“Lu Swalisani Hamoho Ka Lilato”

Batu ba tabela puluso ni tukuluho. Ka lilimo-limo, ba nyolezwi ku imululwa kwa matata ni lipilaelo. Lu kona ku tiyela cwañi matata a bupilo? Kana matata a ka fela muta o muñwi? Mi haiba ku cwalo, a ka fela cwañi?

YEO kona taba ye ne buhisanwi kwa mikopano ya sikiliti ya mazazi a malalu ye ne lukisizwe ki Lipaki za Jehova ku kala ka May 2006. Mikopano yeo ne i na ni toho ya taba ye li “Puluso I Fakaufi!”

Kwa mikopano ye 9 ye cwalo ne ku fumanehile batu ba bañata-ñata ba ba zwa mwa linaha li sili. Mikopano yeo ne i ezizwe mwa July ni August 2006, mwa Prague, yona tolopo ye tuna ya naha ya Czech Republic; mwa Bratislava, tolopo ye tuna ya naha ya Slovakia; mwa Chorzow ni mwa Poznan, kwa Poland; * ni mwa litolopo ze 5 za mwa naha ya Germany za Dortmund, Frankfurt, Hamburg, Leipzig, ni Munich. Palo ya batu ba ne ba fumanehile kwa mikopano yeo kaufela ne i fitelela 313,000.

Ki lika mañi ze ne ezahala kwa mikopano yeo? Mitai ya makande ne i buleziñi ka za mikopano yeo? Mi baputehi ne ba ikutwile cwañi hamulaho wa ku fumaneha kwa mikopano yeo?

Buitukiso Bo Ne Bu Ezizwe

Lipaki ba mwa silalanda ni ba ne ba zwa ku sili ne ba nyolezwi hahulu mikopano yeo kakuli ne ba ziba kuli ne ba ka fepiwa kwa moya luli. Ku lukiseza mizwale ba ne ba tile kwa mukopano malobalo a mande ne li musebezi o mutuna. Ka mutala, kwa mukopano o no ezelizwe kwa Chorzow, Lipaki ba kwa Poland ne ba amuhezi baenyi ba 13,000 ba ne ba zwa kwa Eastern Europe mwa mandu a bona. Ba ne ba tile kwa mukopano wo ne ba zwa kwa Armenia, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, United States, ni Uzbekistan.

Ba bañata ne ba kalile kale ku itukiseza musipili wa ku ya kwa mukopano. Ka mutala, bo Tatiana, likombwa za nako kaufela ba kwa Kamchatka, sikuli sa kwa Russia se si fumaneha kwa mutulo-upa wa Japan, ne ba kalile ku buluka mali a musipili inge ku sa na ni silimo. Ne ba na ni ku zamaya likilomita ze 10,500. Kuli ba yo fita kwa Chorzow, ne ba na ni ku fufa ka fulai ka lihora ze 5, ku zamaya ka sitima ka mazazi a bato ba a  malalu mi kihona cwale ba zamaya lihora ze 30 ka mbasi.

Mizwale ni likaizeli ba bañata ne ba itatezi ku eza musebezi wa ku lukisa hande masitediyamu ni libaka ze potolohile kuli ku kone ku ezezwa mukopano. (Deuteronoma 23:14) Ka mutala, Lipaki ba mwa Leipzig ne ba ezize musebezi o munde wa ku kenisa sitediyamu, mi ne ba sepisize ku eza cwalo hape hamulaho wa mukopano. Kabakaleo, bañi ba sitediyamu seo ba ba zwiseza kwa mali a ne ba swanela ku lifa ili a na ka itusiswa kwa ku kenisa sitediyamu.

Mungendenge wa ku Memela Batu kwa Mukopano

Liputeho mwa lifasi kaufela ne li memile batu ba bañata kuli ba fumanehe kwa mukopano wa “Puluso I Fakaufi!” Mizwale ni likaizeli ba ne ba tile kwa mikopano ye ipitezi yeo ne ba abani mwa mungendenge wo ka cisehelo. Ne ba zwezipili ku mema batu ku fitela nako ya manzibwana fa lizazi la mafelelezo pili mukopano u si ka kalisa kale. Ki lifi ze nde ze ne zwile mwateñi?

Paki wa kwa Poland ya bizwa Bogdan na fumani munna muhulu yo muñwi ya na tabela ku ya kwa Mukopano, kono na si na hande masheleñi a ku kwelisa ku ya kwa Chorzow. Kono kwa fumaneha kuli ne ku ka ba ni sibaka mwa mbasi ye ne hailwe ki puteho. Bogdan u bulela kuli: “Lwa taluseza munna muhulu yo kuli na kona ku ya ni luna a sa lifi se siñwi ibile fela a taha kwa sibaka ko lu fundukela ka 5:30 kakusasana.” A lumela mi a yo fumaneha kwa mukopano. Hamulaho wa mukopano a ñolela mizwale kuli: “Ni itutile ze ñata kwa mukopano mi ni ka lika ka t’ata ku ba mutu yo munde.”

Mwa Prague munna yo muñwi ya na pila mwa hotela mo ne ku tibelezi linumwana za mukopano ba kwa Britain na ba bulelezi kuli ni yena na fumanehile kwa mukopano lizazi leo. Ki sika mañi se ne si mu susuelize ku fumaneha kwa mukopano? Munna yo na bulezi kuli na memilwe ki bahasanyi ba ba shutana-shutana ba 10 mwa makululu a tolopo yeo, mi sa ikutwa kuli u swanela ku fumaneha teñi! Na komokile hahulu mi a tabela ku ziba ze ñata.—1 Timotea 2:3, 4.

Mukopano Ne U Tiisize Baputehi

Mukopano wo ne u bonisize mwa ku tatululela matata a mañata. Mañolo a’ bonisa hande mwa ku tatululela ni ku tiyela matata na nyakisisizwe.

Basupali, ba mapongo, ba ba shwezwi ki balatiwa, kamba ba ba na ni matata mwa bupilo ne ba susuelizwe ku zwelelela mwa Bibele ku ba ni sepo ya za kwapili. (Lisamu 72:12-14) Bosinyalana ni bashemi ne ba lutilwe likuka za Bibele ze tusa ku ba ni linyalo le linde ni ze bonisa mwa ku utela bana hande. (Muekelesia 4:12; Maefe 5:22, 25; Makolose 3:21) Mikulwani ba Sikreste ne ba lutilwe ku itusisa kelezo ya mwa Linzwi la Mulimu, ye ba fiwa ki puteho ni bashemi kuli ba kone ku talimana ni sineneketo ya litaka za bona ni ku “saba litakazo za kwa bucaha.”—2 Timotea 2:22.

 Swalisano Sakata ya Mizwale mwa Lifasi Kaufela

Kamita Lipaki za Jehova ba fiwanga kelezo ye nde ya Mañolo kwa mikopano ya bona. (2 Timotea 3:16) Kono ze ne tisize kuli mikopano yeo i be ye ipitezi kikuli ne ku tile mizwale ba ne ba zwa mwa linaha ze ñata. Kwa mikopano ye mituna yeo kaufela ne ku filwe lingambolo ze swana mwa mishobo ye fapana-fapana. Zazi ni zazi, ba Sitopa Se Si Etelela sa Lipaki za Jehova ne ba file lingambolo ni lipiho ze zwa mwa linaha ze ñwi ze ne tisize kuli mukopano u tabise. Lingambolo ni lipiho zeo ne li tolokilwe ilikuli ba lipuo ze ñwi ni bona ba fumane tuso.

Linumwana za mukopano ne ba nyolezwi hahulu ku bonana ni mizwale ni likaizeli ba ne ba zwa mwa linaha li sili. Yo muñwi wa bona na ize: “Ne lu ikozi sango ku si na taba ni ku shutana kwa lipuo. Kono mane ne ku ekelize fela kwa tabo ya mukopano. Nihaike baenyi ne ba zwa mwa linaha ze shutana ne ba swalisani ka tumelo.” Ba ne ba fumanehile kwa mukopano wa kwa Munich ne ba ize: “Lu swalisani hamoho ka lilato.” Ku si na taba kuli ne ba zwa mwa linaha li sili kamba ne ba bulela lipuo li sili, baputehi bao ne ba ikutwa kuli ne ba li mwahal’a balikani sakata, bona mizwale ni likaizeli za bona za kwa moya.—Zekaria 8:23.

Baputehi Ba Fitisa Manzwi A Buitumelo

Baputehi ba ne ba kopani kwa mikopano ya kwa Poland ne ba talimani ni muliko o muñwi. Pula ne i nela nako kaufela mi hape ne ku bata luli. Muzwale yo muñwi wa kwa America na ize: “Ne ku batile hahulu luli kuli mane ne ni palelwa ni ku teeleza hande. Kono kabakala moya o no bonisizwe wa swalisano ni kamuhelo, batu ne ba sa utwi ni silami. Wo ki mukopano o lu si ke lwa libala ni hanyinyani!”

Nto ye ñwi ye ba si ke ba libala mizwale ba ne ba kopani kwa Poland ne li zibiso ya ku zwisiwa kwa buka ya Insight on the Scriptures mwa puo ya si-Polish ye ne bile sina mupuzo wa ku tiyela ku bata ni pula. Baputehi hape ne ba tabezi hahulu buka ya Live With Jehovah’s Day in Mind ha i zwisiwa fa Mukopano wa “Puluso I Fakaufi!”

Buñata bwa ba ne ba fumanehile kwa mukopano ba hupula ze ñwi ze ne ezahezi. Bo Kristina, ba kwa Czech ba ne ba itatezi ku sindeketa ka mbasi sikwata se ne si zwa kwa linaha ze ñwi, ba li: “Ha ne lu itaeza, kaizeli yo muñwi a ni kumbata mi a ni bulelela, a li: ‘Mu lu babalezi! Ne mu lu file lico ni mezi a ku nwa. Lu itumela hahulu kwa lilato la mina la buitomboli.’” Kaizeli yo na itumela sico sa musihali se ne si lukiselizwe linumwana za mukopano ba ne ba zwa kwa linaha li sili. Muzwale yo muñwi u li: “Lwa li ku ba lu eze musebezi o cwalo mwa bupilo bwa luna. Ne lu na ni ku fepa batu ba 6,500 ka zazi. Ne ku tabisa ku bona ba bahulu ni banana ha ba itatela ku tusa mwa musebezi wo.”

Kaizeli wa kwa Ukraine ya na ile kwa Chorzow na ize: “Lwa itebuha hahulu lilato, pabalelo, ni bufani bo ne ba bonisize mizwale ba luna. Ha lu zibi ni mo lu kona ku taluseza buitumelo bwa luna.” Annika wa lilimo ze 8 ya zwa kwa Finland na ñolezi kwa ofisi ya mutai wa Lipaki za Jehova kwa Poland kuli: “Mukopano wo ne li o munde hahulu. Kwa tabisa ku ba mwa kopano ya Jehova kakuli mutu u kona ku ba ni balikani mwa lifasi kaufela!”—Samu 133:1.

 Ze Bulelwa ki Bashalimeli

Pili mikopano i si ka kala kale, ne ku lukisizwe kuli linumwana li potiswe. Ka mutala, mwa tolopo ya Bavaria, bapoti ne ba izo bona Mandu a Mubuso, mi mizwale ba kwateñi ne ba ba amuhezi. Mupotisi yo muñwi ya si paki na komokile hahulu ha na boni mo ba latanela Lipaki. Numwana yo muñwi u biha kuli: “Ha ne ba kutela ka mbasi kwa Hotela ko ne ba tibelezi, mupotisi na bulezi kuli ne ba shutanela kwahule ni bapoti ba bañwi. Na ize ne lu apezi hande, mi kaufela luna ne lu latelela litaelo. Ha ku na ya na bulela lipulelo ze maswe kamba ku tahisa mifilifili. Na komokile hahulu ha na boni batu bao mo ne ba kona ku bela balikani kapili-pili.”

Muzwale ya na belekela kwa Liluko la Makande kwa mukopano wa kwa Prague u talusa kuli: “La Sunda kakusasana, yo muhulu wa mapokola ba ne ba belekela kwa sibaka sa mukopano a to lu potela. Kono a lemuha kuli ne ku na ni kozo fa sibaka mi a li na si na musebezi. Hape na bulezi kuli batu ba ne ba pila bukaufi ni sitediyamu ne ba batile ku ziba kuli mukopano wo ne li wañi. Ha na bulezi kuli ne li wa Lipaki za Jehova, ne ba komokile hahulu mi mupokola yo a ba taluseza kuli: ‘Kambe batu ne ba ka likanyisa Lipaki za Jehova nihaiba fela hanyinyani, mapokola ne ba si ke ba tokwahala.’”

Ba Bañata Ba Punyuhile Kale!

Linzwi la Mulimu, li swalisanisize Bakreste ku si na taba kuli ba zwa mwa linaha ze shutana-shutana. (Maroma 14:19; Maefese 4:22-24; Mafilipi 4:7) Taba yeo ne i iponezwi hande kwa mikopano ye ipitezi ya “Puluso I Fakaufi!” Lipaki za Jehova ba punyusizwe kale kwa matata a mañata a lifasi le. Ba ambukile moya wa saluluti, mifilifili, ni ndimbelela, mi ba talimezi kwapili muta lifasi kaufela li ka tokwa matata a cwalo.

Ba ne ba fumanehile kwa mikopano yeo ne ba iponezi swalisano ye mwahal’a Lipaki ba ba zwa mwa linaha ni mipilelo ye fapahana. Nto yeo ne i iponezwi hande mikopano ha i fela. Kaufel’a bona ne ba kwashela, ku kumbata balikani ba banca, mi ne ba angana maswaniso lwa mafelelezo. (1 Makorinte 1:10; 1 Pitrosi 2:17) Linumwana za mukopano ne ba tabile mi ne ba na ni sepo ya kuli matata kaufela a tuha a fela mi ne ba kutezi habo bona inze ba ikatulezi kuli ba ka swala ka t’ata “Linzwi la bupilo” la Mulimu.—Mafilipi 2:15, 16

[Litaluso za kwatasi]

[Mbokisi/Siswaniso se si fa likepe 10]

Lipuo Ze 26 Li Swalisani Hamoho

Kwa mikopano kaufela ye 9, lingambolo ne li filwe mwa puo ya mwa linaha zeo. Kwa Germany lingambolo hape ne li filwe mwa lipuo ze ñwi ze 18. Kwa Dortmund lingambolo ne li filwe mwa si-Arabic, si-Farsi, Siputukisi, si-Spanish ni si-Russia; kwa Frankfurt, ne li filwe mwa Sikuwa, Sifura ni si-Serbia kamba si-Croatia; kwa Hamburg mwa si-Danish, si-Dutch, si-Swedish ni mwa si-Tamil; kwa Leipzig mwa si-Chinese, si-Polish ni mwa si-Turkish; mi kwa Munich ne li filwe mwa Sigerike, si-Italia ni mwa puo ya bosusu ya kwa Germany. Kwa Prague lingambolo kaufela ne li filwe mwa si-Czech, Sikuwa ni mwa si-Russia. Kwa Bratislava lingambolo ne li filwe mwa Sikuwa, mwa si-Hungary, si-Slovak ni mwa puo ya bosusu ya kwa Slovakia. Kwa Chorzow lingambolo ne li filwe mwa si-Polish, si-Russia, si-Ukrainia ni mwa puo ya bosusu ya kwa Poland. Kwa Poznan lingambolo ne li filwe mwa si-Polish ni si-Finnish.

Kwa mikopano yeo kaufela lingambolo ne li filwe mwa lipuo ze 26! Baputehi kaufela ne ba swalisani hamoho ka lilato ku si na taba kuli ne ba bulela lipuo ze shutana-shutana.

[Siswaniso se si fa likepe 9]

Baputehi ba kwa Croatia mwa Frankfurt ne ba tabile ku amuhela Bibele ya “New World Translation” mwa puo ya bona