“Mpo ya Mina Ya Butokwa Hahulu”

MANZWI ao n’a bulezwi ki nduna ya n’a banga mubusi wa naha ya Belgium ha n’a talusa buka ya Mutu Yo Mutuna ka ku Fitisisa ya Kile a Pila fa Lifasi-Mubu. * N’a filwe buka yeo ki munna yo muñwi ya n’a pila mabapa ni yena ha n’a tilo mu potela. Hamulaho nduna yo n’a ñozi liñolo la buitumelo, ili mwa n’a talusize kuli: “Ne ni tabile luli ha ne mu ni potezi, mi ne ni tabisizwe hahulu ki mpo ya mina ya butokwa hahulu: ona buka ye bulela za ‘Mutu Yo Mutuna ka ku Fitisisa.’”

Nduna yo na balile buka yeo ka tokomelo, mi hasamulaho n’a ñozi kuli: “Kabe kikuli batu kaufela ba tabela lushango lo lu mwa libuka za Evangeli ni ku mamela litaelo za Jesu Kreste, lifasi ne li kabe li cincize. Ne lu si ke lwa tokwa katengo ka Kopano ya Bamacaba ka ka talima za buiketo (Security Council); mi ne ku si ke kwa ba ni bukwenuheli ni mifilifili mwa lifasi.” Nihaike n’a lemuhile kuli taba yeo ha i koni ku ezahala cwale, n’a itebuhile hahulu munna yo ya n’a pila mabapa ni yena ya n’a til’o mu potela.

Nduna y’o n’a zwezipili ku ñola kuli: “Mu swalisana ni batu ba bande, ba ba lumela kuli batu ba ka cinca, ni kuli lika li ka ba hande kwapili.”

Lipaki za Jehova ba lumela kuli ki Mulimu fela, isi batu, ya ka tisa lifasi le linde. Ba lika ka t’ata ku likanyisa mutu yo mutuna ka ku fitisisa, yena Jesu Kreste. Kana se mu potezwi ki Lipaki za Jehova sa cwanoñu fa? Lu sepa kuli mu ka tabela ku ambola ni bona ka za mutu yo mutuna ka ku fitisisa ya kile a pila fa lifasi-mubu. Mi ni bona ba ka tabela ku mi fa buka ye, ye ne tabisize hahulu nduna ya n’a busanga naha ya Belgium.

[Litaluso za kwatasi]