Ku Batisisa “Ze Tungile Za Mulimu”

“Moya u batisisa linto kaufela, mane ni ze tungile za Mulimu.”—1 MAKORINTE 2:10.

1. Ki litaba mañi za mwa Bibele ze tabisanga baituti ba Bibele ba banca?

BUÑATA bwa luna mwa puteho ya Sikreste lu sa hupula kuli ne lu bile ni tabo ha ne lu itutile niti. Ne lu itutile libaka libizo la Jehova ha li li la butokwa, libaka Mulimu ha tuhelezi manyando, libaka batu ba bañwi ha ba ya kwa lihalimu, mi ne lu itutile ni lika ze nde za kwapili ze ba bulukezwi batu ba ba sepahala. Mwendi pili lu si ka ituta niti, ne lu balanga Bibele, kono litaba zeo kaufela ne li patilwe ku luna sina mo li patezwi kwa batu ba bañata. Ne lu swana inge mutu ya tama musipili malungasiku. Ka nako ya kala musipili ha koni ku bona hande bakeñisa kuli ku na ni lififi. Kono lizazi ha li nze li pazula, u kala ku bona lika hanyinyani-hanyinyani. Ha se ku li musihali, u fita cwale fa ku bona lika kaufela hande mane ni ze kwahule. Ka nzila ye swana, mutu yo muñwi ha n’a kalile ku lu tusa ku utwisisa Mañolo, ne lu kalile ku utwisisa hanyinyani-hanyinyani litaba “ze tungile za Mulimu.”—1 Makorinte 2:8-10.

2. Ki kabakalañi tabo ya ku ituta linzwi la Mulimu ha i sa koni ku fela?

² Kana lu swanela ku tuhela ku ituta Bibele ha se lu zibile fela litaba ze nyinyani? Pulelo ya kuli “ze tungile za Mulimu” i kopanyeleza ku utwisisa butali bwa Mulimu bo bu patululezwi Bakreste ka moya o kenile kono ili bo bu patezwi batu ba bañwi. (1 Makorinte 2:7) Butali bwa Jehova ha ku na fo bu felela mi lwa kona ku fumana tabo ka ku bu batisisa. Ha lu na ku zibelela butali bwa Mulimu. Lu  ka zwelapili ku ba ni tabo ye ne lu bile ni yona ha ne lu itutile litaba za Bibele za matatekelo haiba lu zwelapili ku batisisa “ze tungile za Mulimu.”

3. Ki kabakalañi ha lu swanela ku utwisisa hande litaba ze lu lumela?

³ Lu tokwelañi ku utwisisa litaba “ze tungile” zeo? Haiba lu utwisisa litaba ze lu lumela ni ku utwisisa libaka ha lu lumela litaba zeo, fohe sepo ni tumelo ya luna li ka tiya. Mañolo a lu susueza ku nahanisisa lika ‘kuli lu lemuhe se si latwa ki Mulimu kana ki sifi, se sinde, se si kateleha, se si petehile.’ (Maroma 12:1, 2) Ha lu utwisisa libaka Jehova ha lu laela ku pila mupilelo o muñwi cwalo, lu ka ikatulela ku mu utwa. Kacwalo, haiba lu utwisisa litaba “ze tungile,” lu ka kona ku tiyela miliko ya ku eza lika ze maswe mi lu ka “tukufalelwa misebezi ye minde.”—Tite 2:14.

4. Ku ituta Bibele ku amañi?

⁴ Kuli lu utwisise litaba ze tungile, lu tokwa ku ituta. Kono ku ituta ha ku swani ni ku bala fela. Ku ituta ku talusa ku tatubisisa hande litaba ilikuli lu bone mo li swalisanela ni litaba ze lu ziba ni kale. (2 Timotea 1:13) Ku ama ku lemuha libaka ze li ñolezwi litaba ze lu ituta. Ha lu ituta Bibele, lu swanela ku nahanisisanga mo lu kona ku sebeliseza litaba ze lu ituta kuli lu eze likatulo ze nde ni kuli lu tuse ba bañwi. Hape lu swanela ku ituta “manzwi kaufela a’ zwa mwa mulomo wa Mulimu” bakeñisa kuli “Liñolo kamukana li tahile ka Moya wa Mulimu, mi li na ni tuso.” (2 Timotea 3:16, 17; Mateu 4:4) Ku ituta Bibele ku kona ku ba t’ata. Kono hape kwa kona ku tabisa, mi ku utwisisa “ze tungile za Mulimu” ha ku yo hahulu t’ata.

Jehova U Tusa Ba Ba Ikokobeza ku Utwisisa

5. Ki bomañi ba ba kona ku utwisisa litaba “ze tungile za Mulimu”?

⁵ Niha mu si ka ituta hahulu kwa sikolo kamba niha mu si ka twaela ku ituta, ha mu swaneli ku nahana kuli ha mu koni ku utwisisa “ze tungile za Mulimu.” Jesu ha n’a li fa lifasi, Jehova n’a si ka patulula milelo ya Hae kwa batu ba ba butali kono n’a i patululezi batu-tu fela ba ba si ka ituta, ili ba ne ba kona ku lutiwa ki mutang’a Mulimu bakeñisa kuli ne ba ikokobeza. Ne ba swana sina bana ba banyinyani ha ne ba bapanyiwa kwa batu ba ne ba itutile. (Mateu 11:25; Likezo 4:13) Ha n’a ama kwa ‘litaba zeo Mulimu a lukiselize ba ba mu lata,’ muapositola Paulusi n’a ñolezi balumeli ba bañwi kuli: “Mulimu u li patululezi luna ka Moya. Kakuli Moya u batisisa linto kaufela, mane ni ze tungile za Mulimu.”—1 Makorinte 2:9, 10.

6. Liñolo la 1 Makorinte 2:10 li talusañi?

⁶ Moya wa Mulimu u batisisa cwañi “linto kaufela, mane ni ze tungile za Mulimu”? Ku fita ku patululela niti ku Mukreste ni Mukreste, Jehova u itusisa moya wa hae ku etelela kopano ya hae kuli i tuse batu ba Mulimu ba ba swalisani hamoho kuli ba utwisise Bibele. (Likezo 20:28; Maefese 4:3-6) Mwa lifasi kaufela, liputeho kaufela li ituta litaba za mwa Bibele ze swana. Hamulaho wa ku ituta ka lilimo, liputeho li fitanga fa ku ituta litaba kaufela za mwa Bibele. Moya o kenile u konisanga liputeho kuli li lute batu ku utwisisisa “ze tungile za Mulimu.”—Likezo 5:32.

 “Ze Tungile za Mulimu” Li Amañi?

7. Ki kabakalañi batu ba bañata ha ba sa utwisisi “ze tungile za Mulimu”?

⁷ Ha lu swaneli ku nahana kuli litaba “ze tungile” ki ze t’ata ku utwisiswa. Zibo ya “ze tungile za Mulimu” i patezwi batu ba bañata, isi kabakala kuli butali bwa Mulimu bu t’ata ku bu utwisisa, kono kabakala kuli Satani u puma batu kuli ba hane tuso ya fa Jehova ka kopano ya Hae.—2 Makorinte 4:3, 4.

8. Ki litaba mañi ze tungile za n’a bulezi Paulusi mwa kauhanyo ya bulalu ya liñolo la hae ku ba kwa Efese?

⁸ Kauhanyo ya bulalu ya liñolo la Paulusi ku ba kwa Efese i bonisa kuli “ze tungile za Mulimu” li kopanyeleza litaba ze ñata ze ba utwisisa hande batu ba Jehova, ze cwale ka peu ye ne sepisizwe, za ku ketiwa kwa batu ba bañwi kuli ba ye kwa lihalimu ni za Mubuso wa Mesiya. Paulusi n’a ñozi kuli: “[Kunutu] ili ye ne si ka zibiswa bana ba batu ba masika a kale, sina ha i sa zw’o patululelwa baapositola ba ba kenile, ni bapolofita ba Kreste, ka Moya. Kunutu yeo, kikuli: Bamacaba ki ba ba yola sanda hamoho ni bana ba Isilaele, ku ba mubili u li muñwi ni bona; ba abezwi hamoho ni bona kwa sepiso ye li ku Jesu Kreste.” Paulusi n’a bulezi kuli n’a filwe musebezi wa kuli a “bonise batu kamukana litaba za kunutu yeo ye ne patilwe ku Mulimu haisali.”—Maefese 3:5-9.

9. Ki kabakalañi ha i li tohonolo ku utwisisa “ze tungile za Mulimu”?

⁹ Paulusi n’a zwezipili ku talusa tato ya Mulimu kuli ni “kwa lihalimu i zibiswe, ka Keleke, butali bwa Mulimu bo bu taha ka mikwa ye miñata.” (Maefese 3:10) Mangeloi a ituta lituto ze ñwi ka ku bona ni ku utwisisa ka m’o Jehova a zamaiseza ka butali puteho ya Sikreste. Lu na ni tohonolo luli ku utwisisa litaba z’a tabela nihaiba mangeloi. (1 Pitrosi 1:10-12) Ku tuha fo, Paulusi u bulela kuli lu swanela ku satalala ‘ku utwisisa hamoho ni balumeli kamukana, fo ku kuma bupala, ni butelele, ni butungi, ni butelele bwa ku ya kwahalimu’ bwa tumelo ya Sikreste. (Maefese 3:11, 18) Cwale ha lu nyakisiseñi mitala ya litaba ze tungile mwendi ze lu samba lu ba lu nyakisise.

Mitala ya Litaba Ze Tungile

10, 11. Ka ku ya ka Mañolo, Jesu n’a bile lili yena wa pili kwa “peu” ya musal’a Mulimu wa kwa lihalimu?

¹⁰ Lwa ziba kuli Jesu ki yena wa pili kwa “peu” ya musal’a Mulimu wa kwa lihalimu ya bulezwi kwa Genese 3:15. Kuli lu kone ku utwisisa hande taba yeo, lu swanela ku ipuza kuli: ‘Jesu n’a bile lili peu ye ne sepisizwe? Kana ne li pili a si ka taha kale fa lifasi, kamba ha pepwa fa lifasi, kamba fa kolobelezwa, kamba kana ne li ka nako ya n’a zusizwe kwa bafu?’

¹¹ Mulimu n’a sepisize kuli kalulo ya kopano ya hae ya kwa lihalimu, yona ye talusizwe mwa bupolofita kuli ki musal’a hae, ne i ka tahisa peu ye ne i ka pyata noha kwa toho. Kono ne ku fitile lilimo ze ñata musal’a Mulimu a si na peu ye ne ka kona ku yundisa Diabulosi ni misebezi ya hae. Kona libaka mwa bupolofita bwa Isaya musali yo ha bizwa “mumba” ni “ya na ni maswabi mwa pilu.” (Isaya 54:1, 5, 6) Niteñi, hamulaho wa nako, Jesu a pepwa mwa Betelehema. Kono ne li hamulaho wa kolobezo ya hae, ha n’a tozizwe ka moya sina mwan’a Mulimu wa kwa moya, fa n’a mu bizelize Jehova kuli: “Yo ki mwan’a ka.” (Mateu 3:17; Joani 3:3) Jesu, yena wa pili kwa “peu” ya musali, n’a til’o zibahala cwale. Mi hamulaho, balateleli ba Jesu ni bona ne ba tozizwe ka moya o kenile mi ba fita fa ku ba bana ba Mulimu. Musal’a Jehova, ya n’a ikutwile ka nako ye telele kuli ki “mumba” cwale n’a ‘opezi ka tabo.’—Isaya 54:1; Magalata 3:29.

12, 13. Ki mañolo afi a bonisa kuli Bakreste kaufela ba ba tozizwe fa lifasi ki bona “mutanga ya sepahala, ya na ni kutwisiso”?

¹² Mutala wa bubeli wa litaba ze tungile ze lu patululezwi u ama mulelo wa Mulimu wa  ku keta ba 144,000 mwahal’a batu ba fa lifasi. (Sinulo 14:1, 4) Lu lumela kuli ba ba tozizwe kaufela ba ba pila fa lifasi ka nako ifi kamba ifi ki bona “mutanga ya sepahala, ya na ni kutwisiso” ya n’a bulezwi ki Jesu kuli u ka fa batanga ba hae “lico” ka nako ye lukela. (Mateu 24:45) Ki mañolo afi a mwa Bibele a bonisa kuli tuto yeo ki ya niti? Esi mwendi Jesu ha n’a bulezi za mutanga ya sepahala, ya na ni kutwisiso, n’a talusa fela Mukreste ufi kamba ufi ya susueza ba bañwi ka lico za kwa moya?

¹³ Mulimu n’a taluselize sicaba sa Isilaele kuli: “Ki mina lipaki za ka . . . ni mutanga wa ka ye ni ketile.” (Isaya 43:10) Kono la Nisani 11, 33 C.E., Jesu n’a taluselize baeteleli ba Isilaele kuli Mulimu n’a hanile sicaba sa bona kuli haki mutang’a Hae. N’a ba bulelezi kuli: ‘Mu ka amuhiwa mubuso wa Mulimu, mi u ka fiwa sicaba si sili, se si ka beya lukau lwa ona.’ Jesu n’a bulelezi sicaba kuli: “A mu bone, ndu ya mina i siyala ku mina ili matota.” (Mateu 21:43; 23:38) Ka ku ba mutang’a Jehova, sicaba sa Isilaele ne si si ka sepahala mi ne si si na kutwisiso. (Isaya 29:13, 14) Hamulaho, lizazi le li swana leo, Jesu ha n’a buzize puzo ya kuli: “Ki mañi mutanga ya sepahala, ya na ni kutwisiso?” sa n’a buza luli kikuli, ‘Ki sicaba sifi se si na ni kutwisiso se si ka yola Isilaele kuli si be sona mutang’a Mulimu ya sepahala?’ Muapositola Pitrosi n’a alabile puzo yeo ha n’a taluselize puteho ya Bakreste ba ba tozizwe kuli: ‘Mu mushobo o kenile, mu sicaba sa hae tota.’ (1 Pitrosi 1:4; 2:9) Sicaba sa kwa moya seo, ili “Isilaele wa Mulimu,” ne si bile mutang’a Jehova yo munca. (Magalata 6:16) Sina fela sicaba kaufela sa Isilaele wa kwaikale ha ne si bizwa “mutanga,” ni Bakreste kaufela ba ba tozizwe fa lifasi ba bizwa “mutanga ya sepahala, ya na ni kutwisiso.” Lu li tohonolo luli ku amuhela “lico” ka mutang’a Mulimu yo!

Mwa Kona ku Ikola ku Ituta Bibele

14. Ki kabakalañi ku ituta Bibele ku fita ku i bala fela ha ku tahisa tabo?

¹⁴ Ha lu ituta litaba ze nca za mwa Mañolo, kana ha lu bangi ni tabo bakeñisa mo li tiiseza tumelo ya luna? Kona libaka ku ituta Bibele ku fita ku i bala fela ha ku kona ku tahisa tabo. Kacwalo, ha mu bala lihatiso za Sikreste, mu ipuzange kuli: ‘Taba ye i lumelelana cwañi ni litaba ze ni ziba ni kale? Ki litaba lifi ze ñwi za mwa Mañolo kamba litaluso ze ñwi ze kona ku ni tusa ku utwisisa hande taba ye bulezwi mwa hatiso ye?’ Haiba mu ka tokwa ku eza patisiso ye ñwi, mu ñole puzo ye mu bata ku to batisisa, kuli mu to i nyakisisa hasamulaho.

15. Ki lifi litaba ze mu kona ku ikola ku ituta, mi li kona ku mi tusa cwañi?

¹⁵ Ki lifi litaba ze mu kona ku ituta kuli mu utwisise hande litaba ze mu ziba ni kale? Lwa kona ku ekeza kwa kutwisiso ya luna ka ku ituta litaba ze cwale ka bulikani bo bu shutana-shutana bwa n’a itamile Mulimu ni batu kuli a ba tuse. Mwa kona ku tiisa tumelo ya mina ka ku ituta bupolofita bo bu supa kwa ku taha kwa Jesu Kreste kamba ka ku nyakisisa timana ni timana ya buka ye ñwi ya mwa Bibele ya bupolofita. Hape tumelo ya mina ya kona ku tiiswa haiba mu nyakisisa litaba za miteñi ye za Lipaki za Jehova, ka ku itusisa buka ya Jehovah’s Witnesses—Proclaimers of God’s Kingdom, haiba ya fumaneha mwa  puo ye mu kona ku bala. * Mi ku nyakisisanga “Lipuzo Ze Zwa kwa Babali” ze ñolwanga mwa Tora ya ku Libelela ku ka lu tusa ku utwisisa hande mañolo a mañwi a mwa Bibele. Mu lemuhange mabaka a ka Mañolo a’ itusiswanga ku alaba lipuzo. Ku eza cwalo ku ka mi tusa ku ba ni kutwisiso. (Maheberu 5:14) Ha mu nze mu ituta, mu ñolange lisupo mwa Bibele ya mina kamba fa pampili ilikuli ze mu ka ituta li mi tuse hahulu ni ku mi konisa ku tusa hande ba bañwi.

Mu Tuse Banana ku Ikola ku Ituta Bibele

16. Mu kona ku tusa cwañi bana ba mina ku ikola ku ituta Bibele?

¹⁶ Bashemi ba kona ku tusa bana ba bona ku tabela ku ituta lika za kwa moya. Mu si ke mwa nahana kuli banana ha ba koni ku utwisisa litaba ze tungile. Haiba mu taluseza bana ba mina ku eza lipatisiso za litaba ze ka to nyakisiswa kwa tuto ya Bibele ya lubasi, ka nako ya tuto mu ba buze ze ba itutile. Kwa tuto ya lubasi hape mwa kona ku tusa bana ba mina mwa ku alabela batu ba ba buza ka za tumelo ya bona ni mwa ku boniseza kuli litaba ze ba itutile ki za niti. Ku zwa fo mwa kona ku itusisa broshuwa ya “Bona Naha ye Nde” * kuli mu tuse bana ba mina ku ziba linaha ze bulezwi mwa Bibele ni ku ba tusa ku utwisisa hande litaba ze mu balile mwa Bibele.

17. Ki kabakalañi ha lu sa swaneli ku ituta fela litaba za mwa Bibele lu sa itukisezi mikopano?

¹⁷ Ku itutanga litaba za mwa Bibele kwa tabisa luli ni ku tiisa tumelo, kono lu swanela ku tokomela kuli ha ku lu palelwisi ku itukiseza mikopano ya puteho. Mikopano ki nzila ye ñwi yeo Jehova a lu luta ka yona ka “mutanga ya sepahala, ya na ni kutwisiso.” Kono ku eza lipatisiso ku kona ku lu tusa ku fanga likalabo ze nde kwa mikopano, ye cwale ka Tuto ya Buka ya Puteho kamba ka nako ya ze zwile mubano mwa Sikolo sa Bukombwa sa Teokratiki.

18. Ki kabakalañi buikatazo bwa ku ituta “ze tungile za Mulimu” ha bu si bwa mbango?

¹⁸ Tuto ye tungile ya Linzwi la Mulimu i kona ku mi tusa ku sutelela ku Jehova. Bibele ha i talusa butokwa bwa ku ituta, i li: “Mwa mukunda wa butali mutu wa silelezwa, sina mwa mukunda wa mali; kono bunde bwa zibo, kikuli butali bu babalela bupilo bwa ya na ni bona.” (Muekelesia 7:12) Kacwalo, buikatazo bwa mina bwa ku ituta kuli mu utwisise hahulu lika za kwa moya haki bwa mbango. Bibele i sepisa ba ba eza lipatisiso kuli ‘ba ka fumana ku ziba za Mulimu.’—Liproverbia 2:4, 5.

[Litaluso za kwatasi]

Kana Mwa Kona ku Talusa?

• “Ze tungile za Mulimu” ki litaba mañi?

• Ki kabakalañi ha lu sa swaneli ku tuhela ku ituta litaba ze tungile?

• Ki kabakalañi Bakreste kaufela ha ba kona ku utwisisa “ze tungile za Mulimu”?

• Mu kona ku tusiwa hahulu cwañi ka ku ituta litaba “ze tungile za Mulimu”?

[Lipuzo za Tuto]

[Siswaniso se si fa likepe 28]

Jesu n’a bile lili Peu ye ne sepisizwe?

[Siswaniso se si fa likepe 31]

Bashemi ba kona ku taluseza bana ba bona ku eza lipatisiso za litaba ze ka to nyakisiswa kwa tuto ya lubasi