Linzwi la Jehova Ki Le Li Pila

Ze Zwile Mubano mwa Buka ya Malaki

SE KU fitile lilimo ze fitelela 70 ku zwa fo i yahelwa sinca tempele mwa Jerusalema. Kono hamulaho wa nako, Majuda ba kalisa ku fokola hahulu mwa bulapeli bwa bona. Mane nihaiba bona baprisita ha ba sa sepahala. Ki mañi ya ka ba tusa ni ku lika ku ba kutiseza ku Mulimu? Jehova u fa musebezi wo ku mupolofita Malaki.

Malaki ki yena ya n’a ñozi buka ye ya mafelelezo mwa Mañolo a Siheberu, mi mwateñi ku fumaneha bupolofita bo bu nyangumuna bwa n’a ñozi ka ketelelo ya moya wa Mulimu. Haiba lu tokomela linzwi la bupolofita le li mwa Malaki, lu ka itukiseza “lizazi le lituna le li sabisa la [Muñ’a] Bupilo,” le li ka to timeza lifasi le li maswe le.—Malaki 4:5.

BAPRISITA BA “SITATALISIZE BA BAÑATA”

(Malaki 1:1–2:17)

Jehova u talusa mwa ikutwela ka za Isilaele ka ku bulela kuli: “Ni mi latile.” Kono baprisita ba shwauzi libizo la Mulimu. Kamukwaufi? Ka ku tahisa “sico se si masila fa aletare ya [hae]” ni ka ku fa “nto ye toza, ye kula” sina sitabelo.—Malaki 1:2, 6-8.

Baprisita ba “sitatalisize ba bañata ka mulao.” Batu ba eza ka “bupumi mutu ni mutu ni mwanahabo.” Ba bañwi ba inyalezi basali besi Majuda. Mi ba bañwi bona ba ezize ka bupumi ‘basali ba bunca bwa bona.’—Malaki 2:8, 10, 11, 14-16.

Lipuzo Za mwa Mañolo Za Alabiwa:

2:2—Jehova n’a ‘kutile’ cwañi “mbuyoti” ya n’a file baprisita ba baipanguli? Mulimu n’a kutile mbuyoti ya baprisita ba ba cwalo ka ku fetula limbuyoti ze ne ba fuyola ku li bisa sikuto.

2:3—Ku ‘nepela buloko’ mwa lipata za baprisita ne ku talusañi? Ka ku ya ka Mulao wa Mushe, buloko bwa folofolo ye ne fiwa sina sitabelo ne bu swanela ku nepelwanga kwand’a mafulo ni ku yo cisezwa kwateñi. (Livitike 16:27) Ku nepela buloko fa lipata za baprisita ne ku talusa kuli Jehova n’a hanile matabelo, mi batu ba ne ba fa matabelo a cwalo ne ba nyenyisa ku yena.

2:13—Aletare ya Jehova ne i kwahelwa ka mioko ya bomañi? Aletare ne i kwahelwa ka mioko ya basali ba ba nyezwi ba ne ba taha kwa sibaka se si kenile mwa tempele ni ku to itilelela ku Jehova ka tapelo. Ki kabakalañi batu bao ha ne ba lila cwalo? Bakeñisa kuli ne ba lelekilwe ki banna ba bona ba Majuda ku si na mabaka a utwahala mi ne ba ba siile,  mwendi ka ku bata ku nyala likalibe besi Majuda.

Ze Lu Ituta:

1:10. Jehova n’a hanile matabelo a baprisita ba ba mukwañuli, ba ne ba lifisanga batu fa lika ze nyinyani hahulu ze cwale ka ku kwala minyako ni ku tumbula mililo ya kwa aletare. Misebezi ye lu peta ha lu nze lu sebeleza Mulimu, mane cwalo ni ze lu peta mwa bukombwa, li swanela ku ezwa kabakala kuli lu lata Mulimu ni batu, isi ka mulelo wa ku bata mali!—Mateu 22:37-39; 2 Makorinte 11:7.

1:14; 2:17. Jehova u toile moya wa buipi.

2:7-9. Batu ba ba filwe buikalabelo bwa ku luta mwa puteho ba lukela ku bona teñi kuli ze ba luta za lumelelana ni Linzwi la Mulimu, ona Mañolo a Kenile, ni ze ñozwi mwa lihatiso ze tomile fa Bibele za “sikombwa se si sepahala.”—Luka 12:42; Jakobo 3:11.

2:10, 11. Jehova u tokwa kuli balapeli ba hae ba mamele kelezo ya ku nyala kamba ku nyalwa ‘fela ku Mulena.’—1 Makorinte 7:39.

2:15, 16. Balapeli ba niti ba swanela ku kuteka tamo ya linyalo ye ba tamani ni musali wa bunca bwa bona.

‘MULENA U KA KENA MWA TEMPELE YA HAE’

(Malaki 3:1–4:6)

“Kapili-pili Mulena [Jehova Mulimu] ye mu bata u ka kena mwa Tempele ya hae” ni “Lingeloi la bulikani [Jesu Kreste].” Mulimu u ‘ka sutelela kwa batu ba hae ka ku atula’ ni ku akufela ku ba paki ye lwanisa batu kaufela ba ba eza likezo ze maswe. Mi hape “buka ya kupuzo” i ka ñolelwa ba ba saba Jehova.—Malaki 3:1, 3, 5, 16.

Lizazi “le li cisa sina mulilo” li ka to fenya ba ba maswe. Kono pili lizazi leo li si ka taha kale, mupolofita u ka lumiwa ku “kutiseza lipilu za bashemi kwa bana ba bona, ni lipilu za bana ku bondat’a bona.”—Malaki 4:1, 5, 6.

Lipuzo Za mwa Mañolo Za Alabiwa:

3:1-3—“Mulena” wa niti ni “Lingeloi la bulikani” ne ba tile lili kwa tempele, mi ki mañi ya n’a lumilwe ku ba lukiseza nzila? Jehova n’a tile kwa tempele ya hae ka ku itusisa muyemeli wa hae mi n’a i kenisize la  Nisani 10, 33 C.E. Ka lizazi leo, Jesu n’a keni mwa tempele ni ku to leleka ba ne ba leka ni ku fundota lika. (Mareka 11:15) Taba yeo ne i ezahezi lilimo ze talu ni licika ku zwa fa tozezwa Jesu. Mi hape ku bonahala kuli lilimo ze talu ni licika ku zwa fa bela Mulena mwa lihalimu, Jesu n’a tile ni Jehova kwa tempele ya kwa moya mi ba fumana kuli batu ba Mulimu ne ba tokwa ku keniswa. Mwa miteñi ya baapositola, Joani Mukolobezi n’a lumilwe kwa Majuda kuli a ba zibise za ku taha kwa Jesu Kreste. Mwa miteñi ya luna, ne ku lumilwe numwana kuli i zibise ku taha kwa Jehova mwa tempele ya hae ya kwa moya. Kwa makalelo a lilimo za ma-1880, sikwata sa baituti ba Bibele ne si kalisize ku peta musebezi wa ku luta batu Bibele, ili ku tusa batu ba ba tabela niti kuli ba zibe lituto za Bibele za matatekelo.

3:10—Kana ku tisa nto i liñwi ku ‘ze lishumi za ze luwilwe kaufela’ ku talusa kuli lu swanela ku fana bupilo bwa luna kaufela ku Jehova? Mulao wa Mushe ne u felisizwe ka lifu la Jesu, kacwalo kacenu ha lu tokwi ku tisa nto ya bulishumi kuli lu lapele Mulimu. Niteñi, ku tisa nto ya bulishumi ku na ni taluso ya swanisezo. (Maefese 2:15) Ha ku talusi kuli lu swanela ku fana bupilo bwa luna kaufela ku Jehova. Miteñi yani batu ne ba tisanga nto ya bulishumi silimo ni silimo, kono luna lu fana bupilo bwa luna ku Jehova hañwi, muta lu ineela ku yena ni ku bonisa buinelo bwa luna ka ku kolobezwa mwa mezi. Ku zwa nako ye lu kolobezwa, lika kaufela ze lu na ni zona se li za Jehova. Kono u lu lumeleza ku itusisa kalulo ye ñwi ya bupilo bwa luna, ye swanisezwa kwa nto ya bulishumi, kwa ku mu sebeleza. U bata kuli lu mu sebeleze ku ya ka miinelo ya luna ni ka mo lu konela kaufela. Lika ze lu tisa ku Jehova li kopanyeleza nako, m’ata, ni maluwo a luna mwa musebezi wa ku kutaza Mubuso ni ku luta batu. Mi lika ze ñwi ze lu tisa ki ze cwale ka ku fumaneha kwa mikopano ya Sikreste, ku potela Bakreste ba ba kula ni basupali, mane ni ku fa linubu ze tusa ku zwisezapili bulapeli bwa niti.

4:3—Balapeli ba Jehova ba ka “hatikela ba ba maswe” kamukwaufi? Fo ha ku talusi kuli batu ba Mulimu fa lifasi ba ka “hatikela ba ba maswe” luli, ili ku abana mwa musebezi wa ku fitisa katulo ya Mulimu ku bona. Kono se si taluswa fo kikuli batanga ba Jehova fa lifasi ni bona ba ka nyakalala ka moya kaufela muta lifasi la Satani li yundisiwa.—Samu 145:20; Sinulo 20:1-3.

4:4—Ki kabakalañi ha lu swanela ku ‘hupula Mulao wa Mushe?’ Bakreste ha ba tokwiwi ku mamela Mulao wa Mushe, kono Mulao wo ne li “muluti fela wa ze ne ka taha.” (Maheberu 10:1) Kacwalo ku hupula Mulao wa Mushe ku kona ku lu tusa ku lemuha mo bu talelelezwa bupolofita bo ne bu ñozwi mwa Mulao wo. (Luka 24:44, 45) Mi hape mwa Mulao ku fumaneha “lika ze likanyisa za kwa lihalimu.” Lu tokwa ku ituta ona kuli lu utwisise lituto ni mupilelo o swanela Bakreste.—Maheberu 9:23.

4:5, 6—“Mupolofita Elia” u yemela mañi? Ne ku polofitilwe kuli “Elia” n’a ka to tusa batu kuli ba kutiseze lipilu za bona ku Mulimu. Mwa miteñi ya baapositola, Jesu Kreste n’a zibahalize Joani Mukolobezi kuli ki yena ya n’a yemela “Elia.” (Mateu 11:12-14; Mareka 9:11-13) Sikwata se si swaniseza Elia kacenu si lumilwe pili “lizazi le lituna le li sabisa la [Muñ’a] Bupilo li si ka taha kale.” Kacwalo Elia kacenu u yemela “mutanga ya sepahala,  ya na ni kutwisiso.” (Mateu 24:45) Sitopa se sa Bakreste ba ba tozizwe si zwezipili ku eza musebezi wa ku tusa batu kuli ba be ni silikani se sinde ni Mulimu.

Ze Lu Ituta:

3:10. Haiba lu palelwa ku fa Jehova ze lu kona kaufela, u zibe ha lu na ku ba ni limbuyoti za hae.

3:14, 15. Bakeñisa kuli baprisita ne ba sa tomeli batu mutala o munde, Majuda ba kala ku keshebisa sebelezo ya bona ku Mulimu. Bakreste ba ba na ni buikalabelo mwa puteho ya Sikreste ba swanela ku tomela ba bañwi mutala o munde.—1 Pitrosi 5:1-3.

3:16. Jehova u buluka mabizo a batu ba ba mu saba ni ba ba sepahala ku yena. Wa ba hupula mi u ka ba pilisa ha ka yundisa lifasi le li maswe la Satani. Kacwalo lu si ke lwa tuhela ku sepahala ku Mulimu.—Jobo 27:5.

4:1. Fa lizazi la Jehova le li taha, “mutai” ni “mubisi” li ka fiwa katulo ye swana—banana ba banyinyani ba ka fiwa katulo ka ku swana ni bashemi ba bona. Kacwalo bashemi ba na ni buikalabelo bo butuna bwa ku luta bana ba bona! Bakreste ba ba na ni bana ba lukela ku sebeza ka t’ata kuli ba tabise Mulimu ni ku zwelapili ku ba ni libizo le linde ku yena.—1 Makorinte 7:14.

“Saba Mulimu” Wa Niti

Ki bomañi ba ba ka piliswa fa “lizazi le lituna le li sabisa la [Muñ’a] Bupilo”? (Malaki 4:5) Jehova u li: “Haili mina, ba ba saba Libizo la ka, mu ka pazulelwa ki lizazi la Ku Luka, le li folisa ka liseli la lona. Mu ka zwa, mane mu takise, sina manamani h’a zwa mwa sakana.”—Malaki 4:2.

Jesu Kreste, yena “lizazi la Ku Luka,” u pazulela batu ba ba saba libizo la Mulimu, mi Jehova wa ba shemuba. (Joani 8:12) Mi hape ba ‘foliswa ka liseli la lizazi,’ ili ku foliswa kwa moya cwale, mi ba ka foliselelezwa kwa mubili ni mwa munahano mwa lifasi le linca la Mulimu. (Sinulo 22:1, 2) Ba nyakalala mi ba tabile “sina manamani h’a zwa mwa sakana.” Ha lu nze lu libelezi limboyoti zeo, haike lu mamele manzwi a Mulena Salumoni a li: “Saba Mulimu [wa niti], mi u mamele milao ya hae. Kakuli ki yona swanelo kaufela ya mutu.”—Muekelesia 12:13.

[Siswaniso se si fa likepe 26]

Mupolofita Malaki n’a sebeleza Mulimu ka tukufalelo

[Siswaniso se si fa likepe 29]

Litaba ze lu luta li swanela ku ba ze lumelelana ni ze mwa Bibele

[Siswaniso se si fa likepe 29]

Batanga ba Jehova ba kuteka tamo ya bona ya linyalo