t’ata ku ba hulisa hande, b’a kona ku ba ni sepo ya kuli bana ba bona ba ka ikupula. Manzwi a Bibele a m’ata, mi lituto za bashemi ha li libalwangi kapili.—Samu 97:7.