Lipuzo Ze Zwa kwa Babali

Davida ha sa bulaile Goliati, ki kabakalañi Mulena Saule ha n’a mu buzize kuli, “mutangana, u mwan’a mañi?” hailifo yena Saule kwamulaho n’a kile a biza Davida kuli a to mu sebeleza?—1 Samuele 16:22; 17:58.

Mutu u kona ku bulela kuli Saule n’a libezi Davida bakeñisa kuli ne ba kopani fela ka nako ye nyinyani lwa pili. Kono ha ku bonahali cwalo, kakuli taba ye kwa 1 Samuele 16:18-23 i bonisa kuli Mulena Saule kasibili n’a kile a biza Davida mi a fita fa ku mu lata hahulu ni ku mu beya mulwali wa lilwaniso za hae. Kacwalo Saule u lukela ku ba ya n’a ziba hande Davida.

Bocaziba ba bañwi ba Bibele ba talusa kuli litaba ze kwa 1 Samuele 17:12-31 ni ze kwa 1 Samuele 17:55–18:5 ne li ekelizwe hamulaho kakuli ha li fumanehi mwa likopi ze ñwi za Bibele ya Septuagint ya Sigerike, ili toloko ya Mañolo a Siheberu ya mwa lilimo za mwanda wa bubeli B.C.E. Kono ha lu swaneli ku lumela kuli litaba zeo ne li ekelizwe hamulaho ka libaka fela la kuli ne li siyo mwa likopi ze ñwi za toloko yeo ya Septuagint, kakuli litaba zeo za fumaneha mwa miputo ye miñwi ye nepahezi ya Mañolo a Siheberu.

Ku bonahala kuli Saule ha n’a buzize pili Abinere kihona a buza Davida kasibili, sa n’a bata luli ne si fela ku ziba libizo la ndat’ahe Davida. Ha sa lemuhile kuli Davida n’a na ni tumelo ye tiile ni bundume ze ne mu konisize ku bulaya Goliati, Saule n’a bata ku ziba kuli ki munna ya cwañi ya n’a hulisize mutangana yo. Mwendi Saule n’a bata kuli Jese ndat’ahe Davida, kamba mutu yo muñwi wa mwa lubasi lwa Jese a kene mwa mpi ya hae bakeñisa kuli n’a nahana kuli bundume bwa n’a boni ku Davida ne bu li teñi ni ku ndat’ahe kamba ku mañi ni mañi wa mwa lubasi lwa hae.

Nihaike kuli kwa 1 Samuele 17:58 ku bonisizwe fela kalabo ye kuswani ya Davida ye li, “ni mwan’a mutang’a hao Jese wa mwa Betelehema,” ze bulezwi mwa litimana ze latelela li bonisa kuli ki ze ñata ze ne ambozwi. Bocaziba ba Bibele bo C. F. Keil ni bo F. Delitzsch ba talusa cwana ka za taba ye, ba li: “Manzwi a ñozwi kwa [1 Samuele 18:1] a’ li, ‘Davida h’a s’a felize ku bulela ni Saule,’ a bonisa kuli Saule n’a zwezipili ku ambola ni Davida ka za lubasi lwa hae, kakuli manzwi ao a bonisa kuli ne ba ambozi ka nako ye telele.”

Kacwalo, ku bonahala kuli ka puzo ya hae ya kuli, “mutangana, u mwan’a mañi?” Saule sa n’a bata ku ziba, ne si kuli Davida ne li mañi, kakuli n’a mu ziba ni kale. Kono sa n’a bata ku ziba ki kwa n’a simuluha Davida.

[Siswaniso se si fa likepe 31]

Ki kabakalañi Saule ha n’a buzize Davida kuli ne li mwan’a mañi?