Ku Libelela Lizazi la Jehova ka Buitiiso

“Kwa tumelo ya mina mu ekeze . . . ku itiisa.”—2 PITROSI 1:5, 6.

1, 2. Ku itiisa ku talusañi, mi ki kabakalañi Bakreste ha ba tokwa ku itiisa?

LIZAZI la Jehova le lituna li fakaufi hahulu. (Joele 1:15; Zefania 1:14) Ka ku ba Bakreste ba ba ikatulezi ku zwelapili ku sepahala ku Mulimu, lu nyolelwa hahulu nako muta bubusi bwa Jehova bu ka bubaniswa. Kono ka nako ya cwale, lwa toiwa, lwa kendiwa, lwa nyandiswa, mi lwa bulaiwa kabakala tumelo ya luna. (Mateu 5:10-12; 10:22; Sinulo 2:10) Kacwalo lu tokwa ku itiisa. Ku itiisa ki ku tiyela matata. Muapositola Pitrosi u lu susueza kuli: “Kwa tumelo ya mina mu ekeze . . . ku itiisa.” (2 Pitrosi 1:5, 6) Lu tokwa ku itiisa kakuli Jesu n’a ize: “Ya tundamena ku isa kwa mafelelezo, ki yena ya ka piliswa.”—Mateu 24:13.

² Hape lwa kulanga, lu banga mwa masitapilu, mi lu kopananga ni litiko ze ñwi. Satani u ka ba ya tabile luli haiba tumelo ya luna i fokola! (Luka 22:31, 32) Ka ku tusiwa ki Jehova, lwa kona ku tiyela litiko ze shutana-shutana. (1 Pitrosi 5:6-11) Ha lu nyakisiseñi litaba ze ezahezi luli ze bonisa kuli lwa kona ku libelela lizazi la Jehova ka buitiiso ni ka tumelo ye sa zikinyehi.

Ha Ba Si Ka Tuhela Niha Ba Kula

3, 4. Mu fe mutala o bonisa kuli lwa kona ku sebeleza Jehova ka busepahali niha lu kula.

³ Mulimu ha lu folisangi ka makazo, kono u lu fanga m’ata a ku tiyela makulanu. (Samu 41:1-3) Bo Sharon ba li: “Ni zamaelanga fa sipula sa mawili ku zwa fela kwa bwanana bwa ka. Butuku bo bu tiswa ki ku sinyeha kwa booko ne bu ni palelwisize ku ikola bwanana bwa ka.” Ku ituta za Jehova ni lisepiso za hae za buikangulo bo bunde ku tusize bo Sharon ku ba ni sepo. Nihaike kuli bo Sharon ha ba koni hande ku bulela ni ku zamaya, ba fumana tabo mwa bukombwa bwa Sikreste. Lilimo ze 15 kwamulaho ne ba bulezi kuli: “Buikangulo bwa ka bwa kona ku zwelapili ku fokola, kono sepo ya ka ku Mulimu ni silikani sa ka ni yena li ka ni pilisa. Ni ya tabile hahulu ku ba mwahal’a batu ba Jehova mi ni itebuha ni tuso ya ni fa Jehova!”

⁴ Muapositola Paulusi n’a susuelize Bakreste ba kwa Tesalonika kuli ba “tiise ba lipilu ze shekesha.” (1 Matesalonika 5:14) Lika ze cwale ka ku swabiswa hahulu li kona ku tahisa kuli mutu a tomohe pilu. Ka 1993, bo  Sharon ne ba ñozi kuli: “Bakeñisa kuli ne ni ikutwa ku ba mupalelwi, na . . . tomoha hahulu pilu ka lilimo ze talu. . . . Maeluda ba ni omba-omba ni ku ni eleza. . . . Ka ku itusisa Tora ya ku Libelela, Jehova ka lilato a lu fa lituto ze talusa muinelo wa ku tomoha hahulu pilu. Kaniti luli, Mulimu wa babalela batu ba hae mi wa utwisisa maikuto a bona.” (1 Pitrosi 5:6, 7) Bo Sharon ba sa sebeleza Mulimu ka busepahali ha ba nze ba libelela lizazi la Jehova le lituna.

5. Ki bufi bupaki bo bu bonisa kuli Bakreste ba kona ku itiisa niha ba zwafile hahulu?

⁵ Bakreste ba bañwi ba zwafile bakeñisa lika ze ñwi ze ne ezahezi kwamulaho. Bo Harley ne ba iponezi mifilifili ye maswe ka nako ya Ndwa ya Lifasi ya Bubeli mi ne ba lolanga fela za ndwa. Fokuñwi ha ba lobezi ne ba huwanga kuli: “Ha mu sabe kozi! Mwa shwa!” Ha ne ba zuhanga ne ba fufulelwanga hahulu. Kono ne ba konile ku pila ka ku lumelelana ni likuka za Mulimu, mi ha se ku fitile nako, ba tuhela ku lolanga hahulu za ndwa.

6. Mukreste yo muñwi n’a tiyezi cwañi butuku bo butuna?

⁶ Mukreste yo muñwi ya n’a fumanwi ni butuku bo buñwi bo butuna n’a fumananga t’ata ku kutaza fa ndu ni ndu. Kono a zwelapili ku yanga mwa bukombwa, bakeñisa kuli n’a lemuhile kuli bukombwa bu ka mu pilisa ni ku pilisa ba ba mu utwa. (1 Timotea 4:16) Fokuñwi n’a palelwanga nihaiba ku ngongota fa munyako, kono n’a ize: “Hamulaho wa nako, ne ni kona ku itiisa ni ku ya fa ndu ye tatama, ku lika ku kutaza. Mi bakeñisa kuli ne ni zwezipili ku yanga mwa bukombwa, ne ni konile ku tiya kwa moya.” Muzwale y’o hape ne ku mu belanga t’ata ku fumaneha kwa mikopano, kono n’a kozwi kuli mikopano ya Sikreste ki ya butokwa hahulu. Kacwalo, n’a likanga ka mwa n’a konela kaufela ku fumanehanga kwa mikopano.—Maheberu 10:24, 25.

7. Nihaike kuli ba bañwi ba na ni sabo ya ku bulela fapil’a batu mi ba saba ku fumaneha kwa mukopano, ba bonisa cwañi buitiiso?

⁷ Bakreste ba bañwi ba saba hahulu miinelo ye miñwi ni lika ze ñwi. Ka mutala, ba bañwi ba na ni sabo ye tuna ya ku bulela fapil’a batu kamba mane nihaiba ku fumaneha kwa mukopano. Bakreste ba ba cwalo ku ba belanga t’ata ku alaba kwa mikopano ya Sikreste kamba ku fa ngambolo mwa Sikolo sa Bukombwa sa Teokratiki. Kono ba itiisa, mi lwa itebuha hahulu kuli ba fumanehanga ni ku abana kwa mikopano.

8. Mutu ha zwafile hahulu, u swanela ku ezañi sihulu?

⁸ Mutu ya zwafile hahulu wa kona ku itiisa ka ku pumulanga hahulu ni ku lobala. Mi hape wa kona ku bata likalafo. Niteñi, sa butokwa hahulu ki ku itinga ku Mulimu ka tapelo. Samu 55:22 i li: “U lwalise [Muñ’a] Bupilo mulwalo wa hao, mi u ka ku tiisa. H’a na ku lumela kuli ya na ni niti a nyanganyiswe.” Kacwalo, haike mu “sepe [Muñ’a] Bupilo ka pilu ya [mina] kaufela.”—Liproverbia 3:5, 6.

Ku Itiisa Ha Lu Shwelwa

9-11. (a) Ki likamañi ze kona ku lu tiisa ha lu shwezwi? (b) Mutala wa Anna u kona ku lu tiisa cwañi ha lu shwezwi?

⁹ Yo muñwi mwa lubasi ha timela, ba ba siyala ba banga mwa matomola a matuna hahulu. Abrahama n’a lilile Sara, musal’a hae ya n’a lata, ha n’a timezi. (Genese 23:2) Nihaiba yena Jesu ya n’a petehile n’a ‘lilile’ mulikan’a hae Lazaro ha n’a shwile. (Joani 11:35) Kacwalo batu kaufela ba banga mwa matomola muta mutu ye ba lata ha timela. Kono Bakreste ba ziba kuli ba ba shwile ba ka zuha. (Likezo 24:15) Kabakaleo, ha ba ini “mwa maswabi, sina . . . ba ba si na sepo.”—1 Matesalonika 4:13.

¹⁰ Lu kona ku itiisa cwañi ha lu shwezwi? Mwendi lu itusise mutala kuli lu bone nto ye kona ku lu tusa. Mulikan’a luna ha tamile kasipili, ha lu ikutwangi bulutu mwa pilu ka nako ye telele, kakuli lwa zibanga kuli u ka kuta mi lu ka to bonana hape. Ka ku swana, ku hupula  kuli muta o muñwi lu ka bonana ni Mukreste ya sepahala ya timezi, ku kona ku lu tusa kuli lu si ke lwa tomoha hahulu pilu ka ku felelwa ki sepo, kakuli lwa ziba kuli u ka zusiwa kwa bafu.—Muekelesia 7:1.

¹¹ Ku itinga hahulu ku “Mulimu wa ze tiisa pilu kaufela” ku ka lu tusa ku tiya ha lu shwezwi. (2 Makorinte 1:3, 4) Mi hape lu ka tiiswa ha lu ka nahana za n’a ezize Anna, mbelwa wa kwaikale. N’a shwezwi ki munn’a hae hamulaho fela wa ku nyalana ka lilimo ze supile. Kono ha n’a li wa lilimo ze 84, n’a sa sebeleza Mulimu kwa tempele. (Luka 2:36-38) Ku si na ku kakanya, sebelezo ya hae yeo ya ka tukufalelo ne i mu tusize ku tiyela masitapilu ni buinosi. Ku ezanga kamita misebezi ya Sikreste, ye cwale ka ku kutaza Mubuso, ku kona ku lu tusa ku tiya ha lu shwezwi.

Ku Tiyela Litiko Ze Shutana-Shutana

12. Bakreste ba bañwi ba tiyela litiko mañi mwa lubasi?

¹² Bakreste ba bañwi ba sweli ku tiyela litiko za mwa lubasi. Ka mutala, haiba munna kamba musal’a mutu a buka, seo si kona ku tisa malilalila mwa lubasi. Bakeñisa ku komokisa ni ku swabisa kwa kezo yeo, munna kamba musali ya si na mulatu wa kona ku sa bona buloko mi wa kona ku tuwa sililo. Nihaiba misebezi ye bunolo i kona ku bela t’ata mutu ya cwalo, kuli mane u kona ku eza mafosisa kamba ku tisa kolofalo. Munna kamba musali ya si na mulatu wa kona ku palelwa nihaiba ku ca, mi wa kona ku ota ni ku lyangana. Nihaiba misebezi ya Sikreste ya kona ku mu bela t’ata ku i eza. Mi taba yeo ya kona ku ziyeza hahulu nihaiba bana.

13, 14. (a) Tapelo ya Salumoni ha ne ku kakulwa tempele i mi tiisa cwañi? (b) Ki kabakalañi ha lu kupanga moya o kenile ku Mulimu?

¹³ Ha lu talimana ni litiko ze cwalo, Jehova u lu fanga tuso ye lu tokwa. (Samu 94:19) Tapelo ya Mulena Salumoni ha ne ku kakulwa tempele ya Jehova i bonisa kuli Jehova wa utwanga litapelo za batu ba hae. Salumoni n’a lapezi ku Mulimu kuli: “Tapelo ni kupo kaufela ye ka tahiswa ki mutu ufi kamba ufi, kamba ki sicaba kaufela sa Isilaele, ka ku iziba mutu ni mutu se si mu kataza mwa pilu ya hae, mi a otololela mazoho a hae kwa neku la Ndu ye, U utwe, u li mwa lihalimu mwa sibaka sa hao, u swalele, u eze; u fe mutu ni mutu ka mizamao ya hae m’o zibela pilu ya hae. Kakuli Wena ki Wena u li  nosi ya ziba lipilu za bana ba batu kamukana. Kuli ba ku sabe mwa mazazi kaufela a ba ka pila mwa naha y’o n’o file bokuku a luna ba kale.”—1 Malena 8:38-40.

¹⁴ Sihulu ki kwa butokwa hahulu ku kupanga moya o kenile ku Mulimu. (Mateu 7:7-11) Muselo wa moya wo u kopanyeleza tabo ni kozo. (Magalata 5:22, 23) Lu ka tiiswa Ndat’a luna ya kwa lihalimu ha ka alaba litapelo za luna. Ku fita ku ba ni masitapilu ni ku utwa maswabi, lu ka ba ni tabo ni kozo.

15. Ki mañolo mañi a ka lu tusa ku fukuza kwa lipilaelo za luna?

¹⁵ Ha lu tiyela tiko ye ñwi ye tuna, lwa kona ku ikalelwa hahulu. Kono niha lu ikalelwa cwalo, lipilaelo ze ñwi li ka fukuzwa ha lu ka hupula manzwi a Jesu a, a li: “Mu si ke mwa bilaela ka za bupilo bwa mina, ka se mu ka ca, ni ka se mu ka nwa; nihaiba ka za mibili ya mina, ka se mu ka apala. ... Kono mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.” (Mateu 6:25, 33, 34) Muapositola Pitrosi u lu susueza kuli ‘lu nepele lipilaelo za luna kaufela ku Mulimu, kakuli wa lu tokomela.’ (1 Pitrosi 5:6, 7) Lwa swanela ku ikataza ku tatulula butata. Niteñi, ha se lu ikatalize, lu si ke lwa bilaela fela kono lu lapele za butata b’o. Walisamu n’a opezi kuli: “U beye nzila ya hao ku [Muñ’a] Bupilo. U mu sepe, mi ku ka sebeza Yena.”—Samu 37:5.

16, 17. (a) Ki kabakalañi ha lu banga ni lipilaelo? (b) Lu ka ba ni nto mañi ha lu ka latelela ze li bulela liñolo la Mafilipi 4:6, 7?

¹⁶ Paulusi n’a ñozi kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafilipi 4:6, 7) Ka ku ba batu ba ba si ka petahala ba ba simuluha ku Adama, ha lu koni ku sa ba ni lipilaelo. (Maroma 5:12) Basali ba Isau ba Mahiti ne “ba kenya butuku mwa lipilu” za bashemi ba hae, bo Isaka ni Rebeka. (Genese 26:34, 35) Mi mwendi makulanu n’a bilaelize Bakreste ba ba cwale ka Timotea ni Trofimo. (1 Timotea 5:23; 2 Timotea 4:20) Paulusi n’a ikalezwi za balumeli ba bañwi. (2 Makorinte 11:28) Kono Jehova “ya utwa milapelo” u tusanga ba ba mu lata.—Samu 65:2.

¹⁷ Ha lu nze lu libelela lizazi la hae, Jehova, yena “Mulimu wa kozo” u ka lu tiisa ni ku lu omba-omba. (Mafilipi 4:9) Jehova u na ni “makeke ni musa,” wa “lata ku swalela,” mi ‘wa hupulanga kuli lu liluli fela.’ (Exoda 34:6; Samu 86:5; 103:13, 14) Kacwalo, lu ‘zibise Mulimu se lu bata ka kupo,’ mi ku eza cwalo ku ka lu tusa ku ba ni “kozo ya Mulimu” ili buiketo bwa mwa pilu bo bu sa konwi ku utwisiswa ki batu.

18. Sina mo ku taluselizwe kwa Jobo 42:5, lu kona ku “bona” cwañi Mulimu?

¹⁸ Litapelo za luna ha li alabiwa, lwa ziba kuli Mulimu u na ni luna. Hamulaho wa ku tiyela litiko, Jobo n’a bulezi kuli: “Ne ni utwile za hao [Jehova] ka lizebe fela, kono cwale meto a ka a ku bona.” (Jobo 42:5) Ka meto a kutwisiso, tumelo, ni buitebuho, lu ka bona mwa lu tuselize Mulimu mi lu ka mu “bona” ka nzila ye lu si ka mu bona kale ka yona. Ku ziba Mulimu ka nzila ye cwalo ku ka tisa kuli lu be ni kozo mwa lipilu ni mwa minahano.

19. Ki likamañi ze ka ezahala haiba ‘lu nepela lipilaelo za luna kaufela ku Jehova’?

¹⁹ Haiba ‘lu nepela lipilaelo za luna kaufela ku Jehova,’ lu ka tiyela litiko ka ku ba ni buiketo bo bu ka tiisa lipilu za luna ni kutwisiso ya luna. Mwa lipilu za luna za swanisezo, ha lu na ku ba ni sabo mi ha lu na ku ikalelwa. Ha lu na ku ba ni lipilaelo mwa minahano ya luna.

20, 21. (a) Taba ya Setefani i bonisa cwañi kuli mutu wa kona ku ba ni kozo niha nyandiswa? (b) Mu taluse mitala ya batu ba mwa miteñi ye, ba ne ba bile ni kozo ha ne ba tiyela litiko.

²⁰ Mulutiwa Setefani n’a na ni kozo ya mwa munahano ha n’a tiyezi tiko ye tuna ya tumelo ya hae. Pili a si ka fa kale bupaki bwa hae bwa mafelelezo, batu kaufela mwa Kuta ye tuna ya Majuda “ba bona pata ya hae kuli i bonahala  inge ya lingeloi.” (Likezo 6:15) Pata ya hae ne i bonahala ku iketa inge ya lingeloi la Mulimu. Setefani ha n’a ba bulelezi ngambu kuli ne ba na ni mulatu wa ku bulaya Jesu, baatuli “ba tanya mwa lipilu, mi ba itumela yena ñaña.” Setefani “inz’a tezi Moya o Kenile, a talima kwa lihalimu mi a bona kanya ya Mulimu, ni Jesu a yemi ku la bulyo la Mulimu.” Ka ku tiiswa ki pono yeo, Setefani a itiisa ku isa kwa lifu. (Likezo 7:52-60) Nihaike ha lu koni ku bona lipono kacenu, Mulimu wa kona ku lu fa kozo ha lu nyandiswa.

²¹ Ha lu nyakisiseñi ze ne ba bulezi Bakreste ba bañwi ba ne ba nyandisizwe ki ba Nazi mwa Ndwa ya Lifasi ya Bubeli. Mukreste yo muñwi ha bulela ze ne ezahezi ha zekiswa u li: “Na atulelwa lifu. Na teeleza, mi ha se ni bulezi manzwi a li, ‘U sepahale ku isa kwa lifu,’ ni manzwi a mañwi a Mulen’a luna, na yoyelwa. . . . Mu si ke mwa bilaela. Kakuli ni na ni kozo ye mu sa koni ku utwisisa!” Mukreste wa mukulwani ya n’a atulezwi lifu ka ku silahiwa, n’a ñolezi bashemi ba hae kuli: “Se li malungasiku. Ni sa kona ku latula Mulena. Kono kana ni ka ba ni tabo mwa lifasi le, ha se ni latuzi Mulen’a luna? Batili ni hanyinyani! Kono cwale mu kolwe kuli ni siya lifasi le inze ni na ni tabo ni kozo.” Ku si na ku kakanya, Jehova wa tusanga batanga ba hae ba ba sepahala.

Mwa Kona ku Itiisa!

22, 23. Ki likamañi ze mu ka fumana haiba mu libelela lizazi la Jehova ka buitiiso?

²² Mwendi ha mu na ku talimana ni litiko ze ñwi ze bulezwi mwa taba ye. Kono Jobo munna ya saba Mulimu n’a bulezi niti ha n’a ize: “Mutu ya pepilwe ki musali, bupilo bwa hae ki bo bukuswani, mi bu tezi maziyezi.” (Jobo 14:1) Mwendi mu bashemi ba ba sweli ku lika ka t’ata ku luta bana ba mina litaba za mwa Bibele. Bana ba mina ba na ni ku tiyela litiko kwa sikolo, kono mu tabanga hahulu ha ba yemela Jehova ni ku latelela likuka za hae ze lukile. Mwendi mu kopana ni matata ni miliko kwa mubeleko. Kono mwa kona ku tiyela litiko zeo ni ze ñwi, bakeñisa kuli Jehova wa mi “lwalela milwalo ka zazi ni zazi.”—Samu 68:19.

²³ Mu kana mwa ikutwa kuli mu batu-tu fela ba ba si na tuso, kono mu si libali kuli Jehova ha na ku libala misebezi ya mina ni lilato le mu bonisa kwa libizo la hae. (Maheberu 6:10) Ka tuso ya hae, mwa kona ku tiyela litiko za tumelo ya mina. Kacwalo mu beye tato ya Mulimu mwa litapelo za mina ni mwa milelo ya mina. Kamukwaocwalo, mu ka ba ni sepo ya ku tusiwa ki Mulimu ni ku amuhela limbuyoti za hae ha mu nze mu libelela lizazi la Jehova ka buitiiso.

Ne Mu Ka Alaba Cwañi?

• Ki kabakalañi Bakreste ha ba swanela ku itiisa?

• Ki likamañi ze ka lu tusa ku itiisa ha lu kula ni ha lu shwezwi?

• Tapelo i lu tusa cwañi ku tiyela litiko?

• Kiñi ze lu konisa ku libelela lizazi la Jehova ka buitiiso?

[Lipuzo za Tuto]

[Siswaniso se si fa likepe 29]

Ku itinga ku Jehova kwa lu tiisa ha lu shwezwi

[Siswaniso se si fa likepe 31]

Tapelo ya zwelela kwa pilu i ka lu tusa ku tiyela litiko za tumelo