Kana Lifasi La Kona Ku Swalisana?

KANA mwa lifasi ku tuha ku ba ni kozo kamba ku tuha ku ba ni kozi? Ku bonahala kuli lwa kona ku bulela kuli kaufela zona li tuha li ezahala.

Babusi ba bañwi ba lifasi ba bulelanga kuli kwa konahala ku ba ni kozo mwa lifasi, mi mwendi ze ba bulelisanga cwalo ki ku bata kuli batu ba si ke ba ikalelwa hahulu za kwapili. Niteñi, batu ba bañata ba sabiswa ki lipuzo ze cwale ka ze: Ki linaha lifi ze na ni lilwaniso ze kona ku bulaya batu ba bañata-ñata? Kana li ka itusisa lilwaniso zeo? Ki sika mañi se si ka ezahala haiba li itusisa zona?

Litaba ze ezahezi li bonisa kuli mifilifili ni saluluti li bile zona matata a matuna a palelwisa batu ku utwana, mi hañata bulapeli ki bona bo bu ekelize kwa matata ao ku fita ku a felisa. Mubihi wa makande ya bizwa James A. Haught na ñozi kuli: “Nto kaufela ye kauhanya batu i tisanga toyano, mi bulapeli ki bo buñwi bwa lika ze kauhanya hahulu batu. Ku si na taba kuli batu kai ni kai ba lumela kuli bulapeli bu cincanga batu kuli ba be ba ‘bande,’ kwa iponahaza hande kuli bu kukueza batu ku eza lika ze maswe hahulu.” Muñoli ya bizwa Steven Weinberg ni yena u na ni mubonelo o swana. N’a ñozi kuli: “Bulapeli bu tisanga kuli batu ba bande ba eze likezo ze maswe.”

Kana ku na ni sepo ya kuli muta o muñwi lifasi li ka swalisana hamoho? Eni! Kono sina mo lu ka bonela, se si ka swalisanisa lifasi haki batu kamba bulapeli bo bu tomilwe ki batu.

[Manzwi a fa likepe 3]

Kana lifasi li swana sina ndalamiti ye tuha i tunya?