‘Jehova, U Ni Like’

“YA LIKA lipilu ki [Muñ’a] Bupilo.” (Liproverbia 17:3) Manzwi ao a lu tiisa kaufela luna. Kabakalañi? Kakuli Ndat’a luna wa kwa lihalimu ha swani ni batu ba ba atula fela ka ku talima mutu mwa bonahalela, yena “u talima pilu.”—1 Samuele 16:7.

Nihaiba luna beñi ha lu koni ku tatuba hande milelo ni maikuto a luna. Libaka? Kakuli “pilu ya puma ku fita linto kaufela, i sinyehile ku feleleza; ki mañi ya ka i ziba?” Kono Mulimu wa i ziba hande, kakuli u li: “Ki Na [Muñ’a] Bupilo ya tatuba lipilu, ya lika ni [lipio].” (Jeremia 17:9, 10) Jehova wa ziba ‘pilu,’ kamba milelo ya luna, mi wa ziba “lipio,” ona maikuto a luna.

Ki Kabakalañi Ha Lu Swanela ku Likiwa?

Kona libaka Mulena Davida wa ikale ha na bulelezi Mulimu kuli: “U ni tatube, [Muñ’a] Bupilo, u ni like; u like pilu ya ka, ni maikuto a ka.” (Samu 26:2) Kana kikuli Davida n’a kenile hahulu mwa likezo ni lipulelo, kuli mane ha ku na sa na saba ha na ka likiwa ki Jehova? Batili! Davida ka ku swana ni luna kaufela, ne li mutu ya si ka petahala mi na sa koni ku fita luli fa lipimo za Mulimu. Bakeñisa bufokoli bwa hae, Davida n’a ezize lifoso ze tuna, kono n’a ‘zamaile ka pilu ye lukile.’ (1 Malena 9:4) Ka mukwa ufi? Ka ku amuhela nyazo ni ka ku lukisa mafosisa a hae. Ka ku eza cwalo na bonisize kuli na lata Jehova luli. Busepahali bwa hae ku Mulimu ne li bwa niti.

Luna bo kacenu? Jehova wa ziba kuli ha lu si ka petahala ni kuli lu kana lwa fosa mwa lipulelo ni mwa likezo. Niteñi, ha zibelangi cimo za bupilo bwa luna ka ku itusisa m’ata a hae a ku ziba za kwapili. U lu bupile ni mpo ya ku iketela, kona libaka ha sa icocomezangi mwa litaba za batu bakeñisa mpo yeo ya lu file ka sishemo.

Kono ka linako ze ñwi Jehova wa lu likanga ilikuli a bone milelo ya luna. U kona ku eza cwalo ka ku tuhelela miinelo ye miñwi ye kona ku patulula ze mwa pilu ya luna. Hape u kona ku eza cwalo ka ku lu tuhelela ku talimana ni miliko. Seo si lu fa kolo ya ku bonisa busepahali bwa luna ku Jehova. Miliko ye lu talimana ni yona i kona ku bonisa mo i tiyezi tumelo ya luna, haiba lu “ba ba petehile, ba ba hulile luli, ba ba sa tokwi se siñwi.”—Jakobo 1:2-4.

Munna wa Ikale Wa Likiwa

Miliko ya tumelo haki ye minca kwa batanga ba Jehova. Mu nyakisise toho ya lubasi Abrahama. Bibele i li: “Mulimu [wa niti] a lika Abrahama.” (Genese 22:1) Ka nako y’a ñolwa manzwi ao, tumelo ya Abrahama ku Mulimu ne se i likilwe kale. Lilimo-limo pili Abrahama a si ka likiwa kale, Jehova na mu bulelezi kuli a tute ni lubasi lwa hae mwa muleneñi o munde wa Ure ku ya kwa naha ya sa zibi. (Genese 11:31; Likezo 7:2-4) Abrahama mwendi na na ni ndu kwa Ure, kono na si ka leka ndu kwa Kanana, kwa na izo pila lilimo ze ñata-ñata. (Maheberu 11:9) Abrahama ni lubasi lwa hae ha ne ba nze ba  yambaela, ne ba talimani ni tala, bukebenga, ni babusi ba sihedeni ba mwa sibaka seo. Mwahal’a nako yeo kaufela, Abrahama n’a bonisize tumelo ye tiile.

Cwale Jehova a taluseza Abrahama ku eza nto ye ñwi ye t’ata hahulu. Bibele i li: “U nge mwan’a hao wa libanda, y’o lata hahulu, yena Isaka; . . . u y’o mu eza sitabelo sa ku cisa.” (Genese 22:2) Ku Abrahama, Isaka n’a li mwana ya ipitezi. Ne li yena fela mwana a nosi ye ne ba na ni yena ni Sara musal’a hae. Isaka ne li yena mwana ya na sepisizwe Abrahama kuli ka yena, “peu” ya hae ne i ka yola naha ya Kanana mi na ka tahisa limbuyoti kwa batu ba bañata. Kaniti, Isaka ne li yena mwana ya n’a sepisizwe ku Abrahama ili ya n’a pepilwe ka makazo!—Genese 15:2-4, 7.

Mwa kona ku bona libaka ha ne ku li t’ata ku Abrahama ku utwisisa taelo yeo. Jehova na ka tokwelañi kuli mutu a fiwe sina sitabelo? Ki kabakalañi Jehova ha na tuhelezi Abrahama ku ba ni tabo ya ku ba ni mwana mwa busupali, mi hape ni ku mu bulelela kuli a fe mwan’a hae sina sitabelo? *

Abrahama ni kwa na sa utwisisi litaba zeo, a latelela taelo ya Mulimu kapili-pili. Na zamaile mazazi a malalu kuli a yo fita kwa lilundu la n’a taluselizwe. Ha sa fitile kwa lilundu leo, a yaha aletare ni ku beya likota fahalimw’a yona. A mano eza cwalo, a talimana ni tiko ye tuna ka ku fitisisa. Abrahama a nga tipa, a sa nanula fela tipa kuli a bulaye mwan’a hae, Jehova a mu hanisa ka lingeloi mi a li: “Cwale, ni ziba kuli u saba Mulimu; ha u si ka ni hanisa mwan’a hao wa libanda.” (Genese 22:3, 11, 12) Mu nahane fela mupuzo wa na filwe Abrahama kabakala ku latelela taelo ya Mulimu! Ku swanezi Mulimu ha n’a sepile Abrahama isali kwa makalelo. (Genese 15:5, 6) Hamulaho wa tiko yeo, Abrahama a fa sitabelo mwa  sibaka sa Isaka. Mi Jehova a kutela lisepiso za bulikani ka za peu ya Abrahama. Kona libaka Abrahama ha zibahala kuli n’a li mulikan’a Mulimu.—Genese 22:13-18; Jakobo 2:21-23.

Tumelo ya Luna Ni Yona Ya Likiwa

Lwa izibela hande kuli batanga ba Mulimu kacenu ba ka talimana ni miliko. Mwendi luna Jehova ha na ku lu tokwa ku eza nto ye ñwi ye t’ata, kono a kana a tuhelela miinelo ye kona ku lika tumelo ya luna.

Muapositola Paulusi na ñozi kuli: “Batu kaufela ba ba lata ku pila ka bulumeli bo bu li teñi ku Jesu Kreste, ba ka nyandiswa.” (2 Timotea 3:12) Nyandiso ye cwalo i kona ku zwa ku be lu kena ni bona sikolo, balikani, bahabo luna, bo lu yahile ni bona, kamba babusi ba ba shongilwe litaba za buhata. I kana ya kopanyeleza ku lwahakiwa ni ku lindaulwa, hamohocwalo ni ku palelwisa Bakreste ku pila hande. Hape Bakreste ba niti ba banga ni matata a telanga batu kaufela a cwale ka makulanu, ku zwafa, ni ku atulwa ka ku sa luka. Matata a cwalo kaufela a lika tumelo ya luna.

Muapositola Pitrosi na bonisize bunde bo bu zwa mwa ku likiwa kwa tumelo ya mutu ha n’a ize: “Ki miliko ya mifuta ye miñata; kuli tumelo ya mina ha i se i likilwe, mi tumelo ki ya butokwa ku fita gauda ye fela, bo ni yona i likwa ka mulilo,—i mi fumanise ku lumbwa, ni kanya, ni ku tonipeha, nako ya k’a taha Jesu Kreste.” (1 Pitrosi 1:6, 7) Mane ze zwa mwa miliko li bapanywa kwa ku keniswa kwa gauda ka mulilo. Ku kenisa ko ku cwalo ku zwisa masila. Ni luna tumelo ya luna ya likiwanga ha lu li mwa muliko.

Ka mutala, mutu a kana a ipumana mwa kozi ye kona ku lika tumelo ya hae. Niteñi, ba ba tiile mwa tumelo ha ba bilaelangi hahulu. Ba omba-ombiwa ki sepiso ya Jehova ya kuli: “Ha ni na ku ku tuhela, ha ni na ku ku fulalela.” (Maheberu 13:5) Ba zwelapili ku beya lika za kwa moya mwa sibaka sa pili, inze ba sepa kuli Jehova Mulimu u ka fuyaula buikatazo bwa bona ka ku ba fa ze ba tokwa. Tumelo ya bona i ba tusa kuli ba zwelepili ku tiya mwa linako ze t’ata ni ku sa bilaela hahulu.

Miliko i kona ku bonisa bufokoli bo lu na ni bona, mi hape i kona ku lu tusa ku bona licinceho ze lu tokwa ku eza. Mutu u tokwa ku ipuza kuli: ‘Ni kona ku tiisa cwañi tumelo ya ka? Kana ni tokwa nako ye ñata ya ku bala ni ku yeya Linzwi la Mulimu? Kana n’a fumanehanga kwa mikopano ni balapeli ba bañwi? Kana ni itinga fa butali bwa ka ha ni talimana ni matata ku fita ku lapela ku Jehova Mulimu?’ Kono kwand’a ku itatuba cwalo, ku na ni lika ze ñwi ze lu tokwa ku eza.

Kuli lu tiise tumelo ya luna, lu tokwa ku tabela hahulu lika za kwa moya, ku ‘shukelwa mabisi a moya, a’ si ka zwakwa.’ (1 Pitrosi 2:2; Maheberu 5:12-14) Lu swanela ku lika ka t’ata sina munna ya talusa walisamu kuli: “Ki ya tabela mulao wa [Muñ’a] Bupilo; mi wa u nahana musihali ni busihu.”—Samu 1:2.

Ku eza cwalo ha ku talusi fela ku bala Bibele. Lu swanela ku nahana ka za seo Linzwi la Mulimu li lu bulelela ni ku sebelisa kelezo ye filwe. (Jakobo 1:22-25) Haiba lu eza cwalo, lilato la luna ku Mulimu li ka hula,  litapelo za luna li ka ba ze zwelela kwa pilu, mi tumelo ya luna ku yena i ka tiya hahulu.

Tumelo Ye Likilwe Ki Ya Butokwa

Ku ziba kuli lu tokwa ku ba ni tumelo kuli lu lumelelwe ki Mulimu ku ka lu susumeza ku tiisa tumelo ya luna. Bibele i lu hupulisa kuli: “Kwand’a tumelo mutu h’a koni ku tabelwa ki Yena; kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” (Maheberu 11:6) Kacwalo lu swanela ku ikutwa sina munna ya na kupile Jesu kuli: “U ni tuse mwa ku sa lumela kwa ka.”—Mareka 9:24.

Haiba lu itiisa ha lu talimana ni matata, lwa kona ku tiisa ba bañwi. Ka mutala, Mukreste ha shwelwa ki mulatiwa, tumelo ya hae ye tiile ya sepiso ya Mulimu ya zuho ya mu tiisa. Ki niti kuli a kana a lila kono ha ‘ini mwa maswabi, sina ba bañwi ba ba si na sepo.’ (1 Matesalonika 4:13, 14) Ba bañwi ba ba lemuha tumelo ye tuna ya Mukreste, ba fitanga fa ku itebuha tumelo ya hae. Ba kona ku susuezwa ku ba ni tumelo ye swana, ku ituta Linzwi la Mulimu ni ku ba balutiwa ba Jesu Kreste.

Jehova wa ziba kuli tumelo ye likilwe ki ya butokwa hahulu. Hape miliko i kona ku lu tusa ku ziba haiba tumelo ya luna i tiile. Lu tusiwa ku lemuha fo lu fokola, ilikuli lu kone ku eza licinceho. Mi ha lu tula miliko, lwa kona ku tusa ba bañwi ku ba balutiwa ba Jesu. Haike lu zweleñipili ku tiisa tumelo ya luna, kuli ha se i likilwe, i lu “fumanise ku lumbwa, ni kanya, ni ku tonipeha, nako ya k’a taha Jesu Kreste.”—1 Pitrosi 1:7.

[Litaluso za kwatasi]

[Siswaniso se si fa likepe 13]

Tumelo ya Abrahama ne i mu bisize mulikan’a Mulimu

[Maswaniso a fa likepe 15]

Ha lu tiyela miliko, lu bonisa kuli lu na ni tumelo ye tiile

[Manzwi a bañi ba siswaniso fa likepe 12]

From the Illustrated Edition of the Holy Scriptures, by Cassell, Petter, & Galpin