Mu Be Ni Tulemeno To Tu Ka Mi Tusa Ku Eza Balutiwa

“Mu ye . . . mu lute macaba kaufela.”—MATEU 28:19.

1. Batanga ba Jehova ba ne ba pilile mwa linako za kwamulaho ne ba tokwa ku ba ni buikoneli ni tulemeno to tu cwañi?

BATANGA ba Jehova ba lukela ku banga ni zibo mane ni tulemeno to tu ka ba tusa ku eza tato ya hae. Ka mutala, bo Abrahama ni Sara ha ne ba laezwi ki Mulimu kuli ba zwe mwa muleneñi o fumile wa Ure, ne ba tokwa ku twaela ku ba ni tulemeno to ne tu ka ba tusa ku pila mwa litende. (Maheberu 11:8, 9, 15) Joshua ha n’a etelela Maisilaele mwa Naha ya Sepiso, n’a tokwa ku ba ni bundume, ku sepa Jehova, ni ku ziba Mulao wa hae. (Joshua 1:7-9) Mi nihaike kuli bo Bezaleele ni Oholiabi ne ba ziba za buyahi, moya wa Mulimu ne u ba matafalize kuli ba itusise buikoneli bwa bona kwa ku yaha tabernakele ni ku okamela misebezi ye ne ezwa kwateñi.—Exoda 31:1-11.

2. Ki lipuzo mañi ze ama musebezi wa ku luta batu ze lu ka nyakisisa?

² Lilimo-limo hasamulaho, Jesu Kreste n’a laezi balateleli ba hae kuli: “Mu ye . . . mu lute macaba kaufela, . . . mu ba lute ku mamela ze ni mi laezi kaufela.” (Mateu 28:19, 20) Lo ne li lona lwa pili batu ha ba fiwa musebezi o mutuna cwalo. Ki tulemeno mañi to lu tokwa ku ba ni tona kuli lu pete musebezi wa ku luta batu? Lu kona ku ba cwañi ni tulemeno to tu cwalo?

Mu Be ni Lilato Le Lituna ku Mulimu

3. Ki kolo mañi ye lu ba ni yona ha lu nze lu luta ba bañwi?

³ Kuli lu kone ku atumela batu ni ku zwelapili ku ba susueza ku lapela Mulimu wa niti, lu tokwa ku ba ni lilato le lituna ku Jehova. Maisilaele ne ba kona ku bonisa kuli ne ba lata Mulimu ka ku mamela litaelo za hae ka pilu ya bona kaufela, ku fa matabelo a swanela, ni ka ku mu lumba ka lipina. (Deuteronoma 10:12, 13; 30:19, 20; Samu 21:13; 96:1, 2; 138:5) Ni luna ka ku ba baluti lu swanela ku mamela litaelo za Mulimu, kono hape lu bonisa kuli lwa lata Jehova ha lu taluseza ba bañwi za milelo ya hae. Lu tokwa ku bulela ka ku kolwisa, ku keta hande manzwi e lu bulela ka za sepo ye lu filwe ki Mulimu.—1 Matesalonika 1:5; 1 Pitrosi 3:15.

4. Ki kabakalañi Jesu ha n’a tabela ku luta batu ka za Jehova?

⁴ Jesu n’a lata Jehova luli, kona libaka  ha n’a tabela hahulu ku luta ba bañwi ka za mulelo wa Mulimu, za Mubuso, ni za bulapeli bwa niti. (Luka 8:1; Joani 4:23, 24, 31) Mane n’a ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” (Joani 4:34) Walisamu n’a ama ku Jesu, ha n’a ñozi kuli: “Se ni tabela, ki ku eza tato ya hao, Mulimu wa ka; e, mulao wa hao u mwa pilu ya ka. Ni talusize niti ya hao mwa Kopano ye tuna, bona, ha ni na ku muma mulomo wa ka, [Muñ’a] Bupilo, wa ziba.”—Samu 40:8, 9; Maheberu 10:7-10.

5, 6. Ki kafi kalemeno ka butokwa hahulu ke ba swanela ku ba ni kona baluti?

⁵ Kabakala ku lata Mulimu, ba banca ba ba sa zo ituta niti ya Bibele fokuñwi ba bulelanga ka za Jehova ni Mubuso wa hae ka ku kolwisa luli kuli mane ba fitanga fa ku susueza ba bañwi kuli ni bona ba itute Bibele. (Joani 1:41) Ku lata Mulimu kona kalemeno ka butokwa hahulu ka ka lu susueza ku luta ba bañwi. Kacwalo haike lu zwelepili ku tiisa lilato le li cwalo ka ku balanga ni ku yeya Linzwi la Mulimu kamita.—1 Timotea 4:6, 15; Sinulo 2:4.

⁶ Kaniti luli ku lata Jehova ne ku tusize Jesu Kreste kuli a tukufalelwe ku luta ba bañwi. Kono hape ku na ni kalemeno ka kañwi ka ne ka mu tusize ku tukufalelwa ku shaela za Mubuso. Kacwalo ki kafi kalemeno ka kañwi ka ne ka tusize Jesu ku ba muluti yo munde?

Mu Iyakatwe Batu

7, 8. Jesu n’a nga cwañi batu?

⁷ Jesu n’a iyakatwanga batu mi n’a ba iseza hahulu pilu. Mane niha n’a li kwa lihalimu a nz’a ‘sebeleza’ Mulimu, n’a tabela hahulu batu. (Liproverbia 8:30, 31) Ha n’a til’o pila sina mutu fa lifasi, Jesu n’a utwela batu butuku, mi n’a imulula ba ne ba taha ku yena. (Mateu 11:28-30) Jesu n’a likanyisize lilato ni mukekecima wa Jehova, mi kona libaka ha n’a hohezi batu kwa bulapeli bwa Mulimu a nosi wa niti. Batu ba ba shutana-shutana ne ba teelelize ku Jesu bakeñisa kuli n’a iyakatwa bona mi n’a ba utwela butuku.—Luka 7:36-50; 18:15-17; 19:1-10.

⁸ Munna yo muñwi ha n’a buzize Jesu za n’a swanela ku eza kuli a luwe bupilo bo bu sa feli, “Jesu h’a mu shalimile a mu lata.” (Mareka 10:17-21) Ka za batu ba bañwi ba ne ba lutilwe ki Jesu kwa Betania, lu bala kuli: “Jesu n’a lata Mareta, ni munyan’a hae, ni Lazaro.” (Joani 11:1, 5) Jesu n’a iyakatwa hahulu batu kuli mane nako ye ñwi n’a palezwi nihaiba ku pumula bakeñisa ku bata ku ba luta. (Mareka 6:30-34) Ku iyakatwa hahulu batu ba bañwi cwalo ne ku tahisize kuli Jesu a be muluti yo munde ka ku fitisisa, ya n’a hohela batu kwa bulapeli bwa niti.

9. Paulusi n’a nga cwañi batu ba n’a luta?

⁹ Muapositola Paulusi ni yena n’a iyakatwanga hahulu batu ba n’a kutaza ku bona. Ka mutala, n’a taluselize batu ba ne ba bile Bakreste kwa Tesalonika kuli: “Mwa ku mi shemuba, ne lu lakaza ku mi fa, isi Evangeli ya Mulimu fela, kono ni bona bupilo bwa luna; kakuli ki mina balatiwa ba luna luli.” Mi bakeñisa kuli Paulusi n’a iyakatwa bona, ba bañwi mwa Tesalonika ba ‘tuhela milimu ya maswaniso, kuli ba sebeleze Mulimu-Ya-Pila.’ (1 Matesalonika 1:9; 2:8) Ni luna haiba lu bonisa kuli lwa iyakwa batu luli sina Jesu ni Paulusi, lwa kona ku ba ni tabo ya ku bona taba ye nde ha i fita kwa lipilu za batu ba ba “ketezwi bupilo bo bu sa feli.”—Likezo 13:48.

Mu Be ni Moya wa Buitomboli

10, 11. Ki kabakalañi ha lu tokwa ku ba ni moya wa buitomboli mwa musebezi wa ku luta?

¹⁰ Baluti ba bande ba na ni moya wa buitomboli. Ha ba ngi sifumu kuli kona nto ya butokwa hahulu mwa bupilo. Esi mane Jesu n’a taluselize balutiwa ba hae kuli: “Ba ba luwile, ku tata cwañi kuli ba kene mwa mubuso wa Mulimu!” Balutiwa ba hae ne ba komokile hahulu ha ba utwa cwalo, kono Jesu a ekeza ku bulela kuli: “Bana ba ka, ku tata cwañi kuli ba ba sepile bufumu, ba kene mwa mubuso  wa Mulimu. Se si bunolo kikuli kamele i kene mwa lisuba la ndonga, isi kuli muluwi a kene mwa mubuso wa Mulimu!” (Mareka 10:23-25) Jesu n’a susuelize balateleli ba hae kuli ba pile bupilo bo bu bunolo ilikuli ba ise hahulu mamelelo kwa musebezi wa ku luta. (Mateu 6:22-24, 33) Moya wa buitomboli u kona ku lu tusa cwañi mwa musebezi wa ku luta batu?

¹¹ Ku luta batu ku mamela kaufela za laezi Jesu ki musebezi o mutuna. Muluti hañata u batanga ku zamaisa tuto ya Bibele sunda ni sunda. Bahasanyi ba Mubuso ba bañwi ba batile mubeleko o ba tokwa ku beleka fela ka lihora li sikai ka zazi ilikuli ba tande nako ye ñata mwa musebezi wa ku luta batu ba ba tabela. Mi Bakreste ba bañata ba itutile puo isili ilikuli ba kutaze kwa batu ba ba bulela lipuo li sili mwa silalanda sa bona. Bakreste ba bañwi bona ba tutezi kwa sibaka si sili kamba mane kwa naha ye ñwi ilikuli ba abane ka ku tala mwa musebezi wa kutulo. (Mateu 9:37, 38) Ku eza licinceho zeo kaufela ku tokwa moya wa buitomboli. Kono haki moya wa buitomboli fela o lu konisa ku ba baluti ba bande.

Mu Be ni Pilu-telele mi Mu Si Sinyi Nako

12, 13. Ki kabakalañi ha lu tokwa hahulu ku ba ni pilu-telele ha lu luta batu?

¹² Hape lu tokwa ku ba ni pilu-telele kuli lu pete hande musebezi wa ku luta. Nihaike kuli lu tokwa ku fitisa lushango lwa luna ka kapili-pili, ku luta ba bañwi ki musebezi o tokwa nako ni pilu-telele. (1 Makorinte 7:29) Jesu n’a bonisize pilu-telele ku Jakobo munyan’a hae. Nihaike kuli mwendi Jakobo n’a ziba za musebezi wa Jesu wa ku kutaza, n’a si ka ba mulutiwa honaf’o fela. (Joani 7:5) Kono ku bonahala kuli Jakobo n’a tilo ba mulutiwa nakonyana hamulaho, mwahal’a lifu la Kreste ni Pentekonta ya 33 C.E., kakuli Mañolo a bonisa kuli yena, bomahe, banyani ba hae, ni baapositola ne ba tiiselize ku lapela hamoho. (Likezo 1:13, 14) Jakobo n’a ezize zwelopili ye tuna kwa moya, mi hasamulaho n’a til’o ba ni buikalabelo bo butuna mwa puteho ya Sikreste.—Likezo 15:13; 1 Makorinte 15:7.

¹³ Bakreste ba swana sina balimi kakuli ni bona ba kalanga ku eza lika hanyinyani-hanyinyani, inge cwalo ku utwisisa Linzwi la Mulimu, ku lata Jehova, ni ku ba ni mubonelo wa Kreste. Ku eza cwalo ku tokwa pilu-telele. Jakobo n’a ñozi kuli: “Banabahesu, lu itiise, lu talimele Mulena mane a fite. A mu bone, mulimi h’a libelela lukau lwa butokwa lwa lifasi, wa itiisa, mane a tambule pula ya maseulo ni ya matabula. Ni mina mu libelele; mi mu itiise mwa lipilu za mina; kakuli ku taha kwa Mulena ku se ku li fakaufi.” (Jakobo 5:7, 8) Jakobo n’a susueza balumeli ba bañwi kuli ba itiise kamba ku ba ni pilu-telele ku fitela Mulena a fita. Balutiwa ha ne ba palelwanga ku utwisisa litaba ze ñwi, Jesu n’a banga ni pilu-telele ha talusa lika mi n’a itusisanga liswanisezo. (Mateu 13:10-23; Luka 19:11; 21:7; Likezo 1:6-8) Kono kacenu Mulena u fitile, mi ni luna lu swanela ku ba ni pilu-telele ha lu luta batu. Lu tokwa ku ba ni pilu-telele ha lu luta batu kuli ba fite fa ku ba balateleli ba Jesu.—Joani 14:9.

14. Nihaike kuli lu swanela ku ba ni pilu-telele, lu kona ku itusisa cwañi hande nako ya luna ka ku ba baluti?

 ¹⁴ Nihaike kuli lu na ni pilu-telele, haki batu kaufela be lu kalanga ku ituta ni bona Bibele ba ba amuhelanga linzwi. (Mateu 13:18-23) Kacwalo hamulaho wa ku lika ku ba tusa ka mo lu konela kaufela, ha lu swaneli ku sinya nako hape ku ituta ni batu ba ba cwalo, kono lu ka bata batu ba ba itebuha niti ya Bibele. (Muekelesia 3:1, 6) Ki niti kuli lu ka tokwa ku zwelapili ku tusa batu ba ba tabela niti kuli ba fite fa ku cinca mubonelo wa bona, mikwa ya bona, ni lika ze ba nga ku ba za butokwa mwa bupilo. Kacwalo lu ka tokwa ku ba ni pilu-telele, sina Jesu mwa na ezelize kwa balutiwa ba hae ba ne ba fumana t’ata ku cinca mubonelo wa bona.—Mareka 9:33-37; 10:35-45.

Mu Be ni Buikoneli bwa Ku Luta

15, 16. Ki kabakalañi ku luta ka bunolo ni ku itukiseza hande ha ku li kwa butokwa ha lu luta batu?

¹⁵ Kuli lu kondise mwa musebezi wa ku luta, lu swanela ku lata Mulimu, ku iyakatwa batu, ku ba ni moya wa buitomboli, ni ku ba ni pilu-telele. Kono hape lu tokwa ku ba ni buikoneli bwa ku luta, kakuli bu ka lu tusa ku talusa litaba ka mukwa o utwahala hande ni o bunolo. Ka mutala, lituto ze ñata za n’a lutile Muluti Yo Mutuna, Jesu Kreste ne li ze utwahala bakeñisa kuli ne li ze bunolo. Mwendi mwa kona ku hupula litaba ze ñwi za n’a bulezi Jesu ze cwale ka ze: “Mu ikubukanyeze bufumu kwa lihalimu.” “Mu si ke mwa fa linja linto ze kenile.” “Butali bu ipakezwi ki bana ba bona.” “Mu kutiseze Sesare ze li za Sesare; mi mu kutiseze Mulimu ze li za Mulimu.” (Mateu 6:20; 7:6; 11:19; 22:21) Kono Jesu n’a sa bulelangi fela litaba ze kuswani. N’a lutanga litaba ze utwahala mi n’a talusanga fa n’a bona swanelo ya ku eza cwalo. Mu kona ku likanyisa cwañi Jesu ha mu luta?

¹⁶ Kuli mu kone ku luta ka bunolo ni ka mukwa o utwahala, mu tokwa ku itukisezanga. Muhasanyi ya si ka itukiseza u mbombolanga hahulu. U kona ku palelwisa batu ku ziba lisupo ze tuna bakeñisa ku bulela hahulu litaba kaufela za ziba fa taba ye ambolwa. Kono muhasanyi ya itukiselize hande yena u nahananga za mutu y’a luta, u yeyanga taba ye ambolwa, mi u talusanga fela litaba ze tokwahala. (Liproverbia 15:28; 1 Makorinte 2:1, 2) U nyakisisanga litaba za ziba kale muituti ni lisupo ze swanela ku koñomekwa mwa tuto. Muhasanyi yo wa kona ku ziba lisupo ze ñata ze tabisa fa taba ye ambolwa, kono zeo kaufela wa li kapula ilikuli a kone ku luta ka mukwa o utwahala hande.

17. Lu kona ku tusa cwañi batu kuli ba utwisise Mañolo?

¹⁷ Jesu hape n’a tusanga batu ku nahana ku fita ku ba fa fela likalabo. Ka mutala, muta o muñwi n’a buzize kuli: “M’o hupulela ki cwañi Simoni? Malen’a lifasi ba telisa mi ba bata ñamba ku mañi, kana ki kwa bana ba bona, kamba ku ba mushobo u sili?” (Mateu 17:25) Fokuñwi lu kana lwa tabela hahulu ku talusa litaba za Bibele kuli mane lu tokwa ku iswala ilikuli lu fe kolo muituti nako ya ku talusa maikuto a hae kamba kuli a taluse taba ye bulelwa ha lu ituta ni yena Bibele. Ha lu swaneli ku lengaka batu lipuzo ze ñata. Kono lwa kona ku itusisa maseme, liswanisezo ze nde, ni lipuzo ze susueza baituti ku utwisisa litaba za mwa  Mañolo ze talusizwe mwa lihatiso za luna za Bibele.

18. Ku ba ni buikoneli bwa ‘ku luta’ ku talusañi?

¹⁸ Mañolo a lu susueza ku “talusa” kamba ku ba ni buikoneli bwa ‘ku luta.’ (2 Timotea 4:2; Tite 1:9) Buikoneli bo bu cwalo ha bu talusi fela ku tusa mutu ku peta litaba. Lu swanela ku lika ku tusa mutu ya ituta Bibele kuli a utwisise shutano ye mwahal’a niti ni buhata, ze nde ni ze maswe, butali ni butoto. (Mateu 6:5, 6) Ha lu nze lu eza cwalo ni ku tusa mutu ku lata Jehova ku zwelela kwa pilu, wa kona ku utwisisa libaka ha swanela ku utwa Mulimu.

Mu Abane ka Tukufalelo mwa Musebezi wa ku Luta

19. Bakreste kaufela ba tusa cwañi mwa musebezi wa ku luta?

¹⁹ Puteho ya Sikreste i zibahala ka musebezi wa ku eza balutiwa. Mutu yo munca ha ba mulutiwa, Paki ya Jehova ya n’a mu tusize ku ziba ze i luta Bibele haki yena fela ya ba ni tabo. Ka mutala, haiba sikwata sa batu ba kena musebezi wa ku bata mwanana ya latehile, mwendi ki mutu a li muñwi fela ya ka mu fumana. Kono mwanana yo ha fumanwa ni ku kutiswa kwa bashemi ba hae, batu kaufela ba ne ba bata mwanana yo ba taba. (Luka 15:6, 7) Ka ku swana, musebezi wa ku luta ba bañwi ki musebezi wa puteho kaufela. Bakreste kaufela ba sweli musebezi wa ku bata batu ba ba kona ku ba balutiwa ba Jesu. Mi yo munca ha kalisa ku fumaneha kwa mikopano kwa Ndu ya Mubuso, Mukreste kaufela ya li teñi zazi leo wa kona ku tusa mutu yo kuli a itebuhe bulapeli bwa niti. (1 Makorinte 14:24, 25) Kacwalo Bakreste kaufela ba taba ha ba bona kuli batu ba bañata-ñata ba sweli ba ba balutiwa silimo ni silimo.

20. Ki lifi ze mu swanela ku eza haiba mu bata ku luta ba bañwi niti ya Bibele?

²⁰ Bakreste ba bañata ba tabela ku luta mutu yo muñwi ka za Jehova ni bulapeli bwa niti. Kono fokuñwi ni ko ba likile ka t’ata, ha ba si ka kona ku eza cwalo. Haiba ni mina mu ikutwa cwalo, mu zwelepili ku ba ni lilato le lituna ku Jehova, ku iyakatwa batu, ku ba ni moya wa buitomboli, ni pilu-telele, mi mu zwelepili ku ba ni buikoneli bwa ku luta. Mi sa butokwa ni ku fita, mu lapele ku Mulimu ka za takazo ya mina ya ku bata ku luta ba bañwi niti. (Muekelesia 11:1) Mu zibe kuli ze mu peta kaufela ha mu nze mu sebeleza Jehova za tusa mwa musebezi wa ku luta ili o tisa tumbo ku Mulimu.

Kana Mwa Kona ku Talusa?

• Lu kona ku bonisa cwañi kuli lwa lata Mulimu mwa musebezi wa ku luta?

• Baluti ba tokwa ku ba ni tulemeno mañi?

• Ku ba ni buikoneli bwa ‘ku luta’ ku talusañi?

[Lipuzo za Tuto]

[Siswaniso se si fa likepe 21]

Ka ku eza balutiwa, Bakreste ba bonisa kuli ba na ni lilato le lituna ku Mulimu

[Siswaniso se si fa likepe 23]

Ki kabakalañi baluti ha ba swanela ku iyakatwa ba bañwi?

[Siswaniso se si fa likepe 24]

Baluti ba tokwa ku ba ni tulemeno mañi?

[Siswaniso se si fa likepe 25]

Bakreste kaufela ba tabanga ha ba bona ze nde ze zwa mwa musebezi wa ku luta