Kana Mulimu Wa Mi Bona?

KANA Mubupi yo Mutuna, Jehova, wa kona ku bona? Eni wa kona ku bona! Bibele i bulela hande kuli: “Ya bupile liito, mu li a si ke a bona?” (Samu 94:9) Jehova u bona hande hahulu ku fita batu. Mulimu ha boni fela mo lu bonahalela fande kono hape ki yena “ya lika lipilu,” mi wa kona ku “beya lipilu fa sikala ku li likanyeza.” (Liproverbia 17:3; 21:2) Kaniti, wa kona ku tatuba minahano ya luna, milelo ya luna, ni litakazo za luna za mwa pilu.

Jehova wa ziba matata e lu talimana ni ona mwa bupilo mi wa alabanga likupo za luna. Walisamu n’a ñozi kuli: “Meto a [Muñ’a] Bupilo a talimile ba ba na ni niti, mi lizebe za hae li teeleza mihuwo ya bona. [Muñ’a] Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.” (Samu 34:15, 18) Kwa tiisa luli ku ziba kuli Jehova wa ziba miinelo ya luna ni kuli wa alabanga likupo za luna za ka pilu kaufela!

Jehova Mulimu wa ziba nihaiba misebezi ye ezwa mwa lififi le lituna. Kaniti, “lika kaufela li inzi fande, mi li atami, mwa meto a hae Yena ye lu na ni ku ikalabela ku Yena.” (Maheberu 4:13) Kacwalo, Mulimu wa bona likezo za luna kaufela ibe kuli ki ze nde kamba ki ze maswe. (Liproverbia 15:3) Ka mutala, liñolo la Genese 6:8, 9 li bonisa kuli ‘Nuwe n’a shemubilwe ki [Muñ’a] Bupilo’ ni kuli n’a ‘zamaile ni Mulimu.’ Nuwe n’a latiwa ki Mulimu mi n’a mu fuyauzi bakeñisa kuli n’a utwile Mulimu mi n’a kumalezi likuka za hae ze lukile. (Genese 6:22) Ka ku fapahana ni Nuwe, batu ba ne ba pila mwa miteñi ya Nuwe ne ba na ni mifilifili ni mizamao ye maswe. Mulimu n’a bona ze ne ba eza. Mulimu “a bona bumaswe bwa batu kuli ki bo butuna mwa lifasi, ni kuli mihupulo kamukana ya lipilu za bona ki ye maswe fela, ka mazazi kamukana.” Mi kacwalo Jehova a sinya batu ba ba maswe mi a pilisa Nuwe ni lubasi lwa hae.—Genese 6:5; 7:23.

Kana Jehova ha mi talima u bona kuli mu batu ba bande? Ki niti, meto a Jehova “a talimisisa lifasi kaufela, kuli a tahise mata a hae ku tusa ba ba mu file lipilu za bona, kaufela zona.” (2 Makolonika 16:9) Honacwale-cwale fa, u ka tuha a sinya hape batu kaufela ba maswe fa lifasi ni ku pilisa ba ba ishuwa.—Samu 37:10, 11.