Lipuzo Ze Zwa kwa Babali

Kana noha ye ne bulezi ku Eva ne i na ni mahutu?

Sina mo ku ñolezwi kwa Genese 3:14, Jehova Mulimu n’a bulela kwa noha ye ne pumile Eva mwa simu ya Edeni. Mulimu n’a ize: “Kakuli u ezize se, u kutilwe mwahal’a makomu kaufela, ni mwahal’a lifolofolo kaufela za mwa naha; u ka zamaya ka mba, mi u ka ca liluli ka mazazi kaufela a ku pila kwa hao.” Bibele ha i buleli ka ku nonga kuli noha ye ne itusisizwe kwa ku puma Eva ne i banga ni mahutu pili. Nihaike kuli manzwi a kwa Genese 3:14 a kona ku tahisa kuli batu ba bañwi ba nahane cwalo, ha lu tokwi ku nahana kuli linoha ne li banga ni mahutu pili Mulimu a si ka kuta kale noha yeo. Ki kabakalañi ha lu bulela cwalo?

Kabakala kuli katulo ya Jehova sihulu ne i libisizwe ku Satani, sona sibupiwa sa kwa moya se ne si itusisize noha yeo. Bibele i talusa kuli Satani ki “ndat’ahe lishano” ni kuli ki “noha ya kale.” Lipulelo ze peli ze kaufela li bonisa kuli Satani n’a itusisize noha sina sibuleliso kuli a coweze Eva ku tula taelo ya Mulimu.—Joani 8:44; Sinulo 20:2.

Mulimu ki yena ya n’a bupile noha, mi mwendi Adama ki yena ya n’a file noha libizo pili Satani a si ka itusisa yona kwa ku puma Eva. Kacwalo noha ya n’a itusisize Satani ne si yona luli ye ne kwashekile Eva. Ne i sa zibi kuli Satani n’a itusisa yona, mi ne i sa koni ku utwisisa katulo ya n’a file Mulimu kwa baipanguli bao.

Kono cwale ki kabakalañi Mulimu ha n’a bulezi kuli noha ne i ka zamayanga ka mba? Ku zamaya ka mba kwa noha ni ku zusa-zusa lilimi la yona inge ye ca liluli ne ku swaniseza hande ku tululwa kwa Satani. Sapili n’a li lingeloi la Mulimu le li pahami, kono n’a kokobelizwe mwa mayemo a kwatasi a talusizwe sina mukoti mwa Bibele.—2 Pitrosi 2:4.

Mi hape sina noha mo i kona ku lumela mutu kwa lisito, Satani ni yena mwa mayemo a hae a kwatasi n’a ka ‘luma lisito’ la “peu” ya Mulimu. (Genese 3:15) Kalulo ya pili ya peu yeo ne i til’o ba Jesu Kreste, ya n’a nyandisizwe ki peu ya Satani ka nakonyana. Kono kwa mafelelezo Kreste ni banyani ba hae ba ba tozizwe, bona ba ba zusizwe kwa bafu, ba ka pyata toho ya noha yeo ya swanisezo ku ya ku ile. (Maroma 16:20) Kacwalo sikuto sa Mulimu kwa noha yeo ne si yemela ku kokobezwa ni ku yundiselezwa kwa “noha ya kale,” yena Satani Diabulosi.