Ba ‘Tuzi Hamoho Ni Ngunyana’

KA 1971, bo Carey W. Barber ne ba ñozi liñolo le ne li bonisa mo ne ba sebelelize Mulimu wa niti mwa lilimo ze 50 ze ne se fitile. Ne ba ize: “Lilimo ze ni tandile ku sebeleza Jehova li bile ze tabisa hahulu. Mwa lilimo ze, ni swalisani ni batu ba hae; ni silelelizwe kwa batu ba ba maswe ba mwa lifasi la Satani; ni bile ni sepo ya ku tula hamoho ni Ngunyana, yena Jesu Kreste; mi ni iponezi lilato la Jehova. Mi zeo kaufela li ni tahiselize kozo ni mwangalwa hamohocwalo ni sepo ya tulo ya mafelelezo.”

Hamulaho wa lilimo ze 6, Muzwale Barber, yo muñwi wa Bakreste ba ba tozizwe, a ketiwa ku ba mwa Sitopa Se Si Etelela sa Lipaki za Jehova. Mwa lilimo ze 30 ze ne latelezi, na zwezipili ku ba ni sepo ya ku “tula hamoho ni Ngunyana.” Bo Barber ne ba petile sikonkwani seo ka ku zwelapili ku sepahala ku fitela ha ba timela la Sunda, 8 April, 2007, inge ba na ni lilimo ze 101.—1 Makorinte 15:57.

Bo Carey Barber ne ba pepezwi kwa England ka 1905, mi ne ba kolobelizwe ka 1921 mwa Winnipeg, kwa Canada. Hamulaho wa lilimo ze peli, bona ni bo muhulwan’a bona bo Norman, ba tutela kwa Brooklyn, New York, kuli ba yo tusa ku peta musebezi o n’o kalisizwe. Batu ba Jehova ka nako yeo ne se ba tuha ba kalisa ku hatisa libuka ze ne ka ba tusa ku shaela taba ye nde ya Mubuso “mwa lifasi kaufela.” (Mateu 24:14) O muñwi wa misebezi ya pili ya n’a filwe Muzwale Barber ne li wa ku hatisa. Na hatisanga lika ze cwale ka mapepa a litaba ze ne ka talimwa mwa Kuta Ye Tuna ya United States. Nako ha ne i nze i ya, Muzwale Barber n’a sebelelize mwa likolo le li talima za misebezi mwa liputeho ni musebezi wa ku kutaza mwa naha kaufela (Service Department).

Hamulaho wa ku sebeleza mwa likolo leo, ka 1948 Muzwale Barber a ketiwa ku ba muokameli wa maeto, inz’a zamaisanga mikopano ni ku potela liputeho ze kwa wiko wa United States. Bo Barber ne ba ize ne ba ikolanga hahulu kamoya ka fande ha ne ba nze ba kutaza. Ku kutaza cwalo ne ku tisize kuli Muzwale Barber a zibahale hahulu kwa mizwale ni likaizeli. Zibo ni tukufalelo ya hae mwa bukombwa ne li mu tusize hahulu ha na ile kwa Sikolo sa Giliadi sa Bibele sa Watchtower mwa sitopa sa bu 26. Ha na li kwa sikolo, a zibana ni Kaizeli Sydney Lee Brewer ya na zwa kwa Canada. Ha se ba felize sikolo ba nyalana, mi hamulaho ba yo sebeleza liputeho ze ne li kwa Chicago, mwa Illinois. Kaizeli Barber na zwezipili ku ba mutusi yo munde mwa lilimo ze 20 ze ne ba tandile hamoho mwa musebezi wa maeto.

Ba ne ba fitile fa ku ziba Muzwale Barber mwa lilimo za na belekile sina muokameli wa sikiliti ni wa mupotoloho, kamba mwa lilimo ze 30 za na bile mwa Sitopa Se Si Etelela, ba ka hupulanga hahulu lingambolo za hae ze nyangumuna. Lwa wabelwa luli kuli u ‘tuzi hamoho ni Ngunyana.’