Kana Mu Swanela ku Iyakatwa Fela za Kacenu?

KU KULUBELWA kuli Albert Einstein, caziba wa sayansi ya ile nkuwa n’a kile a bulela kuli: “Na ha ni ipulaisangi ku nahana za kwapili. Kakuli ha ni boni tuso ya ku eza cwalo.” Batu ba bañata ni bona ba hupula kuli ha ba tokwi ku nahana za kwapili. Ba kana ba li: “Ni ipulaisezañi ku nahana za kwapili?” Kamba mwendi mu kile mwa utwa ba ba bulela kuli: “Mu ikezeze fela mo mu latela.” “Ku zibwa za kacenu.” “Za kamuso li ka iponela.”

Kono mubonelo o cwalo ha u si ka kalisa kacenu. Ka mutala, Maepikure ba ikale ne ba bulelanga kuli: “Ha lu ceñi ni ku nwa, lu ikole. Ze ñwi kaufela ha li na tuso.” Batu ba bañwi mwa miteñi ya muapositola Paulusi ni bona ne ba na ni mubonelo o swana. Ne ba bulelanga kuli: “A lu ceñi, a lu nweñi, kakuli kamuso lu ka shwa.” (1 Makorinte 15:32) Ne ba lumela kuli bakeñisa kuli ha lu na a matelele, lu swanela ku ca ni ku nwa honafa ha lu sa pila.

Batu ba bañata mwa lifasi ba sebeza ka t’ata isi ka ku bata fela ku ndongwama minyaka. Ze tahisa kuli ba fufulelwe cwalo ki matata e ba kopana ni ona mwa bupilo. Bakeñisa ku sa ba ni sepo, ba ikutwa kuli ha ba tokwi ku iyakatwa za kwapili.

Kana Lwa Swanela ku Iyakatwa za Kwapili?

Nihaiba batu ba ba si na hahulu matata ba nga kuli ha ku na tuso ya ku iyakatwa za kwapili. Ba kana ba ipuza kuli: “Ni ka ipulaisezañi?” Ba bañwi ba nahana kuli ba ba iyakatwanga za kwapili ba ipulaisanga fela, kakuli milelo ya bona ha i kondangi. Mane nihaiba yena Jobo wa ikale n’a zwafile hahulu ha n’a lemuhile kuli milelo ya hae ye ne ka be i tusize lubasi lwa hae ku pila hande ka tabo ne “i sinyehile.”—Jobo 17:11; Muekelesia 9:11.

Mwa toko ya hae, Robert Burns wa kwa Scotland n’a kile a bapisa matata a batu kwa kozi ya peba ya n’a sinyelize musima ha n’a kekela. Musima wa yona ha se u sinyizwe, ya lumpuka mwa musima ku bata kwa ku ya. N’a zwezipili ku talusa kuli: ‘Ni luna batu kona mo lu inezi cwalo, lwa ziyelehanga luli  ha lu talimana ni matata e lu sa koni ku tatulula.’

Kono kana kikuli ku lela za kwapili ha ku na tuso? Niti kikuli haiba lu sa itukisezi lwa kona ku ziyeleha hahulu muta lu kopana ni likozi ze cwale ka ñuli kamba matata a mañwi. Ki niti kuli ha ku na mutu ya n’a ka tibela ñuli ya Hurricane Katrina. Kono kabe batu ba kwa New Orlean ko ne ku ezahezi kozi yeo ne ba itukiselize hande, ne ba si ke ba sinyehelwa hahulu.

Mina mu bona cwañi? Kana luli lu swanela ku iyakatwa fela za kacenu ni ku libala za kamuso? Lipuzo ze li ka alabiwa mwa taba ye tatama.

[Maswaniso a fa likepe 3]

“Ha lu ceñi ni ku nwa, lu ikole. Ze ñwi kaufela ha li na tuso”

[Siswaniso se si fa likepe 4]

Kabe batu ba kwa New Orlean ne ba itukiselize hande, ne ba si ke ba sinyehelwa hahulu

[Manzwi a bañi ba siswaniso]

U.S. Coast Guard Digital