Ku Peta Mulelo wa Mulimu Kacenu

“[Kreste] u shwezi batu kaufela kuli ba ba pila ba lisele ku ipilela.” —2 MAKORINTE 5:15.

1. Mu kandeke za n’a ezize mulumiwa yo muñwi.

MULUMIWA wa libizo la Aaron, * ha iheta u li: “Mota ya luna ne li yona ya pili kwa limota za batu besi masole ku kena mwa munzi o muñwi wa mwa Africa hamulaho wa ndwa. Ka nako ya ndwa, ne ku li t’ata ku ambolisana ni mizwale ba ne ba li mwa putehonyana ya mwa munzi wo, kono ne lu na ni buikalabelo bwa ku babalela mizwale bao. Kwand’a lico, liapalo, ni lihatiso za Bibele ze ne lu ba shimbezi, hape ne lu ba iselize ni vidio ya Jehovah’s Witnesses—The Organization Behind the Name. * Batu ba bañata mwa munzi wo ne ba tile ku to buha vidio yeo mwa sitebule se situna mo ne ku na ni VCR ni TV kuli mane lwa buhisa vidio yeo habeli. Mi hamulaho wa ku buha vidio yeo, ba bañata ne ba kupile kuli lu ba lute Bibele. Kaniti luli buikatazo bwa luna ne si bwa mbango.”

2. (a) Ki kabakalañi Bakreste ha ba iketezi ku sebeleza Mulimu mwa bupilo bwa bona? (b) Lu ka nyakisisa lipuzo mañi cwale?

² Ki kabakalañi bo Aaron ni balikani ba bona ha ne ba ikatalize ku eza musebezi o t’ata cwalo? Ki kabakala kuli ba itebuha sitabelo sa Jesu Kreste sa ku ba liulula, ba ineezi ku Mulimu mi ba bata ku pila ka ku lumelelana ni mulelo wa Mulimu. Ka nzila ye swana, Bakreste kaufela ba ba ineezi ‘ba lisezi ku ipilela’ kono ba lika ka mo ba konela kaufela ku “eza linto kaufela kabakala Evangeli.” (2 Makorinte 5:15; 1 Makorinte 9:23) Ba ziba kuli muinelo wo ha u ka fela, masheleñi kaufela ni libubo li ka ba za mbango. Kacwalo ba bata ku pila bupilo bwa bona ka ku lumelelana ni mulelo wa Mulimu. (Muekelesia 12:1) Lu kona ku pila cwañi ka ku lumelelana ni mulelo wa Mulimu? Ki kai ko lu kona ku fumana bundume ni m’ata kuli lu eze cwalo? Mi ki ifi misebezi ye lu kona ku eza kuli lu sebeleze Mulimu?

Ku Eza Zwelopili Hanyinyani-Hanyinyani

3. Ki ifi mihato ya pili ye lu swanela ku nga kuli lu eze tato ya Mulimu?

³ Bakreste ba niti ba bata ku eza tato ya Mulimu mwa bupilo bwa bona kaufela. Ba kalanga ka ku eza lika ze cwale ka ku iñolisa mwa Sikolo sa Bukombwa sa Teokratiki, ku bala Bibele ka zazi, ku kutaza ku ba bañwi, mane ni ku kolobezwa. Ha ba nze ba eza zwelopili, lu hupula manzwi a muapositola Paulusi a li: “Tokomela zeo, u li tukufalelwe; ku zwelapili kwa hao ku lemuhiwe ki batu kaufela.” (1 Timotea 4:15) Mutu ha eza zwelopili ye cwalo haki kuli u bata libubo kono ki sisupo sa kuli u bata ku eza tato ya Mulimu ku fita ku eza tato ya hae. Ku eza cwalo ku bonisa kuli lu bata kuli Mulimu a lu zamaise mwa bupilo bwa luna kaufela, mi luli yena wa kona ku lu zamaisa hande ku fita luna beñi.—Samu 32:8.

4. Lu kona ku felisa cwañi sabo ya luna?

⁴ Kono haiba lwa zina-zina mi lu na ni sabo, lu ka palelwa ku eza zwelopili mwa sebelezo ya luna ku Mulimu. (Muekelesia 11:4) Kacwalo, kuli lu fumane tabo ya ku sebeleza Mulimu ni ku tusa ba bañwi, pili lu swanela ku felisa sabo ya luna. Ka mutala, Erik n’a bata ku yo sebeleza mwa puteho ya puo i sili. Kono na ikalezwi  kuli: ‘Kana ni ka yo amuhelwa? Kana ni ka tabela mizwale ba kwateñi? Kana ba ka ni tabela?’ Erik u li: “Ne ni to lemuha kuli ne ni swanela ku iyakatwa hahulu za mizwale ku fita za ka. Na ikatulela ku sa bilaela se siñwi ni ku eza ka mo ni konela kaufela ku si na taba ni ze ne ka ezahala. Na lapela ku kupa tuso ku Mulimu mi n’a tutela kwa puteho yeo. Ka nako ya cwale, ni ikola hahulu ku sebeleza mwa puteho ye.” (Maroma 4:20) Kaniti, ha lu belekela Mulimu ni ba bañwi ka lilato, lu ka ba ni tabo ni nyakalalo ye tuna.

5. Ki kabakalañi ha lu swanela ku nahanisisanga lika ka tokomelo haiba lu bata ku peta mulelo wa Mulimu? Mu fe mutala.

⁵ Kuli lu pete mulelo wa Mulimu, lu tokwa hape ku nahanisisanga hande lika. Ha lu swaneli ku ikenyanga mwa likoloti ze ñata ze kona ku lu bisa batanga mwa muinelo wo ni ku lu palelwisa ku eza musebezi wa Mulimu. Bibele i lu hupulisa kuli: “Ya kalima, ki mutanga wa ya kolotezwi.” (Liproverbia 22:7) Haiba lu sepa Jehova ni ku eza pili lika za kwa moya, lu ka ba ni tokomelo. Ka mutala, Guoming ni likaizeli za hae ba babeli ba pila ni bom’a bona. Mwa sibaka mo ba pila, mandu a tula ku lifelwa mi misebezi ya kataza ku i fumana. Kono ka ku sebelisa hande mali ni ka ku tusana ku leka lika, ba ipilisa nihaike kuli haki kaufela bona ba ba beleka. Guoming u li: “Fokuñwi ha lu bangi ni mali. Kono lu sa zwelapili ku eza bupaina ni ku babalela bom’a luna. Lwa itumela kuli boma ha ba tokwi kuli lu tuhele bupaina kuli lu beleke ilikuli ba pile bupilo bo bu tula.”—2 Makorinte 12:14; Maheberu 13:5.

6. Ki mutala ufi o bonisa mo lu kona ku pilela ka ku lumelelana ni mulelo wa Mulimu?

⁶ Haiba mu keni hahulu mwa lika za lifasi, za ku bata mali kamba lika ze ñwi cwalo, fohe mu ka tokwa ku eza licinceho ze tuna kuli mu eze pili tato ya Mulimu. Ha mu koni ku eza licinceho zeo ka nako i liñwi fela, mi haiba mu palelwa kwa makalelo mu si ke mwa nga kuli ha mu koni. Mu nyakisise mutala wa Koichi ya n’a sinyezanga nako ye ñata kwa minyaka. Koichi n’a kile a ituta Bibele kwa bwanana, kono ka lilimo ze ñata n’a ikenyize hahulu mwa lipapali. Zazi le liñwi Koichi a ipuza kuli: ‘Kanti ni ezañi? Ki kale ni fitelela lilimo ze 30 mi ha ku na ze ni ezize mwa bupilo bwa ka!’ Koichi a kalisa ku ituta Bibele hape mi a amuhela tuso ya n’a filwe ki puteho. Niha n’a eza zwelopili hanyinyani-hanyinyani, n’a si ka zwafa. Ka ku lapelanga ni ka ku tusiwa ki ba bañwi, a tuhela lipapali za n’a ezanga. (Luka 11:9) Ha lu bulela cwana, Koichi ki mutang’a bukombwa.

Mu Si Ezi Lika Ka Ku Tula Tikanyo

7. Ki kabakalañi ha lu sa swaneli ku eza musebezi wa Mulimu ka ku tula tikanyo?

⁷ Ku peta mulelo wa Mulimu ku tokwa kuli lu beleke ka m’ata a luna kaufela. Ha lu swaneli ku itepeleza kamba ku ba ni buzwa ha lu eza cwalo. (Maheberu 6:11, 12) Kono Jehova ha tokwi kuli lu topwele kwa mubili kamba mwa munahano ha lu nze lu mu sebeleza. Ku itumelela ka buikokobezo kuli ha lu koni ku peta musebezi wa Mulimu ka m’ata a luna beñi ku lumbekisa Mulimu mi hape ku ka lu tusa ku sa eza lika ka ku tula tikanyo. (1 Pitrosi 4:11) Jehova u sepisize ku lu fa m’ata e lu tokwa kuli lu eze tato ya hae, kono ha lu swaneli ku itopwelisa, ili ku lika ku eza lika za sa lu libeleli ku eza. (2 Makorinte 4:7) Kuli lu zwelepili ku sebeleza Mulimu ku si na ku katala, lu tokwa ku itusisa hande m’ata a luna.

8. Mukreste yo muñwi wa mukulwani ha n’a likile ku sebeleza Jehova ni ku sebeleza lifasi, ne ku ezaheziñi ku yena, mi n’a ezize licinceho mañi?

⁸ Ka mutala, ka lilimo ze peli bo Ji Hye, ba ba pila kwa upa wa Asia, ne ba beleka musebezi o patehisa hahulu kono hape inge ba eza bupaina. Ba li: “Ne ni likile ku ifana ku Jehova ni ku ifana kwa lifasi, kono ne ni lobalanga fela lihora ze ketalizoho. Ku kumbuluka n’a felelwa ki m’ata ni tabo ya ku eza lika za kwa moya.” Kuli ba sebeleze Jehova ‘ka pilu, ka moya, ka kutwisiso, ni ka mata a bona kaufela,’ bo Ji Hye ba bata musebezi o muñwi o sa patehisi hahulu.  (Mareka 12:30) Ne ba ize: “Lubasi lwa ka niha ne lu ni hapelelize ku eza musebezi o ne u ka ni fumanisa hahulu mali, ne ni ikatulezi ku eza pili tato ya Mulimu. Ni sa kona ku fumana mali a ku leka lika ze ni tokwa ze cwale ka liapalo ze nde. Mi ni ya tabile kuli cwale ni na ni nako ye ñata ya ku lobalanga. Ni fumana tabo mwa bukombwa mi cwale se ni tiile hahulu kwa moya. Libaka le li tisa cwalo ki kuli ha ni isi pilu ya ka kwa lika ze puma ni ze yembulula za lifasi.”—Muekelesia 4:6; Mateu 6:24, 28-30.

9. Musebezi wa luna u kona ku tusa cwañi ba bañwi mwa simu?

⁹ Haki mañi ni mañi ya kona ku sebeleza Mulimu sina paina. Haiba mu basupali, bakuli, kamba mu na ni matata a mañwi cwalo, mu si libali kuli Jehova wa itebuha busepahali bwa mina ni lika kaufela ze mu mu ezeza ka pilu ya mina kaufela. (Luka 21:2, 3) Ha ku na ya swanela ku ikutwa kuli musebezi wa hae, niha u ka ba o munyinyani cwañi, ha u koni ku tusa ba bañwi. Ka mutala, lu nge kuli ha ne lu kutaza fa ndu ni ndu, ha ku na ba ne ba lu teelelize. Hamulaho bañi ba mandu mwendi ba ka ikambota za luna ka lihora kamba ka mazazi, ni ko ne ba si ka lu lumeleza ku kutaza ku bona. Ha lu libeleli kuli mañi ni mañi ya ka utwa taba ye nde u ka i amuhela, kono ba bañwi ba ka i amuhela. (Mateu 13:19-23) Ba bañwi mwendi ba ka i amuhela ha ku ka ba ni licinceho mwa lifasi kamba mwa bupilo bwa bona. Niti ki ya kuli ha lu beleka ka t’ata mwa bukombwa, lu eza musebezi wa Mulimu. Lu “ba ba sebeza ni Mulimu.”—1 Makorinte 3:9.

10. Mañi ni mañi mwa puteho u kona ku ezañi?

¹⁰ Ku zwaf’o kaufela luna lwa kona ku tusa ba mwa lubasi lwa luna ni mizwale ni likaizeli. (Magalata 6:10) Mutala wa luna wa kona ku tusa hahulu ba bañwi. (Muekelesia 11:1, 6) Maeluda ni batanga ba bukombwa ha ba eza misebezi ya bona ka tukufalelo, puteho i ka hula ni ku tiya kwa moya, mi musebezi wa Sikreste u ka zwelapili. Lu sepisizwe kuli ha lu ‘tiisa kamita musebezi wa Mulena,’ musebezi wa luna “ha u na ku ba o si na tuso.”—1 Makorinte 15:58.

Ku Eza Tato ya Mulimu mwa Bupilo bwa Luna

11. Kwand’a misebezi ya fa puteho, ki ifi misebezi ye miñwi ye lu kona ku eza?

¹¹ Ka ku ba Bakreste, lwa lata bupilo, mi lu  bata ku lumbeka Mulimu mwa lika kaufela ze lu eza. (1 Makorinte 10:31) Haiba lu ikataza ku kutaza taba ye nde ka busepahali ni ku luta ba bañwi ku mamela lika kaufela za n’a laezi Jesu, lu ka fumana linzila za ku sebeleza Mulimu ka zona. (Mateu 24:14; 28:19, 20) Kwand’a ku sebeleza fela mwa puteho ya mina, mwa kona hape ku yo sebeleza ko ku na ni butokwi bo butuna, ibe mwa kalulo ya simu i sili, mwa naha i sili kamba ko ku bulelwa puo i sili. Maeluda ni batanga ba bukombwa ba makwasha ba kona ku kena Sikolo sa Tuto ya Bukombwa, mi hamulaho ba kona ku lumiwa ku yo sebeleza kwa liputeho ko ku tokwahala Bakreste ba ba tiile kwa moya, ibe mwa naha ya habo bona kamba mwa naha i sili. Bosinyalana ba ba mwa sebelezo ya nako kaufela ba ba fitile ku ze konisa ba kona ku kena sikolo sa Giliadi ni ku yo sebeleza kwa naha i sili sina balumiwa. Mi ku tokwahala baitateli ba bañata kuli ba pete misebezi ye shutana-shutana ya fa Betele, ni ya ku yaha ni ku lukisa miyaho ya ku lapelela teñi ni liofisi za mitai.

12, 13. (a) Ki lika mañi ze ka mi tusa ku keta musebezi o mu swanela ku eza? (b) Mu fe mutala o bonisa kuli zibo ye fumanwi mwa musebezi o muñwi ya kona ku tusa mutu mwa misebezi ye miñwi.

¹² Kwa misebezi yeo, ki ifi ye mu bata ku eza? Ka ku ba mutang’a Jehova ya ineezi, kamita mu itinge ku yena ni kwa kopano ya hae. ‘Moya wa hae o munde’ u ka mi tusa ku eza liketo ze nde. (Nehemia 9:20) Musebezi o lu eza u kona ku lu libisa kwa musebezi o muñwi mi zibo ni bunangu bo lu fumana mwa musebezi wo za kona ku yo lu tusa mwa musebezi o muñwi.

¹³ Ka mutala, bo Dennis ni bafumahali ba bona bo Jenny ba tusanga kamita kwa ku yaha Mandu a Mubuso. Liñungwa la Hurricane Katrina ha ne li sinyize sibaka sa mboela wa United States, bo Dennis ni bo Jenny ne ba itatezi ku yo tusa ba ne ba ziyelehile. Bo Dennis ba li: “Zibo ye ne lu fumani ha ne lu yaha Mandu a Mubuso ne i lu konisize ku tusa mizwale ba luna mi ne lu bile ni tabo ye tuna. Ne lu ikutwile hande batu be ne lu tusize ha ne ba til’o itebuha ku luna. Likwata ze ñata ze ne bata ku tusa ku yaha mandu a n’a sinyehile ne li konile fela ku yaha mandu a sikai. Lipaki za Jehova ba konile ku lukisa kamba ku yaha sinca mandu a fitelela 5,300 ni Mandu a Mubuso a mañata. Batu ba lemuhile lika ze lu ezize mi cwale se ba teeleza kwa lushango lo lu kutaza.”

14. Mu tokwa ku ezañi haiba mu bata ku eza sebelezo ya nako kaufela?

¹⁴ Kana mwa kona ku eza tato ya Mulimu ka  ku iketela ku kena mwa sebelezo ya nako kaufela? Haiba mwa kona ku eza cwalo, mu kolwe kuli mu ka kapwekiwa limbuyoti ze ñata. Kono haiba ha mu koni ku eza cwalo ka nako ya cwale, mwendi mwa kona ku eza licinceho ze ñwi. Mwa kona ku lapela sina mwa n’a lapelezi Nehemia ha n’a bata ku yo eza musebezi wa butokwa. N’a lapezi kuli: “Mulena, na ku lapela, . . . U kondise mutang’a hao.” (Nehemia 1:11) Mi ka ku sepa Jehova, yena “ya utwa milapelo,” mu nge muhato sina ka mo mu lapelezi ku Mulimu. (Samu 65:2) Kuli Jehova a mi tuse ku mu sebeleza ka ku tala, mu swanela ku eza pili buikatazo bo. Ha se mu ezize keto ya ku eza sebelezo ya nako kaufela, mu si ke mwa cinca munahano wa mina. Nako ha i nze i ya, mu ka ba ni zibo ni yeloseli, mi mu ka ikola musebezi wa mina.

Bupilo Bo Bu Tabisa Luli

15. (a) Lu ka tusiwa cwañi ka ku ikambotanga ni mizwale ni likaizeli ba ba sebelelize Mulimu ka nako ye telele ni ka ku balanga litaba ze ezahezi mwa bupilo bwa bona? (b) Mu kandeke ka bukuswani likande la muzwale kamba kaizeli yo muñwi le li mi susuelize hahulu.

¹⁵ Ki lika mañi ze mu kona ku fumana mwa ku peta mulelo wa Mulimu? Mu ikambote ni mizwale ni likaizeli ba ba sebelelize Jehova ka nako ye telele, sihulu ba ba bile mwa sebelezo ya nako kaufela. Ba ka mi taluseza kuli ba pilile bupilo bo bu tabisa luli! (Liproverbia 10:22) Mi ba ka mi taluseza kuli nihaiba mwa miinelo ye t’ata Jehova ha si ka ba yumba simulamu kono u ba fanga ze ba tokwa mane ni ze ñwi ze ñata. (Mafilipi 4:11-13) Ku zwa ka 1955 ku isa ka 1961, mwa The Watchtower ne ku banga ni taba ye li, “Pursuing My Purpose in Life,” ili mo ne ku ñolwanga litaba ze ezahezi mwa bupilo bwa mizwale ni likaizeli ba ba sepahala. Ku zwelela nako yeo, se ku hatisizwe makande a mañata a bupilo bwa mizwale ni likaizeli. Ye ñwi ni ye ñwi ya litaba zeo i bonisa moya wa mafulofulo ni wa tabo ili o lu hupulisa litaba ze ñozwi mwa buka ya mwa Bibele ya Likezo. Ha mu ka bala litaba ze nde zeo, mu ka susuezwa ku bulela kuli, ‘Ni na ni bata ku pila bupilo bo bu cwalo.’

16. Ki sika mañi se si tisanga kuli bupilo bwa Mukreste bu be bo bu tabisa hahulu?

¹⁶ Bo Aaron ba ba bulezwi kwa makalelo a taba ye, ha ba iheta, ba li: “Mwa lifasi la Africa, ne ni katananga mitangana be ne ba kukana fela inze ba bata mulelo wa bupilo. Mi ba bañata ne ba si ka u fumana. Kono luna ne lu eza tato ya Mulimu ka ku kutaza taba ye nde ya Mubuso mi ne lu ikozi bupilo bo bu tabisa luli. Lu iponezi luli kuli ku na ni mbuyoti ye mwa ku fana, ye fita ye mwa ku fiwa.”—Likezo 20:35.

17. Ki kabakalañi ha lu swanela ku eza tato ya Mulimu cwale?

¹⁷ Mina bo? Mu ezañi mwa bupilo? Haiba ha mu si ka itomela likonkwani za kwa moya, mu ka kala ku ndongwama misebezi ya lifasi. Mu ka sinyezañi bupilo bwa mina ka ku eza lika za lifasi le la Satani? Hona cwale-cwale fa, ñalelwa ye tuna ha i ka lenga, sifumu ni libubo la mwa lifasi ha li na ku ba ni tuso. Ka nako yeo, nto ye ka ba ya butokwa hahulu ki silikani sa luna ni Jehova. Lu ka ba ni tabo hakalo kuli lu sebelelize Mulimu ni ku tusa ba bañwi mi lu ezize tato ya Mulimu mwa bupilo bwa luna!—Mateu 24:21; Sinulo 7:14, 15.

[Litaluso za kwatasi]

Kana Mwa Kona ku Talusa?

• Jehova u ikutwanga cwañi ha lu mu sebeleza?

• Ku eza zwelopili ni ku sa eza lika ka ku tula tikanyo ku kona ku lu tusa cwañi ku sebeleza Mulimu ni ba bañwi?

• Ki misebezi ifi ye lu kona ku eza kuli lu sebeleze Mulimu?

• Lu kona ku pila cwañi bupilo bo bu tabisa cwale?

[Lipuzo za Tuto]

[Maswaniso a fa likepe 23]

Ha lu nze lu sebeleza Jehova ka moyo wa luna kaufela, ha lu swaneli ku eza lika ka ku tula tikanyo

[Maswaniso a fa likepe 24]

Lu kona ku sebeleza Mulimu ka linzila ze ñata