Lipuzo Ze Zwa kwa Babali

Bakeñisa kuli fa n’a kalelwanga ku kutulwa masimu, Maisilaele kaufela ba banna ne ba li kwa Mukiti wa Mahobe a’ si na Mumela, ki bomañi cwale ba ne ba kutulanga mabele a mitamuno a n’a tiswanga kwa tempele?

Mulao wa Mushe ne u laezi Maisilaele kuli: “Halalu ka mwaha, banna kaufela ba haenu ba ka y’o iponahalisa ku [Muñ’a] Bupilo Mulimu wa hao, mwa sibaka s’a ka keta, mwa mukiti wa Mahobe a’ si na mumela, ni mwa mukiti wa Lisunda, ni mwa mukiti wa Minganda.” (Deuteronoma 16:16) Ku zwa fela mwa miteñi ya Mulena Salumoni, Mulimu n’a ketanga kuli mukiti wo u ezezwe kwa tempele ya mwa Jerusalema.

Mukiti wa pili kwa mikiti ye milalu ye ne ba ezanga Maisilaele ka silimo ne u ezwanga kwa makalelo a maliha. Mukiti wo ne u bizwa kuli Mukiti wa Mahobe a’ si na Mumela, mi ne u kalanga lizazi li li liñwi hamulaho wa mukiti wa Paseka wa la Nisani 14 mi ne u zwelangapili ka mazazi a 7 konji ku yo fita ka la Nisani 21. Fa lizazi la bubeli la mukiti wo, lona la Nisani 16, kona fo ne i kalisezanga kutulo ya pili mwa silimo ka ku ya ka kalenda ya Sijuda. Fa lizazi leo, muprisita yo mutuna na nganga ‘ñata ya mitamuno’ ya kutulo ya mabele ni ku i zungisa ka ku ‘i tambeka ni ku i kutisa fapil’a Jehova,’ kwa tempele. (Livitike 23:5-12) Bakeñisa kuli Maisilaele kaufela ba banna ne ba tokwiwa ku fumaneha kwa Mukiti wa Mahobe a’ si na Mumela, ki bomañi cwale ba ne ba kutulanga mabele a nubu?

Taelo ya ku fa nubu ya mitamuno ku Jehova ka nako ya Mukiti wa Mahobe a’ si na Mumela ne i filwe kwa sicaba kaufela sa Isilaele. Ha ku na mutu ya na lumelelwa ku kala ku kutula ni ku itiseza za mitamuno kwa tempele. Kono sicaba ne si laezwi ku keta bayemeli ba ne ba ka eza musebezi wo. Kacwalo, musebezi wa ku kutula ñata ya nubu ya kwa Mukiti wa Mahobe a’ si na Mumela mwendi ne u eziwanga ki batu ba ne ba lumiwanga ku yo kutula ñata yeo mwa simu ya mabele ye ne li fakaufi. Ku ama fa taba ye, buka ye ñwi ya Sijuda i li: “Haiba mabele a buzwize, n’a kutulwanga fakaufi ni Jerusalema; kono haiba a fakaufi ha si ka buzwa, fohe mabele ao n’a yo kutulwanga mwa libaka li sili za naha ya Isilaele. Mabele ao n’a kutulwanga ki banna ba balalu, mi yo muñwi ni yo muñwi wa banna bao n’a na ni cekesi ya hae ni sizuma sa hae.” (Encyclopaedia Judaica) Hasamulaho, ñata ya mabele ne i tiswanga ku muprisita yo mutuna, mi cwale kihona a i fa ku Jehova.

Taelo ya kuli Maisilaele ba fe mitamuno ya kutulo ya bona ne i file Maisilaele kolo ya ku bonisa buitebuho bwa bona ku Jehova bakeñisa ku ba fuyaulela naha ya bona ni ku ba fa kutulo. (Deuteronoma 8:6-10) Kono sa butokwa ni ku fita kikuli, nubu ye, ye ne i fiwanga fa mukiti, ne li “muluti fela wa ze ne ka taha.” (Maheberu 10:1) Jesu Kreste n’a zusizwe kwa bafu ka la Nisani 16 33 C.E., ili lona lizazi la ku fa nubu ya mitamuno ya kutulo ku Jehova. Muapositola Paulusi ha n’a bulela za Jesu, n’a ize: “Kreste u zuhile kwa bafu, mi ki yena mitamuno ya ba ba lobezi. . . . Kono mutu ni mutu u ka zuha ka nako ya hae: Mitamuno ki Kreste; kihona be ili ba Kreste ba ka zuha h’a taha.” (1 Makorinte 15:20-23) Ñata ya mitamuno ya n’a zungisanga muprisita yo mutuna fapil’a Jehova ne i swaniseza Jesu Kreste ya zuhile kwa bafu, ili yena mutu wa pili ku zusezwa kwa bupilo bwa kamita. Kacwalo Jesu n’a kwaluzi nzila ye lukulula batu kwa sibi ni lifu.

[Manzwi a bañi ba siswaniso fa likepe 26]

© 2003 BiblePlaces. com