Kana Mwa Itusisanga Kolo Ye Mu Na Ni Kuli Mu Kutaze ku Ba Bañwi?

“KANA niti luli i teñi?” Yeo ne li yona taba ye ne li mwa kangisano ya ku ñola ya bana ba sikolo ba kwa Poland. Litaelo za taba yeo ne li za kuli: “Ha lu tokwi ku ziba niti luli. Ha ku na mutu ya i tokwa. Mi mane niti luli ha i yo.” Agata, mwan’a sikolo wa lilimo ze 15 ili yo muñwi wa Lipaki za Jehova a ikatulela ku itusisa kolo yeo kuli a taluseze ba bañwi lituto za lumela.

Kuli a itukiseze kangisano yeo, Agata n’a lapezi pili ku Jehova kuli a mu etelele, mi kihona a eza lipatisiso ka za taba yeo. A fumana litaba ze bulela za teñi mwa Tora ya ku Libelela ya July 1, 1995. Agata a ama kwa puzo ya n’a buzize Ponse Pilato ku Jesu ye li: “Niti kiñi?” (Joani 18:38) A ñola kuli puzo yeo ne i bonisa kuli Pilato n’a honona kuli: ‘Kana luli ku na ni niti? Ha ku na nto ye cwalo!’ Agata n’a bulezi kuli “puzo ya Pilato i ni hupulisa litaelo ze ne lu filwe.”

Kihona cwale a talusa muhupulo o li teñi kwa batu wa kuli nto ya niti ku mutu yo muñwi i kona ku sa ba ya niti ku yo muñwi, ni kuli mwendi sibeli sa bona ba nepile. A buza lipuzo ze cwale ka ya kuli: “Ki mañi ku luna ya na ka ba ni bundume bwa ku kwela fulai kambe kuli milao ya mbyumbyulu hasi ya niti?” Cwale a ama kwa Bibele, mi a bulela kuli: “Sepo ya ku sepa Linzwi la Mulimu i tomile luli fa mabaka a niti.” Mi a talusa kuli sepo ya hae ki ya kuli ba ba bata niti luli ba ka i bata ka pilu-telele kuli ba i fumane.

Agata na filwe diploma mi na filwe ni sibaka sa ku kutaza kwa bana ba sikolo ba bañwi. Mi ba bañwi ku bona ba lumela ku ituta Bibele ni yena. Agata u tabile kuli na konile ku itusisa kolo yeo ku taluseza ba bañwi tumelo ya hae. Kaniti luli, ku itusisa kolo ye lu na ni yona kuli lu taluseze ba bañwi tumelo ya luna ku kona ku tahisa ze nde. Mina bo, ki ifi kolo ye mu kona ku itusisa kuli mu kutaze ku ba bañwi?