“Shangwe Mu Amuhele Nubunyana Ya Ka Yeo”

MANZWI a na ñozwi mwa liñolo le ne li amuhezwi ki ofisi ya mutai wa Lipaki za Jehova kwa Russia. Liñolo leo ne li lumezwi hamoho ni mbokisi ye tuna mo ne ku tezi masokisi.

Mpo yeo ne i zwa ku bo Alla ba lilimo ze 67, ili Lipaki za Jehova ba ba swalisana ni puteho ye kwa Upa wa Russia. Bo Alla se ba sebelelize Jehova ka lilimo ze fitelela 10, inze ba kutaza taba ye nde ya Mubuso ka tukufalelo. Kono ka sipundumukela ba swalwa ki butuku bo bu omelelisa lilama za mubili (stroke), mi lilama za mubili wa bona ze ñwi za tuhela ku belaka hande. Kono ka lilato la bona, bo Alla ba ezize sina musali wa Sikreste wa mwa miteñi ya baapositola wa libizo la Dorkasi, ya na lukezi Bakreste ba bañwi liapalo.—Likezo 9:36, 39.

Bo Alla ne ba ñozi cwana mwa liñolo la bona: “Ha ni koni ku shenyisa mahutu a ka, kono ni sa kona ku itusisa mazoho. Kacwalo ni kutazanga ka ku ñola mañolo.” Ne ba zwezipili ku talusa kuli: “Kiha ni boni kuli honafa mazoho a ka ha sa beleka ni kinite masokisi a silami. Ne ni ka tabela kuli masokisi ao a fiwe mizwale ni likaizeli ba ba ka yo yaha Mandu a Mubuso mwa libaka ze bata hahulu, inge cwalo kwa Upa wa Russia ni Siberia.”

Ka ku talusa mo ne ba ka bela balateleli ba hae ba niti, Jesu na ize: “Se ba ka ziba batu kaufela kuli mu balutiwa ba ka ka sona, ki ha mu latana.” (Joani 13:35) Lilato le li swana sina le ba bonisize bo Alla li zibahaza balutiwa ba Jesu ba niti.