Lipuzo Ze Zwa kwa Babali

Kana Jakobo n’a fosize ka ku ipumisa kuli ki yena Isau, sina ka mo ku ñolezwi kwa Genese 27:18, 19?

Mwendi mwa ziba hande likande le. Isaka ha s’a supezi, n’a bulelezi Isau mweli wa hae kuli a mu zumele folofolo. A mu bulelela kuli: “Ni i ce; moya wa ka u ku fuyole ni si ka shwa.” Rebeka ha n’a utwile za n’a bulezi munn’a hae Isaka, a apea nama ye tabusa mi a laela Jakobo a li: “U ka i isa ku ndat’aho, a i ce mi a ku fuyole a si ka shwa.” Cwale Jakobo ha sa apezi liapalo za Isau ni ku apala matalo a lipulinyana mwa mulala ni kwa mazoho, a ya ku ndat’ahe ni musulo wa nama ye tabusa. Isaka ha mu buzize kuli, “ki wena mañi, mwan’a ka?” Jakobo a alaba kuli: “Ki na Isau mweli wa hao.” Isaka a kolwa kuli ne li yena Isau mi a mu fuyaula.—Genese 27:1-29.

Bibele ha i talusi libaka Rebeka ni Jakobo ha ne ba ezize cwalo, kono i bonisa kuli mulelo wo ne u ezahezi ka sipundumukela. Nihakulicwalo, mu lemuhe kuli Linzwi la Mulimu ha li yemeli Rebeka ni Jakobo kono hape ha li ba nyazi, mi taba yeo i bonisi kuli ne si mahata ha ne ba ezize cwalo. Kono Bibele ya bonisa mo ne li ezahalezi lika.

Sapili, Bibele i bonisa hande kuli Jakobo ki yena ya n’a swanela ku fuyaulwa ki ndat’ahe; kono Isau n’a sa swaneli. Pili zeo li si ka ezahala, Jakobo n’a lekile tukelo ya ku ba mweli ku muhulwan’a hae ya n’a sa itebuhi lika za kwa moya, ili ya n’a lekisize buhulu bwa hae ka musulo wa sico. Isau “n’a shubuzi buhulu bwa hae.” (Genese 25:29-34) Kacwalo mbuyoti ya n’a izo bata Jakobo ku ndat’ahe ne i mu swanela luli.

Sa bubeli, Isaka ha n’a lemuhile kuli n’a sa fuyauzi Jakobo, n’a si ka bata ku cinca. Ku bonahala kuli n’a hupuzi za n’a bulezi Jehova ku Rebeka pili mambile bao ba si ka pepwa kale, kuli: “Yo muhulu u ka sebeleza yo munyinyani.” (Genese 25:23) Mi mane Jakobo ha n’a tuha a tama lieto la ku ya kwa Karani, Isaka hape a ekeza hahulu kwa limbuyoti za n’a fuyauzi Jakobo ka zona sapili.—Genese 28:1-4.

Mi sa mafelelezo, lu swanela ku hupula kuli Jehova n’a bona mi n’a iselize hahulu pilu ku ze ne ezahala. Limbuyoti za n’a filwe Jakobo ne li lumelelana ni sepiso ya Mulimu ku Abrahama. (Genese 12:2, 3) Kambe kuli Mulimu n’a sa lati kuli Jakobo a fuyaulwe, n’a kabe a ezize nto ye ñwi. Kono Jehova mane a taluseza Jakobo kuli: “Mishobo kaufela ya lifasi i ka fiwa mbuyoti ka . . . lusika lwa hao.”—Genese 28:10-15.