“Niti Kiñi?”

JESU n’a buzizwe puzo yeo ka bomu ki Mubusisi wa Muroma Ponse Pilato. Pilato n’a sa tokwi kalabo, mi ni yena Jesu n’a si ka mu alaba. Mwendi Pilato n’a nga kuli niti i t’ata hahulu ku i ziba.—Joani 18:38.

Batu ba bañata kacenu, ku kopanyeleza cwalo ni ba bahulu ba bulapeli, baluti, ni ba lipolitiki, ha ba tabeli ku ziba niti. Ba nga kuli niti—sihulu niti ya za muzamao ni ya za kwa moya—haki ye inelela luli kono ki ye cinca-cinca nako kaufela. Munahanelo o cwalo u bonisa kuli batu ba na ni swanelo ya ku iketela ili bona se sinde ni se si maswe. (Isaya 5:20, 21) Mi hape u ezisa batu ku nahana kuli likuka za muzamao ze ne latelelwa ki bashemi ba luna se li za kale hahulu kuli mane ha li sa swanela ku latelelwa.

Taba ye ne tisize kuli Pilato a buze puzo yeo ya ikutwahalela hande. Jesu na s’a bulezi kuli: “Ki sona se ni pepezwi, ni se ni tezi mwa lifasi: kuli ni t’o paka niti.” (Joani 18:37) Jesu n’a sa ngi niti ku ba nto ye t’ata hahulu ku i utwisisa. N’a sepisize balateleli ba hae kuli: “Mu ka ziba niti, mi niti i ka mi lukulula.”—Joani 8:32.

Lu kona ku fumana kai niti ye cwalo? Ka nako ye ñwi, Jesu n’a bulelezi ndat’ahe mwa tapelo kuli: “Linzwi la hao ki yona niti.” (Joani 17:17) Bibele, yona ye ñozwi ka ketelelo ya Mulimu, i lu patululela niti ye lu fa ketelelo ye sepeha ni sepo ya niti ya za kwapili —yona ya bupilo bo bu sa feli.—2 Timotea 3:15-17.

Pilato n’a hanile tohonolo ya ku ituta niti ye cwalo. Mina bo? Kana ne mu ka tabela ku kupa Lipaki za Jehova kuli ba mi tuse ku ziba “niti” ya n’a lutile Jesu? Lipaki za Jehova ba ka tabela hahulu ku mi tusa.