Kana Jesu N’a Na Ni Bibele?

BATILI, Jesu n’a si na Bibele. Kabakalañi? Kakuli Bibele ye kwanile ye lu na ni yona kacenu ne i siyo mwa linako za Jesu. Nihakulicwalo, mwa masinagoge ne ku banga ni miputo ye na ni litaba ze se li kalulo ya Bibele kacenu sina mo lu i zibela. Jesu ha na li mwa sinagoge ya kwa Nazareta, na balile mwa muputo wa Isaya. (Luka 4:16, 17) Muapositola Paulusi ha n’a li mwa Antioke wa mwa Pisidia, na utwile ha ku “balwa mwa Mulao ni Bapolofita.” (Likezo 13:14, 15) Mi mulutiwa Jakobo na bulezi kuli litaba za Mushe ne li “balwa mwa masinagoge ka la Pumulo le liñwi ni le liñwi.”—Likezo 15:21.

Kana mutu ni mutu mwa miteñi ya baapositola n’a na ni miputo ya Mañolo a Kenile? Ku bonahala kuli munna wa Muetopia ya na li sikombwa se situna sa Kandasi, mulena wa Etopia wa musali, n’a na ni miputo ya Mañolo a Kenile kakuli na “inzi mwa koloi ya hae, inz’a bala mwa buka ya mupolofita Isaya” ka nako ya na katanwi ki mulutiwa Filipi mwa nzila ye ya kwa Gaza. (Likezo 8:26-30) Muapositola Paulusi na kupile Timotea kuli a mu tiseze “libuka, sihulu matalo a’ ñozwi.” (2 Timotea 4:13) Nihaike kuli Paulusi na si ka bulela mufuta wa libuka za na tokwa, ku bonahala kuli libuka zeo ne li miputo ya Mañolo a Siheberu.

Alan Millard caziba wa lipuo za Sijuda, u li ku bonahala kuli ba ne ba kona ku ba ni miputo ya Mañolo ne li “batu ba ne ba tumile ba mwa Palestine, batu ba ne ba ipapata kuli ne ba itutile hahulu, ni Bafalisi ba bañwi ni baluti ba ba cwale ka Nekudema.” Le liñwi la mabaka a na tisa cwalo ne li la kuli miputo yeo ne i tula hahulu. Millard u akaleza kuli “muputo fela wa Isaya ne u lekiwa ka mali a eza ma-sixpence a silezi ku isa ku a lishumi” mi u li Bibele ya Siheberu ye kwanile “ne i kona ku ba ni miputo ye 15 ku isa ku ye 20,” mi kacwalo ne i kona ku lekiwa ka mali a n’a hola mutu mwa likweli ze silezi.

Bibele ha i bonisi kuli Jesu kamba balateleli ba hae ne ba na ni likopi za bona za miputo ya Bibele. Kono ha lu koni ku kakanya kuli Jesu n’a ziba hande Mañolo, kakuli n’a amanga ku ona mi n’a kona ku punda Mañolo ku zwelela fela mwa toho. (Mateu 4:4, 7, 10;19:4, 5) Kana taba ye ha i lu susuezi kuli lu tekelele hande Bibele, ha u bona kacenu ha i tuli mi ya fumaneha ka bunolo?