Jehova Wa Tabanga Ha Lu Mu Utwa
Jehova Wa Tabanga Ha Lu Mu Utwa
“Mwan’aka u talife, mi u tabise pilu ya ka.”—LIPROVERBIA 27:11.
1. Ki moya mañi o yambile lifasi kacenu?
MOYA wa buipanguli u yambile lifasi kaufela kacenu. Muapositola Paulusi na bonisize libaka ha ku li cwalo ha na ñolezi Bakreste ba kwa Efese kuli kale ne ba zamaya “ka mukwa wa lifasi le, ka mukwa wa mulena muñ’a mata a’ inzi mwa sibaka sa mbyumbyulu, ili moya o nz’o sebeza mwa bana ba ba ikanyisa.” (Maefese 2:1, 2) Ki niti, mu kana mwa li Satani Diabulosi, yena “mulena muñ’a mata a’ inzi mwa sibaka sa mbyumbyulu,” u suñile moya wa buipanguli kwa batu ba lifasi. Na suñile moya wa buipanguli mwa miteñi ya baapositola, mi u ezize cwalo ni ku fita ku zwa fela fa lundulelwa kwa lihalimu ibat’o ba ka nako ye i tumbuka Ndwa ya Lifasi ya Pili.—Sinulo 12:9.
2, 3. Ki kabakalañi ha lu swanela ku utwa Jehova?
2 Kono ka ku ba Bakreste, lwa ziba kuli lu swanela ku utwa Jehova Mulimu kabakala kuli ki yena ya lu bupile, ya lu babalela, ki Muambakani ya pahami ya lilato, mi ki yena Mupilisi wa luna. (Samu 148:5, 6; Likezo 4:24; Makolose 1:13; Sinulo 4:11) Maisilaele ba mwa miteñi ya Mushe ne ba iponezi kuli Jehova na ba babalela mi na li Mupulusi wa bona. Kona libaka Mushe ha na ba bulelezi kuli: “Mu ka tokomela ku li eza, mw’a mi laelezi [Muñ’a] Bupilo Mulimu wa mina.” (Deuteronoma 5:32) Ki niti, ne ba swanela ku utwa Jehova luli. Kono hañihañi ba fulalela Mubusi wa bona.
3 Ki kabakalañi ha lu swanela ku utwa Mubupi wa pupo kaufela? Nako ye ñwi Mulimu na bulelezi mupolofita Samuele ku taluseza Mulena Saule kuli: “Ku utwa, ki se sinde ku fita matabelo.” (1 Samuele 15:22, 23) Ka mukwa ufi?
Ku Utwa ku Fita Cwañi “Matabelo”?
4. Ki sika mañi se lu kona ku fa Jehova?
4 Ka ku ba Mubupi, Jehova ki yena muñ’a lika kaufela ze lu na ni zona. Haiba ku cwalo, kana luli ku na ni ze lu kona ku mu fa? Eni, ku na ni nto ye ñwi ya butokwa ye lu kona ku mu fa. Ki nto mañi yona yeo? Kalabo lu i fumana mwa manzwi a tatama, a li: “Mwan’aka u talife, mi u tabise pilu ya ka, mi ni ka kona ku alaba ya ni nyaza.” (Liproverbia 27:11) Ku utwa Mulimu ki yona mpo ye lu kona ku mu fa. Ku utwa Mulimu ku si na taba ni miinelo kamba lisimuluho za luna ku bonisa fo ku sweu kuli kañi ya Satani Diabulosi ya kuli batu ba ka fulalela Mulimu haiba ba likiwa ki ya buhata. Ku tabisa Mulimu cwalo ki tohonolo ye tuna!
5. Mubupi u ikutwanga cwañi haiba batu ba sa mu utwi? Mu fe mutala.
5 Mulimu wa iyakatwa liketo ze lu eza. Ha utwangi hande haiba lu sa mu utwi. Ka mukwa ufi? U utwanga butuku ku bona mutu ya nga muhato o fosahezi. (Samu 78:40, 41) Lu ngeni kuli dokota u taluselize mutu yo muñwi ya kula butuku bwa shuka kuli a ambuke lico ze ñwi, kono yena wa li ca. Dokota yo u ka ikutwa cwañi? Kaniti Jehova u utwanga butuku haiba batu ba sa mu utwi, kakuli wa ziba kuli ba ba eza cwalo ba ka kutula lika ze maswe.
6. Lu ka tusiwa kiñi kuli lu utwe Mulimu?
6 Lu ka tusiwa kiñi kuli lu be batu ba ba utwa? Lu swanela ku kupa Mulimu ku lu fa “pilu ye na ni kutwisiso,” ye utwa, sina mwa na ezelize Mulena Salumoni. Na kupile kuli a fiwe pilu ye cwalo ilikuli a “zibe ku keta se sinde ku se si maswe” ni kuli a kone ku ziba mwa ku atulela Maisilaele ba bañwi. (1 Malena 3:9) Ni luna lu tokwa ku ba ni “pilu ye na ni kutwisiso” kuli lu zibe se sinde ni se si maswe mwa lifasi le, le li ambekilwe ki moya wa buipanguli. Mulimu u lu file Linzwi la hae, lihatiso ze tomile fa Bibele, mikopano ya Sikreste, ni maeluda ba ba lilato kuli lu kone ku ba ni “pilu ye na ni kutwisiso.” Kana lwa itusisa limpo zeo?
7. Ki kabakalañi Jehova ha bata kuli lu mu utwe ku fita ku mu fa fela matabelo?
7 Ka za taba ye, mu hupule kuli Jehova na taluselize batu ba hae ba ikale kuli ku utwa ne li kwa butokwa hahulu ku fita matabelo a lifolofolo. (Liproverbia 21:3, 27; Hosea 6:6; Mateu 12:7) Ki kabakalañi ku utwa ha ne ku fita matabelo, hailif’o Jehova ki yena ya na laezi batu ba hae kuli ba fange matabelo? Mulimu na ka amuhela matabelo a bona ha ne ba ka a fa ka mulelo wa ku bata ku mu tabisa, isi ka mulelo wa ku ezeza fela mulao. Haiba Mukreste u bata ku tabisa Mulimu luli, u ka bona teñi kuli wa mamela milao ya hae kaufela. Matabelo haki yona nto ya tokwa Mulimu, kono sa tokwa luli ki ku mu utwa.
Temuso ku Luna
8. Ki kabakalañi Mulimu ha na hanile Saule sina mulena?
8 Likande la mwa Bibele la Mulena Saule li lu bonisa libaka ku utwa ha ku li kwa butokwa. Saule ha kalisa ku busa, ne li mutu ya ikokobeza ni ya ishuwa, ya na ‘ipona kuli ki yo munyinyani.’ Kono hamulaho wa nako, Saule a kalisa ku ikuhumusa, ni ku ikezeza lika mwa latela. (1 Samuele 10:21, 22; 15:17) Nako ye ñwi, Mafilisita ne ba mu lwanisa. Samuele na taluselize mulena kuli a libelele ilikuli yena mupolofita a to fa matabelo ku Jehova ni ku fa litaelo ze ñwi. Kono Samuele na liyehile, mi batu ba kalisa ku hasana. Ha bona cwalo, Saule “a eza sitabelo sa ku cisa.” Jehova na si ka tabela za n’a ezize Saule. Samuele ha yo punya, mulena a ikemela ka ku talusa kuli Samuele na liyehile, kona libaka ha na ‘ikapelelize’ ku fa sitabelo sa ku cisa ilikuli a shemubwe ki Jehova. Mulena Saule na ikutwa kuli ku fa sitabelo ne li kwa butokwa hahulu ku fita ku kuteka taelo ya kuli a libelele ilikuli Samuele a to fa sitabelo. Samuele a mu taluseza kuli: “U ezize ka bukuba, ka ku sa ya ka taelo y’a n’a ku laezi [Muñ’a] Bupilo Mulimu wa hao.” Ku sa utwa Jehova ne ku tisize kuli Saule a haniwe sina mulena.—1 Samuele 10:8; 13:5-13.
9. Saule na bonisize cwañi kuli na sa utwi Mulimu?
9 Kana mulena na itutile se siñwi mwa taba ye? Kutokwa! Nako ye ñwi hape, Jehova na laezi Saule ku tanyela Maamaleke, ba ne ba lwanisize Maisilaele ku si na libaka. Saule na laezwi kuli a si ke a bandusa nihaiba limunanu za bona. Na likile ku latelela taelo ya Jehova ka ku “bulaya Maamaleke, ku kala kwa Havila ku y’o fita kwa Shuri.” Samuele ha na tilo mu katanyeza, mulena na tabisizwe hahulu ki tulo ya hae mi a li: “U fuyolwe ki [Muñ’a] Bupilo! Ni ezize mw’a laelezi [Muñ’a] Bupilo.” Kono Saule ni batu ba hae ne ba si ka latelela litaelo ze namile ze ne ba filwe kakuli ne ba bandusize Mulena Agagi ni “lingu ze nde, ni likomu ze nde ze nunile, ni lingunyana, ni linto kaufela ze nde.” Mulena Saule na ikemezi ka ku bulela kuli: “Sicaba si katilwe lingu ni likomu ze nde, kuli si ezeze [Muñ’a] Bupilo Mulimu wa hao matabelo ka zona.”—1 Samuele 15:1-15.
10. Saule na palezwi ku ituta tuto mañi?
10 Samuele kiha bulelela Saule kuli: “[Muñ’a] Bupilo kana a ka tabela linubu za ku cisa, ni matabelo, sina mw’a tabelela mutu ya utwa linzwi la [Muñ’a] Bupilo? Bona! Ku utwa, ki se sinde ku fita matabelo, mi ku mamela, ki se sinde ku fita ku tahisa mafula a litotolo.” (1 Samuele 15:22) Bakeñisa kuli Jehova na laezi kuli limunanu zeo li yundiswe, na si ke a li amuhela sina matabelo.
Lu Utwe Mulimu mwa Lika Kaufela
11, 12. (a) Jehova u nga cwañi buikatazo bo lu eza ha lu nze lu mu lapela? (b) Mutu u kona ku ipuma cwañi kuli u tabisa Mulimu kono inge a sa lateleli milao ye miñwi?
11 Jehova wa tabelanga luli ku bona batanga ba hae ba ba sepahala ha ba zwelapili ku mu sebeleza ku si na taba ni nyandiso, ni ha ba kutaza Mubuso ku si na taba ni kuli batu ha ba ba isezi pilu, ni ku fumaneha kwa mikopano ya Sikreste ku si na taba ni matata a bupilo! Haiba lu mu utwa mwa lika za butokwa za kwa moya zeo lu ka tabisa pilu ya hae! Wa itebuha buikatazo bwa luna haiba lu mu lapela ka ku zwelela kwa pilu. Batu ba kana ba sa itebuhi buikatazo bwa luna, kono Mulimu wa bona ze lu eza mi ha na ku li libala.—Mateu 6:4.
12 Kono haiba lu bata ku tabisa Mulimu luli, lu swanela ku mu utwa mwa lika kaufela. Ni kamuta lu si ipumi kuli lwa kona ku loba milao ya Mulimu ye miñwi ni ku libelela kuli u ka lu swalela, ibile fela lu eza ka t’ata mwa lika ze ñwi. Ka mutala, mutu yo muñwi a kana a nahana kuli ha na ku fiwa mulatu haiba a eza buhule ni libi ze ñwi ze tuna, ibile fela inge a yanga mwa simu ni kwa mikopano cwalo. Ko ki ku ipuma luli!—Magalata 6:7, 8.
13. Busepahali bwa luna ku Jehova bu kona ku likiwa cwañi ha lu li mwa ndu ya luna?
13 Kacwalo lu swanela ku ipuza kuli, ‘Kana na bonisa kuli na utwa Jehova mwa likezo za ka za ka zazi, niha ni li kwa mukunda?’ Jesu na ize: “Ya sepahala ku ze nyinyani, u ka sepahala ni ku ze tuna; mi ya sa sepahali ku ze nyinyani, h’a na ku sepahala ku ze tuna.” (Luka 16:10) Kana lwa bonisa busepahali niha lu li ‘mwa ndu ya luna,’ mo ba sa koni ku lu bona ba bañwi? (Samu 101:2) Ki niti, lwa kona ku likiwa ha lu li mwa ndu ya luna. Mwa linaha ze ñata m’o batu ba luwile likompyuta mwa mandu, ku bunolo hahulu ku fumana maswaniso a maswe. Kalenyana, kuli mutu a bone maswaniso a cwalo, na tokwa ku a bata ko ku boniswa za buhule. Kana lu ka mamela manzwi a Jesu a kuli: “Mutu nihaikaba ufi kamba ufi ya talima musali ka ku mu lakaza, u s’a mu bukile mwa pilu”? Kana luli lu ka ambuka nihaiba ku buha maswaniso a mapunu? (Mateu 5:28; Jobo 31:1, 9, 10; Samu 119:37; Liproverbia 6:24, 25; Maefese 5:3-5) Kana luli lu ka buha mafilimu a fa TV a bonisa lindwa? Kana lwa lumelelana ni Mulimu ya toile ya “lata situhu”? (Samu 11:5) Ku cwañi ka za ku nwa hahulu bucwala ha lu li kwa mukunda? Bibele i nyaza butahwa, kono hape i lemusa Bakreste kuli ha ba swaneli ku “ineela ku nwa bucwala bo buñata.”—Tite 2:3; Luka 21:34, 35; 1 Timotea 3:3.
14. Lu kona ku bonisa cwañi kuli lwa utwa Mulimu ha ku taha ku za mali?
14 Hape lu tokwa ku tokomela ha ku taha ku za mali. Ka mutala, kana ni luna lu ka ikenya mwa mukwa wa ku bata ku fuma kapili ka ku itusisa bupumi? Kana lwa itusisanga bupumi kuli lu si ke lwa lifa mitelo? Kamba kana lwa likanga ka t’ata ku mamela taelo ye li lu “fe batu kaufela se si ba swanela: Ya swanelwa ki mutelo, mu mu fe mutelo”?—Maroma 13:7.
Ku Utwa Mulimu ku Zwelela kwa Pilu
15. Ki kabakalañi ha mu mamela litaelo za Jehova?
15 Haiba lu utwa litaelo za Mulimu lu ka fuyaulwa. Ka mutala, haiba lu ambuka ku zuba kwai, buhule, ni ku pompelwa mali, lwa kona ku isileleza kwa matuku a mañwi. Ku mamela likuka za Bibele hape ku lu tusa mwa linzila ze ñwi, inge cwalo za lipisinisi ni mo lu swalisanela ni ba bañwi. (Isaya 48:17) Lituso za kwa mubili zeo li bonisa fo ku sweu kuli ku mamela milao ya Mulimu kwa tusa luli. Kono libaka le lituna le lu utwela Mulimu ki kuli lwa mu lata. Ha lu sebelezi Mulimu ka mulelo wa ku bata ku tuseha. (Jobo 1:9-11; 2:4, 5) Mulimu u lu file tukuluho ya ku iketela ye lu bata ku utwa. Lu bata ku utwa Jehova kakuli lu bata ku mu tabisa mi lu bata ku eza ze lukile.—Maroma 6:16, 17; 1 Joani 5:3.
16, 17. (a) Jesu na bonisize cwañi kuli na utwa Mulimu bakeñisa lilato la hae ku yena? (b) Lu kona ku likanyisa cwañi Jesu?
16 Jesu ki mutala o munde wa mutu ya utwa Jehova kabakala lilato la hae ku yena. (Joani 8:28, 29) Ha na li fa lifasi, Jesu ‘na itutile ku utwa, ka ze butuku ze ne mu tahezi.’ (Maheberu 5:8, 9) Ka mukwa ufi? Jesu “a ikokobeza, a ipeya ku utwa ku isa kwa lifu, mane lifu la [kota ya linyando, NW].” (Mafilipi 2:7, 8) Nihaike kuli Jesu na utwa Mulimu ha na sa li kwa lihalimu, na til’o likiwa hape ha na tile fa lifasi. Lu na ni buikolwiso bwa kuli Jesu wa swanela luli ku ba Muprisita yo Mutuna wa banyani ba hae ba ba tozizwe ni batu ba bañwi ba ba lumela ku yena.—Maheberu 4:15; 1 Joani 2:1, 2.
17 Luna bo? Lwa kona ku likanyisa Jesu ka ku beya tato ya Mulimu mwa sibaka sa pili. (1 Pitrosi 2:21) Ku si na taba ni miliko ye lu kopana ni yona, lwa kona ku ba ni tabo haiba lu eza za lu laela Jehova kabakala lilato la luna ku yena. (Maroma 7:18-20) Ku eza cwalo ku kopanyeleza ku latelela litaelo ze lu fiwa ki ba ba etelela mwa kopano ku si na taba kuli ha ba si ka petahala. (Maheberu 13:17) Jehova wa tabanga ha lu mu utwa mwa litaba za ka butu.
18, 19. Ku utwa Mulimu ku zwelela kwa pilu ku ka lu tusa cwañi?
18 Kacenu lu kona ku bonisa kuli lwa utwa Jehova ka ku tiyela nyandiso. (Likezo 5:29) Hape lu na ni ku itiisa ha lu nze lu mamela taelo ya Jehova ya ku kutaza ni ku luta macaba ku fitela mafelelezo a lifasi. (Mateu 24:13, 14; 28:19, 20) Lu tokwa ku itiisa kuli lu zwelepili ku kopananga ni mizwale ba luna, ku si na taba ni matata a lifasi. Mulimu wa luna ya lilato wa iponela buikatazo bwa luna bwa ku bata ku mu utwa. Kono kuli lu zwelepili ku utwa, lu tokwa ku hanyeza mibili ya luna ya sibi, ku ambuka bumaswe ni ku lata ze lukile.—Maroma 12:9.
19 Haiba lu sebeleza Jehova kabakala kuli lwa mu lata, lu ka iponela luli kuli Jehova ki Mulimu ya fa “ba ba mu bata mupuzo.” (Maheberu 11:6) Ki niti kuli Jehova wa tabela matabelo e lu mu fa, kono sa bata hahulu ni ku fita kikuli lu mu utwe ku zwelela kwa pilu.—Liproverbia 3:1, 2.
Ne Mu Ka Alaba Cwañi?
• Ki kabakalañi ha lu kona ku bulela kuli ku na ni ze lu kona ku fa Jehova?
• Saule na ezize mafosisa mañi?
• Mu kona ku bonisa cwañi kuli mwa lumela kuli ku utwa ki kwa butokwa ku fita matabelo?
• Ki kabakalañi ha mu utwa Jehova?
[Lipuzo za Tuto]
[Siswaniso se si fa likepe 26]
Dokota ya lilato u kona ku ikutwa cwañi haiba mukuli a palelwa ku latelela litaelo za hae?
[Siswaniso se si fa likepe 28]
Ki kabakalañi Mulena Saule ha na hanilwe ki Jehova?
[Maswaniso a fa likepe 30]
Kana mwa mamela milao ya Mulimu ni ha mu li mwa ndu ya mina?