Ha Ku Na Silwaniso Se Si Ezezwa Mina Se Si Ka Konda

“Ha ku na silwaniso se si ezezwa wena se si ka konda.”—ISAYA 54:17.

1, 2. Ze ne ezahezi kwa Lipaki za Jehova kwa Albania li bonisa cwañi buniti bwa sepiso ye kwa Isaya 54:17?

LILIMO-LIMO kwamulaho, ne ku na ni sikwata sa Bakreste ba ba bundume ba ne ba pila mwa naha ye ñwi ya malundu, ye kwa mboela-upa wa Yurope. Mulonga wa Komyunizimu o n’o lwanisa tumelo ya bona ne u likile ka mo ne u konela kaufela kuli u ba timise. Kono ne ba si ka timiswa niha ne ba nyandisizwe, ku beiwa mwa minganda ya tukufazo, ni ku tamiwa litaba za buhata. Batu bao ne li bomañi? Ne li Lipaki za Jehova ba kwa Albania. Nihaike kuli ne ku ba belanga t’ata ku kutaza ni ku kopana hamoho, tundamo ye ne ba bonisize ka lilimo-limo i bubekisize ni ku tumisa Bukreste, mi i tisize tumbo kwa libizo la Jehova. Ñohola ha ne ku kakulwa ofisi ya mutai ye nca mwa naha ya Albania, muzwale yo muñwi ya sa bile Paki ka nako ye telele n’a ize: “Satani ni kwa ka lika a mane, u ka zwelapili ku luza, kono haili Jehova yena u ka zwelapili ku wina!”

² Litaba ze kaufela li bonisa buniti bwa sepiso ya n’a file Mulimu kwa batu ba hae, ye ñozwi kwa Isaya 54:17, ye li: “Ha ku na silwaniso se si ezezwa wena se si ka konda; mi wa lilimi kaufela le li ka ku zekisa, u ka mu beya mulatu.” Litaba ze ezahezi li bonisize kuli lifasi la Satani ni kamuta ha li na ku kona ku palelwisa batanga ba Jehova ba ba ineezi ku mu sebeleza.

Milelo ya Satani Ha I Kondi

3, 4. (a) Ki lifi lilwaniso ze ñwi za sa itusisize Satani? (b) Lilwaniso za Diabulosi li bonahezi cwañi kuli ha li kondi?

³ Lilwaniso ze se ezelizwe balapeli ba niti li kopanyeleza ku kwalela musebezi wa bona, ku natakiwa, ku lengiwa mwa litolongo, ni ku ‘leliwa ka lunya ki ba mulao.’ (Samu 94:20) Mane mwa linaha ze ñwi, nihaiba honafa Lipaki za Jehova ha ba sweli ku ituta Tora ye, tumelo ya bona Bakreste ba ku Mulimu i sweli ya likiwa.—Sinulo 2:10.

⁴ Ka mutala, ofisi ya mutai o muñwi wa  Lipaki za Jehova ne i bihile kuli mwa silimo si li siñwi fela, ne ku bile ni linako ze 32 batanga ba Mulimu inge ba holofazwanga ka nako ye ne ba abana mwa bukombwa. Mi hape ne ku bile ni linako ze ñwi ze 59 ili zeo Lipaki, ba bahulu ni banana, banna ni basali, ne ba tamilwe ki mapokola kabakala ku kutaza. Ba bañwi ne ba ngilwe maswaniso ni ku tamiwa sina likebenga. Ba bañwi bona ne ba bembilwe kuli ne ba ka holofazwa. Mwa naha ye ñwi, se ku bile ni litaba ze 1,100 za ku tamiwa, ku lengiwa mulatu, kamba ku natiwa kwa Lipaki za Jehova. Mwa litaba zeo kaufela, ze fitelela 200 ku zona ne li ezahezi ka nako ye ne ba bile ni kupuzo ya lifu la Jesu. Niteñi, moya wa Jehova u pilisize batu ba hae ku si na taba ni matata e ba ipumani ku ona mwa linaha ze, mane cwalo ni ze ñwi. (Zakaria 4:6) Twaniso ya lila ha i na ku palelwisa batu ku lumbeka Jehova. Kaniti lu na ni sepo ye tiile ya kuli ha ku na silwaniso se si kona ku palelwisa mulelo wa Mulimu.

Malimi A Buhata A Fiwa Mulatu

5. Ki litaba mañi za buhata ze ne ba tamilwe batanga ba Jehova mwa miteñi ya baapositola?

⁵ Isaya n’a polofitile kuli batu ba Mulimu ne ba ka beya mulatu lilimi kaufela le ne li ka ba zekisa. Mwa miteñi ya baapositola, hañata Bakreste ki bona ba ne ba tamiwanga litaba za buhata, mi ne ba ngiwa sina batu ba ba maswe. Manzwi a kwa Likezo 16:20, 21 a bonisa litamelezo ze cwalo: “Batu bao ba filikanya munzi wa luna; . . . ba luta mikwa ye lu sa lukeli ku i amuhela, kamba ku ya ka yona, luna Maroma.” Muta o muñwi bahanyezi ne ba likile ku shonga babusisi ba munzi kuli ba lwanise balateleli ba Kreste ka ku ba tameleza kuli: ‘Batu bao ba filikanyize naha kaufela, ba tile ni kwanu; kaufel’a bona ba lwanisa milao ya Sesare.’ (Likezo 17:6, 7) Muapositola Paulusi n’a bizizwe kuli ki “mususuwezi” ni toho ya tuto ye keluhile ye tisa lipetuhelo “mwa manaha kamukana.”—Likezo 24:2-5.

6, 7. Ki ifi nzila ye ñwi yeo Bakreste ba niti ba bonisa ka yona kuli litaba ze ba tamiwa ki za buhata?

⁶ Kacwalo kacenu le ha lu komoki ha lu bona kuli Bakreste ba niti ba tamiwa litaba za buhata ka mulelo wa ku sinya libizo la bona. Kono lu fa cwañi mulatu malimi a bulela buhata?—Isaya 54:17.

⁷ Hañata muzamao o munde wa Lipaki za Jehova u bonisanga kuli litamilikezo ze cwalo ki za buhata. (1 Pitrosi 2:12) Bakreste ha ba bonisa kuli ki batu ba ba mamela milao ni ba mizamao ye minde ba ba iyakatwa batu ba bañwi, litaba ze ba hapelezwanga li fitanga fa ku bonahala ku ba za buhata. Muzamao wa luna o munde u bonisa kuli lu batu ba ba lukile. Mi batu ha ba nze ba lemuha misebezi ya luna ye minde, hañata ba susuezwanga ku lumbeka Ndat’a luna ya kwa lihalimu, mi ba itebuhanga hahulu mupilelo wa batanga ba hae.—Isaya 60:14; Mateu 5:14-16.

8. (a) Ki lifi ze lu tokwa ku eza fokuñwi kuli lu yemele tumelo ya luna ye tomile fa Bibele? (b) Ka ku likanyisa Jesu, lu kona ku eza cwañi batu ba ba lu tama litaba za buhata?

⁸ Kwand’a ku ba fela ni muzamao o munde ka ku ba Bakreste, fokuñwi lu tokwa ku yemela ka bundume tumelo ya luna ye tomile fa Bibele. Nzila ye ñwi ye lu kona ku eza cwalo ki ku ipeleza ku ba milonga ni ba likuta kuli ba lu sileleze. (Estere 8:3; Likezo 22:25-29; 25:10-12) Jesu ha n’a li fa lifasi, fokuñwi n’a halifelanga balwanisi ba hae, ni ku hanyeza litamilikezo za bona za buhata. (Mateu 12:34-37; 15:1-11) Ka ku likanyisa Jesu, lu swanela ku taluseza ba bañwi ka ku utwahala litaba ze lu lumela. (1 Pitrosi 3:15) Lu si ke lwa tuhelela banyefuli, ibe kwa sikolo, kwa musebezi, kamba bahabo luna ba ba sa lapeli kuli ba lu palelwise ku zibahaza niti ya Linzwi la Mulimu.—2 Pitrosi 3:3, 4.

Jerusalema Ki “Licwe Le Li Bukiti”

9. Ki Jerusalema ufi ya yemelwa ki “licwe le li bukiti” le li bulezwi kwa Zakaria 12:3, mi ki bomañi ba ba yemela licwe leo fa lifasi?

⁹ Bupolofita bwa Zakaria bu lu fa libaka macaba  ha lwanisa Bakreste ba niti. Zakaria 12:3 i li: “Mwa lizazi leo, ni ka eza kuli Jerusalema ibe licwe le li bukiti kwa macaba kaufela.” Jerusalema ya taluswa mwa bupolofita bo ki ufi? Jerusalema ya talusizwe mwa bupolofita bwa Zakaria ki “Jerusalema wa lihalimu,” ona Mubuso wa kwa lihalimu ko ba bizelizwe Bakreste ba ba tozizwe. (Maheberu 12:22) Bomasiyaleti ba sikai ba ba ka yo ca sanda sa Mubuso wa Mesiya ba sa li teñi fa lifasi. Bona hamohocwalo ni balikani ba bona ba “lingu ze ñwi” ba sweli musebezi wa ku mema batu kuli ba sepe Mubuso wa Mulimu nako i si ka fela kale. (Joani 10:16; Sinulo 11:15) Bamacaba ba amuhezi cwañi pizo ye? Mi ki tuso ye cwañi ya fa Jehova kwa balapeli ba niti kacenu? Lu ka fumana likalabo kwa lipuzo ze ha lu nze lu zwelapili ku nyakisisa Zakaria kauhanyo 12. Mi ha lu nze lu nyakisisa bupolofita bo, lu ka lemuha kuli “ha ku na silwaniso” se si ezezwa ba ba tozizwe ba Mulimu ni balikani ba bona ba ba ineezi “se si ka konda.”

10. (a) Ki kabakalañi batu ba Mulimu ha ba nyandiswa? (b) Ku ezaheziñi kwa batu ba ba likile ku zwisa “licwe le li bukiti” mwa nzila?

¹⁰ Zakaria 12:3 i bonisa kuli batu ba ba nanula licwe leo ba ka “holofala.” Ku taha cwañi? Mulimu u laezi kuli taba ye nde ya Mubuso i kutaziwe. Lipaki za Jehova ba nga taba ya ku kutaza ku ba musebezi o mutuna. Kono ku shaela Mubuso kuli ki ona fela o kona ku fa batu sepo ku bile sina “licwe le li bukiti” kwa macaba. Ba lika ku li nanula, ku li zwisa mwa nzila ka ku palelwisa bakutazi ba taba ya Mubuso. Kono ka ku eza cwalo, macaba ao a’ sweli ku lwanisa taba ya Mubuso a “holofala,” ni ku pazauha maswe. Mane nihaiba lona libubo la bona li fitile fa ku sinyeha ha ba nze ba kokobezwa cwalo. Ha ba koni ku kuzisa balapeli ba niti, ba ba nga ka butuna tohonolo ya ku shaela “evangeli ya linako ze sa feli” ya Mubuso wa Mulimu o ka busiwa ki Mesiya, mi ba eza cwalo pili mafelelezo a lifasi le a si ka fita kale. (Sinulo 14:6) Mulibeleli wa tolongo mwa naha ye ñwi ya Africa n’a bulezi cwana ha n’a boni batanga ba Jehova mo ne ba nyandisezwa: ‘Mu sinya fela nako ya mina ku nyandisa batu ba. Ha ba na ku tuhela. Mane kona ba ka zwelapili.’

11. Mulimu u talelelize cwañi sepiso ya hae ye ñozwi kwa Zakaria 12:4?

¹¹ Mu bale Zakaria 12:4. Jehova u sepisa kuli ka swanisezo u ka nata ka bubofu ni ku “nata” ba ba lwanisa batu ba hae ba ba shaela lushango lwa Mubuso ka bundume. Mi u sweli wa taleleza sepiso ya hae. Ka mutala, mwa naha ye ñwi mo ne ku kwalezwi bulapeli bwa niti, balwanisi ne ba si ka palelwisa batu ba Mulimu ku amuhela lihatiso za Bibele. Mane mwa mutende o muñwi ne ku ñozwi kuli Lipaki za Jehova ne ba kenya lihatiso za Bibele mwa naha ka moya! Sepiso ye, ya n’a file Mulimu kwa batanga ba hae ba ba sepahala ne i talelelizwe, ye li: “Ni ka tonela ba ndu ya Juda; kono lipizi kaufela za macaba ni ka li nata ka  bubofu.” Kabakala bubofu bwa bunyemi, lila za Mubuso ha ba zibi za ku eza. Kono lu na ni sepo ya kuli Jehova u ka sileleza batu ba hae ka sikwata ni ku ba babalela hande.—2 Malena 6:15-19.

12. (a) Jesu n’a tilo kalisa cwañi mulilo fa lifasi? (b) Bomasiyaleti ba ba tozizwe ba tumbuzi cwañi mulilo wa swanisezo, mi ki lifi ze zwile mwateñi?

¹² Mu bale Zakaria 12:5, 6. “Mandun’a Juda” ba ba bulezwi mwa liñolo le ba yemela batu ba ba filwe buikalabelo bwa ku okamela batu ba Mulimu. Jehova u fa batu ba hae tukufalelo ha ba nze ba shaela za Mubuso mwa lifasi. Muta o muñwi Jesu n’a taluselize balutiwa ba hae kuli: “Ni tile ku t’o nepela mulilo fafasi.” (Luka 12:49) Kaniti luli Jesu n’a tilo tumbula mulilo. Jesu n’a koñomekanga hahulu taba ya Mubuso ha n’a kutazanga kwa batu ka tukufalelo. Lushango lwa hae ne lu tumbuzi mulilo mwahal’a Majuda. (Mateu 4:17, 25; 10:5-7, 17-20) Ka ku swana, “sina mulilo wa fa liiso le li beilwe mwahali ki likota, ni sina lumonyi lwa mulilo lo lu inzi mwahal’a mañata a buloto,” balateleli ba Kreste mwa miteñi ye ni bona ba tumbula mulilo wa swanisezo. Buka ye ne hatisizwe ka 1917 ya The Finished Mystery * ne i yanehile buipi bwa Krestendomu. Mi ba bahulu ba bulapeli ne ba nyemisizwe ki buka yeo. Mi mwa lilimo za cwanoñu fa, Taba ya Mubuso No. 37, ye na ni  toho ya taba ye li, “Mafelelezo a Bulapeli bwa Buhata a Fakaufi!” i susuelize batu kuli ba iketele ku yemela Mubuso wa Mulimu kamba ku sa u yemela.

“Litende za Juda” Li Ka Piliswa

13. Pulelo ya “litende za Juda” i bonisañi, mi ki kabakalañi Jehova ha pilisa ba ba mwa litende zeo?

¹³ Mu bale Zakaria 12:7, 8. Mwa Isilaele wa ikale, ne ku fumanehanga litende ze ñata, mi fokuñwi ne li itusiswanga ki balisana ni balimi. Ba ne ba pila mwa litende ki bona ba ne ba banga ba pili ku ziyeleha lila ha ne li tasezanga muleneñi wa Jerusalema. Pulelo ya “litende za Juda” i bonisa kuli bomasiyaleti ba ba tozizwe ba mwa miteñi ye ba mwa sibaka se si si ka silelezwa ka swanisezo. Teñi m’o ba yemela Mubuso wa Mesiya ka bundume. Jehova wa limpi u ka pilisa “litende za Juda pili” kakuli batu bao sihulu kona ba lela ku lwanisa Satani.

14. Jehova u sileleza cwañi batu ba ba mwa “litende za Juda,” mi u ba sileleza cwañi kuli ba si ke ba fokola?

¹⁴ Litaba ze ezahezi li bonisa kuli Jehova wa sileleza lindumeleti za Mubuso ba ba tozizwe ba, mwa “litende” za bona. * Wa ba sileleza kuli ba si ke ba “fokola” ka ku ba fa m’ata ni bundume sina Davida, mulena ya n’a li ndwalume.

15. Ki kabakalañi Jehova ha lela “ku bulaelela macaba kaufela,” mi ki lili fa ka ezeza cwalo?

¹⁵ Mu bale Zakaria 12:9. Ki kabakalañi Jehova ha lela “ku bulaelela macaba kaufela”? Kabakala kuli ba tundamena ku lwanisa Mubuso wa Mesiya. Bakeñisa kuli ba nyandisa batu ba Mulimu, ba ka atulwa. Cwanoñu fa batu ba itusisa Satani fa lifasi ba ka lwanisa balapeli ba Mulimu ba niti, mi twaniso yeo i ka libisa kwa nako ye i biza Bibele kuli ki Harmagedoni. (Sinulo 16:13-16) Mi Muatuli Yo Mutuna u ka yemela batanga ba hae ni ku kenisa libizo la hae mwahal’a macaba.—Ezekiele 38:14-18, 22, 23.

16, 17. (a) “Sanda sa batanga ba [Muñ’a] Bupilo” kiñi? (b) Lu bonisañi ha lu tundamena niha lu lwaniswa ki Satani?

¹⁶ Ha ku na silwaniso sa Satani se si kona ku fokolisa tumelo kamba tukufalelo ya batu ba Mulimu mwa lifasi kaufela. Kozo ye lu ikola, ye tiswa ki ku ziba kuli Jehova wa lu tusa ka m’ata a hae a’ pilisa, ki “sanda sa batanga ba [Muñ’a] Bupilo.” (Isaya 54:17) Ha ku na mutu ya kona ku lu yawisa kozo ni lika ze nde ze lu ikola kwa moya. (Samu 118:6) Satani u ka zwelapili ku susueza batu kuli ba lu lwanise ni ku lu nyandisa. Ha lu tundamena ka busepahali niha lu sheununwa, lu bonisa kuli lu na ni moya wa Mulimu. (1 Pitrosi 4:14) Taba ye nde ya Mubuso wa Jehova o se u tomilwe i sweli ya kutazwa mwa lifasi kaufela. Batu ba Mulimu ba nepilwe lilwaniso ze ñata ze swana sina “macwe a kafwililo.” Kono ka m’ata a Jehova, batanga ba hae ba pima macwe a cwalo, ni ku a hatikela. (Zakaria 9:15) Bomasiyaleti ba ba tozizwe ni balikani ba bona ba ba sepahala ha ba na ku tuheliswa ki lika ze cwalo!

¹⁷ Lu talimezi kwapili kwa nako ye lu ka piliswa ku ya ku ile kwa litasezo za Diabulosi. Lwa tiiswa luli ka ku ziba kuli ‘ha ku na silwaniso se si ezezwa luna se si ka konda; mi wa lilimi kaufela le li ka lu zekisa, lu ka mu beya mulatu’!

[Litaluso za kwatasi]

Ne Mu Ka Alaba Cwañi?

• Lilwaniso za Diabulosi li bonahezi cwañi kuli ha li kondi?

• Jerusalema wa lihalimu u bile cwañi “licwe le li bukiti”?

• Jehova u pilisa cwañi “litende za Juda”?

• Mu na ni buikolwiso mañi ha lu nze lu atumela Armagedoni?

[Lipuzo za Tuto]

[Maswaniso a fa likepe 21]

Batu ba Jehova kwa Albania ne ba zwezipili ku sepahala ni ko ne ba lwanisizwe ki Satani

[Siswaniso se si fa likepe 23]

Jesu n’a hanyelize litamilikezo za buhata

[Maswaniso a fa likepe 24]

Ha ku na silwaniso se si ezezwa batu ba ba shaela taba ye nde se si ka konda