Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Linzwi la “puteho” li itusisizwe ka linzila lifi z’e ne mwa Mañolo a Sigerike a Sikreste?

Linzwi la “puteho” sihulu li talusa sikwata sa Bakreste ba ba tozizwe (mi Mañolo a mañwi a bonisa kuli Kreste ni yena na li yo muñwi wa ba ne ba li mwa puteho). Fokuñwi linzwi la puteho ya Mulimu li talusa Bakreste kaufela ba ba pila mwa silengo se siñwi sa nako. Nzila ya bulalu ye li itusisizwe linzwi la “puteho” mwa Bibele i talusa Bakreste kaufela ba ba pila mwa sibaka se siñwi. Nzila ya bune ye bonisa mo li itusiselizwe linzwi la “puteho,” i ama kwa Bakreste ba ba li mwa puteho i liñwi.—4/15, makepe 21-3.

• Bakreste ba ba ya kwa lihalimu ba fezwa ku biziwa lili?

Bibele ha i fi kalabo ye nongile kwa puzo yeo. Balutiwa ba Jesu ne ba kalile ku toziwa ka silimo sa 33 C.E. ku to fita mwa miteñi ya luna. Hamulaho wa silimo sa 1935, musebezi wa ku luta macaba wa kala ku ezwa ka mulelo wa ku kubukanya buñata bo butuna. Moya wa Bakreste ba bañwi ba ba kolobelizwe hamulaho wa 1935 u pakelani ni moya wa Mulimu kuli ba amuhezi pizo ya lihalimu, kacwalo ha lu koni ku toma nako tenyene ye ba ka tuhela ku biziwa Bakreste ba ba ka ya kwa lihalimu. Bakreste ba ba tozizwe luli ha ba ngi kuli bona ba na ni moya o kenile o muñata ku fita balikani ba bona ba lingu ze ñwi, mi ha ba libeleli ku sebelezwa ki ba bañwi. Bakreste ba swanela ku sepahala ni ku eza tato ya Mulimu ku si na taba ni sepo ya bona.—5/1, makepe 30-1.

• Kana Jefita na itukiselize ku fa mwan’a hae sina sitabelo sa ku cisa ku Mulimu ha na itama ka luci?

Batili. Ku bonahala kuli Jefita n’a talusa kuli n’a ka fa Jehova mutu wa pili ya n’a ka mu katanyeza, ilikuli mutu yo a sebeleze fela Mulimu, mi tukiso yeo ne i lumelezwa mwa Mulao wa Mushe. (1 Samuele 2:22) Ku likana ni mo ne ba itamezi bondat’ahe, mwan’a Jefita na zwezipili ku sebeleza kwa tabernakele, mi bo ne li buitomboli bo butuna luli bakeñisa kuli na si ke a nyalwa.—5/15, makepe 9-10.

• Kodekisi ne i tusize cwañi mwa miteñi ya Bakreste ba kwa makalelo?

Ku bonahala kuli Bakreste ne ba itusisize hahulu miputo ku isa mane bukaufi ni mafelelezo a lilimo za baapositola. Ku zwa kwa mafelelezo a lilimo za baapositola ku taha mwa lilimo za ma-200 C.E., ne ku bile ni ku hohana mwahal’a ba ne ba tabela ku itusisa kodekisi ni ba ne ba sa ñañelela miputo ya sapili. Licaziba li lumela kuli ba bañata ne ba kalile ku itusisa kodekisi kabakala Bakreste ba ne ba itusisa yona.—6/1, makepe 14-15.

• Kalenda ya kwa Gezeri ne li nto mañi?

Ne li litapa le li pangilwe fa macwe a masweu le ne li pumbuzwi ka 1908 mwa tolopo ya Gezeri. Ba bañata ba lumela kuli litaba ze ne li fa litapa leo ne li ñozwi ki mwanana ya na ñola litaba za kwa sikolo. Litapa leo li bonisa misebezi ye ne ezwanga ka nako ya njimo mwa silimo, ku kala ka nako ya kutulo ka kweli ye zamaelela ni kweli ya September kamba October, mi li bonisa litolwana za mifuta-futa ze ne kutulwanga ni misebezi ye ne ezwanga.—6/15, likepe 8.

• Ku foseza moya o kenile ku talusañi?

Kwa konahala ku foseza moya o kenile wa Jehova, mi ya eza sibi se ha na ku swalelwa ni kamuta. (Mateu 12:31) Jehova ki yena ya kona ku atula haiba lu ezize sibi se si sa koni ku swalelwa, mi wa kona ku lu amuha moya wa hae. (Samu 51:11) Haiba lu swabela sibi se lu ezize, seo si kona ku bonisa kuli mwendi lu bakile luli mi ha lu si ka foseza moya o kenile.—7/15, makepe 16-17.

• Ki kabakalañi Mulena Saule ha n’a buzize Davida kuli ki mwan’a mañi hailif’o yena Saule kwamulaho n’a kile a sebelisana ni Davida? (1 Samuele 16:22; 17:58)

Saule na sa bati fela ku ziba libizo la ndat’ahe Davida. Ha sa lemuhile kuli Davida n’a na ni tumelo ye tiile ni bundume ze ne mu konisize ku bulaya Goliati, Saule n’a bata ku ziba kuli ki munna ya cwañi ya n’a utile mutangana yo. Mwendi Saule n’a bata kuli Jese kamba mutu yo muñwi wa mwa lubasi lwa Jese a kene mwa mpi ya hae.—8/1, likepe 31.