M’ata a Lilimi

MWA butelele lilimi la tutwa li kona ku eza lisentimita ze 45 mi kabakala m’ata ni bubebe bwa lona li kona ku kola matali a kwa mitai ya likota. Lilimi la blue whale lona li likana ni tou kwa bukiti. Ha mu nahane fela m’ata a na ka tokwahala kuli lilimi leo li nanulwe!

Lilimu la mutu haki se siñwi ha li bapanywa kwa malimi a bulezwi ao. Kono niteñi li m’ata luli. Mane Bibele i li: “Lifu ni bupilo li mwa mata a lilimi.” (Liproverbia 18:21) Ki niti, lu se lu utwile litaba ze ñata ze bonisa m’ata a lilimi la batu fa kuma. Lilimi li itusisizwe kwa ku bulela buhata ni ku paka litaba za lishano ze shangumuzi matata kamba mane ku bulaisisa batu ba ba si na mulatu.

Ka nzila ye swana, batu ba bañwi ba ba bile balikani ka nako ye telele ba fitile fa ku fapana kabakala lipulelo ze utwisa butuku. Lipulelo za ku kayaula fela li tunkile ba bañwi kwa lipilu. Jobo na kile a sawaniwa mi na itilelezi kuli: “Mu ka nga nako ye kuma kai inze mu swabisa pilu ya ka, mu ni lobaka buemba-emba?” (Jobo 19:2) Mulutiwa Jakobo na file swanisezo ye bonisa hande businyi bwa lilimi le li si ka tokomelwa, ha na ize: “Lilimi, niha li li silama se sinyinyani, li itumba ka ze tuna. A mu bone, mushitu o mutuna o ca lubya lo lu zwa kwa kalilo ka kanyinyani! Lilimi ni lona ki mulilo.”—Jakobo 3:5, 6.

Kono hape m’ata a lilimi a’ kona ku pilisa. Manzwi a ku utwela ba bañwi butuku kamba a omba-omba a tusize ba ne ba lembwalile kamba ba ne ba batile ku ipulaya. Batu ba bañata ne ba kabe ba shwile kapili kabakala milyani ye kola kamba likezo za bona za bukebenga kono ba pilisizwe ki ku latelela kelezo ye itingwa ye ne ba filwe. Kaniti, lilimi la mutu ya lukile “ki kota ya bupilo,” mi “linzwi le li bulezwi ka nako ye swaneleha, li swana sina apule ya gauda ye mwa pizana ya silivera.”—Liproverbia 15:4; 25:11.

Kono nzila ye nde ka ku fitisisa ya ku itusisa ka yona lilimi ki ya ku lumbeka Jehova Mulimu, ili ku shaela taba ye nde ya Mubuso wa Hae, ni ku luta ba bañwi niti ya butokwa ye mwa Bibele. Kabakalañi? Kakuli Jesu na ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”—Joani 17:3; Mateu 24:14; 28:19, 20.