Ki Kabakalañi Mulimu Ha Tuhelela Bumaswe?

BUMASWE ni manyando li fumaneha kai ni kai. Batu-tu fela ni masole ba sweli ba bulaiwa mwa lindwa. Bukebenga ni mifilifili li atile hahulu. Mwendi sa cwanoñu fa ne mu ketuluzwi kamba ku ezwa maswe. Bakeñisa bumaswe bo mu iponezi ni bo mu ipumani ku bona, mwendi se mu ipuzize kuli, ‘Ki kabakalañi Mulimu ha tuhelela bumaswe?’

Batu ba bañata se ba ipuzize puzo ye swana yeo. Lilimo ze 3,600 kwamulaho, mutang’a Mulimu ya sepahala Jobo na buzize kuli: “Kiñi ba ba maswe ha ba nze ba pila?” (Jobo 21:7) Bakeñisa likezo ze maswe za batu ba na pila ni bona, mupolofita Jeremia ya na pilile mwa lilimo za ma-600 B.C.E. na buzize kuli: “Mukwa wa ba ba maswe o ba pila ka ona, u konda ka nzila ifi? Kiñi mahata kaufela ha ba pila mwa kozo?” (Jeremia 12:1) Jobo ni Jeremia ne ba ziba kuli Mulimu ki ya lukile. Kono ne ba ipuzanga libaka bumaswe ha ne bu atile. Mwendi ni mina se mu ikutwile cwalo.

Batu ba bañwi ba nyaza Mulimu kuli ki yena ya tahisize bumaswe ni manyando. Ba bañwi bona ba ipuzanga kuli: ‘Haiba luli Mulimu ki ya m’ata ote, ki ya lukile, mi u lilato, ki kabakalañi ha sa felisi bumaswe ni manyando? Ki kabakalañi ha tuhelezi bumaswe ku fitela kacenu?’ Taba ye tatama i ka alaba lipuzo zeo ni zeñwi za butokwa.

[Manzwi a bañi ba siswaniso fa likepe 3]

AP Photo/Adam Butler