Mu Kona Ku Ba Cwañi Mutu wa kwa Moya Luli?

MUAPOSITOLA PAULUSI n’a ñozi kuli: “Ku utwa za nama ki lifu, kono ku utwa za Moya ki bupilo ni kozo.” (Maroma 8:6) Ka manzwi ao, muapositola Paulusi n’a bonisa kuli ku ba mutu wa kwa moya ki nto ya butokwa, ye lu sa swaneli ku keshebisa. Ki taba ya bupilo ni lifu. Kono mutu wa kwa moya u fumana cwañi “bupilo ni kozo”? Ka ku ya ka Bibele, mutu ya cwalo u ka ba ni kozo ya mwa pilu, u ka ba ni kozo ni Mulimu, mi u ka fiwa mupuzo wa bupilo bo bu sa feli kwapili. (Maroma 6:23; Mafilipi 4:7) Ki lona libaka Jesu ha n’a ize: “Tabo ki ya ba ba lemuha butokwi bwa bona bwa kwa moya”!—Mateu 5:3, NW.

Taba fela ya kuli mu sweli ku bala magazini ye i bonisa kuli mwa tabela ku ba mutu wa kwa moya mi mu eza hande. Niteñi, batu ba na ni mibonelo ye shutana ka za mutu wa kwa moya, kacwalo mu kana mwa ipuza kuli: ‘Ku ba mutu wa kwa moya ku talusañi luli? Mutu u kona cwañi ku ba wa kwa moya?’

“Muhupulo wa Kreste”

Muapositola Paulusi n’a si ka bulela fela za bunde bwa ku ba mutu wa kwa moya. Hape n’a taluselize Bakreste ba mwa munzi wa Korinte ya kwaikale kuli mutu ya lata za nama u shutana ni mutu ya lata za kwa moya. Paulusi n’a ñozi kuli: “Mutu fela h’a amuheli za Moya wa Mulimu; kakuli ku yena ki butanya.” Kono Paulusi n’a bulezi kuli mutu wa moya ki mutu ya na ni “muhupulo wa Kreste.”—1 Makorinte 2:14-16.

Ku ba ni “muhupulo wa Kreste” ku talusa ku ba ni “maikuto a li mañwi ka ku ya ka Jesu Kreste.” (Maroma 15:5; Mafilipi 2:5) Ka mubulelelo o muñwi, mutu wa kwa moya ki mutu ya nahana sina Jesu ni ku hata mwa n’a hatile Jesu. (1 Pitrosi 2:21; 4:1) Munahano wa mutu ha u swana hahulu ni wa Kreste, mutu yo u ka tiya hahulu kwa moya mi u ka fumana “bupilo ni kozo.”—Maroma 13:14.

Mwa ku Zibela “Muhupulo wa Kreste”

Kuli mutu a be ni muhupulo Kreste, pili u na ni ku ziba mwa nahanela Kreste. Kacwalo, sa tokwa ku eza mutu kuli a be wa kwa moya ki ku ziba pili mwa nahanela Jesu. Kono lu kona ku ziba cwañi mwa n’a nahanela mutu ya n’a pilile lilimo ze 2,000 kwamulaho? Lu buze cwana kuli, ne mu konile cwañi ku ziba za batu ba ne ba pilile kwaikale? Ne li ka ku bala za bona, nji cwañi? Ka ku swana, kuli lu zibe mwa nahanela Kreste, lu na ni ku bala litaba ze ñozwi ka za hae.—Joani 17:3.

Litaba za Jesu lu kona ku li bala mwa libuka za Evangeli z’e ne, ze ne ñozwi ki Mateu, Mareka, Luka, ni Joani. Ku bala ka tokomelo litaba ze ñozwi mwa libuka zeo ku ka mi tusa ku lemuha mwa n’a nahanela Jesu, mwa n’a ikutwela ka za lika, ni ze ne mu susuezanga ku eza lika. Ha mu ka nahanisisanga ze mu bala ka za Jesu, mu ka fita fa ku utwisisa hande kuli Jesu ne li mutu ya cwañi. Niha mu ipala kuli mu balateleli ba Kreste, ha mu ka balanga ni ku nahanisisanga za Jesu, mu ka zwelapili ku ‘hula kwa neku la sishemo, ni kwa neku la zibo ya Jesu Kreste Mulena ni Mupilisi wa luna.’—2 Pitrosi 3:18.

Kacwalo, ha lu nyakisiseñi litaba ze ñwi za mwa libuka z’e ne za Evangeli kuli lu bone se ne si tusize Jesu ku ba mutu wa kwa moya. Kihona mu ka nahana mo mu kona ku likanyiseza mutala wa hae.—Joani 13:15.

 Mutu wa kwa Moya U Beya “Muselo wa Moya”

Luka muñoli wa buka ya Evangeli n’a bulezi kuli moya o kenile wa Mulimu ne u shetumukezi fahalimw’a Jesu ha n’a kolobezwa ni kuli Jesu n’a “tezi Moya o Kenile.” (Luka 3:21, 22; 4:1) Mi ni yena Jesu n’a koñomekile kwa balateleli ba hae butokwa bwa ku etelelwa ki moya o kenile wa Mulimu kamba “m’ata a sebeza.” (Genese 1:2, NW; Luka 11:9-13) Ki kabakalañi ha lu swanela ku etelelwa ki moya wa Mulimu? Kakuli moya wa Mulimu u na ni m’ata a ku cinca munahano wa mutu kuli u swane ni wa Kreste. (Maroma 12:1, 2) Moya o kenile u tusa mutu ku ba ni tulemeno to tu cwale ka lilato, tabo, kozo, pilu-telele, musa, bunde, tumelo, buishuwo, ni buiswalo. Tona tulemeno to, to tu bizwa mwa Bibele kuli “muselo wa Moya,” tu bonahaza mutu kuli ki wa kwa moya luli. (Magalata 5:22, 23) Ka mubulelelo o muñwi, mutu wa kwa moya ki mutu ya etelelwa ki moya wa Mulimu.

Jesu n’a bonisize muselo wa moya mwa bukombwa bwa hae kaufela. N’a bonisize tulemeno to tu cwale ka lilato, musa, ni bunde ha n’a sebelisana ni batu be ne ba s’a ngiwi kuli ki ba butokwa. (Mateu 9:36) Ka mutala, ha mu bone taba ye, ye talusizwe ki muapositola Joani. Lu bala cwana kuli: “Jesu a bona mutu ya n’a pepilwe a li sibofu.” Balutiwa ba Jesu ni bona ne ba boni sibofu yo, fela kikuli bona ne ba mu boni kuli ki muezalibi. Ba buza kuli: “Ki mañi ya ezize sibi, kana ki yena, kamba bashemi ba hae?” Ba n’a pila ni bona, ni bona ne ba mu ziba, fela kikuli bona ne ba mu nga kuli ki mukupi. Ba bulela kuli: “Kana yo, hasi yena ya n’a inanga mi a kupa?” Kono Jesu yena n’a boni kuli mutu wa sibofu yo n’a tokwa tuso. N’a ambozi ni mutu wa sibofu yo mi a mu folisa.—Joani 9:1-8.

Taba ye i lu lutañi ka za muhupulo wa Kreste? Sapili i lu luta kuli, Jesu n’a sa kendi batu ba ba nyandile kono n’a ba bonisanga sishemo. Sa bubeli kikuli, n’a itatelanga ku tusa ba bañwi. Kana mwa latelela mutala wo wa n’a tomile Jesu? Kana mu nga batu sina mwa n’a ba ngezi Jesu, ili ku ba tusa mwa bupilo bwa bona cwale ni ku ba tusa ku ba ni sepo ya za kwapili? Kamba kana mu hanelelanga ku tabela ba ba fumile ni ku kenda babotana? Haiba mu nga batu sina mwa n’a ba ngela Jesu, u zibe mu sweli ku latelela luli mutala wa hae.—Samu 72:12-14.

Mutu wa kwa Moya wa Lapelanga

Litaba ze ñozwi ka za Jesu li bonisa kuli Jesu n’a lapelelanga ku Mulimu kamita. (Mareka 1:35; Luka 5:16; 22:41) Ka nako ya bukombwa bwa hae bwa fa lifasi, Jesu n’a banga ni nako ya ku lapela. Mateu muapositola wa Jesu n’a ñozi kuli:  “[Jesu] a man’o kutisa buñata, a kambamela fa lilundu ku y’o lapela.” (Mateu 14:23) Jesu n’a tiiswanga ha n’a lapelanga cwalo a nosi ku Ndat’ahe wa kwa lihalimu. (Mateu 26:36-44) Ni kacenu batu ba kwa moya luli ba lapelanga ku Mulimu, kakuli ba ziba kuli ku eza cwalo ku ka tiisa silikani sa bona ni Mubupi mi ku ka ba tusa ku ba ni muhupulo o swana ni wa Kreste.

Fokuñwi Jesu n’a lapelanga ka nako ye telele. (Joani 17:1-26) Ka mutala, pili a si ka keta kale banna ba 12 kuli ba be baapositola ba hae, Jesu ‘a zwela fa lilundu ku y’o lapela; a tola busihu kaufela inz’a lapela Mulimu.’ (Luka 6:12) Nihaike kuli ha ba na ku lapelanga busihu kaufela, batu ba kwa moya luli ba latelela mutala wa Jesu. Pili ba si ka eza kale likatulo ze tuna, batu ba kwa moya luli ba lapelanga hahulu ku Mulimu, kuli ba kupe moya o kenile ku ba tusa ku eza likatulo ze ka ba tiisa kwa moya.

Ka litapelo za hae, Jesu n’a bonisize kuli lu swanela ku lapelanga ka tukufalelo. Ha mu bone za n’a ñozi Luka ka za tapelo ya n’a lapezi Jesu manzibwana a lizazi la n’a bulailwe. ‘H’a na li mwa ñalelwa ye tuna, a ekeza ku lapela ka tata; mi mifufuzo ya hae ya ba sina mali a’ lota, a’ wela fafasi.’ (Luka 22:44) Jesu n’a lapelanga ka t’ata kono ka nako yeo ha n’a li mwa ñalelwa ye tuna, n’a lapezi hahulu ‘ka t’ata’ mi tapelo ya hae ne i alabilwe. (Maheberu 5:7) Batu ba kwa moya luli ba latelela mutala wa Jesu. Ha ba li mwa miliko ye mituna hahulu, ba lapelanga “ka t’ata” ku kupa Mulimu kuli a ba fe moya o kenile, ketelelo, ni m’ata.

Bakeñisa kuli Jesu n’a lapelanga kamita, ha ku komokisi kuli balutiwa ba hae ni bona ne ba bata ku mu likanyisa. Ne ba mu buzize kuli: “Mulena, u lu lute ku lapela.” (Luka 11:1) Ni kacenu batu ba kwa moya luli ba ba bata ku etelelwa ki moya o kenile wa Mulimu ba latelelanga mutala wa Jesu ha ba lapela ku Mulimu. Mutu wa kwa moya luli wa lapelanga kamita.

Mutu wa kwa Moya ki Mukutazi wa Taba ye Nde

Mwa buka ya Mareka ku ñozwi kuli muta o muñwi Jesu n’a belekile ka t’ata ku folisa batu ba bañata ba ne ba kula ku isa mane ka nako ya busihu. Habusa kakusasana ha n’a li a nosi inze a lapela, baapositola ba hae ba taha ni ku to mu bulelela kuli batu ba bañata ne ba mu bata, mwendi kuli a ba folise. Kono Jesu a ba taluseza kuli: ‘A lu yeñi kusili, mwa minzi ye miñwi, ni yo luta ba mwateñi.’ Mi Jesu a talusa libaka la n’a yela kwa minzi yeo, a li: “Kakuli ki ona musebezi o ni tezi.” (Mareka 1:32-38; Luka 4:43) Nihaike Jesu n’a bona kuli ku folisa batu ne li kwa butokwa, nto ya n’a nga ku ba ya butokwa hahulu ni ku fita ne li ku kutaza taba ye nde ya Mubuso wa Mulimu.—Mareka 1:14, 15.

Ni kacenu batu ba ba na ni muhupulo wa Kreste ba zibahala ka musebezi o ba eza wa ku bulelela ba bañwi za Mubuso wa Mulimu. Jesu n’a laezi batu kaufela ba ba bata ku ba balateleli ba hae kuli: “Mu ye cwale, mu lute macaba kaufela, . . . mu ba lute ku mamela ze ni mi laezi kaufela.” (Mateu 28:19, 20) Hape  Jesu n’a polofitile kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:14) Bakeñisa kuli Linzwi la Mulimu li bonisa kuli musebezi wa ku kutaza u petwa ka m’ata a moya o kenile, mutu ya eza ka t’ata musebezi wo u bonisa kuli ki mutu wa kwa moya luli.—Likezo 1:8.

Ku kutaza taba ya Mubuso kwa batu mwa lifasi kamukana ku tokwa kuli bolule-lule ba beleke hamoho ka swalisano. (Joani 17:20, 21) Batu ba ba eza musebezi wo ha ba tokwi fela ku tiya kwa moya kono hape ba swanela ku swalisana hande mwa lifasi kaufela. Kana mwa ziba batu ba ba latelela mutala wa Kreste ili ba ba kutaza taba ye nde ya Mubuso mwa lifasi kaufela?

Kana Mu Bona Kuli Mu Batu Ba kwa Moya Luli?

Ki niti kuli ku na ni lika ze ñata z’a tokwa ku eza mutu wa kwa moya luli, kono kana mwa eza ze se bulezwi? Kuli mu zibe haiba mwa eza cwalo, mu tokwa ku ipuza kuli: ‘Kana na balanga Linzwi la Mulimu kamita ni ku nahanisisa ze ni balanga? Kana na bonisa muselo wa moya mwa bupilo bwa ka? Kana na lapelanga kamita? Kana na tabela ku swalisana ni batu ba ba eza musebezi wa ku kutaza taba ye nde ya Mubuso wa Mulimu mwa lifasi kamukana?’

Ka ku itatuba hande, mwa kona ku bona haiba mu batu ba kwa moya luli. Lu mi susueza ku eza ze tokwahala cwale kuli ite mu fumane “bupilo ni kozo.”—Maroma 8:6; Mateu 7:13, 14; 2 Pitrosi 1:5-11.

[Mbokisi/Maswaniso a fa likepe 7]

MUTU WA KWA MOYA LULI

◆ U lata Linzwi la Mulimu

◆ U bonisa muselo wa moya

◆ U lapelanga ku Mulimu kamita, ku zwelela kwatas’a pilu

◆ U kutazanga taba ye nde ya Mubuso ku ba bañwi

[Siswaniso se si fa likepe 5]

Bibele i mi tusa ku ziba “muhupulo wa Kreste”