Tumelo ya Me I Tula Lifu

“Haiba mu sweli ku bala liñolo le, mu zibe kuli ne ni si ka punyuha ha ne ni pazuzwi kwa sipatela mi ha ni sa li yo ni mina.”

AO KI ona manzwi a makalelo a liñolo le ne li ñozwi ki Carmen, me wa Mukreste ya n’a na ni bana ba basizana ba balalu ba lilimo ze 25, 19, ni 16. Mi ka bumai luli bo Carmen ne ba si ka punyuha ha ne ba pazuzwi.

Ku shwa ka nzila ye cwalo ni ku siya bana ba balalu mwa masitapilu kwa tomohisa luli pilu. Nihakulicwalo, tumelo ye tiile ya musali yo ku Jehova ni mwa lisepiso za hae ne i tuzi lifu, kakuli ne i mu tusize ku ba ni kozo ili ye iponahaza hande mwa liñolo la hae le li tomohisa pilu. Ha mu utwe za n’a bulelezi bana ba hae.

“Pili ni bata ku mi taluseza kuli na mi lata ka pilu ya ka kaufela. . . . Mu bana ba bande hahulu, mi mwa ni tabisa luli.

“Ne ni ka tabela ku ba hamoho ni mina ku fitela lu kena mwa lifasi le linca la sepisize Mulimu . . . , kono bakeñisa kuli ha ku konahali, ni kupile Mulimu kuli a mi tuse ku zwelapili ku sepahala, sina mo mu sepahalezi. Lu tiyezi miliko ye miñata hamoho, mi Jehova ha si ka lu fulalela. . . . Kacwalo mu zwelepili ku latelela litaelo za kopano ya hae ni ku sebelisana ni ba bañwi mwa puteho ni maeluda. Mu kutazange kamita, mi mu late mizwale ni likaizeli kaufela.

“Lu ka kauhana fela ka nakonyana. . . . Ni kupa kuli mu ni swalele bakeñisa mafosisa e ne ni ezanga ni ku sa mi utwisisa fokuñwi kamba ku sa mi taluseza mo ni mi latela. . . . Na ziba kuli mañi ni mañi wa mina ku na ni za tokwa. Jehova wa ziba hande hahulu ze mu tokwa, mi u ka mi fa zona kaufela ni ku mi fa mupuzo bakeñisa buitiiso bwa mina.

“Mu si ke mwa libala kuli mulelo wa mina ki ku kena mwa lifasi le linca. Mu like ka t’ata ku peta mulelo wa mina. Haike Jehova a mi fuyaule ni ku mi tiisa ilikuli mu sepahale ku isa kwa mafelelezo. . . . Mu si ke mwa ba mwa maswabi, bana ba ka ba ba lateha. Na mi lata!”

Bumai bu kona ku wela ufi kamba ufi ka nako ifi kamba ifi. Mulena Salumoni wa ikale n’a ñozi kuli: “Mutu ni mutu u tamwa ki linako z’a pila ka zona, ni ki bushiko kamba bumai bwa hae.” (Muekelesia 9:11) Kono ba ba na ni tumelo ye tiile ku Mulimu ba kona ku ba ni sepo ye swana ni ya muapositola Paulusi, ya n’a ize: “Ni kozwi kuli nihaiba lifu, nihaiba bupilo . . . nihaiba nto ye ñwi ye bupilwe, ha ku na se si kona ku lu kauhanya ni lilato la Mulimu, le li li teñi ku Jesu Kreste Mulen’a luna.”—Maroma 8:38, 39; Maheberu 6:10.