Lu Lute Bana Ba Luna ku Lata Mulimu

KACENU ku t’ata hahulu kuli mutu a be ni silikani se sinde ni Jehova Mulimu. (Samu 16:8) Lu pila mwa “linako ze tata” sina mo ku polofitezwi mwa Bibele. Buñata bwa batu “ba lata minyaka, isi Mulimu.” (2 Timotea 3:1-5) Kaniti, batu ba bañata mwa lifasi kacenu ha ba na lilato sakata ku Mulimu.

Bana ha ba koni fela ku lata Mulimu lu sa ezi buikatazo. Lu swanela ku luta bana ba luna kuli ba late Jehova Mulimu. Lu kona ku eza cwañi cwalo?

Lu Ambolisane ni Bona Hande

Kuli lu kone ku luta bana ba luna ku lata Mulimu, luna ka sibili lu swanela ku mu lata. (Luka 6:40) Kona mo i boniseza Bibele ha i li: “Lata [Muñ’a] Bupilo Mulimu wa hao, ka pilu ya hao kaufela, ni ka moya wa hao kaufela, ni ka mata a hao kaufela. Mi manzwi ao, e ni ku laela kacenu, a ine mwa pilu ya hao; mi u na ni ku a luta bana ba hao.”—Deuteronoma 6:4-7.

Lu kona ku luta cwañi bana ba luna ku lata Mulimu? Lu tokwa ku ziba ze mwa pilu ya bona. Mi hape lu swanela ku ba bonisa ze mwa pilu ya luna.

Jesu Kreste ha na liba kwa Emausi ni balutiwa ba hae ba babeli, na ba tuhelezi ku talusa ze ne li kwa pilu ya bona. Na ba teelelize pili, mi kihona a ba hakulula ka Mañolo. Hasamulaho ne ba ize: “Ha lu li, lipilu za luna ne li tuka mwa lifuba za luna, ha n’a lu bulelisa.” Wo ki mutala o munde wa ku ambolisana hande. (Luka 24:15-32) Lu kona ku ziba cwañi ze mwa pilu ya bana ba luna?

Cwanoñu fa, bashemi ba bañwi ba ba na ni bana ba se ba hulile ili ba ba eza hande mwa puteho ne ba buzizwe ka za haiba ba ambolisananga hande ni bana ba bona. Ka mutala, bo Glen ba ba pila kwa Mexico ba na ni bana ba bane ba ba hulile. * Ba talusa kuli: “Ku ambolisana ko kunde mwahal’a bashemi ni bana ha ku itaheli fela. Na ni bo musal’a ka, ne lu itombozi ku sa ezanga lika ze ñwi ze si za butokwa hahulu, ilikuli lu fumane nako ya ku ba hamoho ni bana ba luna. Ha ne ba sa nonoboka, fokuñwi ne lu tonanga ni bona manzibwani ni ku ambola ze ne ba bata kaufela. Hape ka nako ya ku ca, ne lu teelezanga kwa makande a bona, mi ne lu kona ku lemuha ze mwa pilu ya bona ni ku ba tusa hande kuli mane fokuñwi ne ba sa lemuhangi.”

Ku ambolisana hande hape ku tokwa kuli lu taluse ze mwa pilu ya luna. Jesu na ize: “Mutu yo munde u zwisa ze nde mwa sibulukelo se sinde sa pilu ya hae . . . kakuli mulomo wa mutu u buleliswa ki se si tezi mwa pilu.” (Luka 6:45) Bo Toshiki ba kwa Japan, ba ba na ni bana ba balalu ba ba li likombwa za nako kaufela, ba talusa kuli: “Hañata ne ni talusezanga banake libaka ha ne ni na ni tumelo ku Jehova, kuli u teñi luli, mi hape ne ni ba talusezanga kuli ze ni ipumani ku zona mwa bupilo li ni kolwisize kuli Bibele ki ya niti luli, ni kuli ki yona fela buka ye kona ku lu tusa mwa bupilo.” Bo Cindy ba kwa Mexico ba li: “Bo munn’a ka kamita ne ba lapelanga hamoho ni bana ba luna. Banana ha ne ba teelezanga kwa litapelo za bona ze zwelela kwa pilu, ne ba ikutwa kuli Jehova u teñi luli.”

Lu Ba Tomele Mutala

Mutala wa luna o munde u kona ku tusa hahulu bana ba luna, kakuli u ba bonisa mo  lu latela Mulimu. Ka ku bona Jesu Kreste mwa na utwela Jehova, batu ne ba kona ku lemuha mwa na latela Mulimu. Jesu na ize: “Kuli lifasi li zibe kuli ni lata Ndate, ni kuli ni eza s’a ni laela Ndate.”—Joani 14:31.

Bo Gareth, Lipaki za Jehova ba ba pila kwa Wales ba li: “Bana ba luna ba swanela ku iponela kuli lwa lata Mulimu ni kuli lu lika ku eza lika mwa latela. Ka mutala, banake ba lemuhile kuli na itumelelanga mafosisa a ka sina mwa batela Mulimu. Mi ni bona se ba likanga ku eza cwalo.”

Bo Greg ba ba pila kwa Australia ba li: “Ne lu bata kuli bana ba luna ba lemuhe kuli niti ki yona nto ya butokwa hahulu mwa bupilo bwa luna. Pili lu si ka eza liketo ka za mubeleko ni nako ya ku ishumusa, lu nyakisisanga ku bona haiba lu ka filikanya tomahanyo ya luna ka ku ba Bakreste. Mi kwa tabisa ku lemuha kuli mwan’a luna wa lilimo ze 19 ni yena sa ezanga cwalo mwa bupaina bwa hae bwa ku tusa.”

Lu Tuse Bana ba Luna ku Ziba Mulimu

Ha lu koni ku lata kamba ku sepa mutu ye lu sa zibi hande. Muapositola Paulusi ha na susueza Bakreste ba kwa Filipi kuli ba zwelepili ku lata Jehova, na ize: “Se ni mi lapelela, kikuli lilato la mina li ye li ekezehe mwa zibo ni mwa kutwisiso kaufela.” (Mafilipi 1:9) Bo Falconerio ba kwa Peru ba ba na ni bana ba bane, ba li: “Ku balanga ni ku ituta Bibele ni banake kamita ku tiisa tumelo ya bona. Nako ye ne ni tuhelanga ku eza cwalo, lilato la bona ku Jehova ne li kala ku fola.” Bo Gary ba ba pila kwa Australia ba li: “Hañata ni bonisanga banake kuli bupolofita bwa Bibele bu sweli bwa talelezwa. Hape ni ba bonisanga bunde bwa ku latelela likuka za Bibele. Ku ba ni tuto ya lubasi kamita ku tiisize hahulu tumelo ya bona.”

Mwana u kona ku ituta hande haiba mwa lapa ku na ni moya wa silikani ni tabo. (Jakobo 3:18) Bo Shawn ni Pauline ba kwa Britain ba ba na ni bana ba bane ba talusa kuli: “Ha  ne lu ezanga tuto ya lubasi ne lu likanga ku sa halifela bana ba luna ku si na taba kuli fokuñwi ne ba ezanga hanyinyani lilata. Ne lu zamaisanga tuto ka linzila ze shutana-shutana. Fokuñwi ne lu talusezanga bana ba luna kuli ba kete taba ye lu ka nyakisisa. Ne lu itusisanga mavidio a lukisizwe ki kopano ya Jehova. Mi fokuñwi ne lu kutelanga ku buha likalulo ze ñwi za vidio kamba ku i yemisa hanyinyani ilikuli lu nyakisise litaba ze mwateñi.” Kwa Britain, me ya bizwa Kim u li: “Ni itukisezanga hande tuto ya lubasi ilikuli ni kone ku buza lipuzo ze ka tusa banake ku nahana. Lwa ikolanga ku ituta. Mi lwa ikashaulanga luli.”

Lu Ba Tuse ku Keta Balikani

Bana ba luna ba kona ku lata Jehova ni ku itebuha bulapeli bwa niti haiba ba swalisana ni batu be li balikani ba Mulimu. Lu tokwa ku ikataza kuli lu fumanele bana ba luna balikani ba bande. Kono ku eza cwalo kwa tusa. Hape ki kwa butokwa ku lukisanga kuli bana ba luna fokuñwi ba kopanange ni Lipaki za Jehova ba ba li mwa sebelezo ya nako kaufela. Bakreste ba bañata ba ba mwa sebelezo ya nako kaufela ne ba susuelizwe ku eza cwalo ki batanga ba Jehova ba ba na ni tukufalelo. Kaizeli yo muñwi ya na tilo ba mulumiwa u li: “Hañata bashemi ba ka ne ba memelanga mapaina kwa sico. Ne ba bonahala ku ikola bukombwa bwa bona, mi na ba ni takazo ya ku sebeleza Mulimu sina bona.”

Kaniti, bana ba luna ba kona ku susuezwa ku eza ze nde kamba ze maswe. Bakeñisa kuli bana ba kona ku ba ni liango ze maswe, lu swanela ku ziba hande mwa ku ba lutela. (1 Makorinte15:33) Ku luta bana ku ambuka batu ba ba sa lati Jehova ki musebezi luli. (Liproverbia 13:20) Bo Shawn ba ba bulezwi mwa taba ye hape ba li: “Ne lu lutile bana ba luna kuli ba kona ku utwana ni balikani ba bona ha ba li kwa sikolo, kono ha ba swaneli ku eza sango ni bona ha se ba zwile kwa sikolo. Ne ba utwisisize libaka ha ne ba sa swaneli ku ikenya mwa lipapali kwa sikolo.”

Bunde Bwa ku Luta Bana

Ha lu luta bana ba luna ku kutaza ku ba bañwi, lu ba tusa ku ikola ku sebeleza Mulimu. Bo Mark ba ba pila kwa America ba li: “Ne lu lutile bana ba luna kuli ba kona ku kutaza ku ba bañwi nako ifi kamba ifi ni ko ba si ka apala inge ba ba ya mwa bukombwa. Kacwalo ha lu yanga kwa ku ishumusa inge cwalo kwa likamba, kamba mwa liparki, lu lwalanga Libibele ni lihatiso ze ñwi ilikuli lu kutaze kwa batu be lu fumana. Banana ba ikolanga ku kutazanga cwalo. Mi ni bona ba abananga mwa lipuhisano.”

Muapositola Joani ya na sa supezi na tusize batu ba bañata ku zwelapili ku lata Mulimu. Kona libaka ha na ñozi kuli: “Ha ku na se si ni tabisa ku fita se, ha ni utwa kuli bana ba ka [ba kwa moya] ba zamaya mwa niti.” (3 Joani 4) Ni luna lwa kona ku ba ni tabo ye swana haiba lu luta bana ba luna ku lata Mulimu.

[Litaluso za kwatasi]

[Maswaniso a fa likepe 9]

Ku ambolisana litaba za kwa moya ku tokwa buikatazo

[Siswaniso se si fa likepe 10]

Mu lute bana ba mina ku bonisa lilato la bona ku Mulimu

[Manzwi a bañi ba siswaniso]

Courtesy of Green Chimneys Farm