Barizilai—Munna ya N’a Ziba Mapalelwi a Hae

‘BARIZILAI wa lilimo ze 80 n’a bulelezi Mulena wa Isilaele Davida kuli: ‘Ku ka tusañi ha ni ka fetuha mushimbo ku wena.’ Bibele i talusa kuli Barizilai ne li “mutu ya luwile hahulu.” (2 Samuele 19:32, 35) N’a pila mwa naha ya Giliadi, mwa sibaka sa malundu se si kwa upa wa Nuka ya Jordani.—2 Samuele 17:27; 19:31.

Ne ku ezahalañi Barizilai ha n’a bulezi manzwi ao ku Davida? Mi ki nto mañi ye ne tisize kuli munna wa musupali yo a bulele cwalo?

Mulena Ha Kwenuhelwa

Davida n’a li mwa kozi. Mwan’a hae Abisalomi n’a icolisize fa bulena hamulaho wa ku “hapa lipilu za bana ba Isilaele.” Ne ku bonahala hande kuli Abisalomi n’a ka bulaya mutu kaufela ya n’a sepahala ku Davida. Kacwalo, Davida ni batanga ba hae ba baleha mwa Jerusalema. (2 Samuele 15:6, 13, 14) Davida ha fita mwa Mahanaimi, ili sibaka se si kwa upa wa Jordani, Barizilai a mu tusa.

Barizilai ni banna ba bañwi ba babeli, bo Shobi ni Makiri, ba yumbula Davida lico ze ñata. Banna ba balalu ba ba sepahala bao ne ba bonisize kuli ne ba utwisisa butata bwa n’a li ku bona Davida ni batu ba hae, kakuli ne ba bulezi kuli: “Sicaba si lapile, si katezi, mi si shwile linyolwa kabakala lihalaupa.” Bo Barizilai, Shobi, ni Makiri ba eza ka mo ne ba konela kaufela  ku tiseza Davida ni batu ba hae malobalo, buloto, mabele, bupi, likobe ze cokozwi, manawa a makima, manawa a masisani, linosi, mafula a silileli, lingu ni lika ze ñwi.—2 Samuele 17:27-29.

Ku tusa Davida ne ku kona ku tahisa kozi. Abisalomi n’a ka ota mutu kaufela ya n’a ka tusa Davida, yena mulena ya swanela. Kacwalo, ka ku sepahala ku Davida, Barizilai n’a bonisize bundume.

Lika Ha Li Kutela Mo Ne Li Inezi Sapili

Nakonyana fela hamulaho, mpi ya Abisalomi ya baipanguli ya lwana ni banna ba Davida. Ndwa yeo ne i lwanezwi mwa mushitu wa Efraimi, mwendi mabapa ni Mahanaimi. Balwani ba Abisalomi ba tulwa, “mi pulao ya bona ya ba ye tuna mwa lizazi leo.” Nihaike kuli Abisalomi n’a likile ku ñweha, kono a bulaiwa.—2 Samuele 18:7-15.

Davida hape a busa Isilaele ku si na ya mu lwanisa. Balateleli ba hae ne ba si ka pila sina linyambaeti hape. Mi bakeñisa kuli ne ba sepahalile ku yena, Davida a ba kuteka ni ku itebuha bona.

Davida ha n’a tuha a kutela kwa Jerusalema, “Barizilai wa kwa Giliadi a zwa mwa Rogelimi, a fita, a sila Jordani hamoho ni mulena, ku mu silisa Jordani.” Ka lizazi leo, Davida a mema Barizilai wa musapali a li: “A lu zamaye ni wena, ni ku ute ku na mwa Jerusalema.”—2 Samuele 19:15, 31, 33.

Ka niti luli, Davida n’a itebuha hahulu za n’a mu ezelize Barizilai. Mi mulena ha na mema Barizilai ne si ka libaka la ku kutisa mazoho bakeñisa lika za n’a mu file. Barizilai wa mufumi n’a sa tokwi ku fiwa lika. Mwendi Davida n’a bata kuli munna-muhulu yo a yo ba nduna mwa kuta ya hae kakuli n’a na ni mikwa ye minde hahulu. Ku yo pila mwa Jerusalema ne li tohonolo ye tuna, mi tohonolo yeo ne i ka konisa Barizilai ku ikola silikani ni mulena.

Buishuwo ni ku Nga Lika ka Mo Li Inezi

Barizilai alaba Mulena Davida a li: “Ki a makai mazazi a myaha ye ni pilile, ha u li ni ye kwa Jerusalema ni mulena? Kacenu ni feza myaha ye 80. Kana ni sa na ni mo ni ka ketela se si munati ku se si baba? kamba mutang’a hao u sa na ni mw’a ka utwela mwahanu se ni ca, kamba se ni nwa? ni ku utwa, kana ni sa kona ku utwa manzwi a banna ni a basali ba ba opela?” (2 Samuele 19:34, 35) Kacwalo, Barizilai ka likute a hana ku ya ni mulena mi a hana ni tohonolo ya n’a filwe. Kono n’a haneziñi?

Libaka le liñwi la n’a hanezi Barizilai mwendi ne li la kuli ne se li musupali mi n’a na ni mapalelwi a mwa busupali. Mwendi Barizilai n’a ikutwa kuli n’a si na a matelele. (Samu 90:10) N’a likile ka mwa n’a konela kaufela ku tusa Davida, kono hape n’a ziba kuli n’a unjamwi ki mapalelwi a mwa busupali. Barizilai n’a si ka tuhelela moya wa ku ba ni libubo ku mu palelwisa ku nyakisisa hande za buikoneli bwa hae. Ka ku sa swana ni Abisalomi, Barizilai ka butali a bonisa buishuwo.—Liproverbia 11:2.

Libaka le liñwi le ne li tisize kuli Barizilai a eze katulo ye cwalo mwendi ne li la kuli n’a sa lati kuli busupahali bwa hae bu palelwise misebezi ya mulena ya ketilwe ki Mulimu. Barizilai n’a buzize kuli: “Ku ka tusañi mutang’a hao h’a ka fetuha mushimbo ku mulena muñ a ka?” (2 Samuele 19:35) Nihaike n’a sa zwelapili ku tusa Davida, ku bonahala kuli Barizilai n’a nga  kuli mutangana ki yena ya n’a ka kona ku eza hande misebezi. Mwendi ka ku ama ku mwan’a hae, Barizilai n’a bulezi kuli: “mutang’a hao, Kimihami, ki yo, u ka sila ni mulena muñ a ka; yena u mu eze m’o latela kaufela.” Ku fita ku nyema, Davida a lumela ku ya ni Kimihami. Mane pili a si ka sila kale Jordani, Davida a “tubeta Barizilai, a mu fuyola.”—2 Samuele 19:37-39.

Lu Tokwa ku Ba ni Buitikaneleli

Likande la Barizilai li bonisa butokwa bwa ku ba ni buitikaneleli. Ha lu swaneli ku hana matohonolo a sebelezo e lu fiwa kamba ku ina wa tandabale kuli lu si ke lwa fiwa misebezi ilikuli lu pile bupilo bo bu si bwa mipateho. Hape lu si ke lwa ikutwa kuli ha lu na buikoneli bwa ku peta misebezi. Mulimu wa kona ku lu tusa ku peta misebezi haiba lu itinga fa m’ata ni butali bwa hae.—Mafilipi 4:13; Jakobo 4:17; 1 Pitrosi 4:11.

Kono hape lu swanela ku ziba mapalelwi a luna. Ka mutala, mwendi Mukreste u patehile hahulu bakeñisa misebezi ya kwa moya. Mi u lemuha kuli ha ka amuhela misebezi ye miñwi ya kwa moya, a ka swana a palelwa ku peta buikalabelo bwa hae bwa ka Mañolo bwa ku babalela lubasi lwa hae. Mwa muinelo wo cwalo, muzwale yo n’a ka bonisa buishuwo ni buitikaneleli ha n’a si ke a amuhela misebezi ye miñwi ya kwa moya ka nako yeo.—Mafilipi 4:5; 1 Timotea 5:8.

Barizilai ki mutala o munde, mi lu swanela ku nahanisisa mutala wa hae. Ne li munna ya sepahala, ya bundume, ya fana, ni ya ishuwa. Mi sa butokwa ni ku fita kikuli, Barizilai n’a ikatulezi ku eza pili misebezi ya Mulimu mwa bupilo bwa hae.—Mateu 6:33.

[Mapa ye fa likepe 15]

(Kuli mu bone mo i hatiselizwe luli, mu bone hatiso)

Barizilai wa lilimo ze 80 n’a tamile musipili o katalisa kuli a yo tusa Davida

EFRAIMI

GILIADI

Jerusalema

Nuka ya Jordani

Giligali

Jeriko

Rogelimi

Sukoti

Mahanaimi

[Siswaniso se si fa likepe 13]

Ki kabakalañi Barizilai ha n’a hanile ku ya ni Davida?