Kana Mu Na Ni Mutu Ya Mi Tusa ku Sebeleza Mulimu?

OZIASI na bile mulena wa mubuso wa Juda wa kwa mboela inge a sa li fela mutangana wa lilimo ze 16. Na busize ka lilimo ze fitelela 50, ku zwa ka 829 ku i sa 778 B.C.E. Ku zwa kwa bwanana bwa hae, Oziasi na “eza ze lukile mwa meto a [Muñ’a] Bupilo.” Ki sikamañi se ne si mu tusize ku eza cwalo? Litaba ze ñozwi za kale li li: “[Oziasi] a bata [Muñ’a] Bupilo mwa mazazi kaufela a Zakaria, munna ya n’a na ni kutwisiso mwa ku bona za Mulimu; mi mazazi ao a’ batile [Muñ’a] Bupilo ka ona, Mulimu a mu fa mbuyoti.”—2 Makolonika 26:1, 4, 5.

Mwa Bibele, ha ku na hahulu ze ñata ze bulezwi ka za Zakaria ya na li muelezi wa mulena kwand’a yona taba ye. Kono ka ku ba “munna ya n’a na ni kutwisiso mwa ku bona za Mulimu,” Zakaria na tusize hahulu mulena wa mwanana yo ku eza ze lukile. Bibele ye ñwi (The Expositor’s Bible) i talusa kuli, Zakaria u swanela ku ba munna ya na ziba hande Mañolo, ya na na ni yeloseli ya kwa moya, ili ya na kona ku luta ba bañwi hande.” Muituti yo muñwi wa litaba za Bibele, na ñozi cwana ka za Zakaria, kuli: “Na li munna ya lukile ya na tabela hahulu za bulapeli, ili ya na ziba hande bupolofita, mi . . . ku bonahala kuli na susuelize hahulu Oziasi.”

Oziasi na fuyauzwi hahulu bakeñisa kuli na pilile ka busepahali, mi na “fetuhile ya na ni mata hahulu” kakuli ‘Mulimu na mu tusa.’ Na kondisize ku za na ezize kaufela, mi hasamulaho na kondisize ni kwa moya “mwa mazazi kaufela a Zakaria.” (2 Makolonika 26:6-8) A mano kondisa, Oziasi a keluha tuto ya na lutilwe ki Zakaria muelezi wa hae. “Pilu ya hae ya ikuhumusa, mane a eza sibi, a foseza [Muñ’a] Bupilo.” Kabakala mafosisa a hae, Oziasi na otilwe ka butuku bo bu maswe-maswe, ili bo ne bu mu palelwisize ku peta hande musebezi wa hae sina mulena.—2 Makolonika 26:16-21.

Kana mu na ni mutu ya li sina muluti kamba muelezi wa mina, ili ya mi susueza ku “bata [Muñ’a] Bupilo”? Mwa kona ku ba ni Mukreste ya cwalo ku si na taba kuli mu sa li banana kamba se mu hulile, mu banna kamba basali. Mu itebuhe yena, kakuli likelezo za hae za kona ku mi tusa ku zwelapili ku eza ze lukile mwa meto a Jehova. Mu utwe za mi bulelela Mukreste ya hulile kwa moya yo mi mu teeleze kwa kelezo ya hae. Haike mu si ke mwa keshebisa manzwi a’ butali a ‘munna yo ya na ni kutwisiso mwa ku bona za Mulimu.’—Liproverbia 1:5; 12:15; 19:20.